බොලි­වුඩ් කොලි­වුඩ් තරු බැබ­ළෙන්නේ මෙහෙ­මයි | සිළුමිණ

බොලි­වුඩ් කොලි­වුඩ් තරු බැබ­ළෙන්නේ මෙහෙ­මයි

 

 

ඉන්දියාවේ නළු නිළියන් ගේ මේ වනවිට ජනප්‍රිය වී ඇති නම් ඔවුන්ගේ සැබෑ නම් නොවන බව සමහර විට බොහෝ දෙනකු නොදන්නවා ඇති. මේ සමහරුන් ඔවුන් ගේ මුල් නම් වෙනස් කර ඇත්තේ එ්වා දිග වැඩි නිසා හෝ උච්චාරණයේ අපහසුතා නිස යි. තවත් සමහරුන් එසේ කර ඇත්තේ වාසනාව සහ සාර්ථකත්වය ගෙන එනු ඇතැයි විශ්වාස කළ නම් භාවිත කිරීමට තිබූ වුවමනාව නිසා යි. මේ එ් ආකාරයෙන් නම් වෙනස් කළ නළු නිළියන් කිහිප දෙනකු ගැන විස්තර බිඳක්.

 

සුපිරි නළු අමිතාබ් බච්චන් පවා ඔහුගේ මුල් නම වෙනස් කළ කෙනෙක්. අමිතාබ් ගේ උපන් නම ලෙස සඳහන් වන්නේ ඉන්කිලාබ් ශ්‍රීවාස්තව යන්න යි. පසුකාලයේ එම නම අමිතාබ් බච්චන් ලෙස වෙනස් කර ඇත්තේ ඔහුගේ පියා හරිවංශ් රායි බච්චන් විසින්. එම නම් වෙනස් කිරීම සිදු වී ඇත්තේ පියා ගේ මිතුරකු හා කවියකු වූ සුමිත‍්‍රනන්දන් පාන්ත් ගේ යෝජනාවකට අනුවයි. අමිතාබ් යන්නෙ හි තේරුම ‘නොනිමෙන රශ්මිය’යි. අමිතාබ් ගේ පියා ගේ මුල් වාසගම වී ඇත්තේ ශ්‍රීවාස්තව ලෙසයි. නමුත් කවියකු වූ ඔහු තමාගේ පොත්පත්වලට යොදා ඇත්තේ බච්චන් යන ආරූඪ නමක්. අවසානයේ එ් නම අමිතාබ් වෙනුවෙනුත් භාවිත කිරීමට තීරණය කර ඇත්තේ ඔහු පාසලට ඇතුළත් කරන අවස්ථාවේ යි.

දකුණු ඉන්දියානු සිනමාවේ දැවැන්තයකු වන රජිනි කාන්ත් ගේ උප්පැන්න සහතිකයේ ලියා ඇති නම ෂිවාජි රා ඕ ගයික්වාඩ්. ඔහුගේ මවුපියන් එ් නම තබා ඇත්තේ ෂිවාජි නම් වූ සුප්‍රකට මරාත අධිරාජයා සිහි වීමට යි. නමුත් ෂිවාජි රා ඕ ගයික්වාඩ් සිනමාවට එක් වීමෙන් අනතුරුව ඔහුට රජනි කාන්ත් යන නම දී ඇත්තේ සුප‍්‍රකට දකුණු ඉන්දියානු සිනමා අධ්‍යක්‍ෂ කේ. බාලචන්දර් විසින්. රජිනිකාන්ත් මුල් කාලයේ විශාල ජනප්‍රියත්වයක් හිමි කරගත්තේ බාලචන්දර් ගේ චිත්‍රපටවල රඟපෑමෙනු යි. රජිනි කාන්ත් සිනමාවට හඳුන්වා දෙන ලද්දේත් ඔහු විසින්.

තවත් ජනප්‍රිය නිළියක වන කත්‍රිනා කායිෆ් ගේ සැබෑ නම කත්‍රිනා ටර්කුවෙට්. කලක් ලන්ඩනයේ ජීවත් වූ ඇය කායිෆ් යන නම භාවිත කරන්නට පටන්ගෙන ඇත්තේ බොලිවුඩයට පා තබන විටයි. ඇය එලෙස නම වෙනස් කර ගෙන ඇත්තේ ජැකී ෂ්රොෆ් ගේ බිරිය වූ අයේෂා ෂ්රොෆ් ගේ යෝජනාවකට අනුව. ඉන්දියානු ප්‍රේක්ෂකයන් ට උච්චාරණය කිරීමටත්, මතක තබා ගැනීමටත් පහසු නමක් හැටියටයි කායිෆ් යන්න තෝරාගෙන තිබුණේ. ජැකී ෂ්රෝෆ් ද ඔහුගේ මුල් නම වෙනස් කර ගත් කෙනෙක්. ඔහුගේ මුල් නම වූයේ ජායිකිෂාන් කාකුභායි යන්නයි. ඔහුට ජැකී යනුවෙන් අමතන්නට පටන්ගෙන තිබුණේ පාසල් මිතුරකු යි. පසුව චිත්‍රපට අධ්‍යක්‍ෂ සුභාෂ් ගායි ද එම නම භාවිත කිරීමට කැමැති වී තිබෙනවා. ජැකී ගේ පුත්‍රයා වන ටයිගර් ෂ්රොෆ් ගේ මුල් නම හැටියට සඳහන් වන්නේ ජායි හේමන්ත් ෂ්රොෆ්.

කලකට පෙර ඉතා ජනප්‍රිය නිළියක වූ ශිල්පා ෂෙට්ටි ගේ මුල් නම වුණේ අශ්විනි ෂෙට්ටි ලෙස යි. ජ්‍යෝතීර්වේදියකු කළ යෝජනාවක් අනුව එය ශිල්පා ෂෙට්ටි යනුවෙන් වෙනස් කරනු ලැබ ඇත්තේ ඇගේ මව විසින් බව සඳහන්. ශිල්පා ෂෙට්ටි යන්න වඩාත් වාසනාවන්ත සහ ප්‍රසිද්ධිය ගෙන එන නමක් ලෙස යි සලකා ඇත්තේ. තවත් ජනප්‍රිය නිළියක වූ ප්‍රීටි සින්ටා ගේ මුල් නම ප්‍රීටම් සින්ටා සිං බව සඳහන්. ප්‍රීටි යන්න ප්‍රීටිම් වඩාත් කෙටි කර සාදාගත් නමක් බව පෙනෙනවා. ඇය සික් ජාතික කාන්තාවක්.

තවත් ජනප්‍රිය නිළියක වූ ශ්‍රී දේවි ගේ සැබෑ නම වූයේ ශ්‍රී අම්මා යාන්ගර් අයියපන් යන්න යි. තාබු, සනි ලියොන්, අජේ දේව්ගන් යන අයගේ මුල් නම් හැටියට සඳහන් වන්නේ පිළිවෙළින් තබාසුම් ෆාතිමා හෂ්මි, කරන්ජිත් කවුර් වොහ්රා, විෂාල් වීරු දේව්ගන් යන එ්වා යි.

 

Comments