මාතලේ දේශපාලනය පසුගිය සතියේදී යම් උණුසුම් බවක් දක්නට ලැබුණේ විපක්ෂයේ මෙන්ම ආණ්ඩු පක්ෂයේද දේශපාලනඥයන්ගේ ක්‍රියා කලාපය හේතුවෙනි. ඒ, පසුගියදා පැවති පාර්ලිමේන්තු මැතිවරණයේදී විපක්ෂයට හිමි එක් අසුනක් වෙනුවෙන් නැවත මානප ගණන් කරන ලෙස ඉල්ලා හිටපු පාර්ලිමේන්තු මන්ත්‍රී රංජිත් අලුවිහාරේ විසින් නඩුවක් ගොනු කිරීමත් සමඟය.
මාතලේ දිස්ත්‍රික්කය සඳහා සමගි ජන බලවේගය පක්ෂයෙන් තරග කොට තේරී පත් නොවූ අපේක්ෂකයකු වන හිටපු රාජ්‍ය අමාත්‍ය රංජිත් අලුවිහාරේ එම පෙත්සම ඉදිරිපත් කරමින් කියා සිටියේ ඉකුත් මහ මැතිවරණයේදී සමගි ජන බලවේගය පක්ෂයෙන් මාතලේ දිස්ත්‍රික්කය සඳහා තරග වැදුණු අපේක්ෂකයන්ගේ මනාප ඡන්ද ගණනය කිරීමේදී අක්‍රමිකතා සිදු වූ බවය. එම පෙත්සම පසුගිය (17) දා අභියාචනාධිකරණයේ සභාපති විනිසුරු ඒ. එච්. එම්. ඩී. නවාස් සහ සෝභිත රාජකරුණා යන මහත්වරුන්ගෙන් සමන්විත විනිසුරු මඬුල්ල ඉදිරියේ සලකා බැලීම සිදුකෙරුණි.
පෙත්සම විභාග කිරීමට තීරණය කළ අභියාචනාධිකරණ විනිසුරු මඬුල්ල මීට අදාළව නොවැම්බර් මස 05 වැනිදා අධිකරණය හමුවේ කරුණු දක්වන ලෙස දන්වා එහි වගඋත්තරකරුවන් ලෙස මාතලේ දිස්ත්‍රික් මැතිවරණ තේරීම් භාර නිලධාරියා, ප්‍රධාන ගණන් කිරීමේ නිලධාරියා, මැතිවරණ කොමිසමේ සභාපති මහින්ද දේශප්‍රිය ඇතුළු එහි සාමාජිකයන්, මාතලේ දිස්ත්‍රික්කයේ සමගි ජන බලවේගය පක්ෂයෙන් තේරී පත්වී සිටින පාර්ලිමේන්තු මන්ත්‍රිනී රෝහිණී කවිරත්න ඇතුළු 14 දෙනෙකු නම් කරමින් ඔවුන් වෙත නොතිසි නිකුත් කරන ලෙසද නියෝග කළහ.
මේ පිළිබඳ අදහස් දක්වමින් සමගි ජන බලවේගයේ පාර්ලිමේන්තු මන්ත්‍රිනී රෝහිණි කවිරත්න කියා සිටියේ ජනතාව විසින් වැඩි ඡන්දයෙන් තමන් තෝරා ගෙන ඇති බවත් රාජ්‍ය සේවකයන් නිවැරදිව අපක්ෂපාතිව තම වගකිම් ඉටු කර ඇති බවට තමා විශ්වාස කරන බවත්ය.
මේ අතර එක්සත් ජාතික පක්ෂයට මාතලේ දිස්ත්‍රික්කයේ බලය හිමිව තිබූ එකම පළාත් පාලන ආයතනයේ බලය ද පසුගියදා අහිමි වූයේ නගරාධිපති ඩල්ජිත් අලුවිහාරේගේ ධුරය තාවකාලිකව අත්හිටුවා එහි වැඩ බැලීම සඳහා මධ්‍යම පළාත් ආණ්ඩුකාර ලලිත් ගමගේ මහතා විසින් නියෝජ්‍ය නගරාධිපති සන්දනම් ප්‍රකාශ්ට බලය පැවරීම හේතුවෙනි.
