අපේ රටේ යෞවන සම්මාන නාට්ය උලෙළේ වගේම රාජ්ය නාට්ය උලෙළේ තුළ කෙටි නාට්ය අංශයේ හොඳම නාට්ය විදිහට ඇගයීම් සම්මාන ලැබූ තරුණ නාට්යකරුවන් තිදෙනෙකුගේ කෙටි නාට්ය තුනක් මෙවර "ප්රේක්ෂා රංග කලා මහෝත්සවයෙ දි “ ප්රේක්ෂකයන්ට ළං කරන්නට සූදානම්.
එක් නලීන් ලූසේනා. ඔහු කැලණිය විශ්වවිද්යාලයට ඇතුළත්ව නාට්ය හා රංග කලාව පිළිබඳ විශේෂවේදී උපාධියක් හදාරා නාට්ය හා රංග කලාව පිළිබඳව කථිකාචාර්යවරයෙක් විදිහට කටයුතු කරනවා. දෙවැන්නා ඉන්දික සඳරුවන්. ටවර් හෝල් රංග කලා පාඨමාලාව හදාරන්න කොළඹට එන ඔහු මේ වන විට කැලණිය විශ්වවිද්යාලයේ පුස්තකාල විද්යාව පිළිබඳව බාහිර උපාධිය හදාරනවා.
අනෙක් තරුණයා සඳුන් ලක්ෂාන. ඔහු ජාතික තරුණ සේවා සභාවේ නාට්ය හා රංග කලා පාඨමාලාව සහ ටවර් හෝල් නාට්ය පාසලේ නාට්ය හා රංග කලාව හදාරනවා. අධ්යාපනවේදී උපාධිය දෙවන වසර සම්පූර්ණ කරමින් ඉන්නවා .
මේ තරුණයන් තිදෙනාගේම නිර්මාණ ජාතික තලයේ ඇගයීමට ලක් වුණා. ඒ නිර්මාණයන් නැවත ජනතාව අතරට රැගෙන යන්න ප්රේක්ෂා රංග කලා උලෙළේදී හැකි වුණා. ඒ බලාපොරොත්තු සහගත නිර්මාණ ගැන එම නිර්මාණකරුවන් සමඟ කතා කරන්න අප උත්සාහ කරන්නේ ඒ නිමිතිකර ගෙනයි. මුලින්ම අපි සංවාදයට එක් වෙන්නෙ රාජ්ය සම්මාන කෙටි නාට්ය උලෙළේ හොඳම නාට්ය ලෙස සම්මාන ලැබූ "නොකියා හිටපු දෙයක්" කතාව අධ්යක්ෂණය නලීන් ලුසේනා සමඟ කළා.
"තාරුණ්ය තුළ ආදරය පුළුල් තේමාවක්. පවුල, කුටුම්භය කියන අර්ථයෙන් ගත්තහම වර්තමානයේ පුද්ගලයන් එකිනෙකාට දක්වන ගෞරවය, ආදරය පිළිබඳ වන වගකීම මේ නාට්යයෙන් ප්රශ්න කරනවා. වර්තමාන සමාජ ක්රමය තුළ සංස්කෘතිය කියන කාරණාව ජීවිතයත් එක්ක කරන හැලහැප්පීම පිළිබඳයි නාට්ය තුළ අන්තර්ගත වන තේමාව වන්නේ. විශේෂයෙන් මේ නාට්ය මා අතින් ලියවෙන්නේ අද සමාජයෙ සිදුවීම් එක්ක මට ඇති වුණ කම්පනය.
ඉන්දික සඳරුවන් අතින් නිර්මාණය වන කෙටි නාට්ය "ලෙටර්"... එය රාජ්ය කෙටි නාට්ය උලෙළේ දෙවන ස්ථානය දිනා ගන්නවා. "මේ නාට්යයයේ තේමාව යොවුන් ප්රේමය. නාට්ය එක්තරා ආකාරයක පරීක්ෂණාත්මක අත්හදා බැලීමක්. නාට්ය නිර්මාණය වන්නේ ඔස්ට්රේලියානූ කෙටිකතා කරුවකු වන මාර්ක් වෝකර්ගේ "පෙම් හසුන" කෙටිකතාව ආශ්රයෙන්.
