දෙහිවල සත්වෝද්‍යානයේ ”බන්ධුල” මිය යයි | සිළුමිණ

දෙහිවල සත්වෝද්‍යානයේ ”බන්ධුල” මිය යයි

දෙහිවල ජාතික සත්වෝද්‍යානයේ සිටි ”බන්ධුල” නැමැති හස්ථියා මියගොස් තිබේ. හදිසියේ ඇතිවූ අසනීප තත්ත්වයක් හේතුවෙන් එම හස්ථියා මිය ගොස් ඇත.
 
සත්වෝද්‍යාන ආරංචිමාර්ග සඳහන් කළේ දෙපා අප්‍රාණිකව බිම ඇදවැටීමත් සමඟ පශු වෛද්‍යවරුන් විසින් අලියාට ප්‍රතිකාර සිදුකර ඇතත් ඒ වනවිටත් එම සත්වයා මියගොස් සිට ඇති බවයි.
 
”බන්ධුල” හස්ථියා යනු 1949 සිට දෙහිවල ජාතික සත්වෝද්‍යානයේ දීර්ඝ කාලයක් සිටි හස්ථියෙකි. හස්ථියා මියයන විට 79 වන වියේ පසු විය.
 
”බන්ධුල” හස්ථියා 1943 වසරේ දී අනුරාධපුරයේදී උපත ලද අතර වසර 03 කට පමණ පසුව මව් සෙනෙහස නොලබා අලි රංචුවෙන් වෙන්ව වනයේ අතරමංව සිටින විට වනජීවී සංරක්ෂණ දෙපාර්තමේන්තුව මඟින් සිය භාරයට ගෙන වර්ෂ 1949 දී දෙහිවල සත්වෝද්‍යානයට ගෙනවිත් දී ඇත.
 
මෙම හස්ථියා වර්තමානයේදී දෙහිවල සත්වෝද්‍යානයේ සිටින සියලු සතුන් අතුරින් වඩාත්ම ජනතා ආකර්ෂණයට ලක් වූ සත්ත්වයා වශයෙන් හැඳින්විය හැකි අතර මනස්කාන්ත රූ සපුව, ශාන්ත බවින් යුක්ත තේජස් ගමන් විලාසය සහ උසට සරිලන පිරිපුන් සද්ධන්ත ශරීරය ඊට සාක්ෂි දරයි.
 
උසින් අඩි 09ක් පමණවන දෙහිවල ජාතික සත්වෝද්‍යානයෙහි අලි ඇතුන් කණ්ඩායමෙහි උසම සාමාජිකයා වන බන්ධුල හස්ථියා, ශ්‍රී ලංකාවෙහි වර්තමාන හීලෑ අලි-ඇතුන් අතර සිටි උසින් වැඩිම අලි-ඇතුන් කිහිපදෙනා අතරට එක්වේ. 

Comments