නාගරික සංවර්ධන අධිකාරිය කොළඹ ගොල්ෆේස් පිටියේ සිට බත්තරමුල්ල ශ්‍රී ජයවර්ධනපුර දක්වා පා පැදි මාර්ගයක් සැලසුම් කර තිබේ. එම මාර්ගයේ මූලික සැලැස්ම කෙටුම්පත් කිරීම මේ වනවිට ආරම්භ වී ඇත.ජනාධිපති ගෝඨාභය රාජපක්ෂත් නාගරික සංවර්ධන විෂය භාර අමාත්‍යවරයා වශයෙන් අගමැති මහින්ද රාජපක්ෂත් මෙම ව්‍යාපෘතිය අනුමත කර තිබේ. යෝජිත ව්‍යාපෘතිය ක්‍රියාත්මක කිරීමට ජනාධිපතිවරයාත් අගමැතිවරයාත් නාගරික සංවර්ධන අධිකාරියේ සභාපති හර්ෂ ද සිල්වාට සහ අධ්‍යක්ෂ ජනරාල් එන්.පී.කේ. රණවීරට උපදෙස් දී ඇත.
කටයුතු නාගරික සංවර්ධන අධිකාරියේ වැඩ බලන ව්‍යාපෘති අධ්‍යක්ෂ වයි.ඒ.ජී.කේ. ගුණතිලක යටතේ ක්‍රියාත්මකය. ගොඩනැගෙමින් අත්තේ විචිත්‍ර සංකල්පයකි. ඊට හේතුවක් තිබේ. අප දන්නා කොළඹට වඩා නොදන්නා කොළඹ මනරම්ය. එය ඓතිහාසික ස්ථාන, වාස්තු කර්මාන්ත, උද්‍යාන හා දියමංවලින් සැදි කදිම භූ දර්ශනයෙන් යුතු බිමකි. අපට මෙතෙක් කළමනාකරණය කරගන්නට බැරි වූයේ අතිශයින් වටිනා පාරිසරික කලාපයක පිහිටි ලෝකයේ ඇති දුර්ලභ තෙත් බිම් නගරයකි. මේ නගරය නිසි ලෙස කළමනාකරණය කළ හැකි බවට වූ විශ්වාසය අපට කලෙක ලැබී තිබිණි. යෝජිත පා පැදි මාර්ගය නිර්මාණය වන්නේ මේ මනරම් භූ දර්ශන පෙළහර අතරිනි.
කොළඹ සිට බත්තරමුල්ලට යෝජිත මේ පා පැදි මං පෙත දැනට සැලසුම් කර ඇති ආකාරයට දුර කිලෝමීටර 11කි. අධික තදබදයක් හා පීඩනයක් සහිත ප්‍රධාන මාර්ග අවම ලෙස සම්බන්ධ වන සේ මග සැලසුම් කර තිබේ. මංපෙතේ පළල මීටර 2.5 කි. ඉහළට හා පහළට ගමන් කරන මං තීරු දෙකකි. ඉදිවෙමින් ඇති වරාය නගරය තුළ පා පැදි මං තීරුවක් සැලසුම් වේ. යෝජිත පා පැදි මාර්ගය ආරම්භ වන්නේ වරාය නගරයෙනි.
මාර්ගය භාවිතා කරනු ඇතැයි ඉලක්ක කළ කණ්ඩායම් හතරකි. ඒ පාසල් සිසුන්, රැකියාව සඳහා පැමිණෙන පිරිස්, සංචාරකයන් මෙන්ම පා පැදි ක්‍රීඩකයන්ය. වරාය නගරයෙන් ආරම්භ වී ඉතා කෙටි දුරක් ගාළු පාර ඇසුරෙහි දිවෙන මාර්ගය බේරේ වැව දෙසට ගමන් කර වැව ඔස්සේ ගංගාරාම පරිශ්‍රය අසලට ප්‍රවේශ වේ. “ කළම්බො සිටි සෙන්ටර් ගොඩනැගිල් අසලින්“ අතුළට ගමන් කර මාර්ය විහාරමහාදේවී උද්‍යානයට හරහා ගමන් කර නෙළුම් පොකුණ රඟහල අසලින් නිදහස් චතුරශ්‍රය වෙත ගමන් කරයි. යටත්විජිත වකවානුවට යන ඉදිකිරීමක් වූ ආර්කේඩ් ගොඩනැගිල්ල දකිමින් මාර්ගය බෞද්ධාලෝක මාවත ඇසුරු කරමින් බොරැල්ල කනත්ත දෙසට දිවෙයි.