පැවති පළාත් පාලන මැතිවරණයේදි එක්සත් ජාතික පක්ෂයට සභිකධුර 09ක්ද ශ්‍රි ලංකා පොදුජන පෙරමුණට සභික ධූර 06ක්ද එක්සත් ජනතා නිදහස් සන්ධානයට මන්ත්‍රිධුර 04ක්ද එකමුතු ප්‍රගතශිලි සන්ධානයට මන්ත්‍රිධුරයක් සහ ජනතා විමුක්ති පෙරමුණට එක් මන්ත්‍රිධුරය බැගින් ද හිමිවිය.
 |
| මාතලේ මහ නගර සභාව |
මෙහිදි නගරාධිපතිවරයා තේරිමේදි එක්සත් ජනතා නිදහස් සන්ධානයෙන් තරග වැද පරාජයට පත් වි නැවත ලැයිස්තුවෙන් තේරි පත්වු සන්දනම් ප්‍රකාශ් මහතාගේ සහය හිමි වුයේ ඩල්ජිත් අලුවිහාරේටය.
පැවති පළාත් පාලන මැතිවරණයේදී එක්සත් ජාතික පක්ෂයට සභික ධුර 9ක්ද ශ්‍රී ලංකා පොදුජන පෙරමුණට සභික ධූර 06ක්ද එක්සත් ජනතා නිදහස් සන්ධානයට මන්ත්‍රී ධුර 4ක්ද එකමුතු ප්‍රගතශිලි සන්ධානයට සහ ජනතා විමුක්ති පෙරමුණට එක් මන්ත්‍රී ධුරය බැගින්ද හිමි විය.
එහිදී නගරාධිපතිවරයා තේරීමේදී එක්සත් ජනතා නිදහස් සන්ධානයෙන් තරග වැද පරාජයට පත් වී නැවත ලැයිස්තුවෙන් තේරී පත්වූ සන්දනම් ප්‍රකාශ් මහතාගේ සහාය හිමි වූයේ ඩල්ජිත් අලුවිහාරේට ය. සන්දනම් ප්‍රකාශ් මහතා නියෝජ්‍ය නගරාධිපතිවරයා බවට පත් විය.
කාලයක් ගතවද්දී නගරාධිපතිවරයා සහ එම පක්ෂයේ ම මන්ත්‍රීවරුන් අතර විවිධ අවස්ථාවලදී විවිධ ගැටුම් ඇති විය. නියෝජ්‍ය නගරාධිපතිවරයා ඇතුළු මන්ත්‍රීවරුන් සමඟ නගරාධිපතිවරයා විසින් විවිධ අවස්ථාවලදී තර්කවිතර්ක ඇතිකර ගැනීම හේතුවෙන් අය වැය ලේඛනයද පරාජයට පත් කිරීමට නියෝජ්‍ය නගරාධිපතිවරයා ඇතුළු මන්ත්‍රීවරු කටයුතු කළහ.
නගරාධිපතිවරයාට විරෝධය පළ කරමින් මන්ත්‍රීවරුන් අවස්ථා ගණනාවකදී ම උද්ඝෝෂණ හා විරෝධතා පැවැත් වූ අතර මධ්‍යම පළාතේ හිටපු ආණ්ඩුකාරවරුන් වෙත අවස්ථා ගණනාවකාවදී ම පැමිණිලිද ඉදිරිපත් කළහ.
