දේශීය සහ විදේශීය ණය ප්‍රතිව්‍යුහගත කිරීමේ වැඩසටහනින් පසු මේ මාසයේ දී ශ්‍රී ලංකාව වෙත ඩොලර් මිලියන 780 ක මුදලක් ලැබීමට නියමිතය.
දේශීය සහ විදේශීය ණය ප්‍රතිව්‍යුහගත කිරීමේ වැඩසටහනට මේ වන විට ණය හිමියන්ගේ එකඟතාවය පළ කර ඇතැයි ඉකුත්දා නිවේදනය කෙරිණි.
මේ වන විට විදෙස් ණය හිමියන් මෙන්ම පෞද්ගලික ණය හිමියන්ද ලංකාවට ණය සහන කාලයක් ලබා දීමට එකඟ වී ඇති අතර ණය සහ පොලිය ගෙවීමේ කාලය දිගු කිරීමටත් ණය පොලිය යම් පමණකින් කපා දැමීමටත් තීන්දු කර ඇතැයි මුදල් අමාත්‍යාංශයේ ජ්‍යෙෂ්ඨ ප්‍රකාශකයෙක් පැවසීය.
ඒ අනුව ජාත්‍යන්තර මූල්‍ය අරමුදල ලංකාවට පිරිනමන දෙවෙනි වාරිකය වන ඩොලර් මිලියන 330 ක මුදල ලබන සති දෙක ඇතුළත නිදහස් කිරීමට නියමිතය. ඒ සමඟ ඇති කරගෙන තිබෙන එකඟතා මත ලෝක බැංකුවෙන් ඩොලර් මිලියන 250ක් නිදහස් කිරීමට නියමිතව පවතී. ආසියානු සංවර්ධන බැංකුවෙන් ඩොලර් මිලියන දෙසීයක් ලබාදීමටද නියමිතය.
ඒ අනුව ලබන දෙසැම්බර් මාසය ඇතුළත ඩොලර් මිලියන 780ක් හෙවත් රුපියල් බිලියන 257ක් ශ්‍රී ලංකාවට ලැබීමට නියමිතව ඇතැයි මුදල් අමාත්‍යාංශය පවසයි.
ජනාධිපති රනිල් වික්‍රමසිංහයන්ගේ උපදෙස් මත කාර්ය මණ්ඩල ප්‍රධානී සාගල රත්නායකගේ සම්බන්ධීකරණයෙන් මේ කටයුතු සිදු කෙරෙයි.
ජාත්‍යන්තර මූල්‍ය අරමුදල, ආසියානු සංවර්ධන බැංකුව, ලෝක බැංකුව සහ දේශීය වශයෙන් මුදල් අමාත්‍යවරුන් වන ශෙහාන් සේමසිංහ සහ රංජිත් සියඹලාපිටිය යන රාජ්‍ය ඇමැතිවරුන්ගේ ද මුදල් අමාත්‍යාංශයේ සහ මහ බැංකු නිලධාරීන් ද අතර අදාළ සම්බන්ධීකරණ කටයුතු මෙහෙයවනු ලබන්නේ සාගල රත්නායක විසිනි.