අනතුරුව මාර්ගය විහිදෙන්නේ බොරැල්ල කනත්ත මැදිනි. එය ලංකාවේදී පුද්ගලයෙකුට අත් විඳින්නට හැකි වෙනස්ම ආකාරයේ අත්දැකීමකි. 
කනත්ත මැදින් එන මංතීරුව අනතුරුව බොරැල්ල ගොල්ෆ් පිටිය වෙත ඇදෙයි. ගොල්ෆ් පිටියේ මනරම් දැකුම් දකිමින් ලේක් ඩ්‍රයිව් ඔස්සේ කෝට්ටේ වගුරු බිම් සීමාවෙන් දියත උයන පරිශ්‍රය ස්ඵර්ශ කරයි. මේ තොණ්ඩුවක හැඩය ගත් මාර්ගය අනතුරුව පාරිලිමේන්තුව හා දියවන්නා ඔය ඇසුරෙහි විහිදෙයි. මාර්ගය මුළුමන්නිම නිමා වනවිට දියත උයනේ සිට කොලොන්නාව ඇළ මාර්ගය, මීතොටමුල්ල, ශාන්ත සෙබස්තියන් ඇළ, අලුත්කඩේ උසාවි පරිශ්‍රය ඇසුරු කරමින් බෙරේ වැව හරහා ගෝල්ෆේස් වෙත ගමන් කිරීමට සැලසුම් වේ. මේ මාර්ගයේ තැනින් තැන පා පැදි කුලී පදනම මත ලබා ගත හැකි ස්ථාන 11ක් වේ. ඒ ඕනෑම තැනකින් මිල ගෙවා පා පැදිය රැගෙන ඕනෑම තැනකට බාර දිය හැකිය. දේශීය පාරිභෝගිකයන් බොහෝ විට මාර්ගය භාවිත කරනු ඇතැයි සිතන උදෑසන හෝ රාත්‍රී කාලයේ දී භාවිත පහසුව වෙනුවෙන් මාර්ගය ආලෝක කිරීම, වර්ණ ගැන්වීම අන්තර්ජාතික ප්‍රමිතිය ප්‍රකාරව සිදුවේ.
මේ දියත් වී ඇත්තේ ව්‍යාපෘතියේ මූලික අදියරය. තවම සිදුවෙමින් ඇත්තේ මේ මාර්ගයේ භූමිය හඳුනා ගැනීමය. ලබන අයවැයෙන් මුදල් වෙන් කරගෙන වර්ෂ 2021 වනවිට මේ මාර්ගයේ ඉදිකිරීම් ආරම්භ කළ හැකිය. ඒ සඳහා සියලු ප්‍රවේශ විවෘතව ඇත.
අප අබියස වන්නේ ජාතියක් ලෙස විමසිය යුතු ඵලදායී ප්‍රවේශයකි. කාර්යාල වේලාවන් ලෙස සැලකෙන උදේත් සවසත් බත්තරමුල්ල සිට බොරැල්ල වෙත පැමිණෙන කිලෝමීටර කීපය වාහනයකින් ගමන් කරන විට දල වේගය පැයට කිලෝමීටර හයකටත් අඩු වන අවස්ථා තිබෙන්නේය. මාර්ග තදබදය, නිකරුණේ දහනය වන ඉන්ධන ප්‍රමාණය, විනාශ වන මිනිස් පැය ගණන ගැන බැලුවත් මේ ප්‍රවාහනය වෙනුවෙන් ඵලදායි විකල්ප අවශ්‍යවන කාලයකි. පා පැදි සංස්කෘතියක් විලාසිතාවක ස්වරූපයෙන් හඳුන්වා දීම ඉන් වඩාත් ඵලදායී ප්‍රවේශයක් වන්නේ එබැවිනි.
