බොරලු සහිත දුෂ්කර ධාවන පථයක අධික වේගයෙන් දිවෙන යතුරු පැදියකි. ඊට වඩා දෙගුණයක වේගයෙන් අහසේ පියඹා යන ත්රාසජනක මොහොතේදී පවා මුදු සිනහව පිරි ඔහුගේ දෙතොළඟ මිමිණෙන්නේ ගීතයකි. ‘රේස් පදිනකොට සින්දුවක් නොකියපු දවසක් නෑ. හැබැයි ඉතින් සමහර රේස් සින්දුවට කලින් ඉවර වෙනවා.‘ එසේ කියමින් සිනාසෙන මේ යතුරුපැදි ශූරයා යොවුන් වියට පා තැබුවා පමණි. ඔහු 14 හැවිරිදි කේසර ගොඩගේය. මෑත කාලයේ මෙරට යතුරු පැදි තරග බිමේ කාගෙත් අවධානයට ලක්වූ ළාබාලතම මෝටර් රථ ධාවන ශූරයා ඔහුය.
පස් හැවිරිදි වියේදී තම පියා තෑගි කළ කුඩා යතුරු පැදියෙන් පළමු වරට සුපර් ක්රොස් තරග බිමට කේසර එක්වෙද්දී ඔහුගේ වයසේ සෙසු දරු දැරියන් පදිමින් සිටියේ සෙල්ලම් බයිසිකල්ය. අවුරුදු 10න් පහළ තරග ඉසව්වට එක්වෙමින් සුපර් ක්රොස් තරග වරම් ලද ඔහු වසර දෙකක් ඇතුළත මෙරට යතුරුපැදි තරග ඉසව්වේ පෙරළිකාර ක්රීඩකයකු බවට පත් වීමේ නිමිති පහළ කළේය.
2015සියැට් ස්ලාඩා වාර්ෂික සම්මාන උලෙළේදී අවුරුදු 13න් පහළ දක්ෂතම ක්රීඩකයා සම්මානය දිනාගනිද්දී කේසරගේ වයස අවුරුදු 9කි. ඔහු 16න් පහළ තරග ඉසව්වට එක්වෙන්නේ 13න් පහළ ඉසව්ව පදිද්දීමය. ඊළඟ වසර කිහිපය ගෙවී ගියේ ඔහු 16න් පහළ තරග ඉසව්වේ විශිෂ්ටයා බවට පත්වෙමිනි. එම තරග අංශය පසුකාලීනව අවුරුදු 15න් පහළ තරගයක් බවට පත් කර තිබුණු අතර, ඔහු සිත් සේ සිය අණසක ධාවන පථය පුරා පතුරුවාලන්නට විය.
දුහුවිලි අවුස්සාගෙන අධික වේගයෙන් ඉදිරියට ඇදී එන නොම්මර 23 කේසරගේ යතුරුපැදිය ඊළඟ බෑවුමේදී පහළට ධාවනය වන්නේ අඩි විස්සකට වඩා උසකින් ත්රාසය මුසු පිම්මකින් පසුවය. ඒවා දැන් ඔහුට සුපුරුදු දේවල්ය. ‘ගොඩාක් රේස් ඉවර වුණේ කිසිම තරගයක් නැතිවම මම ජයග්රහණය කරලයි. ඒ වගේ රේස් මට හරි නීරසයි. ‘රසඳුන සමඟ පිළිසඳරකට එක්වෙමින් ඔහු එසේ කීවේය.
කොවිඩ් වසංගතය හේතුවෙන් මේ වසරේ මුල් භාගයේ මෙරට මෝටර් රථ හා යතුරුපැදි ධාවන බිමේ පැවත්වූයේ කළු අග්ගල තන්ඩර්වැලි සුපර් ක්රොස් තරගාවලිය පමණි. එහිදී ද ඔහු අවුරුදු 15න් පහළ ඉසව්ව ජයගත්තේ තරගයකින් තොරවය.
‘ජාත්යන්තර තරග එක්ක සංසන්දනය කරද්දී අපේ රටේ තරගවල ප්රමිතිය තව දියුණු වුණා නම් හොඳයි කියලයි මට හිතෙන්නේ. ගොඩාක් යතුරුපැදි තරග ඉවර වෙන්නේ මිනිත්තු 10ක්, 15ක් වගේ කෙටි කාලයක් ඇතුළතයි. ඒත් ඒවා මිනිත්තු 30ක් වගේ කාලයකට පැවැත්වෙනවා නම් තරගකරුවන්ගේ ශාරිරික යෝග්යතාවටත් හොඳයි. රේස් එකක් අමාරු වෙන තරමට ඉන් ලැබෙන විනෝදය ඉහළයි. මම කැමැති ඒ වගේ අමාරු රේස් පදින්නයි. ‘ ඔහු සිනාසෙමින් එසේ කීවේය.
