චීනයෙන් ආරම්භ වූ කොවිඩ් - 19 මේ වන විටත් මිනිසුන්ට කිසිඳු අවස්ථාවක් ලබා නොදෙමින් වඩා වැඩි වේගයෙන් ලොව පුරා පැතිරෙමින් තිබේ. ඉදිරි මාසවලදී පෘථිවියේ උත්තරාර්ධ ගෝලයට ශීත ඍතුව එළඹීමට නියමිත බැවින් වයිරසය තවදුරටත් ව්‍යප්ත වීමට නියමිත බව විද්‍යාඥයන්ගේ අදහසයි.
ඒ අන්දමට කොවිඩ් වයිරසය හෝ පාලනය කර ගැනීමට නොහැකිව පවතින අවස්ථාවක චීනයේ පැතිර යන තවත් හඳුනා නොගත් රෝගයක් සම්බන්ධව තොරතුරු වාර්තා වී තිබේ.
දැනට හඳුනාගෙන ඇති අන්දමට මේ රෝගය බෝ වීමට හේතුව වයිරසයක් නොව බැක්ටීරියාවකි. වයඹ දිග චීනයේ දහස් ගණන් මිනිසුන් මේ බැක්ටීරියාවේ පැතිර යෑම හේතුවෙන් රෝගී වී ඇතැයි වාර්තා වේ. මේ බැක්ටීරියාව සමාජයට මුදාහැරීම සිදුවී ඇත්තේ ඖෂධ නිෂ්පාදන ආයතනයක අත්වැරදීමක් හේතුවෙනි. එහෙත් මේ බැක්ටීරියාව ආසාදනය වී ඇත්තේ ගොවිපොළ සතුන් ඇතිකිරීමේ වෘත්තියේ නිරතව සිටින පුද්ගලයන්ටය. ඒ අනුව වයඹ දිග චීනයේ ලන්ෂූ නගරයෙන් පුද්ගලයන් 3,245කට මේ වන විට බැක්ටීරියාව ආසාදනය වී ඇතැයි වාර්තා වන අතර හරකුන්, එළුවන් සහ ඌරන් ඇතිකර පුද්ගලයන් අතර මේ බැක්ටීරියාව වේගයෙන් පැතිර යමින් පවතින බවද වාර්තා වේ.
බැක්ටීරියාව ආසාදනය වූ පුද්ගලයන්ට ප්‍රථමයෙන් ඇතිවන රෝග ලක්ෂණය වන්නේ ආහාර අරුචියයි. ඉන්පසු හිසරදය, මස්පිඩු වේදනාව, උණ සහ ඇඟපත වේදනාව වැනි රෝග ලක්ෂණද ඇතිවන බව වාර්තා වේ.
ලන්ෂූ නගරය පිහිටා ඇති ගන්ෂු ප්‍රාන්තයේ සෞඛ්‍ය කොමිසම තහවුරු කර ඇත්තේ මේ වන විට 21,487කට බැක්ටීරියාව ආසාදනය වී ඇති බව තහවුරු වී ඇතත් එක් මරණයක් හෝ වාර්තා වී නොමැති බවයි. දැනට තහවුරු වී ඇති අන්දමට බැක්ටීරියාව සමාජ ගතවී අැත්තේ ලන්ෂූ නගරයේ සත්ත්ව එන්නත් නිෂ්පාදනය කරන ඖෂධ සමාගමක අත්වැරදීමකිනි. මෙම බැක්ටීරියාව බෘසෙල්ලා නම් වන අතර එය ආසාදනය වීමෙන් වැලඳෙන රෝගය බෘසෙල්ලොසිස් යනුවෙන් නම් කර තිබේ. සීඑන්එන් සේවයද මේ රෝගය වාර්තා කර තිබුණේ බෘසෙල්ලොසිස් යනුවෙනි.
චීනය මේ වන විට මේ රෝගය ‘වසංගතයක්‘ (Outbrake) යනුවෙන් නම් කර තිබේ. එමෙන්ම චීන රජය රජයේ රෝහල්වලට නියෝග කර ඇත්තේ මේ බැක්ටීරියාව ආසාදනය වී ඇතිදැයි පරීක්ෂා කර ගැනීමට රෝහල් වෙත එන ජනතාවට නොමිලේ එම පර්යේෂණයන් කර දෙන ලෙසයි.
