මෙරට බීඩි කර්මාන්තය විධිමත්ව පවත්වාගෙන යාම වෙනුවෙන් නව ප්‍රතිපත්තියක් හඳුන්වා දෙන්නට රජය තීරණය කර ඇති අතර, ඒ අනුව අදාළ ප්‍රතිපත්තිය සැකසීම මුදල් අමාත්‍යාංශය වෙත පවරා ඇත.
ජනපති උපදෙස් අනුව කාර්ය මණ්ඩල ප්‍රධානී සාගල රත්නායක ගේ ප්‍රධානත්වයෙන් ඉකුත් සතියේ සියලු පාර්ශ්ව සමඟ සාකච්ඡාවකදී මෙම තීරණය ගනු ලැබීය. දැනට බීඩි කොළ කිලෝවක් සඳහා අය කරන රුපියල් 5,000 ක සෙස් බද්ද ඉවත් කිරීමට ද එම සාකච්ඡාවේදී යෝජනා වී තිබේ.
බීඩි කොල ආනයනයේදී අය කරන රුපියල් 5,000 ක සෙස් බද්දට අමතරව එක් බීඩියකින් රුපියල් දෙකක මුදලක් ද රජය අය කර ගනු ලබයි.
සුරා බදු දෙපාර්තමේන්තුව මෙම ක්‍රමය හඳුන්වා දී ඇති නමුත් එය නිසි පරිදි ක්‍රියාත්මක නොවන බව ද ඉහත සාකච්ඡාවේදී අනාවරණය වී තිබේ. බීඩි කොළ කිලෝවකට අය කරන සෙස් බද්ද හේතුවෙන් හොර පාරෙන් රටට විශාල වශයෙන් බීඩි කොළ පැමිණෙන බවට ද මෙහිදී තොරතුරු වාර්තා වී ඇත. එම නිසා බීඩි කාර්මාන්තය විධිමත් කරමින් සුරා බදු දෙපාර්තමේන්තුවේ කටයුතු ද විධිමත් කිරීමට මෙහිදී තීරණය විය.
බීඩි කර්මාන්තයේ 700 ක පමණ පිරිසක් මේ වන විට යෙදී සිටින බැවින් බීඩි කොළ ගෙන්වීමේදී අය කරන සෙස් බද්ද ඉවත් කොට එක් බීඩියකින් අය කරන බදු මුදල රුපියල් 3.50 දක්වා ඉහළ දැමීමට ද තීන්දු වී තිබේ.
සෙසු බද්ද ඉවත් කළ ද ලැබෙන ආදායම කිසි ලෙසකින් අඩු නොවන ලෙස මෙම සංශෝධනය ඉදිරිපත් කර ඇත. මුදල් ඇමැතිවරයා ලෙස ජනපති රනිල් වික්‍රමසිංහයන් සමඟ ඉහත ප්‍රතිපත්ති මාලාව සාකච්ඡා කොට එය ක්‍රියාත්මක කිරීමට නියමිතය.
