රිමාන්ඩ් බන්ධනාගාරගතව සිටින මොහොමඩ් නජිබ් මොහොමඩ් ඉම්රාන් හෙවත් කංජිපාන ඉම්රාන් නමැති ප්‍රධාන පෙළේ මත් ජාවාරම්කරුගේ මෙහෙයවීමෙන් පසුගිය මැයි 31 වැනිදා මාලිගාවත්තෙ ලක්සෙත මහල් නිවාස සංකීර්ණයේ ඉහළ මහලකදී රවුෆ් නමැත්තකුට වෙඩි ප්‍රහාරයක් එල්ල කෙරිණි. ඉන් බරපතළ තුවාල ලත් රවුෆ් දින කිහිපයකට පසු කොළඹ ජාතික රෝහලේදී මියගියේය. එලෙස බන්ධනාගාරයේ සිටින අපරාධකාර රැඳවියන් පසුගිය කාලය පුරාවටම බොහෝ අපරාධ මෙන්ම මත් ජාවාරම් මෙහෙයවූයේ දූෂිත බන්ධනාගාර නිලධාරින්ගෙන්ද ලැබුණු බොහොමයක් උපකාර මතයි. ඊට අපරාධකාරයන්ද දූෂිත බන්ධනාගාර නිලධාරින්ට අතදිග හැර මුදල් වියදම් කර ඇති බවටද සැල වේ.
මේ තත්ත්වය මනා සේ වටහාගත් වත්මන් ජනපති ගෝඨාභය රාජපක්ෂයන් බන්ධනාගාර පද්ධතිය සෑම අතින්ම ඉහළ තත්ත්වයකට ඔසවා තැබීමට ක්ෂණික පියවර ගැනිණි. ඒ අනුව ආරක්ෂක ලේකම් විශ්‍රාමික මේජර් ජෙනරාල් කමල් ගුණරත්නගේ ප්‍රධානත්වයෙන් නව බන්ධනාගාර කොමසාරිස් ජෙනරාල්වරයා ලෙස පත්වූ තුෂාර උපුල්දෙණිය ප්‍රමුඛ බලධාරින් දින කීපයක් තුළදී බන්ධනාගාරවල මහත් ‘වෙනසක්‘ ඇති කිරීමට සමත් වී ඇති බවක් පෙනේ.
 |
| පොට්ට නවුෆර් |
එවැනි වටපිටාවක් බන්ධනාගාර පරිපාලනය පැත්තෙන් සිදුවෙද්දී රැඳවියන් ගැන ද දැඩි අවධානයක් යොමු වී තිබේ. විශේෂයෙන්ම වැලිකඩ, කොළඹ රිමාන්ඩ් බන්ධනාගාරවල රැඳි සිටිමින් රිසි සේ ජංගම දුරකථන භාවිත කළ ප්‍රධාන අපරාධකාරයන් කිහිපදෙනෙක්ම මාරුකර යැවුණේ බූස්ස බන්ධනාගාරයටය. එසේ බූස්සට ගිය රැඳවියන් අතර මත් ජාවාරම් නිසාවෙන් මරණීය දණ්ඩනය ලබා සිටින සමන්ත කුමාර හෙවත් වෙලේ සුදා, භාරත ලක්ෂ්මන් ඝාතනයට මරණ දඬුවම් විඳින දෙමටගොඩ චමින්ද, මහාධිකරණ විනිසුරු සරත් අඹේපිටිය ඝාතනයට මරණ දඬුවම් විඳින පොට්ට නවුෆර් වැන්නන්ද රිමාන්ඩ් බන්ධනාගාරගතව සිටි ඩුබාහියිදී මාකඳුරේ මධුෂ්ගේ සාදයට එක්ව සිටියදී අත්අඩංගුවට පත් මෑත කාලයේ ප්‍රබලම මත් ජාවාරම්කාරයකු ලෙස කරළියට පැමිණි කංජිපාන ඉම්රාන්, කොස්ගොඩ තාරක, පොඩි ලැසි, මාකිලංගමුවේ සංජීව, ආමි සම්පත්, කැලුම් ඉන්දික හෙවත් පිටිගල කැවුමා, ගිය වසරේදී ඉන්දියාවේදී අත්අඩංගුවට පත්ව මෙරටට පිටුවහල් කළ බ්ලූමැන්ඩල් සංඛ, ඌරු ජුවා වැන්නන් විය.