කේසර ගොඩගේ මෝටර් රථ ක්රීඩාවේදිත් දැන් දැන් කැපී පෙනෙන දස්කම් දක්වමින් සිටී. ඔහු මුලින්ම මෝටර් රථ ක්රීඩාවට එක්වූයේ වසර 2017දීය. ඒ වසරේදී වලව සුපර් ක්රොස් තරගාවලියේ නිසාන් මාච් තරග ඉසව්වට එක්වෙද්දී ඔහුගේ වයස අවුරුදු 12කි. අනතුරුව ඔහු ෆෝර්ඩ් ලේසර් වැනි තරගවලටත් එක් විය. ඔහුගේ ක්රීඩා දිවියේ හොඳම වසර පසුගිය වසරය. එවර ෆොක්ස් හිල් සුපර් ක්රොස් තරග බිමේ ත්රිත්ව ශූරතා දිනාගැනීමට ඔහු සමත් වූයේ එවැනි දස්කමක් පෑ ළාබාලතම ක්රීඩකයා බවට පත් වෙමිනි. එම තරගාවලියේදී ඔහු නිසාන් මාච්, ෆෝර්ඩ් ලේසර් මෝටර් රථ තරග ද්විත්වයත්, අවුරුදු 15න් පහළ යතුරුපැදි තරගයත් ජයගත්තේය. එම වසරේ වාර්ෂික ජාතික ශුරතාවලියේ සහ ස්ලාඩා වාර්ෂික ශුරතාවලියේ අවුරුදු 15න් පහළ දක්ෂතම යතුරුපැදි ශූරයා ද කේසරය.
ලබන වසර කේසරට අතිශය කාර්යබහුල වසරක් බව ඔහු කියා සිටියේය. නුගේගොඩ ලයිසියම් ජාත්යන්තර පාසලේ අධ්යාපනය ලබන කේසර ලබන වසරේදී අපොස සාමාන්ය පෙළ විභාගයට පෙනී සිටීමට නියමිතය. එමෙන්ම සිය ක්රීඩා දිවියේ තවත් පියවරක් ඉදිරියට තබමින් ඔහු වැඩි තරගකාරීත්වයෙන් යුතු 250 කාණ්ඩයේ යතුරුපැදි තරග ඉසව්වටත්, ප්රවීණ තරගකරුවන් වැඩි ප්රමාණයක් සහභාගි වන හොන්ඩා එස්.එල්.එච්. කාණ්ඩයේ මෝටර් රථ තරග ඉසව්වටත් එක්වීමට බලාපොරොත්තුවෙන් පසුවෙයි.
‘අධ්යාපන කටයුතු ඉදිරියට කරගෙන යන ගමන්ම මෝටර් රථ හා යතුරුපැදි ක්රීඩාවෙනුත් ඉහළට යාම තමයි දැනට තියෙන ඉලක්කය. සුපර් ක්රොස් තරග බිමේ ප්රධානතම තරග ඉසව්ව වන අධිවේගී එස්.එල්.ජී.ටී.වර්ගයේ සුපර් කාර් තරග ඉසව්වට එක්වීමත් එක බලාපොරොත්තුවක්.
ජාත්යන්තර තරගාවලියක් වන ෆෝමියුලා රේස් පදින්නත් ආසාවක් තියෙනවා.‘ ඔහු කියයි. ඔහු කියන්නේ බොරලු ඇතිරූ දුෂ්කර සුපර් ක්රොස් තරගාවලි දැනට පැවැත්වෙන මුහුණුවර වෙනස් විය යුතු බවය. මෝටර් රථ සහ යතුරුපැදි එකම ධාවන පථයක පැවැත්වීම ඔහුගේ සිත් ගන්නේ නැත. ‘මෝටර් රථවලට වෙනම ධාවන පථයකුත්, යතුරුපැදි තරගවලට තවත් ධාවන පථයකුත් හැදෙනවා නම් හොඳයි. ‘ ඔහු කියා සිටියේය.
තරග නොපැවැත්වුණු කොවිඩ් වසංගත සමයේදී ඔහු වැඩිපුර කාලය වැය කළේ ජාත්යන්තර තරග පිළිබඳ අධ්යයනය කිරීමටය. ඊට අමතරව තම එකම සොයුරිය සමඟ කාලය ගත කළේය. පවුලේ බඩ පිස්සී මිනදි ඔහුගේ හොඳම යෙහෙළියයි.
‘මම තාත්තා එක්ක එකතු වෙලා මෑකරල්, බණ්ඩක්කා, වම්බටු, දඹල වගේ එළවළු වර්ග වගා කළා.‘ කේසර හිනැහෙමින් එසේ කීවේය.
කේසරගේ ජීවිතයේ සෙවැණැල්ල ඔහුගේ පියා ය. ව්යාපාරිකයකු වන ධම්මික ගොඩගේ මහතා ද මෝටර් රථ ධාවන ශුරයෙකි. ඔහු තම පුත්රයාගේ සියලු කටයුතු සඳහා කාලය වැය කරන්නේ ව්යාපාරික කටයුතු පවා අඩාළ කර ගනිමිනි. කේසර සහභාගි වන සියලුම තරගවලට පවුලේ සාමාජිකයන් සියලුදෙනාම සහභාගි වෙති. මව සාවිත්රි මෙන්ම නැඟණිය මිනදිත් ඔහුගේ තරග නැරැඹීමට පැමිණිය යුතුමය. ඔහුට තරග වැදීමට ඔවුන් තරග බිමේ සිටිය යුතුමය.