හොර චෙක්පත් මුද්‍ර­ණ­යෙන් ලක්ෂ 430ක් කොල්ල කැ හැටි | සිළුමිණ

හොර චෙක්පත් මුද්‍ර­ණ­යෙන් ලක්ෂ 430ක් කොල්ල කැ හැටි

කොරෝනා වසංගතයෙන් රටම වෙළාගෙන තිබුණද මිනීමරුවන්, අපරාධකාරයන්, කොල්ලකරුවන් මෙන්ම කප්පම්කරුවන්ගේ 'ගේම්'වල කිසිදු අඩුවක්නම් දක්නට නොවේ. පසුගියදා අනුරාධපුරයේ බැංකුවක ඒටීඑම් යන්ත්‍රයකට ඇතුළු කිරීම සඳහා ගෙන ආ රුපියල් ලක්ෂ 120ක මුදලක්ද කොල්ලකරුවන් පිරිසක් කොල්ලකා පලා යාමට තැත් කළත් පැමිණි ආරක්ෂක නිලධාරියාගේ සහ බැංකු නිලධාරියාගේ අභීත ක්‍රියාදාමය නිසාවෙන් කොල්ලකරුවන්ට පලා යාමට වූයේ හිස් අතිනි.

එසේම රත්නපුර ප්‍රධානතම පෞද්ගලික රෝහලකින්ද කප්පම්කරුවෙක් ලක්ෂ එකහමාරක කප්පම් මුදලක් ගැනීමට තැත් කළේය. ඒ එම රෝහල් ගේට්ටුව අසල නිසි පරිදි මුව ආවරණ නොපලඳා ආරක්ෂක නිලධාරියෙකු රාජකාරි කරන ආකාරය වීඩියෝගතකොට සමාජ මාධ්‍යයටද මුදා හරිමිනි.

එලෙස අමුතුම තාලේ කප්පම්කරුවන්ද බිහිව ඇති සමයක තවත් මහා පරිමාණ මූල්‍ය වංචාවක් සිදුව තිබුණේ චෙක්පත් ව්‍යාජ ලෙස මුද්‍රණය කරමිනි. මෙරට ප්‍රධානතම පෞද්ගලික බැංකුවක පවත්වාගෙන යන මෙරට ප්‍රධානතම වානේ කම්බි නිෂ්පාදිත සමාගමක් වන මෙල්වා සමාගමේ ගිණුමකට අදාළව චෙක් පොතක් ව්‍යාජ ලෙස මුද්‍රණයකොට එම චෙක්පත් භාවිත කරමින් කොල්ලකරුවන් පිරිසක් සිදුකර තිබුණේ සුළුපටු මූල්‍ය වංචාවක් ‍නොවේ. ඒ, රුපියල් ලක්ෂ 430ක මුදල් ප්‍රමාණයක් ලබා ගනිමිනි.

කොල්ලකරුවන් පස්දෙනකු පසුගිය 12 වැනිදා පෙරවරුවේ පැය තුන හතරක කාලසමයක් තුළ මූල්‍ය ආයතනයේ ශාඛා හයකට ගොස් ව්‍යාජව මුද්‍රණය කළ චෙක්පත් ඉදිරිපත් කරමින් එම මූල්‍ය වංචාව සිදුකර තිබුණේ ව්‍යාජ චෙක්පත් මුද්‍රණය කරමින් මෙරට ඉතිහාසයේ සිදුකළ පළමු මූල්‍ය වංචාව සනිටුහන් කරමිනි.

පොලිස් අපරාධ පරීක්ෂණ දෙපාර්තමේන්තුව (CID) සිදුකළ තවත් සියුම් විමර්ශනයකින් පසු එම මූල්‍ය වංචාවේ සියලු තතු අනාවරණය කරගනිමින් ඊට මුල්වූ ප්‍රධානීන් සියලු දෙනාම පසුගිය 01 වැනිදා අත්අඩංගුවට ගැනීමට සමත් වූයේ කෙතරම් සුපරීක්ෂාවෙන් කොල්ලකෑම් සිදුකළද අතිදක්ෂ විමර්ශකයන්ගෙන් වසන් විය නොහැකි බව පසක් කරමිනි.

