800 හැදුවේ සුපිරි වීරයෙක් මවන්න නොවෙයි | සිළුමිණ

800 හැදුවේ සුපිරි වීරයෙක් මවන්න නොවෙයි

ශ්‍රී ලංකාවේ වඩාත්ම අවධානයට ලක්වූ චරිතයක් ගැන නිර්මාණය කෙරෙන මේ ගවේෂණයට ඉඩ හැරිය යුතුයි...

දෙමළ ජනවාර්ගික යුද්ධයක් පවතින කාලෙ මුළුමනින්ම සිංහල ක්‍රීඩකයන්ගෙන් පිරුණු ක්‍රීඩාගාරයේ අත්දැකීම මුරලිගෙන් අහන්න ඕන වුණා...

 ‘මුරලිදරන්ගේ චිත්‍රපටයේ තිර රචනයට දායකත්වය ලබා දෙන්න මම එකඟ වුණේ හේතු දෙකක් නිසයි. ඒ, ප්‍රශ්න දෙකකට පිළිතුරු සැපයීමක් විදිහටයි. සමහර විට එය මට කවදා හරි මුරලිදරන් හමු වුණා නම් ඔහුගෙන් විමසීමට තරම් ධෛර්යයක් නැති ප්‍රශ්න දෙකක් වෙන්නත් තිබුණා.

‘එසේ කියන්නේ ශ්‍රී ලාංකික අන්තර්ජාතික කීර්තියට පත් ඉංග්‍රීසි සාහිත්‍යවේදී ශෙහාන් කරුණාතිලකයි. මුත්තයියා මුරලිදරන්ගේ ‘800‘ චිත්‍රපටයේ සහාය තිර රචකයා ඔහුයි. Chinaman: The Legend of Pradeep Mathew කෘතිය රචනා කරමින් වසර 2016දී පොදු රාජ්‍ය මණ්ඩලයීය සාහිත්‍ය සම්මානයත්, දකුණු ආසියානු DSC සාහිත්‍ය සම්මානයත්, ඉංග්‍රීසි බසින් සාහිත්‍යකරණයේ නිරතවන ශ්‍රී ලාංකිකයන්ට පිරිනැමෙන ග්‍රේෂන් සම්මානයත් දිනා ගත් මේ ප්‍රකට ඉංග්‍රීසි සාහිත්‍යවේදියා වර්තමානයේ නිදහස් වෙළෙඳ දැන්වීම් නිර්මාණ ශිල්පියෙක් ලෙස කටයුතු කරමින් සිටිනවා. 1988-89 භීෂණ සමය තේමා කරගත් ඔහුගේ දෙවැනි කෘතිය ‘Chats with the dead‘ මේ වසර ආරම්භයේදී එළි දැක්වූවා. ඔහු දැන් ඔහුගේ තුන්වැනි කෘතියේ වැඩ ආරම්භ කරලයි තිබෙන්නේ.

මුරලිගේ චිත්‍රපටයේ තිර රචනය පිළිබඳ මෙම ලියුම්කරුගේ ඉල්ලීමට ‘රසඳුන‘ සමඟ විශේෂ සාකච්ඡාවකට ඔහු එක්වූයේ එම චිත්‍රපටය අරභයා මෙරට පුවත්පතකට ප්‍රකාශයක් ලබාදෙන පළමු අවස්ථාව සටහන් කරමින්.

ලිපිය ආරම්භයේ සඳහන් වන්නේ මුරලිගේ භූමිකාවට පණ පෙවීමට නියමිතව සිටි විජේ සේතුපති ඉන් ඉවත්වීමෙන් පසු ‘ටයිම්ස් ඔෆ් ඉන්ඩියා‘ පුවත්පතේ වෙබ් අඩවියට ශෙහාන් කරුණාතිලක විසින් සපයනු ලැබූ දීර්ඝ ලිපියෙන් උපුටා ගත් ප්‍රකාශයක්. එය එක් අතකින් විජේ සේතුපතිට ඔහු විසින් ලියන ලද විවෘත ලිපියක් ද වෙනවා.

