ඉන්දියානු ව්‍යාප්තවාදයට එරෙහිව දැඩි ප්‍රතිපත්තියක් අනුගමනය කළ අනුර කුමාර දිසානායක ප්‍රමුඛ ජාතික ජන බලවේගය මේ වන විට ඉන්දියානු ධන කුවේරයන් ඉදිරිපිට දණ නමා ඇති බවට පෙරටුගාමී සමාජවාදී පක්ෂයේ ප්‍රධාන ලේකම් කුමාර් ගුණරත්නම් මහතා පැවසීය. පසුගිය සිකුරාදා කොළඹදී පැවති මාධ්‍ය හමුවකදී ඔහු මේ බව සඳහන් කළේය.
‘‘1987 දී ගෙන ආ පළාත් සභා සම්බන්ධයෙන් අනුර කුමාර සහ ටිල්විල් සිල්වා මුනිවත රැකීම ගැන තේරුම් ගැනීමට අමාරුයි. අවුරුදු 76ක් පැවති දේශපාලන ක්‍රමවේදයටම දැන් තල්ලුවෙමින් එනවා. 88 – 89 කාලය ගැන පිළිතුරු නොදීම තුළ ඇත්තේ ඔවුන්ගේ දේශපාලන පිල් මාරුවයි.
ඔවුන් ව්‍යාපාරික සමුළුව පවත්වා ආර්ථික වැඩපිළිවෙළ ඉදිරිපත් කළේ රටේ සිටි ධන කුවේරයන්ටයි. මොවුන් සමාජවාදය අත්හැරලා ගොඩක් කල් මොවුන් ප්‍රාග්ධනය සමග යහන්ගත වීමේ ක්‍රමයක් තිබෙන්නේ.
බදු වංචා කළ, බැංකුවලට ට්‍රිලියන දෙකකට අධික පොලු තිබෙන සුවිශේෂී ධන කුවේරයින් සමග සම්බන්ධ වෙලා අද වෙන කොට ඉන්දියානු ප්‍රාග්ධනයට අත තබමින් ‘සිස්ටම්‘ එක රකින්න කටයුතු කරනවා.
අනුර කුමාර උතුරට ගිහින් 13 සංශෝධනය සම්පූර්ණයෙන් ක්‍රියාත්මක කරන බව පැවසූ බව සුමන්තිරන් මහතා කිව්වා. ප්‍රතිපත්ති ප්‍රකාශනයේ තිබෙන්නේ 13 සංශෝධනයක් ක්‍රියාත්මක කරන්නේ නැති බවත් පළාත් සභා තිබෙන විදියට ගෙන යනවා කියලා උතුරට එකයි දකුණට එකයි කියනවා.‘‘