අලුත් අවුරුදු සමයෙන් පසුව පසුගිය 17 වැනිදා මෙල්වා සමාගමේ සේවකයෝ සේවයට වාර්තා කළහ. එදින එහි ගිණුම් අංශ සේවිකාවක් පෞද්ගලික බැංකුවක පිටකොටුව, පරණ යොන් වීදිය ශාඛාවේ පවත්වාගෙන ගිය සමාගමේ විදුලි බිල්පත් සහ රක්ෂණ වාරික ගෙවීමටම වෙන්වූ ගිණුම පිළිබඳව පරීක්ෂා කළාය. එම ගිණුමේ කෝටි ගණනක මුදල් තැන්පතුවක් විය. ගිණුම පිරික්සූ ඇය තුෂ්ණිම්භුත වූවාය. ඒ පසුගිය 12 වැනිදා ගිණුමෙන් රුපියල් ලක්ෂ 430ක මුදලක් අඩුවී ඇති බව දුටු හෙයිනි. සිය සමාගමේ වගකිවයුතු කිසිවකුත් නොදැන ඒසා මුදල් කන්දරාවක් ගිණුමෙන් අඩුවීම පිළිබඳව වහා බැංකු ශාඛාව අමතා විමසන්නටද ඇය කටයුතු කළාය. එහිදී අනාවරණය වී තිබුණේ බැංකුවේ ශාඛා 6කින් පසුගිය 12 වැනිදා පෙරවරුවේ පැය තුන හතරක කාල පරාසයක් තුළ එම මුදල් ප්‍රමාණය අඩුවී ඇති බවයි. බැංකු ශාඛාවන්ද එම මුදල් නිකුත් කර තිබුණේ ගිණුම හිමි ශාඛාවෙන්ද කිසිදු විමසීමකින් තොරවය. එහෙත් ගිණුමට අදාළව 2019 වසරේදී මෙල්වා සමාගමට නිකුත් කළ චෙක්පොතේ චෙක්පත් 6ක් එම මුදල් නිකුතුවට බැංකුවට ලැබී තිබිණි.

සමාගමේද අභ්‍යන්තර විමර්ශනයක් සිදුවෙද්දී මූල්‍ය වංචාව පිළිබඳව පොලිසියට පැමිණිලි කෙරිණි. පසුව පසුගිය 23 වැනිදා මෙල්වා සමාගමේ අධ්‍යක්ෂ මණ්ඩල සාමාජිකයකු විසින් අපරාධ පරීක්ෂණ දෙපාර්තමේන්තුවේ නව අධ්‍යක්ෂවරයා ලෙස පත්වූ ජ්‍යෙෂ්ඨ පොලිස් අධිකාරි රොහාන් ප්‍රේමරත්නට එම මූල්‍ය වංචාව පිළිබඳව පැමිණිලි කළේය.

සිදුව ඇති මහා පරිමාණ මූල්‍ය වංචාව පිළිබඳව අධ්‍යක්ෂවරයා විසින් සීඅයිඩීය බාර නියෝජ්‍ය පොලිස්පති ප්‍රසාද් රණසිංහද දැනුවත් කිරීමෙන් පසු නියෝජ්‍ය පොලිස්පතිවරයාගේ උපදෙස් මත කොල්ලකරුවන් අත්අඩංගුවට ගැනීමට සූක්ෂ්ම සැලැසුමක් දියත් කෙරිණි. ඒ අනුව සීඅයිඩීහි මූල්‍ය හා වාණිජ අපරාධ විමර්ශන අංශ ස්ථානාධිපති ප්‍රධාන පොලිස් පරීක්ෂිකා රසංගා නිල්මිණි මෙන්ඩිස් ප්‍රමුඛ පොලිස් පරීක්ෂිකා ඉනෝකා අබේරත්න සහ උපපොලිස් පරීක්ෂිකා සිතාරා ප්‍රමුඛ කණ්ඩායම් 10ක් විමර්ශනයට එක්වූවාය.

