වැටුප් විෂමතා ගැටලුවක් මුල් කර ගනිමින් ඌව පළාතේ ගුරු සහ විදුහල්පති වෘත්තිය ක්රියා මාර්ගයක් හේතුවෙන් අප්රේල් 6 වැනිදා පාසැල් සියල්ලක්ම පාහේ වැසී ගොස් තිබුණේ ගුරුවරුන් විදුහල්පතිවරුන් නැති පාසලකට ළමුන් පැමිණීමෙන් ඵලක් නැති නිසාය. එදින ඌව පළාතේ කිසිදු පාසලක අධ්යාපන කටයුතු සිදු කෙරුණේ නැත. පාසලේ සේවයට වාර්තා කර තිබුණේ අනධ්යයන කාර්ය මණ්ඩලවල සේවකයන් පමණි. මෑතක අධ්යාපන ක්ෂේත්රයේ සිදුකරන ලද සාර්ථකම විරෝධතා ව්යාපාරය මෙය විය.
මෙම ඒකාබද්ධ වෘත්තිය ක්රියා මාර්ගය සඳහා ඌව පළාතේ සියලුම පාසල්වල ගුරුවරුන් සහ විදුහල්පතිවරුන් එක්ව සිටියේ අසනීප නිවාඩු ලබා ගනිමින්ය.
වෘත්තීය සමිති ක්රියා මාර්ගය දියත්වන පසුබිමක බණ්ඩාරවෙල හපුතලේ වැලිමඩළ පස්සරල මහියංගණ ඇතුළු ප්රදේශ ගණනාවක සිට බස්, වෑන් ඇතුළු වාහන වලින් බදුල්ලට පැමිණි දහස් ගණනක් වූ ගුරු-විදුහල්පතිවරුන් එදින පෙරවරු 11.00 ට පමණ බදුල්ල නගරයට එක්රැස් වූහ.
එතැන් පටන් සටන් පාඨ කියමින් විරෝධතා පෙළපාළියකින් ඌව පළාත් සභා සංකීර්ණය ඉදිරිපිටට පැමිණියහ. මෙම විරෝධතා පෙළපාළිය හා උද්ඝෝෂණය නිසා මාර්ගය සම්පූර්ණයෙන්ම වැසී යාමෙන් පැය දෙකකට අධික කාලයක් වාහන ගමනාගමනයද ඇණහිටිනි.
මේ උද්ඝෝෂණය පිළිබඳව අදහස් දැක්වූ ශ්රී ලංකා ඉස්ලාම් ගුරු සංගමයේ ප්රධාන ලේකම් එම්. කේ. මොහොමඩ් නියාර් පැවසුවේ මෙවැන්නකි.
‘ගුරුවරුන් කියන්නේ අනෙක් හැමෝටම ආදර්ශවත් අය. මේ නිසා තමයි 1994 හිඳලා මේ වෙනකම් පැවැති හැම ආණ්ඩුවක්ම ගුරුවරුන්ව රවට්ටන්නේ. ගුරු සේවය පිහිටු දවසේ හිඳලා ගුරු සේවය වර්ණනා කරගෙන ගුරුවරුන්ව රවට්ටන එක විතරයි මේ ආණ්ඩු කළේ. තවදුරටත් අපි රැවටෙන්න සූදානම් නෑ. අපේ වැටුප් විෂමතා ප්රශ්නයට කඩිනම් විසඳුම් ලබාදෙන්න ඕනෑ. අවුරුදු 27 ක් පුරා මේ විෂමතාව මතම ගැරුවරු විශාල පිරිසක් විශ්රාම ගියා. මිය ගියා. දැන් මේ ඉන්න අයටවත් මේ ගැටලුව විසඳලා සාධාරණය ඉටුකරන්න ඕනෑ කියන හඬ තමයි බදුල්ල දිස්ත්රික්කයේ සියලු ගුරුවරුන් එකාමෙන් පෙන්නුවේ.