1999 වසරේදී ඇරැඹි බූස්ස බන්ධනාගාරය ඉකුත් කාලයේ ප්‍රසිද්ධව තිබුණේ අත්අඩංගුවට පත්ව බන්ධනාගාරගතව පුනරුත්ථාපනය වන හිටපු එල්ටීටීඊ රැඳවියන් රඳවා සිටි බන්ධනාගාරයක් ලෙසයි.
අධි ආරක්ෂිත බන්ධනාගාරයක් සේ සැලැකෙන විශේෂිත සිර කුටි 46කින් සමන්විත බූස්ස බන්ධනාගාරයේ රැඳවියන්ට කිසිසේත්ම ජංගම දුරකථන භාවිත කළ නොහැකි වන ලෙස දුරකථන සංඥා අවහිර කිරීමට ජැමර් පද්ධතියක්ද සක්‍රිය කෙරිණි.
බූස්ස සහ අඟුණකොළපැලැස්ස බන්ධනාගාරවලට පමණක් යොදවා සිටි පොලිස් විශේෂ කාර්ය බළකා නිලධාරිහු පසුගියදා කොළඹ, බන්ධනාගාර පද්ධතියටද යෙදවීමට රජය තීන්දු කළහ.
මෙවැනි වටපිටාවක් බන්ධනාගාර පද්ධතිය තුළ සිදුවෙද්දී විශේෂ ගණයේ කුටි 46ක් පමණ තිබෙන බූස්ස බන්ධනාගාරය වෙත කොළඹ, වැලිකඩ, අඟුණකොළපැලැස්ස, දුම්බර ආදි බන්ධනාගාරවල සිටිමින් පිටත සමාජය සමඟ එක්ව මත් ජාවාරම්, කොල්ලකෑම්, මිනීමැරුම් මෙහෙයවූ සියලුම රැඳවියන් බූස්සට ගාල් කළේ මීට මාස කිහිපයකට පරිදියි.
ඔවුනට පසුගිය කොරෝනා සමයේදී නිවෙස්හි සමීපතම ඥාතින් සමඟ දුරකථන ඔස්සෙ විනාඩි තිහක පමණ කාලයක් කතාබහ කිරීමට ඉඩ හසර විවර කර දෙනු ලැබීය.
බන්ධනාගාර බලධාරින් විසින් ඉරිදා හෝ බදාදා දිනයක එම අවස්ථාව ලබා දුන්නෙ කොරෝනා වසංගතය නිසාවෙන් ඥාතින්ට රැඳවියන් බැලීමට බන්ධනාගාරයට පැමිණීමට අවස්ථාව නොලැබුණු හෙයිනි.
කොරෝනා තත්ත්වය පහව යාමත් සමඟ රැඳවියන්ට ඥාතින් සමඟ දුරකථන ඔස්සෙ කතාබහ නතර කෙරුණේ ඥාතින්ද බන්ධනාගාරයට පැමිණ රැඳවියන් දැකබලා ගැනීමට අවස්ථාව ලබාදීම නිසාවෙනි.
එහෙත් රැඳවියන් දිගින් දිගටම එලෙස දුරකථන ඔස්සෙ ඥාතින් හා කතාබහ කිරීමට ඉල්ලීම් කළහ. ඊට යහපත් ප්‍රතිචාරයක් නොලැබුණු හෙයින් එම කරුණ ඇතුළු රැඳවියන් හමුවීමට පැමිණෙන නීතිඥවරුන් පොලිස් විශේෂ කාර්ය බළකාය විසින් පරීක්ෂා කිරීම, ආපණ ශාලාවෙන් ආහාර ඇතුළු අත්‍යවශ්‍ය ද්‍රව්‍ය ලබා ගැනීමට මසකට ලබාදෙන රුපියල් අට දහසේ මුදල ඉහළ නැංවීම, පොලිස් විශේෂ කාර්ය බළකාය විසින් බන්ධනාගාරය තුළ සිදුකරන පරීක්ෂණ නතර කරන ලෙසද තම දුවාදරුවන් හමුවීමට ලබාදෙන විනාඩි තිහක කාලය පැයක් දක්වා ඉහළ නංවන ලෙස ඉල්ලා විශේෂ කුටි 45ක් තුළ සිටි රැඳවියන්ගෙන් පිරිසක් පසුගිය 10 වැනිදා පෙරවරුවේ සිට ආහාර වර්ජනය කරමින් උපවාසයක් ආරම්භ කෙරිණි.