“ඇත්තටම ශ්‍රීපතී මේ තිර රචනය ඉවර කරලයි තිබුණේ. මගේ ‘චයිනමන්‘කෘතිය නිසා ඔහුට මුලින් වුවමනා කළේ මට මේ තිර රචනය කියවන්න දීලා උපදෙස් ටිකක් ලබාගන්න. නමුත් පස්සේ මමත් සහය තිර රචකයෙක් විදිහට එකතු වුණා.‘

‘රසඳුන‘ සමඟ එක්වෙමින් ශෙහාන් එසේ කීවා.

ශ්‍රීපතිගේ අවශ්‍යතාව වූයේ දෙමළ සිනමාවට අවේනික ලෙස ‘සුපිරි වීරයකු ( Superhero) තැනීම නොව, මුරලිගේ ජීවන අත්දැකීම් ඇසුරින් යථාර්තවාදී චිත්‍රපටයක් නිර්මාණය කිරීම බව ශෙහාන් පවසනවා. ඒ සඳහා ශ්‍රීපති සහ ශෙහාන් අතර ඇතිවූ සංවාද රැසක් ඇතිවෙලා තිබුණා. දකුණු ඉන්දීය සිනමාවේ භාවිතයට ගන්නා දෙමළ බස ශ්‍රී ලංකාවේ දෙමළ බස හාත්පසින් වෙනස් බැවින් ඒ පිළිබඳ ශෙහාන් විමසද්දී උඩරට වතුකරයේ භාවිත කරනු ලබන දෙමළ බස මේ චිත්‍රපටයේ භාවිතයට ගන්නා බව ශ්‍රීපති කියා තිබුණා.

“අපි දෙන්නම හිටියේ එක මතයක. ඒ, ඇත්ත ඇති සැටියෙන් ඉස්මතු කර පෙන්වීමටයි. ඒ සඳහා අවශ්‍ය පරිදි පසුව තිර රචනයේ යම් යම් වෙනස්කම් සිදුවුණා.

ශ්‍රීපති හොඳ තිර රචකයෙක් නෙවෙයි. ඔහු සිනමාකරුවෙක්. නමුත් අපි දෙන්නා එකතුවෙලා ඉතා සාර්ථකව මේ තිර රචනය ඉවර කළා. ඇත්තටම තවමත් යම් යම් වෙනස්කම් මේ තිර රචනයේ සිදුවෙමින් පවතිනවා.“ ශෙහාන් සඳහන් කළා. වැදගත්ම දේ ශෙහාන් කරුණාතිලකට මෙතෙක් මුරලිදරන් හෝ සේතුපති මුණ නොගැසීමයි.

‘ටයිම්ස් ඔෆ් ඉන්ඩියා‘ පුවත්පතේ වෙබ් අඩවියට ශෙහාන් කියා සිටියේ මෙරට ජනවාර්ගික යුද්ධය පැවැති සමයේදී ශ්‍රී ලංකා ක්‍රිකට් කණ්ඩායම පමණක් නොව මෙරට සමස්ත ජනතාවම මුරලිගේ පසුපස සිටි බවයි. සිංහල බෞද්ධ සහ දෙමළ වර්ගවාදී සියලු පාර්ශ්ව මුරලිගේ ‘වැලමිටේ‘ප්‍රශ්නයේදී ඔහු වෙනුවෙන් එක්සත් වූ බව ඉස්මතු කිරීමට තමා වඩාත් උනන්දු වූ බවයි ඔහු කියන්නේ.

“ලේඛකයකුට නම් මෙය ළයාන්විත මිනිසෙක් හා ආකර්ෂණීය කතාවක්. ඒ වගේම සිනමා තරුවකට වඩා රංගන ශිල්පියකු විදිහට තමාව දකින නළුවකුට නම් මෙය ජීවිත කාලය තුළ රඟපෑමට ලැබෙන විශිෂ්ටතම භූමිකාව විය හැකියි“ ශෙහාන් යළි යළිත් අවධාරණය කරනවා.