ලංකා ගුරු සේවා සංගමයේ බදුල්ල දිස්ත්රික් ලේකම් නන්දන හපුගොඩ මෙසේ කීය.
‘ගුරුවරු සමාන්තර අනෙක් සේවා සමඟ බලනවිට බරපතළ වැටුප් විෂමතාවකට ලක්ව තිබෙනවා. එදා රිචඩ් පතිරණ අධ්යාපන ඇමති විදිහට ඉන්නකොට තමයි 1997 දී ගුරු සේවය පිහිටුවනු ලැබුවේ. 1997 බී. සී පෙරේරා වැටුප් කොමිසමේ අලුත් ප්රතිසංස්කරණ වලින් ගුරු සේවය හැර අනෙක් සමාන්තර සේවා වල වැටුප් වැඩි කළා. එදා අධ්යාපන ලේකම් තාරා ද මැල්, මුදල් ඇමති සරත් අමුණුගම ගුරු සේවය විශේෂ සේවාවක් ලෙස සලකා එහි වැටුප් වැඩිකිරීම පසුව සිදුකරන බව සඳහන් කළා. අද වනවිට අවුරුදු 24 ක් වෙනවා; තවමත් වැටුප් වැඩිවුණේ නෑ. 2006/6 යනුවෙන් තවත් චක්රලේඛයක් ආවා ඒකෙන් වැටුප් විෂමතාව තවත් වැඩිවුණා. අදවනවිට ගුරු සේවයේ පළමු ශ්රේණියේ ගුරුවරයෙකුගේ විෂමතාව රුපියල් 32,225 ක් වෙනවා. අපි මේ ඉල්ලීම වෙනුවෙන් විභාග වර්ජනය කළා, දින පහක වැඩ වර්ජනයක් කළා; එහෙත් මේ වෙනකම් විසඳුමක් නෑ‘
මීට කලින් ආණ්ඩුවේ ඩලස් අලහප්පෙරුම අධ්යාපන ඇමති වෙලාවේ මේ විෂමතාව පිළිගෙන එය විෂමතාව නිවැරදි කරන තෙක් අතුරු දීමනාවක් ලබාදෙන්න එකඟ වුණා. ඒකට කැබිනට් පත්රිකා දැම්මා.
එහෙත් ඒක ලබාදෙන විදිහක් තිබුණේ නෑ. ඒ අතුරු දීමනාව ලබා දෙන විදිහ ඉල්ලලා පහුගිය අවුරුද්දේ මාර්තුවල වැඩවර්ජනය කළා. මේ ඉල්ලීම් ලැබෙනකම් අපි අපේ සටන දිගටම ගෙනියනවා. මීළඟ විරෝධතාව ලබන 29 වැනිදා ගාල්ල දිස්ත්රික්කයේ පවත්වනවා‘
සමස්ත ලංකා එක්සත් ගුරු සංගමයේ උප ලේකම් සෙනරත් බණ්ඩාරගේ අදහස මෙසේය.
‘වැටුප් විෂමතා ප්රශ්නයට අමතරව ඌව පළාතේ ගුරුවරුන්ගේ ප්රශ්න එමටයි. ස්ථාන මාරුවීම් පිළිබඳ නිසි ක්රමවේදයක් නෑ. ඒවා කෙරෙන්නේ හිතවත්කම් මත. හිතවත් නැති අය ඈතට; හිතවත් අය නගරය තුළ. අනෙක ගුරුවරුන්ගේ හිඟ වැටුප් ගෙවා නෑ. ආපදා ණය ගෙවන්නේ නෑ. ගුරුවරුන්ගේ දැඩි පීඩනයක් මුදා හැරියා. මේ පළාත් සභාවේ සිදු කෙරෙන අප්රසන්න ක්රියා සම්බන්ධයෙන් ඉදිරියේ දී දැවැන්ත වැඩපිළිවෙළකට යනවා‘
ලංකා ගුරු සංගමයේ දිස්ත්රික් ලේකම් සරත් රත්නායක මේ සම්බන්ධයෙන් මෙසේ පැවසීය.
