ආර්ථිකය වර්ධනයේදී විදේශ සංචිත වැඩිවෙමින් පවත්නා නිසා වාහන ආනයන සීමා කිරීම් ක්‍රමයෙන් අඩු කොට 2025 වසරේ පෙබරවාරි මාසය වන විට සියලු මෝටර් වාහන නිදහසේ ආනයනය කිරීමට ඉඩ ප්‍රස්ථා පුළුල් කිරීමට අවකාශ ලබා දීමට කැබිනට් මණ්ඩලය තීරණය කර ඇතැයි කැබිනට් ප්‍රකාශක ආචාර්ය බන්දුල ගුණවර්ධන සිළුමිණට කීය.
2021 වසරේ සිට ඇති වූ විදේශ විනිමය අර්බුදය හා ආර්ථික අර්බුදය නිසා වාහන ආනයනය මුළුමණින්ම නතර වී තිබූ අතර ආර්ථිකය යහපත් වීමත් සමඟ පසුගිය වර්ෂයේදී සංචාරක ව්‍යාපාරය සඳහා මෝටර් වාහන 1000ක් ආනයනයට අවසර ලබා දුන් බවද ආචාර්ය ගුණවර්ධන කීය. මේ වන විට ආර්ථික වර්ධන වේගය ඉහළ යාමත් විදේශ සංචිත ඉහළ යාමත් කරනකොට ගෙන 2025 වසරේ සිට මෝටර් වාහන ආනයනයට පනවා තිබූ තහංචි ඉවත් කර ආනයනය ලිහිල් කිරීමට මුදල් විෂය භාර ඇමැතිවරයා වශයෙන් ජනාධිපතිවරයා ඉදිරිපත් කළ යෝජනාවට කැබිනට් අනුමැතිය හිමිව ඇත.
ඒ අනුව 2024 ඔක්තෝම්බර් 1වැනිදා සිට අදියර තුනක් යටතේ මෙම තහනම ඉවත් කිරීම සිදු කෙරේ.
පළමු අදියර යටතේ පොදු මගී ප්‍රවාහන වාහනද දෙවන අදියර යටතේ දෙසැම්බර් මාසයේ සිට වාණිජමය හෝ භාණ්ඩ ප්‍රවාහන කටයුතු වෙනුවෙන් භාවිතා කරන වාහන සඳහාද තුන්වන අදියර යටතේ 2025 පෙබරවාරි 1 වැනිදා සිට පෞද්ගලිකව භාවිත කෙරෙන මෝටර් රථ ඇතුළු වාහන සඳහාද අවසර දෙනු ලැබේ.
