පසුගිය 15 වැනි දින පැවැත්වූ ශිෂ්‍යත්ව විභාගයේ ප්‍රශ්න පත්‍ර පිටවී ඇති බවට වූ චෝදනා මත සිදුකරමින් යන මූලික විමර්ශන වාර්තාවේ හා අපරාධ පරීක්ෂණ දෙපාර්තමේන්තු වාර්තාවේ ප්‍රතිඵල ලැබීමෙන් පසු විභාගයේ ප්‍රශ්න පත්‍රය පිටවී ඇත්නම් විභාගය නැවත පැවැත්වීමට කටයුතු කරන බව අධ්‍යාපන අමාත්‍යාංශයේ ලේකම් තිලකා ජයසුන්දර පවසයි.
අධ්‍යාපන ඇමැති සුසිල් ප්‍රේමජයන්තගේ මඟපෙන්වීම යටතේ අධ්‍යාපන අමාත්‍යාංශය හා විභාග දෙපාර්තමේන්තුව එක්ව සාකච්ඡා කර පැවැත්වූ මූලික පරීක්ෂණ වාර්තාව පිළිබඳව සොයාබලා කටයුතු කිරීමට අපරාධ පරීක්ෂණ දෙපාර්තමේන්තුවට භාර දී ඇත.
මේ වන විට අපරාධ පරීක්ෂණ දෙපාර්තමේන්තුව විසින් පරීක්ෂණ කඩිනමින් සිදුකරගෙන යයි. පරීක්ෂණ ප්‍රතිඵල ලැබී අවසන් වන තෙක් විභාග පිළිතුරු පත්‍ර සමීක්ෂණ කටයුතු අත් හිටුවා ඇති අතර, දූ දරුවන්ට අසාධාරණයක් සිදු කරන්නට යම් පාර්ශ්වයක් මැදිහත් වී ඇත්නම් ඊට දැඩි ක්‍රියාමාර්ග ගැනීමට කටයුතු කරන බවද ලේකම්වරිය වැඩිදුරටත් පැවැසීය. එසේම විභාග දෙපාර්තමේන්තුව විසින් උපකාරක පංති තහනමක් පැවැත්වුවද මේ හරහා පෙනී යන්නේ ඊට පටහැනිව නීති විරෝධී ක්‍රියාකර ඇති බවත් ඒ සම්බන්ධයෙන්ද නිත්‍යනුකූල පියවර ගැනීමට සූදානම් වන බවත්ය.