එහිදී එක් විමර්ශන කණ්ඩායමක් සිදුකළ විමර්ශනයේදී හෙළි වූයේ බැංකුවෙහි කිරිබත්ගොඩ, බොරැල්ල, රාජගිරිය, කොටුව, පිටකොටුව සහ දළුගම ශාඛාවලින් රුපියල් ලක්ෂ හැට, හැත්තෑව, අසූව ආදි සඳහන් විවෘත චෙක්පත් ඉදිරිපත් කරමින් මුදල් ලබාගෙන ඇති බවයි. මේ අතරේ එක් විමර්ශන කණ්ඩායමක් අදාළ බැංකුවේ චෙක්පත් මුද්‍රණය කරන ආයතනයෙන්ද විමසීමක් කරමින් මුදල් ලබාගැනීමට දී තිබූ චෙක්පත් පරීක්ෂා කළේය. එහිදී අනාවරණය වූයේ චෙක්පත් ව්‍යාජව නිර්මාණය කර ඇති බවයි. වැඩිදුරටත් හෙළි වූයේ අදාළ චෙක්පත් තොරතුරු කිසියම් බැංකු නිලධාරියකු හරහා පිටතට ගොස් ඇති බවයි. ඒත් සමඟ චෙක්පොත නිකුත් කළ 2019 වසරේ සමයේ එම බැංකුවේ යොන්වීදිය ශාඛාවේ අදාළ කාර්යයන්හි නිරතව සිටි වත්මනෙහි ස්ථාන මාරුවීම් ලැබ සිටි අයගෙන්ද ප්‍රශ්න කිරීමට සීඅයිඩී නිලධාරිහු සූක්ෂ්ම වූහ. එහිදී ඒ සමයේ එම ශාඛාවේ සේවය කළ වර්තමානයෙහි බොරැල්ල ශාඛාවේ සේවය කරන නිලධාරියකුගෙන්ද දීර්ඝව ප්‍රශ්න කෙරිණි. තවත් සීඅයිඩී විමර්ශන කණ්ඩායමක් චෙක්පත් මාරු කළ කාල පරාසයන්හි අදාළ බැංකු ශාඛාවන්හි සහ ඒ අවට සීසීටීවී දසුන් දහස් ගණනක් නැරැඹුවත් කිසිදු නිශ්චිත හෝඩුවාවක් නොවූහ. එහෙත් රාජගිරිය බැංකු ශාඛාවේ සීසීටීවී එකී කාල පරාසයන්හි නරඹද්දී බැංකුව තුළට මූල්‍ය කටයුත්තකට පැමිණි නිල ඇඳුම්ලාගත් පොලිස් නිලධාරින් දෙදෙනෙකුගෙන් අයෙක් දුරකථන ඇමැතුමක් ගනිද්දී ඒ අසල සිටි තවත් පුද්ගලයෙක්ද කලබල ස්වරූපයෙන් දුරකථන ඇමැතුමක් ගැනීමට තැත්කරන ආකාරය දිස්විණි.

එම පොලිස් නිලධාරියා දුරකථන ඇමැතුම ගත් ‍‍මොහොතේ දුරකථනය ක්‍රියාත්මක කළ පුද්ගලයා කවුරුන්ද යන්න හඳුනා ගැනීමට වෙහෙසකර කර්තව්‍යයක යෙදුණු විමර්ශන නිලධාරිහු අවට දුරකථන කුලුනු ඔස්සෙ දුරකථන අංක ලක්ෂ ගණනක් පරීක්ෂාවට ලක් කළහ. එම විමර්ශනය සාර්ථකත්වයට පත්වෙමින් අදාළ දුරකථනය ක්‍රියාත්මක කළ පුද්ගලයා කවුරුන්ද යන්න හඳුනා ගැනීමට විමර්ශන නිලධාරින්ට හැකි විය. ඒ අනුව පසුගිය 01 වැනිදා මුලින්ම මෙකී වංචාවට අදාළව වේයන්ගොඩ, අලවල වෙසෙන මෙරට ප්‍රමුඛ පෙළේ පෞද්ගලික සමාගමක විධායක නිලධාරියකු ලෙස සේවය කරන 27 හැවිරිදි අඹවලදේවගේ ගයාන් රුවන් කුමාර නමැත්තා අත්අඩංගුවට ගැනිණි. ඔහුගෙන් හෙළි වූයේ අදාළ ව්‍යාජ චෙක්පත් මාරු කිරීමට බොරැල්ල සහ රාජගිරිය ශාඛාවන්ට ගියේ තමා බවයි. එසේම ව්‍යාජ චෙක්පත් වංචාවේ සුලමුල සියල්ල ඔහුගෙන් අනාවරණය කරගැනීමට ගතවූයේ නිමේෂයකි.

