මහ මැතිවරණයෙන් පසුව එජාපයේ හා සමඟි ජන බලවේගයේ ප්‍රබලයන් රැසක් ශ්‍රී ලංකා පොදුජන පෙරමුණ සමඟ එකතු වීමට තීරණය කර ඇතැයි විශ්වාස කටයුතු ආරංචි මාර්ගවලින් දැනගන්නට ලැබී තිබේ. මේ පිළිබඳ සාකච්ඡා වට දෙකක් ඉකුත් සතියේ පැවැති අතර ඉන් එක් සාකච්ඡාවක් කොළඹදී සහ අනෙක් සාකච්ඡාව මහනුවරදී පවත්වා තිබෙන බව දේශපාලන ආරංචි මාර්ග ඊයේ අනාවරණය කෙළේය. මෙම සාකච්ඡාවට එජාපයේ සහ සමඟි ජන බලවේගයේ ප්‍රබලයන් 6 දෙනකු සහභාගි වී ඇති බව කියති.
මහ මැතිවරණයෙන් පසුව ආණ්ඩුවට තුනෙන් දෙකක බලයක් නොලැබුණහොත් නව ආණ්ඩුක්‍රම ව්‍යවස්ථාවක් සම්පාදනය කිරීම සඳහා රජයට සහාය දීම ආණ්ඩුවට එක් වන විපක්ෂ මන්ත්‍රීවරුන්ගේ අරමුණ වී ඇත.
මේ පිළිබඳ කළ විමසීමේදී ශ්‍රී ලංකා පොදු ජන පෙරමුණේ ප්‍රකාශකයකු සඳහන් කෙළේ රජයක් ක්‍රියාත්මක කිරීම සඳහා වෙනත් දේශපාලන පක්ෂයන්හි පත්වන මන්ත්‍රීවරුන් සමඟ සන්ධානගත වීමේ අභිලාෂයක් නොමැති වුවද රටට හිතකර වන ලෙස ආණ්ඩුක්‍රම ව්‍යවස්ථාවේ සංශෝධන සකස් කර ගැනීම සඳහා අවස්ථානුකූලව සාකච්ඡා කිරීමට සූදානම් බවය.
