ඉකුත් නව වැනිදා රටම බිලිගත් ප්රචණ්ඩත්වයෙන් ජීවිත 9ක් අහිමි වී ගියේය. ඒ අතරට පාර්ලිමේන්තු මන්ත්රීවරයෙක්ද අයත් විය. ඔහු 2020 වසරේ ප්රථම වතාවට පොලොන්නරුව දිස්ත්රික්කය නියෝජනය කරමින් පාර්ලිමේන්තුවට පැමිණි අමරකීර්ති අතුකෝරල මන්ත්රීවරයායි. හිටපු අගමැතිවරයා දැකබලා ගැනීමට අරලියගහ මන්දිරයට පැමිණ යමින් සිටි අමරකීර්ති අතුකෝරල ගමන්ගත් රථය නිට්ටඹුව නගරයේදී කොටු වී තිබුණේ එදා ප්රචණ්ඩ ලෙස හැසිරුණ පිරිස්හටය.
ඒ මොහොතේ දහස් ගණනක් දෙනා රැස්ව මන්ත්රීවරයාගේ කණ්ඩායමට විරෝධය පළ කිරීමත් සමඟ මන්ත්රීවරයා ඇතුළු පිරිස පවසා තිබුණේ විවාහ මංගල උත්සවයකට සහභාගිවී යන බවයි.
අනතුරුව ප්රචණ්ඩකාරීන්ගෙන් ගැලවීමක් නොමැති තැන මන්ත්රීවරයාගේ ආරක්ෂකයෙක් විසින් වෙඩි ප්රහාරයක් එල්ල කිරීමත් සමඟ තත්ත්වය උත්සන්න වී තිබිණි. එම වෙඩි ප්රහාරයෙන් තිදෙනෙක් තුවාල ලැබූ අතර ඒ අතර සිටි මීරිගම, කල්එළියේ පදිංචි හර්ෂ නදීෂාන් ජයවීර නමැති 27 හැවිරිදි තරුණයා මිය ගියේය.
අනතුරුව මන්ත්රීවරයා සහ ආරක්ෂක නිලධාරි පොලිස් සැරයන් අහංගම විතාරණලාගේ ජයත්ත ගුණවර්ධන ගිනි අවියක්ද අතැතිව නිට්ටඹුව නගර මධ්යයේ පදික වේදිකාවේ දිව යන ආකාරය සීසීටීවී කැමරාවකද සටහන් වී තිබිණි. කෙසේ හෝ එලෙස දිව ගිය මන්ත්රීවරයා සහ ආරක්ෂක නිලධාරියා නිට්ටඹුව නගරයේ සුප්රසිද්ධ රෙදිපිළි වෙළෙඳසලක් වන නිහාල් ෆැෂන් ඉදිරිපිට මරණයට පත්ව සිටියේය.
58 හැවිරිදි දෙදරු පියකු වන අමරකීර්ති මන්ත්රීවරයාගේ මරණය පිළිබඳ සැණින් වාර්තා වෙද්දී රටපුරා පැතිර ගියේ පොළොන්නරුව දිස්ත්රික් පාර්ලිමේන්තු මන්ත්රී අමරකීර්ති අතුකෝරල නිට්ටඹුව නගර මධ්යයේ සියදිවි නසාගෙන ඇති බවයි. එලෙස ‘සියදිවි නසා ගැනීමක්‘ ලෙස අර්ථ දක්වමින් පුවත් මැවුණද මන්ත්රීවරයාගේ මළසිරුර පිළිබඳ සිදුකළ පශ්චාත් මරණ පරීක්ෂණය අනුව එය පහරදීමක් නිසා සිදුවූ ඝාතනයක් බවට තහවුරු විණි.
ඉතා අමානුෂික ලෙස ඝාතනය වී සිටි මන්ත්රීවරයාගේ සහ ආරක්ෂක නිලධාරියාගේ ඇඳිවතද ඉවත්කොට තිබූ අතර දෙදෙනාගේ මළසිරුරු එම රෙදිපිළි වෙළෙඳසල ඉදිරිපිට පැය ගණනාවක් තිබූ බවත් සැල වේ.
