අගෝස්තු 01 වැනිදා සිට ලංගම බස්රථ 800 ක් යළි ධාවනයට එක් කිරීමට ප්‍රවාහන අමාත්‍යාංශය තීරණය කර ඇත. ප්‍රවාහන අමාත්‍ය ආචාර්ය බන්දුල ගුණවර්ධනගේ උපදෙස් පරිදි මෙසේ එක් කරන්නේ දිවයින පුරා ලංගම ඩිපෝවල ටයර් සහ අමතර කොටස් හිඟය හේතුවෙන් ධාවනයෙන් ඉවත්කර තිබූ බස්රථ 800 කි.
මීට අමතරව මෙම බස් රථවලට අවශ්‍ය අමතර කොටස් කඩිනමින් ලබාගැනීම සඳහා පසුගියදා පැවති කැබිනට් මණ්ඩලයේදී අනුමැතිය හිමි විය. ඒ අනුව නැවතත් මෙම බස්රථ ධාවනයට සුදුසු පරිදි අලූත්වැඩියා වූ අතර එලෙස අලුත්වැඩියා කෙරුණු බස්රථ 800ක් දිවයින පුරා ලංගම ඩිපෝ 105 ක් මගින් එළඹෙන අගෝස්තු පළමුවැනිදා සිට ධාවනයේ යොදවනු ඇත. මෙම බස්රථ නැවත ධාවනයට එක්වීමත් සමඟ දැනට පවතින බස්රථ හිඟය හේතුවෙන් මගී ජනතාව පත්වන අපහසුතාවයන් මඟහැරී පොදු ප්‍රවාහන සේවය වඩාත් කාර්‍යක්ෂම වනු ඇතැයි විශ්වාස කෙරේ.