මාතලේ මහ නගර සභාවේ නගරාධිපති ඩල්ජිත් අලුවිහාරේ සහ මන්ත්‍රී මණ්ඩලය සමඟ පැවැති එම අර්බුදකාරි තත්ත්වය නිමා කරමින් පසුගියදා මධ්‍යම පළාත් ආණ්ඩුකාර නීතිඥ ලලිත් යු. ගමගේ විසින් නගරාධිපතිවරයාගේ සේවය තාවකාලිකව අත්හිටවනු ලැබීය.
මධ්‍යම පළාත් ආණ්ඩුකාර ලලිත් යූ ගමගේ ට පැවරී ඇති බලතල අනුව 2020 අගෝස්තු 25 වන දින අංක 2190/24 දරන අති විශේෂ ගැසට් නිවේදනයක් මඟින් මෙම සේවය අත්හිටුවීම සිදු කර ඇති අතර මාස 3ක කාලසීමාවක් ඇතුළත පරික්ෂාකර කරුණු වාර්තා කිරීමට කොමිසමට බලතල ලබා දී ඇත. නගරාධිපති පිළිබද එම විමර්ශනයට විශ්‍රාම ලත් අධිකරණ නිලධාරිනී සරෝජනි කුසලා වීරවර්ධන පත්කර තිබේ.
ඒ අනුව 1989 අංක 12 දරන පළාත් සභා ( අනුසාංගික විධිවිධාන) පනත 02 යටතේ 02 නන වගන්තිය සමග කියවිය යුතු සංශෝධිත මහ නගර සභා ආඥා පනත යටතේ (252 අධිකාරිය) 277 (i) ( ආ) ( අ) මෙම නියෝගය ආණ්ඩුකාරවරයා විසින් නිකුත් කර ඇත.
මාතලේ මහ නගර සභාවේ දැනට නියෝජ්‍ය ධුරයෙහි කටයුතු කරන සන්දනම් ප්‍රකාශ් මාතලේ මහ නගර සභාවේ නගරාධිපතිවරයාගේ කාර්යයන් ඉටු කිරීමට හා බලතල ක්‍රියාත්මක කිරීමට සන්දනම් ප්‍රකාශ් ට බලය පවරා තිබේ.
ලියාපදිංචි නොකළ ගිවිසුමක් යටතේ කුලී පදනම මත පෞද්ගලික සමාගමකට ලබා දී ඇති නගරාධිපතිවරයා නමින් ලියාපදිංචි කර ඇති සී. පී. කේ. ඩී. 8627 ජිප් රථය නගරාධිපතිවරයාගේ නිල රථය ලෙස කුලී පදනම මත ලබා ගැනීම, තාක්ෂණික කමිටුවේ අනුමැතිය ලබා නොගෙන විථි ලාම්පු මිලදී ගෙන මුදල් අවභාවිත කිරිම, මාතලේ පාරාවත්ත ප්‍රදේශයේ නගර සභාවට අයත් ඉඩමක් සොයා බැලීමකින් තොරව සමාගමකට බදු දීම, පළාත් ආණ්ඩුකාරවරයාගෙන් අනුමැතියෙන් තොරව රියදුරකු බඳවා ගැනීම, මාතලේ රජයේ විද්‍යා විද්‍යාලය අසළ කඩ කාමර නගරාධිපතිවරයාගේ අනුමැතිය මත තෝරාගත් පිරිසකට ලබා දීම, මාතලේ ළමා උද්‍යානය අසළ ආපන ශාලාව කමිටු හෝ මහ සභා තීරණයක් නොමැතිව අභිමතය පරිදි පවත්වාගෙන යෑමට ඉඩදීම යන චෝදනා එල්ල කර තිබේ.
මධ්‍යම පළාත් ආණ්ඩුකාර නීතිඥ ලලිත් යු ගමගේ පැවසුවේ නගරාධිපතිවරයාට එල්ල වී ඇති චෝදනා විමර්ශනය සිදු කිරීම සඳහා කොමිෂන් සභා බලය ඇති ඒක පුද්ගල කොමිසමක් පත් කළ බවත් මාස තුනකට නගරාධිපතිවරයාගේ සේවය තාවකාලිකව අත්හිටවු බවය. අදාළ කොමිසම විමර්ශනය කිරීමෙන් අනතුරුව වාර්තාව තමා වෙත ලබා දීමට නියමිත බවද සඳහන් කළේය.