මෙකී ඝාතන සිදුවීම පිළිබඳව නිට්ටඹුව පොලිස් ස්ථානාධිපති ප්රධාන පොලිස් පරීක්ෂක කේ. පී. ඩී. අබේරත්නගේ මෙහෙයවීමෙන් පරීක්ෂණ ඇරැඹීමත් සමඟ පසුදා එනම් ඉකුත් 10 වැනිදා අලුයම අත්තනගල්ල මහේස්ත්රාත් අධිකරණයට කරුණු වාර්තා ෙකරිණි.
පසු එහි අංක 02 මහේස්ත්රාත්වරිය මළසිරුරු තිබූ ස්ථානයට ගොස් නිරීක්ෂණ කටයුතු සිදුකොට වතුපිටිවල මූලික රෝහලට ගොස් එහිදී මියගොස් සිටි මීරිගම තරුණයාගේ සිරුරද පරීක්ෂා කර බලා තිදෙනා ගැනම පශ්චාත් මරණ පරීක්ෂණ පැවැත්වීම සඳහා නියෝග කළාය.
අනතුරුව වතුපිටිවල මූලික රෝහලේ විශේෂඥ අධිකරණ වෛද්ය නිලධාරි රමේෂ් අලගියවන්න සිදුකළ පශ්චාත් මරණ පරීක්ෂණයෙන් හෙළි වූයේ අමරකීර්ති අතුකෝරල මන්ත්රීවරයා මියගොස් ඇත්තේ අධික ලෙස පහර දීමෙන් ඔහුගේ සිරුරේ අස්ථි බිඳි යාමෙන් වූ අභ්යන්තර රුධිර වහනය නිසාවෙන් බවටයි. විශේෂඥ අධිකරණ වෛද්යවරයා නිකුත් කළ වෛද්ය වාර්තාවෙන් වැඩිදුරටත් හෙළි කර තිබුණේ මන්ත්රීවරයාගේ සිරුරේ බහුවිධ තුවාල අධික ප්රමාණයක් තිබූ බවටයි.
ඒ අතරේ විශේෂඥ අධිකරණ වෛද්ය නිලධාරි රමේෂ් අලගියවන්න විසින් මන්ත්රීවරයා සමඟම මියගොස් සිටි ආරක්ෂක නිලධාරි සැරයන් ජයන්ත ගුණවර්ධනගේ මළසිරුර පිළිබඳ සිදුකළ පශ්චාත් මරණ පරීක්ෂණයේදීද හෙළි වී තිබුණේ සැරයන්වරයා මියගොස් ඇත්තේ පපු ප්රදේශයට එල්ල කළ වෙඩි ප්රහාරයකින් එම වෙඩි උණ්ඩය ඔහුගේ පෙනහැල්ල හරහා ගමන් කරමින් සිරුර පසාරු කර පිටව යාම නිසාත් ඔහුට පහරදීමෙන් හිස්කබල පුපුරා යාමෙන් මොළයට රුධිරය වහනය වීමෙන් බවටයි. එසේම පොලිස් සැරයන්වරයාගේ සිරුරේද බහුවිධ තුවාල රැසක්ම ඇති බවත් එම වෛද්ය වාර්තාවේ සඳහන් වේ.
ඒ අනුව මන්ත්රීවරයා සහ ආරක්ෂක නිලධාරියාගේ මරණ පිළිබඳව පැතිර ගිය සියදිවි නසා ගැනීමේ පුවත අසත්යයක් බවට මනා ලෙස තහවුරු විණි.
ජනතා නියෝජිතයෙක් ලෙස දිගු ගමනක් යාමට සිටි අමරකීර්ති අතුකෝරල මන්ත්රීවරයාගේ මරණය පිළිබඳව පවුලේ අයවලුන් මෙන්ම ප්රදේශවාසීන්ද මහත් කම්පාවට වූයේ ඔහු පොලොන්නරුව ජනතාවගේ හොඳ හිත දිනා සිටි මන්ත්රීවරයෙක් වූ හෙයිනි.