"සර්... මට චෙක්පත් දුන්නෙ හංවැල්ලෙ මුද්‍රණාලයක් පවත්වාගෙන යන ව්‍යාපාරිකයෙක්..."

එසැණින් විමර්ශන නිලධාරිහු අදාළ මුද්‍රණාල හිමිකරුවා ගැන සොයා බැලිණි. ඔහු 37 හැවිරිදි අසංක ප්‍රදීප් මොල්ලිගොඩ නමැති මෑත කාලයේ ධනවතෙක් වූ ව්‍යාපාර රැසකම හිමිකරුවෙකි. සියලු සාක්ෂි රැස්කරගත් සීඅයිඩී නිලධාරිහු හංවැල්ලේ ඔහුගේ මුද්‍රණාලය ආසන්නයේ පසුගිය සෙනසුරාදා රාත්‍රියේ රැකවල්ලා සිටියහ. ඒ මොහොතේ පැමිණි කේඩීඑච් වෑන් රථයකින් තිදෙනෙක් බැස්සේය. නිලධාරිහු උඩබිම බැලුවේ පැමිණි පෙරදී ප්‍රශ්න කළ බොරැල්ල ශාඛාවේ 34 හැවිරිදි හේෂාන් ගුණවංශ නමැති බැංකු නිලධාරියාද ඒ අතර සිටිනු දුටු විටයි. තමනගේ 'ගේම' ගැන සීඅයිඩීය පසුපස හඹා එන බව කන වැකී සිටි ඔවුන් තිදෙනා එම ස්ථානයට පැමිණ තිබුණේ පලා යාමේ අටියෙනි. චෙක්පත් වංචාවේ සියලු සාක්ෂි සහිතව සන්නද්ධව සිටි සීඅයිඩි නිලධාරින් වෑන් රථය සමඟ තිදෙනාම අත්අඩංගුවට ගැනිණි.

මුද්‍රණාල හිමිකරුවා සහ බැංකු නිලධාරියාට අමතරව අත්අඩංගුවට පත්වූයේ රණාලේ වෙසෙන 51 හැවිරිදි ජයන්ත වීරකෝන් නමැති ධනවතෙකි. ඔහු පෙබරවාරි මස 05 වැනිදා බ්‍රිතාන්‍යයේ වාසය කොට මෙරටට පැමිණි කෝටිපතියෙකි. පළමුවෙන්ම වේයන්ගොඩදී අත්අඩංගුවට පත් ගයාන් රුවන් සහ සෙසු තිදෙනා වන අසංක ප්‍රදීප්, හේෂාන් සහ ජයන්ත වීරකෝන් යන සිවුදෙනා ගජමිතුරන්ය.

බ්‍රිතාන්‍යයේ සිට පැමිණි ජයන්තගේ සහ මුද්‍රණාල හිමිකරු අසංකගේ අදහසක් අනුව ක්‍රියාත්මක වූ කොල්ලයට ව්‍යාජ චෙක්පත් මුද්‍රණය සඳහා මුද්‍රණාල හිමිකරුට චෙක්පත්හි සියලු තතු ලබා දී තිබුණේ වසර 15ක පමණ බැංකු සේවයට හිමිකම් කී හේෂාන්ය.

ඔහු මෙල්වා සමාගම යොන්වීදිය ශාඛාවේ එකී ගිණුම අරඹන සමයේ සේවය කර තිබුණේය. හේෂාන්ට, මුද්‍රණාල හිමිකාර ව්‍යාපාරිකයා දැනහඳුනා ගැනීමට ලැබී ඇත්තෙ හංවැල්ල ශාඛාවේ සේවය කරන සමයේයි.

තිදෙනාගේ මූල්‍ය වංචාවට චෙක්පත් රැගෙන බැංකු ශාඛාවන්ට ගිය රුවන් කුමාර ඇතුළු පස්දෙනාගෙන් සෙසු සිවුදෙනා 'ගේම'ට ඈඳාගෙන තිබුණේ රුවන් කුමාර විසිනි.