මෙයට මම මූලාශ්ර කර ගන්නේ යුනෙස්කෝ සංවිධානය කළ එක්තරා කෙටිකතා කෘතියක්. මං කැමතියි මේ නාට්යය නරඹලම ප්රේක්ෂකයන් ඔවුන්ගේ ප්රතිචාර අපිත් සමඟ බෙදා හදා ගන්නවා නම්." සඳුන් ලක්ෂාන් අධ්යක්ෂණය "නයිට් ඩියුටි" රාජ්ය කෙටි නාට්ය උලෙළේ තෙවැනි ස්ථානය දිනාගන්නවා.
"මෙහි තේමාව එක්තරා තරුණයකුගේ විරැකියාව පිළිබඳ අත්දැකීමක්. අද පවතින ආර්ථිකය තුළ සියලුම සමාජ අර්ථ මුදලට විකිණෙමින් තියනවා. මෙහි නාට්ය පෙළ රචනා වන්නේ සුරේෂ් මධුෂාන් අතින්".
ඔබට කිසියම් ආකාරයක කුකුසක් දැනටමත් ඇති. ලබන 16 වෙනිදා මෙම කෙටි නාට්ය තුන එක පෙළට 3.30 සහ 6.30 දර්ශනවාරවල ප්රදර්ශනය වෙනවා. අපේ රටේ නිර්මාණශීලී තරුණයන්ට එක්තරා පණිවිඩයක් මින් ලැබෙනවා.
සමාජයේ තරුණ පිරිසක් එක් අනන්තයකට ගිහින් සමාජ විරෝධී ව්යසනයන්ට අවාසනාවන්ත ලෙස ගොදුරු වෙද්දී, මෙවැනි තරුණයන් තමන්ගේ නිර්මාණ හරහා මේ ව්යසනකාරී සමාජය දෙස බලන්න උත්සාහ කරනවා. ඒ උත්සාහය පවා අප්රමාණ ඇගයීමට ලක් කළ යුතුයි. පසුගිය කාලේ කොරෝනා තත්ත්වයත් එක්ක අපේ තරුණයනුත් එක්තරා ආකාරයට ඉච්ඡාභංගත්වයට පත් වුණා. "ප්රේක්ෂා රංග කලා මහෝත්සවය" ඔවුන්ට නැවත හොඳ උත්තේජනයක්.
නලීන් ලුසේනා ඒ ගැන පළ කළේ මෙහෙම අදහසක්... "තරුණයන් විදිහට අපි නොහිතපු පියවරක් මේක. ඇත්තටම අපි කල්පනා කරමින් හිටිය කොහොමද ආයිත් ලංකාවේ නාට්යය පෙන්වන්න පටන් ගන්නෙ කියලා. රඟහලට කොරෝනා හැදුනේ මීට බොහෝ කලකට පෙරදී. ටවර් හෝල් රඟහල පදනම මේ ගත්ත තීරණය සාධනීයයි.
ඒ වගේම කෙටි නාට්ය කරුවන් අමතක නොකිරීමත් එහිදී ඉතාමත් වැදගත්. ජනතාව වෙනදාටත් වඩා උනන්දුවෙන් නාට්ය එක්ක එකතු වෙනවා. ටවර් හෝල් පදනමේ අධ්යක්ෂ ජනරාල් ඩග්ලස් සිරිවර්ධන මහත්මාට සහ සියලුම කාර්ය මණ්ඩලයට මා ස්තූතිවන්ත වෙනවා." ඉන්දිකගේ අදහස ටිකක් වෙනස්,
"ලංකාවේ නාට්ය ප්රේක්ෂාගාරය වෙත ගියාම අපි දකින දෙයක් තමයි ජනප්රිය නළු නිළියන් සිටින නාට්යවලට හොඳ ප්රේක්ෂක පිරිසක් ඉන්නවා. අලුත් පරම්පරාවේ නාට්ය කරුවන්ගේ නිර්මාණ වලට මෙවැනි ඉඩකඩක් නිර්මාණ වෙනවා අඩුයි. ආරාධනා කරනවා තරුණ නාට්ය කරුවන්ගේ නිර්මාණත් නරඹා ප්රතිචාර දක්වන්න කියලා."
අනතුරුව සදුන් ලක්ෂාන් පළ කළේ මෙවැනි අදහසක්. අද නාට්ය මාර්කට් කරන සුළු පිරිසක් ඉන්නවා. නාට්යකින් මිනිස්සුන්ට පුළුල් වින්දනයක් ලබා දෙන්නට පුළුවන්. එවන් පසුබිමක සතුටුයි මේ අවස්ථාව ලැබීම ගැන. මේ ලැබුණු අවස්ථාව සම්බන්ධයෙන් මා බෙහෙවින්ම ස්තුතිවන්ත වෙනවා.