‘වැටුප් විෂමතා මුලික කරගෙන අප කළ මෙවර විරෝධතාව අතිශයින්ම සාර්ථක වුණා. ගුරුවරු විදුහල්පතිවරු වැඩි ප්රමාණයක දායකත්වය ලැබුණා.
මේ ප්රශ්නයට අමතරව බදුල්ල දිස්ත්රික්කයේ ගුරුවරුන්ට ගොඩාක් ප්රශ්න තියෙනවා. දේශපාලන අතපෙවීම් වැඩියි. දේශපාලන බලය ඇති ගුරුවරු අවුරුදු පහළොවක් විස්සක් නගරයේ එකම පාසලේ ඉන්නවා. ගුරු මාරුවීම් සාධාරණ විදිහට කෙරෙන්නේ නැහැ. විදුහල්පතිවරු පත්කිරීමේ දී දේශපාලනය මුල්කරගෙනයි කරන්නේ. මේවට විරුද්ධව 2014 හිඳලම සටන් කළත් වැඩක් නෑ. ඉදිරියේ දී අපිත් ලොකු සටනකට යනවා‘
ඌව පළාත් ආණ්ඩුකාර එම්. ජේ. එම්. මුසම්මිල් පැවසුවේ මෙවැන්නකි.
මේ අර්බුදය අපිට සම්බන්ධ දෙයක් නොවෙයි. මේක ජාතික මට්ටමේ ප්රශ්නයක්. ඕනෑම ප්රශ්නයක් දිග්ගැස්සීම හොඳ නෑ. නමුත් මේ විරෝධතාව දැක්වූයේ ගුරුවරු, විදුහල්පතිවරු. එදා දවසේ දරුවන්ගේ අධ්යාපනය සම්පූර්ණයෙන්ම ඇණහිටියා ඒ නිසා. කොරෝනා නිසා අවුරුද්දකට වැඩි කාලයක් දරුවන්ගේ අධ්යාපනයට බාධා ඇතිවුණා. එහෙම එකේ මේ වගේ විරෝධතා දරුවන්ට ලොකු පාඩුවක්‘
ඌව පළාත් අධ්යාපන අධ්යක්ෂ ඩී. ඇම්. රත්නායකගේ අදහස මෙසේය.
‘මේ උද්ඝෝෂණය ගැන කල්තියා අප දැනුවත් කර තිබුණා. පළාත් අධ්යාපන ලේකම්ට යවන ලද ලිපියක පිටපතක් මා වෙතද එවා තිබුණා.
ඒ ලිපියේ වෘත්තීය සමිති අටක නියෝජිතයන් අත්සන් කර තිබුණා. 94 සිට පවතින වැටුප් විෂමතාවකට විසඳුම් සහ අවිධිමත් ලෙස කරන පත්වීම් නතර කරන්න කියා එම ලිපියේ තිබුණා. එවැනි පත්කිරීමක් කරලා නැහැ. ඒ වගේම එවැනි පත්කිරීම් කරන්න කියලා කවුරුත් බලපෑම් කරලත් නැහැ. මේ වැටුප් විෂමතාව රාජ්ය මට්ටමින් විසඳිය යුතු දෙයක්.
ඒකට පළාත් බලධාරීන්ට හෝ දෙපාර්තමේන්තු ප්රධානීන්ට කිසිවක් කරන්න බැහැ.
නමුත් චක්රලේඛ මඟින් ලබාදීමට නියම කර ඇති සියලු සහන සලසාදීමට අපි පියවර ගෙන තිබෙනවා. මේ විරෝධතාව නිසා පාසල්වල පැමිණීම ඉතාමත් දුර්වල මට්ටමක පැවැතුණේ. සමහර පාසල්වල පැමිණීම සියයට එකත් පහළොවත් අතර වුණා.