කොරෝනා වයිරසය පැතිර යාමත් සමඟ ප්‍රසංග කලාවට පමණක් නොව ප්‍රාසාංගික කලාවේ නියුතු කලාකරුවන්ට ද කණ කොකා හැඬුවේ යැයි කීවොත් වරදක් නැත. විශේෂයෙන්ම පැඳුරෙන් බිමට වැටුණු වේදීකා නට්‍ය ශිල්පීන් ශිල්පීනියන් මෙන්ම ඒ ක්ෂේත්‍ර යේ නියුතු වුවන් සඳහා යම් සහනයක් ලබාදීමේ අරමුණ ද ඇතිව ප්‍රේක්ෂකයන් යළිත් ප්‍රේක්ෂකාගාරය වෙත කැඳවන්නට ටවර්හොල් රඟහල පදනම විසින් ප්‍රේක්ෂා නාට්‍ය උළෙල සංවිධානය කරන ලදී. ඉකුත් 24 වැනිදා සිට 30 දක්වා ටවර් රඟහලේදී සහ එල්ෆින්ස්ටන් රඟහලේදී පැවැති ප්‍රේක්ෂා නාට්‍ය උලෙළ බොහෝ සාර්ථක වූ බව ප්‍රවීණ නාට්‍යවේදී ටවර්හෝල් රඟහල පදනමේ අධ්‍යක්ෂ ජනරාල්, ටෙලි නිර්මාණ වේදීන්ගේ සංසදයේ සභාපති ‘ප්‍රේක්ෂා‘ නාට්‍ය උලෙළේ සංවිධායක නිතීඥ ඩග්ලස් සිරිවර්ධන මහතා පවසයි.
“ අපි මෙම නාට්‍ය උලෙළ සංවිධානය කරද්දි ඇතැම් අය අපට කිව්වා මෙය සාර්ථකව කර ගන්නට බැරි වේවි කියලා.
නමුත් මම අද බොහෝම සතුටින් කියන්නේ අපි හිතුවාටත් වඩා මේ උලෙළ සාර්ථක වුවා . පවුල් පිටින් නාට්‍ය නරඹන්නට ආවා. ජනතාව කුමන අපහසුතා මැද්දේ වුවත් මේ සඳහා සහභාගි වීමම අගය කළ යුත්තක්.
ඒ වගේම නාට්‍ය පුහුණු වීමට වගේම නාට්‍ය රඟ දැක්වීමට ඒ අවශ්‍ය භාණ්ඩ නළු නිලියන් ප්‍රවාහණය කිරීම පදනමේ අනුග්‍රහයෙන් කළේ. නාට්‍ය පැවැත්වෙන දින ඇතුළත් දැන්වීම් ගැහුවේ, ඒවා ඇවේවේ පදනමෙන්. ඊට අමතරව ටිකට්පත් වලින් ලැබුණ ආදායමට තවත් රුපියල් 50000 එක්කර තමයි අපි මේ අයට ගෙවීම් කළේ . මාස ගණනකට පස්සේ නළු නිලියන්ට ඒ අදාල ශිල්පීන්ට යම් මුදලක් අතට ලැබුණ බවයි මගේ හැඟිම.
මෙම නාට්‍ය උලෙළේදී සුබ සහ යස, හංකිති දහතුන, බෙරහඬ, මධුර ජවනිකා, ආදි වු නාට්‍ය දාහතරක් පෙන්වනු ලැබුවා. නැවතත් සැප්තැම්බර් මාසයේ මෙම නාට්‍ය උලෙළ පැවැත්වීමට අපි අදහස් කරගෙන සිටිනවා. වෛද්‍ය උපදෙස් අනුව තමයි අප මේ නාට්‍ය උළෙල පැවැත් වූවේ. ලෝකයේ ඇතැම් රටවල මිනිස්සු නාට්‍යයක් බලන්නවත් එළියට බහින්නේ නැති කාලයක තමයි අපි ප්‍රේක්ෂා නාට්‍ය උලෙළ පැවැත්වුවේ. එය සාර්ථක වීම අපිට සතුටක්.
ඩග්ලස් සිරිවර්ධනයන් පවසන්නේ ඉකුත් දා නිමා වූ නාට්‍ය උලෙළ ගැනය.
“අපේ රටේ ප්‍රේක්ෂකයෝ බොහෝම සංවේදියි. මට නම් හැගෙන්නේ ඔවුන් මේ වගෙයි කියලා .ඉස්සර නම් බෝම්බයක් පිපිුරුවොත් එළියට බහින් බයයි.
රටේ යම් කලබලයක් ඇති වුණොත් අපේ මිනිස්සු එළියට බහින්න බයයි. ඉස්සර උදේ දවල් රෑ දර්ශන වාර තුනක් චිත්‍රපට පෙන්නපු රටක් මේක. උදේ පාන්දර ඉදන් රෑ වෙනතුරු බස් දුවපු රටක් මේක.
නමුත් කොරෝනා වසංගතයත් එක්ක ඒ හැමදේම පහුගිය කාලේ වෙනස් වුණා. එවන් යුගයක තමයි අපි මේ ප්‍රේක්ෂා පෙන්නුවේ. මේ නාට්‍ය උළෙල බලන්න බොහෝ ප්‍රේක්ෂකයන් පැමිණිම අපට සතුටක්. නමුත් මෙහෙම ප්‍රශ්නයකුත් තියෙනවා.
නාට්‍ය බලන්නට පැමිණියේ සාමාන්‍ය ප්‍රේක්ෂකයෝ. එහෙම නැතිව නාට්‍ය ගැන හදාරණ අය, ඒ පිළිබද උගන්වන අය හෝ ඒ ක්ෂේත්‍රය නියෝජනය කරන අයනොවේ. ඉතාම ප්‍රශස්ථ නාටය කිහිපයක් පෙන්වමින් අප කළේ නාට්‍යකරුවන් මෙවන් අවස්ථාවක දිරි ගැන්වීමයි.
ප්‍රේක්ෂා දෙවෙැනි අදියර මීටත් වඩා සාර්ථක වේවි කියලා අප බලාපොරොත්තු වෙනවා. ඒ වගේම සෑම අවුරුද්දකම මේ නාට්‍ය උලෙළ මීටත් වඩා සාර්ථකව පැවැත්වීමයි අපේ බලාපොරොත්තුව. ටවර්හොල් රඟහල පදනමේ සභාපතිධුරය දරන්නේ බුද්ධශාසන, සංස්කෘතික හා ආගමික කටයුතු ඇමැති මහින්ද රාජපක්ෂ මැතිතුමා. අපට මේ වැඩ පිළිවෙල සඳහා එතුමාගේ පුර්ණ අනුග්‍රහය සහයෝගය ලැබුණා. ඒ වගේම සංස්කෘතික අමාත්‍යාංශයේ ලේකම් බන්දුල හරිස්චන්ද්‍ර මහතා මේ වැඩසටහනේ අධීක්ෂණ කටයුතු සිදු කෙරුවා.“
ඩග්ලස් සිරිවර්ධනයන් පවසන්නේ මාස පහකට ආසන්න කාලයක් මකුළුදැල් බෑදි පාළුවට ගොස් තිබු රංග ශාලා වල යළිත් ඔල්වර සන් දෙමින් නාට්‍ය විදින්නට ප්‍රේක්ෂකයාට ප්‍රේක්ෂා නාට්‍ය උලෙළ පැවැත්වීමේ සතුට සිතැතිවය.
