කලාව තුළ අපිට මුණගැහෙන බොහොමයක් චරිත පිරිමි. නමුත් ඔවුන් කතා කරන්නේ බොහෝ විට කාන්තාවන් ගැන. නිර්මාණ කරණයට කාන්තාවන් යොමු වන්නේ ඉතාමත්ම කලාතුරකින්. කාන්තාවන් ගැන ඇත්තම කතා කරන්න අපේ සමාජයේ පිරිස අඩුයි. මෙවර රාජ්‍ය නාට්‍ය උළෙලේ කැපී පෙනෙන කාන්තා චරිත තුනක් අපට මුණගැහෙනවා. කෙටි නාට්‍යය අංශයෙන් එකම නාට්‍යය වෙනුවෙන් මේ තිදෙනා රාජ්‍ය නාට්‍ය උළෙලේ සම්මානයට පාත්‍ර වනවා. ඒ කෙටි නාට්‍ය අංශයේ හොඳම නිළිය සම සම්මාන දිනා ගන්න යුවතියන් දෙදෙනා සහ එම කෙටි නාට්‍ය අධ්‍යක්ෂණය කළ අනෙක් සුවිශේෂී යුවතිය ලෙසින්. අපේ රටේ නන් දෙසින් අග නගරයට සේන්දු වන තරුණ තරුණියන් අතර දේදුනු සංගීතා, තිලංකා වික්‍රමසිංහ සහ බුද්ධිමා අබේසිංහ අභියෝගාත්මක චරිත තුනක් විදිහට හැඳින්වීම අතිශයෝක්තියක් නොවේ.
‘FEMALE‘නාට්‍යයේ වස්තු බීජය ගොඩනැඟෙන්නේ මේ නාට්‍යයේ අධ්‍යක්ෂකවරිය වන දේදුනු සංගීතා කළුපහන ගේ මනස තුළ. ප්‍රසිද්ධ වේදිකාවට අභියෝගාත්මක තේමාවක් ගෙන එන ඇගේ පසුබිම ගැන ඇය මෙහෙම කිව්වා.
"මගේ ගම වලපනේ නිල්දණ්ඩාහින්න. මූලික අධ්‍යාපනය ලබන්නේ නිල්දණ්ඩාහින්න සුමංගල ජාතික පාසලේ. අනතුරුව මම ගිරිඋල්ල වික්‍රමශීලා ජාතික පාසලට ඇතුළත් වෙනවා. පස්සෙ මහනුවර රිසිකලා සෞන්දර්ය පාසලේ උසස් පෙළ කරලා, වැඩිදුර අධ්‍යාපනයට කොළඹට එනවා.
කැලණිය විශ්ව විද්‍යාලයේ බාහිර කලා උපාධිය හදාරන අතරතුර එහි ‘Theater Players‘ නාට්‍ය කණ්ඩායම එක්ක කටයුතු කරන්න මට අවස්ථාවක් ලැබෙනවා. මම මුලින්ම නිෂ්පාදනය කරන‘Same As Before‘වේදිකා නාට්‍ය එම නාට්‍ය උළෙලේ හොඳම නාට්‍ය බවට පත් වනවා. ඉන් අනතුරුවයි මම ‘FEMALE‘නිෂ්පාදනය කරන්න තීරණය කරන්නේ. කෙටි නාට්‍ය දෙකෙන්ම මම කතා කරන්නේ අපේ සමාජයේ ඉන්න කාන්තාවන් ගැන. එයට යෞවන සම්මාන උළෙලේ සම්මාන හතක් හිමිවෙනවා. රාජ්‍ය නාට්‍ය උළෙලේ හොඳම නිළිය සම සම්මාන සහ හොඳම අධ්‍යක්ෂණය තෙවැනි ස්ථානය මේ නාට්‍යය වෙනුවෙන් හිමිවෙනවා."
මේ නාට්‍යයේ සිටින්නේ නිළියන් දෙදෙනයි. ඉන් සම සම්මානය ලබා ගන්නා ඇය තිලංකා වික්‍රමසිංහයි.
"මගේ ගම මාතලේ හඳුන්ගමුව. හඳුන්ගමුව නවෝද්‍යා පාසලෙන් අනතුරුව මහනුවර රිසකලා සෞන්දර්ය පාසලට ඇතුළත් වෙනවා. උසස් පෙළ සමත්ව කොළඹ විශ්වවිද්‍යාලයේ ශ්‍රීපාලි මණ්ඩපයේ නාට්‍ය හා රංග කලාව පිළිබඳ උපාධිය හදාරනවා. ඒ අතරතුරයි නාට්‍යකරණයට යොමුවන්නේ". ඇය එසේ කතාවට මුල පුරද්දි හොඳම නිළිය සම සම්මානයට හිමි කම් කියන්නිය
බුද්ධිමා අබේසිංහ ද ඒ කතා බහට එකතු වුණා.
“මගේ ගම රත්නපුර වේවැල්වත්ත. මම හොරණ ශ්‍රීපාලි විද්‍යාලයෙන් මූලික අධ්‍යාපනය හැදෑරුවේ. උසස් පෙළට රත්නපුර ෆර්ගියුසන් බාලිකා විද්‍යාලයට ඇතුළු වුණා. අනතුරුව කැලණිය විශ්වවිද්‍යාලයෙන් උපාධිය සම්පූර්ණ කරලා දැනට ගුරුවරියක් විදිහට සේවය කරනවා."
