ශිෂ්‍යත්ව ප්‍රශ්න පත්‍ර ගැටලුව සම්බන්ධයෙන් සතියක් ඇතුළත වාර්තාවක් ලබාදෙන ලෙස ශ්‍රී ලංකා මානව හිමිකම් කොමිසම විභාග දෙපාර්තමේන්තුවට දැනුම් දී ඇත.
ශිෂ්‍යත්ව විභාගයේ පළමු ප්‍රශ්න පත්‍රය විභාගයට පෙර පිටවීමේ සිද්ධිය සම්බන්ධයෙන් එළඹෙන 04 වැනිදා (සිකුරාදා) වන විට වාර්තාවක් ලබා දෙන ලෙස එලෙස විභාග දෙපාර්තමේන්තුවට මානව හිමිකම් කොමිසම දැනුම් දී තිබේ.
අධ්‍යාපන අමාත්‍යාංශයේ හා විභාග දෙපාර්තමේන්තුවේ නිලධාරීන් ඉකුත් මස 26 වැනිදා කොමිසමට කැඳවූ අවස්ථාවේදී මේ බව දන්වා ඇත.
මානව හිමිකම් කොමිසම පවසා සිටියේ ප්‍රශ්න පත්‍රය පිටවිම හේතුවෙන් දරුවන්ගේ මානව හිමිකම් කඩවීම මෙන්ම විභාගය යළි පැවැත්විම හේතුවෙන් ඔවුන්ට සිදුවන මානසික බලපෑම යන කාරණා සම්බන්ධයෙන් මෙහිදී සාකච්ඡා කළ බවයි.
මේ වනවිට අදාළ සිදුවීම සම්බන්ධයෙන් අගතියට පත් දරුන්ගේ මව්පියන් විසින් පැමිණිලි රැසක් මානව හිමිකම් කොමිසමට යොමු කර ඇත.
අදාළ සිද්ධිය සම්බන්ධයෙන් විෂය භාර අමාත්‍ය අග්‍රාමාත්‍ය හරිනි අමරසූරිය අධ්‍යාපන බලධාරීන්ට උපදෙස් දෙමින් අවධාරණය කර සිටියේ ප්‍රශ්න පත්‍ර ගැටලුව සම්බන්ධයෙන් වහාම ස්වාධීන පරීක්ෂණයක් සිදු කර වාර්තාවක් ලබා දෙන ලෙසයි.