එතෙක් මෙතෙක් ලොව බිහිවූ ශ්‍රේෂ්ඨතම පන්දු යවන්නා ලෙස සළකනු ලැබූ මුරලිට ක්‍රීඩාලෝලීන් සමූහයක් විසින්ම වංචාකාරයකු, බොරුකාරයකු, පන්දුව දමාගසන්නකු ලෙස හැඳින්වීමත්, සිංහල හා දෙමළ ජනවාර්ගික යුද්ධයක් පවතින අතරතුරදීම මුළුමනින්ම සිංහල ක්‍රීඩකයන්ගෙන් පිරුණු ක්‍රීඩා විවේකාගාරයක රැඳී සිටීමට මේ දෙමළ ක්‍රීඩකයාට අවස්ථාව ලැබීමත් දැනෙන්නේ කෙලෙසදැයි යන්න ලෝකයා හමුවේ කියා පෑමට හැකිවීම මේ චිත්‍රපටයේ තිරකතාව ලිවීමට තමා එකඟ වූ කරුණු දෙක බව ශෙහාන් ‘ටයිම්ස් ඔෆ් ඉන්ඩියා‘පුවත්පතේ වෙබ් අඩවියට යොමු කළ ලිපියේ සඳහන් කරලා තිබුණා.

‘800‘ චිත්‍රපටය මුරලි අරභයා ගොඩ නැගුණු තවත් ප්‍රශ්න කන්දරාවකටම පිළිතුරු සපයන්නක්. සිංහල කලහකාරීන් පිරිසක් ගිනිතබා විනාශ කළ ව්‍යාපාර හිමි වතුකරයේ පවුලකින් පැවත එන දෙමළ තරුණයකුට ශ්‍රී ලංකා ජාතික ක්‍රිකට් කණ්ඩායමට ක්‍රීඩා කිරීමට හැකිවූයේ කෙසේද ?. ඉයන් බෝතම්, රිචඩ් හැඩ්ලි, කපිල් දේව් මෙන්ම ශේන් වෝන් ද පසු කළේ කෙසේද ?. පිටදඟ පන්දු යැවීම ගැන අවධානය යොමු කිරීමටත්, දේශපාලනයෙන් වැළකී සිටීමටත් ඔහු ගත් තීරණය ඥානාන්විත එකක්ද ?. පන්දුව දමා ගසන බවට චෝදනා කළ ඩැරල් හෙයාර් පසුකලෙක ඔහුට කීවේ කුමක්ද ?. ලාහෝර් ප්‍රහාරයේදී වෙබ් උණ්ඩය ඇදී ගියේ කුමාර් සංගක්කාරගේ හිසට කෙතරම් සමීපවද?.

මේ සියලු ගැටලුවලට විසඳුම් ‘800‘ චිත්‍රපටයෙන් පෙන්නුම් කර ඇතැයි ශෙහාන් සඳහන් කරනවා.

‘මම ‘ටයිම්ස් ඔෆ් ඉන්ඩියා‘ වෙබ් අඩවියට ලියූ ආකාරයෙන්ම මුලින්ම අපි මේ චිත්‍රපටය තිරගත වනතුරු බලා සිටිමු. ඉන් පසුව පුළුවනි තර්ක විතර්ක කරන්න. එය නිර්මාණය කිරීමට පෙර විනිශ්චය කරන්න එපා. ශ්‍රී ලංකාවේ වඩාත්ම අවධානයට ලක්වූ චරිතයක් ගැන නිර්මාණය කෙරෙන මේ ගවේෂණයට ඉඩ හැරිය යුතුයි.‘ ශෙහාන්ගේ ඉල්ලීම එයයි.

මුරලි චිත්‍රපටය එක්තරා අන්දමකින් වීරකාව්‍ය නිර්මාණයක්. එහි ගැබ්ව ඇත්තේ අභිමානවත් ශ්‍රී ලාංකේය පුත්‍රයකුගේ ජීවන හඬයි. සැබැවින්ම මේ චිත්‍රපටය තිරගත වනතුරු ශෙහාන්ට ඉස්පාසුවක් නැහැ. අපට ද එසේ නොවන්නේද...?

Comments