ජාතක කතා ශ්‍රවණ පුස්තකයක් | Page 2 | සිළුමිණ

ජාතක කතා ශ්‍රවණ පුස්තකයක්

ඉන්දු - ශ්‍රී ලංකා රාජ්‍ය තාන්ත්‍රික සබඳතා හි 75 වන සංවත්සරය නිමිත්තෙන් ජාතක කතා සිංහල ශ්‍රවණ පුස්තකය ඉකුත් 14 වැනිදාට යෙදුණු පොසොන් පොහොය දින අනුරාධපුර, රුවන්වැලි මහා සෑ රදුන් අභියස දී එළි දැක්විණ. 
 
යහපත් ඔවදන් යන තේමාව යටතේ ජාතක කථා අතරින් තෝරාගත් ජාතක කතා 50ක් ඇතුළත් මෙම ශ්‍රවණ පුස්තකය ප්‍රධාන වශයෙන්ම දෘශ්‍යාබාධිත අය වෙනුවෙන් සකසා ඇත. 
 
ඉන්දියා මහ කොමසාරිස් කාර්යාලයේ තාක්ෂණික සහයෝගීතා අංශයේ උපදේශක සහ කාර්ය මණ්ඩල ප්‍රධානී ආචාර්ය සුෂිල් කුමාර් මහතා විසින් පළමු ශ්‍රවණ පුස්තකය මහා සංඝරත්නය වෙත පිළිගන්වන ලදී. 
 
මෙම ශ්‍රවණ පුස්තකය ස්වාමි විවේකානන්ද සංස්කෘතික මධ්‍යස්ථානයේ (SVCC) සහ කොළඹ විශ්ව විද්‍යාලයේ සමකාලීන ඉන්දියානු අධ්‍යයන මධ්‍යස්ථානයේ (CCIS) ඒකාබද්ධ ප්‍රයත්නයකි. 
 
අති පූජ්‍ය රඹුක්කන සිද්ධාර්ථ හිමියන් විසින් අධීක්ෂණය කරන ලද මෙම ශ්‍රවණ පුස්තකය ස‍ඳහා ස්වාමි විවේකානන්ද සංස්කෘතික මධ්‍යස්ථානයේ අධ්‍යක්ෂ ආචාර්ය රේවාන්ත් වික්‍රම් සිං, සමකාලීන ඉන්දියානු අධ්‍යයන මධ්‍යස්ථානයේ අධ්‍යක්ෂ මහාචාර්ය උපුල් රංජිත් හේවාවිතානගමගේ, ජනප්‍රිය රූපවාහිනී නිවේදකයකු වන ආචාර්ය ඩබ්. ඒ. අබේසිංහ සහ ජනප්‍රිය ගුවන් විදුලි නිවේදිකාවක් වන වත්සලා සමරකෝන් යන මහත්ම මහත්මීහු ද දායකත්වය ලබා දුන්හ. 
 
වීඩියෝ තාක්ෂණය ඔස්සේ සිංහල භාෂාවෙන් මෙම අවස්ථාව ඇමතූ මහ කොමසාරිස් ගෝපාල් බාග්ලේ මහතා ජාතක කතා ශ්‍රවණ පුස්තකය ඉන්දියානු ජනතාව විසින් ශ්‍රී ලාංකික ජනතාව වෙත පිදෙන ධර්ම දානයක් බව ප්‍රකාශ කළේය. ජාතක කතා ඇතුළු බොදු උරුමය ඉන්දියාව සහ රටවල් රැසක් අතර වැදගත් ශිෂ්ටාචාරමය බැඳීමක් ඇති කර තිබෙන බව ද වසර දෙදහසකට පෙර ඉන්දියාවෙන් බුදු දහම හිමි වූ පළමු රටවල් කිහිපය අතර සිටින ශ්‍රී ලංකාවට ඒ අතරින් ඉතා සුවිශේෂී ස්ථානයක් හිමි වන බව ද ඔහු පැවසීය. අසල්වැසි රටවල් ද්විත්වය අතර පොදු සංස්කෘතික උරුමය සහ දෙරට ජනතාව අතර බැඳීම් ශක්තිමත් කිරීම සඳහා මෙවන් පියවර ඉවහල් වන බව මහ කොමසාරිස්වරයා  පැවසීය. 

Comments