එක් අතකින් අප ජීවත් වෙමින් සිටින්නේ රජයේ රෝහලක ඕ. පී. ඩී. එකක් බඳු ජන ගහණයක් සහිත සමාජයකය. සෞඛ්‍ය සම්පන්න ජාතියක් වෙනුවෙන් පා පැදියෙන් කෙරෙන ගමනාගමනය ප්‍රවර්ධනය කිරීමට උත්සාහ කිරීම සංකල්පයක් ලෙස තවත් අතෙකින් වැදගත්ය. මෙරට වාර්ෂිකව සිදුවන මරණවලින් සියයට 75 ත් 80 ත් අතර සංඛ්‍යාවක්‌ සිදුවනුයේ බෝ නොවන රෝග හේතුවෙනි. සංඛ්‍යාත්මකව ගතහොත් එය වර්ෂයකට මරණ එක් ලක්‌ෂ තුන්දහස්‌ පන්සීයයක්‌ (103,500) පමණය. පුද්ගලයෙක් බෝ නොවන රෝගවලට ලක්වන ප්‍රධානම හේතුවක් ලෙස සැලකෙන්නේ අඩු ව්‍යායාමවල යෙදීමය. සෞඛ්‍ය අමාත්‍යාංශය හා ලෝක සෞඛ්‍ය සංවිධානය එක්‌ව සිදුකරන ලද නවතම දීප ව්‍යාප්ත සමීක්‌ෂණයකින් හෙළි වී ඇත්තේ කාන්තාවන්ගෙන් සියයට 38.4 ක්‌ද පිරිමින්ගෙන් සියයට 22.5 ක් ද ලෝක සෞඛ්‍ය සංවිධානය විසින් නිර්දේශ කර ඇති දිනකට විනාඩි 20 ක් හෝ 30 ක් ඇවිදීම ඇතුළු ව්‍යායාම රටාව අනුගමනය නොකරන බවය. නව පා පැදි සංස්කෘතියක් රටට හඳුන්වා දෙන්නට සැලසුම් වන්නේ මේ සමාජ වටපිටාව දකිමිනි. ලෝකයේ දියුණු රටවල් මේ සැලසුම්වල විපුල ඵල මේ වනවිට විඳිමින් සිටිති. ජපානය, චීනය මින් මහා අර්ථයන් අත්විඳිනු ලැබූ ආසියාතික රටවල්ය. යුරෝපය පුරා පා පැදිය විලාසිතාවක් සේ පැතිර යමින් ඇත්තේ පරිසරයට මෙන්ම තමන්ගේ සෞඛ්‍ය සම්පන්න ජීවිතයට ද ඇලුම් කරන්නට පුරුදුවන මිනිසුන් හේතුවෙනි.
කොළඹ අවට මෙන්ම කොළඹින් පිටත ද පා පැදි මං තීරු සහිත මාර්ග ඉදි විය. සක්මන් ප්‍රවේශ ඉදි විය. බොහෝවිට එහි අර්ථය වූයේ ව්‍යායාමය ය.
එහෙත් මේ නව පා පැදි මංතීරුව විවෘත වන්නේ නව අර්ථයක් සහිතවය. කොළඹ පාරිසරික අලංකාරය වින්දනය කිරීම, කොළඹ ඉතිහාසය ස්පර්ශ කිරීම, ඒ අතරම සෞඛ්‍ය සම්පන්න මිනිසුන් පිරිසක් බිහි කරගැනීම, සංචාරක ව්‍යාපාරය උත්තේජනය කිරීම සහිත බහු ඵලදායී ව්‍යාපෘතියක් එහි ගැබ් වී තිබේ.
ජාතියක් ලෙස මේ ව්‍යාපෘතිය වැලඳ ගත යුත්තේ එබැවිනි.
