තම විවාහක සැමියා තදින්ම බීඩි හා සිගරට් පානයට ඇබ්බැහි වී ඇති බවත් ඔහු නිතර කරාඹු යුගලක් කනේ පලඳින බවත්, ඒ නිසා ඔහුගෙන් තමාට දික්කසාද වීමට අවශ්ය බවත් පවසමින් 25 හැවිරිදි එක් දරු උපාධිධාරී ගුරුවරියක් ඉකුත් දා උහන පොලිසියට පැමිණිල්ලක් කළාය.
දිවංගත ඩී.එස් සේනානයක ශ්රීමතාණන්ගේ ගල්ඔය ගොවිජනපද යොජනා ක්රමයේ 23 වැනි ජනපදය වුයේ ගලහිටියාගොඩය. ගලහිටියාගොඩ ග්රාමයේ ඉපදී හැදි වැඩුණු සුමනා විරසිංහ අධ්යාපනය ලැබුවේද ගමේ පාසලෙනි. ඉගෙනිමට දක්ෂ ඇය විශ්වවිද්යාල වරම් ලබා උපාධිධාරිනියක් වුවාය. ඒ අතරතුර දැනහැඳින ගත් 21 ජනපදයේ කුමාරිගම ග්රාමයේ පදිංචිව සිටි ගැමුණු නානායක්කාර නම් තරුණයකු සමඟ ප්රේම සම්බන්ධයක් ඇති කරගෙන තිබුණි. ප්රේමය දලු ලා වැඩෙද්දි සුමනාට ගම් ප්රදේශයේම ගුරු පත්වීමක්ද ලැබුණි. ගැමුණුට හරිහමන් රැකියාවක් නොවූ අතර ඔහු කළේ එදිනෙදා කුලී වැඩයි. නමුත් එය ප්රේමයට බධාවක් නොවුණි.
සුමනාට රැකියාව ලැබී ටික කලකින්ම සුමනා හා ගැමුණු අතර විවාහය සිදු විය. විවාහ වීමෙන් වසරක් ගත වෙද්දි ඔවුන්ගේ කැදැල්ලට සුරතල් දියණියක්ද එක් විය. මේ වන විට ඇයගේ වයස අවුරුදු 4කි.
ඉකුත් දිනක සුමනා සිය දියණියද කැටුව උහන පොලිසියේ ස්ථානාධිපති ප්රධාන පොලිස් පරීක්ෂක එල්. ඩී. එන් කරුණාරත්න ඉදිරියේ පෙනී සිට එතෙක් සිය රාජකාරි ජිවිතයේ ඔහු අසා නොතිබූ පාපොච්චාරණයක් කළාය.
‘මම උපාධිධාරි ගුරුවරියක්. මේ දරුවාට වයස අවුරුදු 4 යි. අපි බැදලා අවුරුදු 5 ක් වෙනවා. මම බැන්දේ ප්රේම සම්බන්ධයක් මත. ඔහුට රැකියාවක් තිබුණෙ නැහැ. නමුත් මට රස්සාවක් තිබුණ නිසා අපි කසාද බැන්දා. බැන්දට පස්සේ තමයි සර් මම ගැමුණුගේ නියම තත්ත්වය දැනගත්තේ. ඔහු තදින්ම බීඩි උරන්නත් සිගරට් බොන්නත් ඇබ්බැහි වී සිටියා; මත්පැනුත් බිව්වා. ඒ මදිවට ඔහු ඔහුගේ කනේ එක එක මාදිලියේ කරාඹු දානවා. හරිම කැතයි. කොච්චර කිවත් ඔහු ඔහුගේ පුරුදු අත්හැර ගන්න කැමති නැහැ. මේක මට හරි වදයක් සර්. බීඩි ගද දැනෙන කොට මට වමනය යනවා. ළඟට යන්න හිතෙන්නෙත් නැහැ. එතකොටත් තවත් ප්රශ්න ඇති වෙනවා. විවාහ වුණ අලුතත් මේ ප්රශ්න පිළිබඳව පොලිසියට පැමිණිලි කළා. පොලිසිය ඔහුට අවවාද කළා. එත් වැඩක් වුණේ නැහැ. සර්, මම ගුරුවරියක්; මගේ මිනිහා කරාඹු දලා ඉන්නකොට මම කොහොමද ළමයින්ට මුහුණ දෙන්නේ ?මම කොහොමද ඔහුත් එක්ක ගමනක් බිමනක් යන්නේ? එහුගේ එම නොමනා පුරුදු අත්හැරගන්නා ලෙස කෙතෙකුත් ඇවටිලි කරත් ඔහු ඒවා ගණනකට ගන්නේ නැහැ. මේක මට මහා වදයක් සර්. මේ තත්ත්වය මට තවත් ඉවසන්න බැහැ. මට දික්කසාද වෙන්න ඕන; ඒකට මට උදව් කරන්න‘
අද සමාජයේ බොහෝ දුරට විවාහකයෝ දික්කසාද වෙන්නේ නොගැළපීම, අනියම් සබඳතා, ගෘහස්ත ප්රචණ්ඩත්වය, ලිංගික හිංසනය, දුරාචාරය වැනි ක්රියාකාරකම් නිසාය. නමුත් මෙහිදි සුමනා දික් කසාදය ඉල්ලන්නේ ගැමුණුගේ බීඩි සිගරට් බිම නිසා මුඛයෙන් වහනය වන දුර්ගන්දය ඉවසීම නොහැකි නිසාය.
මෙහිදි මෙම පැමිණිල්ල විභාග කරන අතරතුර තම චර්යාවන් මින් ඉදිරියට අත්හරින බවට ගැමුණු පොලිස් ස්ථානාධිපතිවරයා ඉදිරියේ පොරොන්දු වී ඇත. ඒ අනුව තම චර්යාවන් වෙනස් කර නොගතහොත් අනිවාර්යෙන් දික්කසාද වීමට සිදුවනු ඇති බවත්; ඉදිරි සතියක කාලයකින් පසු දෙදෙනාම තමා හමුවට පැමිණ තත්ත්වය පැහැදිලි කරන ලෙස දන්වා ඇත. එසේ නොවන්නේ නම් සිවිල් නඩුවක් දමා ප්රශ්නය අධිකරණයෙන් විසදා ගන්නා ලෙසත් දන්වා ඇත.
මේ වන විට සතියක කාලය ඉකුත් වී ඇතත් තවමත් දෙදෙනාම පොලිසියට නොපැමිණි බව පොලිස් ආරංචි මාර්ග සඳහන් කළේය.
(නම් ගම් පමණක් මන:කල්පිතය)