 |
| පොඩි ලැසී |
කංජිපාන ඉම්රාන් මෙහෙයවා ඇති එම ආහාර වර්ජන උපවාසයට පොඩි ලැසි, වෙලේ සුදා, දෙමටගොඩ චමින්ද වැනි 36 දෙනෙක් මුලින් එකතු විණි. ඊට පොට්ට නවුෆර්, ආමි සම්පත්, පිටිගල කැවුමා ආදි 9 දෙනෙක් එක්ව සිටියෙ නැත.
දින හතරක කාලයක් වර්ජනය සිදු වූවත් දිනෙන් දින වර්ජනය සිදුකළ පිරිස ක්‍රමයෙන් වර්ජනයෙන් ඉවත් විණි. ඒ අතර වර්ජනයේ ප්‍රධානියා වූ කංජිපාන ඉම්රාන් පසුගිය 11 වැනිදා පෙරවරුවේ අසනීප තත්ත්වයක්යැයි පවසා කරාපිටිය රෝහලට ඇතුළත් වීමට උත්සාහ ගත්තත්, බන්ධනාගාර බලධාරින් ඉම්රාන් ගාල්ල නාවික හමුදා රෝහලට ඇතුළත්කොට ඊසීජී ඇතුළු පරීක්ෂණ ද සිදුකරමින් ඔහුට අසනීප තත්ත්වයක් නොමැති බව තහවුරු කරගැනිණි.
එලෙස අසනීප තත්ත්වයක් පා කරාපිටිය රෝහලට ඇතුළුවීමට කංජිපාන තැත් කළේ කිසියම් සැලැසුමක් සඳහා වන්නට ඇති බවට සැකයක් පහළ වූ බව බන්ධනාගාර ප්‍රධානියෙක් කීවේය.
එම නිසා කංජිපාන ගාල්ල නාවික හමුදා රෝහලේ සිට නැවතත් අධි ආරක්ෂිත බන්ධනාගාරයක් වන බූස්ස බන්ධනාගාරයට ඇතුළු කිරීමේදී ගුද මාර්ගයේ හෝ කිසිවක් සඟවාගෙන ආවාද යන්න පරීක්ෂාවට ඔහුට ඉඳිආප්ප ආහාරයට දී ශරීර කෘත්‍යයද කරවා විශේෂ සිර කුටිවලට ඇතුළු කිරීමට බලධාරිහු පියවර ගත්හ.
අනතුරුව ඔහු නැවතත් වර්ජනයට එක්වූවත් බන්ධනාගාර බලධාරින් කිසිදු ඉල්ලීමකට කන් නොදුන්නේය. එසේ හෙයින් 36 දෙනෙක් පමණ එක්ව සිදුකළ වර්ජනය අවසන් වූයේ පසුගිය 14 වැනිදා දහවල් සියලු දෙනා ආහාර ගත් නිසාවෙනි.
මේ පිළිබඳව බන්ධනාගාර කොමසාරිස් ජෙනරාල් තුෂාර උපුල්දෙණිය පවසන්නෙ ඔවුනගේ වර්ජනයට එරෙහිව දැඩිව විනය නීති ක්‍රියාමාර්ග ගන්නා බවත්, දරුවන් මුණගැස්වීමට කළ ඉල්ලීම පමණක් සලකා බලන බවයි.
