දේශගුණය උණුසුම් කරන වායු වාර්තාගත ලෙස ඉහළ මට්ටමකට ළඟා වෙයි. ෆොසිල ඉන්ධන දහනය විසින් මෙහෙයවනු ලබන මෙම ‘ඉහළ යාමේ ප්‍රවණතාවේ නිමක් නොපෙනේ’, යැයි ලෝක කාලගුණ සංවිධානය පවසයි.
2022 වසරේ දී වායුගෝලයේ දේශගුණය උණුසුම් කරන වායුවල බහුලත්වය වාර්තාගත ලෙස ඉහළ ගොස් ඇති බව එක්සත් ජාතීන්ගේ ලෝක කාලගුණ විද්‍යා සංවිධානය (WMO) වාර්තා කරයි. ප්‍රධාන හරිතාගාර වායුව වන කාබන්ඩයොක්සයිඩ් සාන්ද්‍රණය කාර්මික විප්ලවය ආරම්භ වීමට පූර්වයෙන් පැවතියාට වඩා දැන් 50% කින් වැඩි වී ඇත.
නොවැම්බර් 30 වනදා ආරම්භ වන එක්සත් ජාතීන්ගේ Cop28 දේශගුණ සමුළුවට පෙර ප්‍රකාශයට පත් කරන ලද වාර්තාවට අනුව මීතේන් සහ නයිට්‍රස් ඔක්සයිඩ් යන අනෙකුත් ප්‍රධාන හරිතාගාර වායු දෙකෙහි සාන්ද්‍රණය ද ඉහළ ගොස් තිබේ.
විමෝචනය ශුද්ධ ශුන්‍ය (Net Zero) දක්වා අඩුවන තුරු හරිතාගාර වායු මට්ටම් අඛණ්ඩව වැඩි වනු ඇත, එනම් ගෝලීය උණුසුම සහ ආන්තික කාලගුණයේ බලපෑම් ද අඛණ්ඩව වර්ධනය වනු ඇත. කෙසේ වෙතත්, අඟහරුවාදා දිනයේ ප්‍රකාශයට පත් කරන ලද වාර්තාවකට අනුව, පුනර්ජනනීය බලශක්තිය අත්පත් කරගැනීමේ සහ විදුලි මෝටර් රථ භාවිතයේ කිසියම් ප්‍රගතිය තිබියදීත්, විමෝචනය කපා හැරීමට අදාළ සෑම ප්‍රතිපත්තියක්ම පාහේ ඉටුකරලීමට ලොව පුරා සෑම රටක්ම පාහේ අසමත්ව සිටී. උදාහරණයක් ලෙස, ගෝලීය උෂ්ණත්වය ඉහළයාමේ නරකම බලපෑම් වළක්වා ගැනීමට නම් දැන් සිදු වෙමින් පවතිනවාට වඩා හත් ගුණයක වේගයෙන් ගල් අඟුරු භාවිතයෙන් ඉවත් කළ යුතු බව වාර්තාවේ සඳහන් වේ.