මේ තිදෙනාම එකිනෙකා දැන හඳුනගන්නෙ නාට්‍ය කලාවේ තියෙන අපූර්වතම සෞන්දර්ය චාරිකාව අතරතුර. ‘FEMALE‘නාට්‍යය ඔවුන් ගේ හෘද ස්පන්දනය බවට පත් වන්නේ මේ නාට්‍යයෙන් ඔවුන් කතා කරන්නේ ඔවුන් ගැනම වීම නිසයි. දේදුණු යළිත් සංවාදයට එක්‌ වෙන්නේ මෙම නාට්‍යයේ අධ්‍යක්ෂවරිය ලෙස ඒ අත්දැකීම පවසන්නයි.
“නාට්‍ය පිළිබඳ මට ඇත්දැකීම් ලැබෙන්නේ පාසල් කාලෙදීමයි. සමස්ත ලංකා පාසල් නාට්‍ය උළෙලේ හොඳම නිළිය සම්මානය දෙවරක් සහ රාජ්‍ය ළමා නාට්‍ය උලෙළේ හොඳම නිළිය විදිහට ඇගැයීමට ලක් වුණා. නාට්‍ය කලාව සාමූහික කලා මාධ්‍යයක්. අපට එතැනදි එකට වැඩ කරන හොඳ යාළුවෝ පිරිසක් අවශ්‍ය වෙනවා.
මගේ මුල්ම කෙටි නාට්‍යට තේමාව වුණේ දරුඵල අහිමි මඳසරු භාවයට පත් වන්නේ අපේ සමාජයේ ස්ත්‍රිය පමණක්ද කියන කාරණය. සම්මත සදාචාර රාමුව තුළ මේ ප්‍රස්තුතය සාකච්ඡා කිරීම මට අභියෝගයක් වුණා. යක් බෙරය පාවිච්චි කළ අවස්ථාවක් සහ මෙහි ඇතැම් ග්‍රාම්‍ය දෙබස් නාට්‍යයට යොදා ගැනීම අත්‍යවශ්‍ය වුණා. ඒ පිළිබඳ ඇතැම් විනිශ්ච මණ්ඩල විද්වතුන් පවා මට අවධාරණය කරපු අවස්ථා තියෙනවා. නමුත් මම යෝජනා කරන්නේ මෙය නිර්මාණාත්මක
ප්‍රකාශනයක්. එය ඒ විදිහට බාර ගන්න කියලයි.".....
තිලංකා රඟපෑවේ අභියෝගාත්මක චරිතයකි. ඒ ගැන ඇයට ද කියන්නට කතාවක් ඇත..
"දේදුණු ගේ නාට්‍ය පිටපත ලැබුණම ඇත්තටම මට තිගැස්මක් ඇති වුණා. සමාජයෙන් ලැබෙන ප්‍රතිචාර ගැන මම ඒ වෙලාවේ කල්පනා කළා. පෙර පුහුණුවීම් අතරතුර නාට්‍යයෙන් පිටත ඉඳලා මේ නාට්‍ය බලපු අය දක්වන ප්‍රතිචාර තුළ චරිතය ගැන මට විශ්වාසයක් ගොඩ නැගුණා. දක්ෂ අය ගොඩාක් හිටියා. ඒ නිසා සම්මානයක් ගැන නම් බලාපොරොත්තු තියා ගත්තේ නැහැ. ඒත් සම්මානය අතට ගනිද්දි දැනුණු බර නම් තවමත් හිතේ තියෙනවා. මේ නිර්මාණය වගේම හොඳ නිර්මාණය ඔස්සේ ප්‍රේක්ෂකයා අතරට යන්න දැන් අනිවාර්යයෙන්ම සිද්ධ වෙනවා.
තිලංකා තම කතාව එසේ අවසන් කරද්දි බුද්ධිමාට තමා එක්වූ නිර්මාණය හා ලැබූ සම්මානය ගැන තිබුණෙ මෙහෙම අදහසක්..
"දේදුනු මට දුන්න චරිතය ටිකක් අභියෝගාත්මකයි. ඇය නමින් පාතිමා. පාතිමා ජීවත් වන්නේ ඇගේ සංස්කෘතික වටපිටාවක් තුළ. ජාති ආගම් බේදයකින් තොරව කාන්තාව සමාජයේ දුක් ගැහැට විඳින බව අපි දන්නවා. ඒ නිසා සමස්ත ගැහැනුන් පිළිබඳ කතාවක් විදිහටයි මම මේ නාට්‍ය දකින්නේ. කසාද බැඳපු කාන්තාවක් වුණත් තමන්ගේ ගෙදරදී ම ඇතැම් විට දූෂණයට ලක් වෙනවා. මෙය සමාජයේ එක්තරා හරස්කඩක්. මේ පරීක්ෂණාත්මක වැඩේදි අපිට බොහෝ දේවල් හොයන්න වුණා. අපි නොදන්න සංස්කෘතීන් ගැන යාළුවන්ගෙන් දැන කියා ගන්න වුණා. ඒ සියල්ලටම ලැබුණු අගය කිරීමක් තමයි මේ සම්මානය. මම වඩාත්ම සතුටු වෙන්නේ අප තිදෙනාටම එකම වේදිකාවක සම්මාන ලබා ගන්න හැකි වීම. එය ජීවිතයේ අමතක නොවන අත්දැකීමක්.