මෙකී වර්ජනය පිළිබඳව ආරක්ෂක ලේකම් කමල් ගුණරත්න ද බන්ධනාගාර රැඳවියන්ට අවැසි ඉඩ පහසුකම් වැඩි කිරීමට බෝගම්බර බන්ධනාගාරයේ කොටසක් නැවතත් ලබා ගැනීම පිළිබඳව සොයා බැලීමට ගිය මොහොතේදී බූස්ස රැඳවියන්ගේ වර්ජනය ගැන කීවේ මෙවැන්නකි.
 |
| කංජිපානි ඉම්රාන් |
“ඒ රැඳවියන්ගේ ඉල්ලීම් අසාධාරණ ඉල්ලීම්... ආරක්ෂක ලේකම් ලෙස මාව ගියත් අද වන විට බූස්ස බන්ධනාගාරයෙ සිටින පොලිස් විශේෂ කාර්ය බළකා නිලධාරින්ගේ පරීක්ෂාවට ලක් වෙනවා. ඒ නිසා අපරාධකාරයන් වෙනුවෙන් පෙනී සිටින නීතිඥවරුන් පරීක්ෂා නොකර සිටීමට කිසිදු හේතුවක් නෑ. උපවාසය දින හතරයි කළේ. බඩගින්න උත්සන්න වූ සැණින් නැගිට ආහාර ගත්තා. අපේ රටේ උපවාසයක් සිදුකොට මියගිය එකම කෙනා තිලීපන් පමණයි. (ප්‍රභාකරන්ගේ සමීපතම මිත්‍ර යෙක් වූ තිලීපන් 1987 වසරේදී යාපනය නල්ලුර් කෝවිල අසල ආරම්භ කළ උපවාසයෙන් මරණයට පත් විය.)
සංවිධානාත්මක අපරාධකාරයන් හෙවත් පාතාල අපරාධකරුවන් ඇතුළු ප්‍රබල ගණයේ මත් ජාවාරම්කරුවන් වන කංජිපාන, වෙලේ සුදා වැන්නන් එක්ව බන්ධනාගාරය තුළ වර්ජන සිදුකළත් ඔවුහු නයි-මුගටි මෙන් තරහකාරයන්ය.
මාකඳුරේ මධුෂ් සමඟ කංජිපාන ඇතුළු කණ්ඩායම ඩුබායි පොලිසියට කොටුකර දීමේ සැලැස්මේ ප්‍රධානියා ද වන්නෙ වෙලේ සුදාය. ඒ, මධුෂ් විසින් වෙලේ සුදාගේ මත්ද්‍රව්‍ය කලාපය වූ දෙහිවල සිට ගාල්ල හම්බන්තොට දක්වා ප්‍රදේශයේ හෙරොයින් ජාවාරම අත්පත්කර ගැනීමට තැත් කිරීමත් සමඟ වූ බද්ධ වෛරය නිසායි. ඒ, හේතුවෙන් මධුෂ් සැලැසුම්කර ඇත්තෙ වෙලේ සුදා ද කළුතර, එතනමඩලදී බන්ධනාගාර බස්රථයට පහර දී සමයං ඝාතනය කළා සේ වෙලේ සුදා ද ඝාතනය කිරීමටයි. එහෙත් මධුෂ්ට පෙර වෙලේ සුදා ක්‍රියාත්මක විණි.
කෙසේ හෝ වත්මන් රජය සහ බන්ධනාගාර පාලනාධිකාරිය සිරකරුවන් ද මනුෂ්‍යයන් බව පසක් කරමින් ඔවුනට අවැසි පහසුකම් සැලැසීමට උත්සාහ ගනිද්දී ප්‍රබල ගණයේ අපරාධකාර රැඳවියන් මාන බලන්නෙ කෙසේ හෝ බන්ධනාගාර පාලකයන් බිය ගන්වා දූෂිත බන්ධනාගාර නිලධාරින් හා එක්ව දුරකථන ඔස්සේ රට තුළ අපරාධ සහ මත් ජාවාරම් ප්‍රචලිත කිරීමටයි.
ඊට පොඩි ලැසි, තාරක, කැවුමා වැන්නන් මීට පෙරද උත්සාහ කළේ බන්ධනාගාර නිලධාරින්ට මරණ තර්ජන ද එල්ල කරමිනි. එම නිසා ඒ කිසිවකට යටත් නොවී වත්මන් බන්ධනාගාර පාලනාධිකාරිය ගෙන යන සාර්ථක වැඩපිළිවෙළ පිළිබඳව අපගේ පැසසුම් ද එක් කරන්නෙමු.