ඔවුන් පස්දෙනා පසුගිය 12 වැනිදා මෙල්වා සමාගමේ සේවකයන් සේ සුදු කමිස සහ කළු කලිසම් ඇඳ අත්අඩංගුවට පත් කේඩීඑච් රථයෙන් බැංකු ශාඛා ආසන්නයට ගොස් කිසිදු චකිතයකින් තොරව මුදල් රැගෙන නැවතත් එක් ස්ථානයකට රැස්ව තිබිණි. අනතුරුව ඔවුන් රැගෙන ආ මුදල් කන්දරාව ලබාගත් ව්‍යාපාරිකයන් දෙදෙනා එම සිවුදෙනාට රුපියල් ලක්ෂ තුන හතර බැගින් දී තිබිණි. චෙක්පත් මාරු කිරීමට අවැසි ව්‍යාජ හැඳුනුම්පත්ද මුද්‍රණාල හිමිකරුවා විසින්ම මුද්‍රණය කෙරිණි. කොල්ලයෙන් පසු එම ව්‍යාජ හැඳුනුම්පත් සහ ඊට භාවිත කළ ජංගම දුරකථනද ව්‍යාපාරිකයන් දෙදෙනා විසින් කැලණි ගඟට විසි කළ බව හෙළි විණි.

මෙකී මහා පරිමාණ මූල්‍ය වංචාවට කොටුව සහ පිටකොටුව බැංකු ශාඛා වෙත ගිය දෙදෙනාද පසුගියදා සීඅයිඩීය අත්අඩංගුවට ගැනිණි. ඒ, චාමර පැතුම් රණවීර සහ සංජු ඩිලාන් යන අයවලුන්ය. ඔවුන් දෙදෙනාගෙන් අයෙක් රක්ෂණ නියෝජිතයෙකි. අනෙකා හෝටල් සේවකයෙකි.

එම සැකකරුවන් දෙදෙනා කොල්ලය සඳහා ගාලු මුවදොරට පැමිණීමෙන් පසු සුදු කමිස සහ කළු කලිසම් හැඳ මෙල්වා සමාගමේ සේවකයන් පලඳින ආකාරයෙන් හැඳුනුම්පත්ද කරේ එල්ලාගෙන බැංකු ශාඛාවන්ට ගොස් රුපියල් ලක්ෂ 60ක සහ 80ක චෙක්පත් දෙකක් මාරු කළ බව පාපෝච්චාරණය කළහ. බැංකු ශාඛාවන්ගෙන් මුදල් රැගෙන සීසීටීවී කැමරා මඟහරිමින් පා ගමනින් පැමිණ ත්‍රිරෝද රථයකට නැඟ සියලු දෙනාම එක් ස්ථානයකදී රැස්වී ව්‍යාපාරිකයන් දෙදෙනාට මුදල් ලබා දුන් බවත් පසුව තමනටද රුපියල් ලක්ෂ පහ බැගින් දුන් බවද කීවේය.

කොල්ලකෑ මුදලින් රුපියල් කෝටි දෙකක මුදලක් ව්‍යාපාරිකයන් දෙදෙනාගේ නිවෙස්හි සඟවා තිබියදී සොයා ගැනීමට සමත් වූහ. සෙසු සැකකරුවන් කිහිප දෙනාද අත්අඩංගුවගෙන ඉතිරි මුදල් සොයා ගැනීමට සීඅයිඩීය මේ වන විටත් දිගින් දිගටම විමර්ශන සිදුකරමින් සිටී.

ආයතනවලට නිකුත්කර ඇති බැංකු ගිණුම් අංක වෙනත් පාර්ශ්වයන් වෙත යොමු වීමෙන් මෙවැනි මූල්‍ය වංචාවන්ට වඩාත් ඉඩහසර විවර කර දෙන බවත් ඒ නිසාවෙන් ආයතනගත බැංකු ගිණුම් පිළිබඳව නිරන්තරවම සෝදිසියෙන් සිටින ලෙස පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ සඳහන් කරයි.

එසේම විවෘත චෙක්පත් මඟින් ගනුදෙනුකරුවන් මුදල් ලබා ගැනීමට ‍යොමු වීමේදී මූල්‍ය ආයතන විසින්ද දැඩි අවධානයක් යොමු කළ යුතු බවත් එලෙස මුදල් ලබාගැනීමට පැමිණෙන අයවලුන් පිළිබඳවද දැඩිව සොයා බැලිය යුතු බවද පොලිස් මාධ්‍ය ප්‍රකාශකවරයා සඳහන් කරයි.

 

Comments