ග්‍රන්ථය - ශ්‍රී ලාංකේය පාරිභෝගික ජීවන රටා
සහ මුද්‍රිත මාධ්‍ය වෙළඳ දැන්වීම්
කර්තෘ - ප්‍රභාත් චින්තක මීගොඩගේ
කර්තෘ ප්‍රකාශනයකි
මිල -රු.950 (පිටු 460)
ලොව වාණිජ පැවැත්ම නිර්මාණය වුයේ අද බහුලව කතා කරන ගෝලීයකරණය යන හැසිරීමටත් පෙර සිට ය. ලෝක යුද්ධ දෙකක් මුලික වශයෙනුත් කලාපීය යුද ගැටුම් බහුල වශයෙනුත් ඇති එකී වාණිජ පැවැත්මේ වෙළඳ පළ බෙදා ගැනීම මුල් කොටගෙන ඇති වුවක් විය. ගෝලීයකරණය යනු මේ ඵෙතිහාසික ක්‍රියාවලියේ දේශ සීමා නැති කර දැමු නව වාණිජත්වයක් බව පැහැදිලිය.
ඒත් සමඟම එනම් ගෝලීයකරණය තුළ නිර්මාණය වන වෙළඳපොළ අලෙවිකරණය යන්න ප්‍රචාරණ මාධ්‍යය හරහා අසීමාන්තික තරගයක් ඇති කර ගැනීමක් වීම ද වැළැක්විය නොහැක්කක් බවට පත්ව තිබේ.
එවැනි පසුබිමක් තුළ ගෝලීයකරණය යන්න විෂයබද්ධ හැදෑරීමක් ලෙසින් ගතහොත් එහිලා ජාත්‍යන්තර වෙළඳාම, අලෙවිකරණය, සන්නිවේදනය, වෙළඳ ප්‍රචාරණය යන විෂයන් අන්තර් සංස්කෘතික පාදමක් මත අධ්‍යයනය කිරීම විශ්ව විද්‍යාල මට්ටමේ විෂය අධ්‍යයනයක් හැටියට සිදු වෙමින් පවතී.
ඔවුන් පවසන අන්දමට ඒ හා සම්බන්ධ විශ්ලේෂණ කටයුතු විෂයයිකව නව උපාය මාර්ග නිර්මාණය කෙරෙමින් ද පවතී.
මෙරට විශ්වවිද්‍යාල පද්ධතියට අදාළව ගතහොත් සන්නිවේදන කළමනාකණය හා අලෙවිකරණ සම්බන්ධ උපාධි මෙන්ම පශ්චාත් උපාධි පාඨමාලා මට්ටමින් උගන්වනු ලැබුව ද එකී විෂය රාමුව තුළ සිදුවන අධ්‍යයන පර්යේෂණ ඉතා අවම මට්ටමකින් පවතී යැයි පැවසේ.
“ශ්‍රී ලාංකේය පාරිභෝගික ජීවන රටා සහ මුද්‍රිත මාධ්‍ය වෙළඳ දැන්වීම්” යනුවෙන් ජන සන්නිවේදනය පිළිබඳ සිය ශාස්ත්‍රපති උපාධිය වෙනුවෙන් කැලණිය විශ්ව විද්‍යාලයේ ප්‍රභාත් චින්තක මීගොඩගේ විසින් සම්පාදිත කෘතිය ගැන අදහසක් පළ කරන්නවුන් මුලින් කී අදහස් ගැන ද සැලකිලිමත් වීම අදාළ වීෂය වෙනුවෙන් පෙනී සිටින විද්‍යාර්ථීන්ට ද වැදගත් වනු ඇතැයි සිතමි.
සිය විශ්වවිද්‍යාල පර්යේෂණ කටයුතු පාදක කර ගනිමින් ඔහු විසින් රචිත යථොක්ත කෘතිය පිළිබඳ නිසි විමසුම් විශ්වවිද්‍යාල ආචාර්යවරුන් අතින් ම වන්නේ නම් එය ද අදාළ විෂය උගන්නා විද්‍යාර්ථීන් හමුවේ අධ්‍යයන පර්යේෂණ පහසුකම් සැලසීමක් වනු ඇත. ඇත්ත වශයෙන්ම කියනවා නම් සිදුවිය යුත්තේ ද එය යි.