සේවය අත්හිටුවීමට ලක්ව සිටින නගරාධිපති ඩල්ජිත් අලුවිහාරේ ගෙන් අප මේ පිළිබඳ විමසීමක් කළෙමු.
“නගරාධිපති ධුරය අත්හිටුවීමට ගත් තීරණය දේශපාලන පළිගැනීමක්. මම ඒ ගැන කනගාටු වෙනවා. ජනාධිපතිවරයාගේ සෞභාග්‍යයේ දැක්ම ක්‍රියාත්මක කරන්න අද තුනෙන් දෙකක් ලැබිලා තිබෙනවා. මේ තුනෙන් දෙකේ ප්‍රතිඵලය මත තමයි මේ දේශපාලන පළිගැනීම්වලට අප ලක් කර තිබෙන්නේ. මාතලේ මහ නගර සභාවේ පමණයි මේ දිස්ත්‍රික්කයේ එජාපය ජයග්‍රහණය කළේ. මම පත් වුණේ ජනතා ඡන්දයෙන්. නමුත් ආණ්ඩුකාරවරයා බලය අතික්‍රමණය කරමින් ගැසට් නිවේදනයක් නිකුත් කර තිබෙනවා. මම මහාධිකරණයේ නඩුවක් ගොනු කර තිබෙනවා. නීතියට පටහැනිව කටයුතු කර තිබෙනවා. කුරුණෑගල නගරාධිපති වැරදි කරලත් අද එළියේ ඉන්නවා. මම වැරදි කරලා නැහැ. අපි නිවැරදිව වැඩ කරලත් අපට බොරු චෝදනා එල්ල කරනවා. අපි බය නැහැ. ජනතාවට සේවය කරලා තියනවා. මේක තනිතරම දේශපාලන පළිගැනීමක්. ජනාධිපතිවරයාගෙන් ඉල්ලනවා මාතලේට විමර්ශනයක් කණ්ඩායමක් එවන්න. මම මහ සභා අනුමැතිය යටතේ සභා තීන්දු අනුව තමයි වැඩ කරලා තියෙන්නේ. මගේ අභිමතය පරිදි කිසි දෙයක් කරලා නැහැ. රජයේ විගණන අනුව අපි නිවැරදි කියලා තිබෙනවා. මම බය නැතිව කියනවා, මම අධිභාර කරලා නැහැ. විමර්ශනයක් කරලා වැරදි කරලා තියෙනවා නම් සිරගත කරන්න කියා ඉල්ලනවා.”
මේ අතර පසුගිය දිනෙක මාතලේ දිස්ත්‍රික්කයේ රාජ්‍ය සේවකයන් වෙනුවෙන් මාතලේ ඇම්.සී. පාර ප්‍රදේශයේ ඉදිකළ නිල නිවාස සංකීර්ණය සේවක අයිතියට පැවරිමේ උත්සවයට මාතලේ දිස්ත්‍රික්කයේ ආණ්ඩු පක්ෂයේ මන්ත්‍රීවරුන්ට ආරාධනය නොකිරීම සම්බන්ධයෙන් විරෝධය පළ කිරීමත් සමඟ ආණ්ඩු පක්ෂයේ මන්ත්‍රීවරුන්ගේ බෙදීමේ ස්වාභයක් පෙන්නුම් කර අයුරු දක්නට ලැබුණි. මාතලේ දිස්ත්‍රික් සම්බන්ධීකරණ කමිටුවේ සභාපති පාර්ලිමේන්තු මන්ත්‍රී (පො.පෙ) නාලක බණ්ඩාර කෝට්ටේගොඩ විසින් තනිවම ගොස් මෙම නිල නිවාස සංකිර්ණය ජනතා අයිතියට පත් කළ අතර එයට ආරාධනය නොකිරීම සම්බන්ධයෙන් අනෙක් මන්ත්‍රීවරුන්ද තම විරෝධය පළ කළහ. මෙම නිවාස සංකීර්ණයේ නිවාස ඒකක 6කින් සමන්විත වන අතර ඒ සඳහා රජය විසින් දරා ඇති වියදම රුපියල් මිලියන 39කි.
ආරාධනය නොකිරීම සම්බන්ධයෙන් අදහස් දැක්වූ පාර්ලිමේන්තු මන්ත්‍රී ප්‍රමිත බණ්ඩාර තෙන්නකොන් කියා සිටියේ රාජ්‍ය සේවා පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් ට කිසිදු ආරාධනාවක් සිදු නොකිරීම සම්බන්ධයෙන් කනගාටුව වන බවත් මෙවැනි දේ සිදු වීම කිසිසේත් අනුමත කළ නොහැකි බවත්ය.
ආණ්ඩු පක්ෂයේ මන්ත්‍රිවරයකු වන රෝහණ දිසානායක ගෙන් මේ පිළිබඳ විමසීමේදි කියා සිටියේ තමාට කිසිදු ආරාධනාවක් සිදු නොකළ බවත් තමන් මේ පිළිබඳ මාතලේ මහ දිසාපතිවරයා දැනුවත් කළ බවත් ය. මේ පිළිබඳව මාතලේ මහ දිසාපති කරුණාසිරි පෙරේරා කියා සිටියේ මෙම නිවෙස් හිමි රාජ්‍ය සේවකයන්ට හිමි යතුරු ආදිය මිට සති දෙකකට පෙර බාර දුන් බවත් 21 වැනිදා ඔවුන් තේ පැන් සංග්‍රහයක් සූදානම් කර තමාට ආරාධනය කළ බවත් තමන් එයට සහභාගි නොවු බවත් ය. විවෘත කිරීම සඳහා සමරු ඵලක ආදිය සකස් කර නොතිබු බවද හෙතෙම පැවසීය.
දිසාපතිවරයා වැඩිදුරටත් සඳහන් කළේ පසුගිය කාලයේ තමා විසින් ස්වදේශ කටයුතු හා රාජ්‍ය පරිපාලන අමාත්‍යංශය මගින් මෙම නිල නිවෙස් ඉදිකිරිම සඳහා සැලසුම් සකස් කර අමාත්‍යංශයට ඉදිරිපත් කර මුදල් අනුමත කරවාගෙන මෙම නිවෙස් ඉදි කළ බවද ඔහු පැවසිය.
මේ පිළිබඳව කමිටු සභාපති පාර්ලිමේන්තු මන්ත්‍රී නාලක බණ්ඩාර කොට්ටේගොඩ පැවසුවේ පසුගිය රජය සමයේ දිස්ත්‍රික් සම්බන්ධීකරණ කමිටුවේ තීරණ සහ අමාත්‍යංශ ප්‍රතිපාදන අනුව මෙම නිල නිවෙස් ඉදිකර ඇති බවත් ඒ අනුව කමිටුව මගින් සිදු කළ සංවර්ධන යෝජනා ක්‍රම විවෘත කිරීමක් සිදු කළ බවය
කෙසේ වෙතත් දිවයිනේ අනෙකුත් නගර දෙස බැලීමේදී සංවර්ධනයක් සිදුව නොමැති බව මාතලේ ඉතිහාසය ගැන දන්නා පිරිසට අමුතුවෙන් මතක් කළ යුතු නොමැති අතර දේශපාලන පිල් බෙදිම්වලට හසුව ඇති මාතලේ සංවර්ධනය ඉදිරියට රැගෙන යෑම මාතලේට ආදරේ ඇති සියලු මහජන නියෝජිතයන්ගේ වගකීම හා යුතුකම වන බව මතක් කළ යුතුමය.