මේ අතර චීනයෙන් තවදුරටත් කොවිඩ් රෝගීන්ද අඛණ්ඩව වාර්තා වෙමින් තිබේ. පසුගිය සතියේදී කොවිඩ් ආසාදිතයන් 32ක් වාර්තා වූ අතර දෛනිකව ආසාදිතයන් නව දෙනෙක් පමණ චීනයෙන් වාර්තා වෙමින් තිබේ.
මේ අතර සමස්ත ලෝකයේ කොවිඩ් මරණ මිලිනයන සම්පූර්ණ කිරීමට ඉතා ආසන්නව සිටී. මේ වන විට සමස්ත කොවිඩ් මරණ 9,81,968ක් වාර්තා වී ඇති අතර බොහෝ දුරට මේ සතිය අවසන් වීමට පෙර සමස්ත කොවිඩ් මරණ මිලියනය ඉක්මවා යනු ඇත. සමස්ත ලෝකයෙන් මේ වන විට කොවිඩ් ආසාදනය වූ සංඛ්‍යාව මිලියන 32කි. එහෙත් ලෝක සෞඛ්‍ය සංවිධානය පවසන්නේ මේ වන විටත් වයිරසයේ ව්‍යප්තිය කිසිඳු අන්දමකින් පාලනය වී නොමැති බවයි.
එමෙන්ම පෘථිවියේ උතුරු අර්ධගෝලයට ශීත සමය එළඹීමට නියමිත බැවින් ඉදිරියේදී යුරෝපා රටවලින් තවත් විශාල වශයෙන් කොවිඩ් රෝගීන් වාර්තා විය හැකි බව ලෝක සෞඛ්‍ය සංවිධානය අනතරු අඟවා තිබේ. ලෝක කොවිඩ් සටහනේ දාහතරවන ස්ථානය දක්වා පසුබැස ගියද මහා බ්‍රිතාන්‍ය මේ වන විට නැවත ආසාදිතයන්ගේ වර්ධනයක් පැහැදිලිවම පෙන්නුම් කරමින් තිබේ. ලන්ඩන් නගරය තවමත් ආරක්ෂිත වුවද උතුරු ප්‍රදේශයෙන් දෛනිකව වාර්තා වන ආසාදිතයන්ගේ විශාල වැඩිවීමක් දක්නට ලැබෙමින් තිබේ.
ඉන්දියාවේ තත්ත්වයද ඉතාමත් කනගාටුදායකය. මේ වන විට මිලියන පහ ඉක්මවා ආසාදිතයන් වාර්තා වී ඇති ඉන්දියාව ඉදිරියේදී මිලියන හතක් මේ වන විට ආසාදිතයන් වාර්තා කර ඇති ඇමරිකාව ඉක්මවා යෑමටද ඉඩ තිබේ. ඇමරිකානු ජනතාවගෙන් වයිරසය පාලනයට සහයෝගය නොලැබුනද ඇමරිකාව සතුව යම් යම් සෞඛ්‍ය පහසුකම් ඉන්දියාවට සාපේක්ෂව පවතින බව පැහැදිලිය. එමෙන්ම සෞඛ්‍ය පහසුකම් අවම ඉන්දියාවේද වයිරසය පාලනයට ජනතාවගෙන් ලැබෙන සහය අවමය. එබැවින් ඉදිරියේදී ඉන්දියාවෙන් වාර්තාවන ආසාදිතයන් සංඛ්‍යාව ඇමරිකාව ඉක්මවා යෑමට වුවද ඉඩ තිබේ. එමෙන්ම මේ වන විට ඉන්දියාව කොවිඩ් හේතුවෙන් රට තුළ පනවා තිබූ සියලු තහනම් ඉවත් කර සාමාන්‍ය පරිදි පවත්වාගෙන යමින් සිටී. පසුගියදා ටජ් මහලද සංචාරකයන්ට සම්පූර්ණයෙන් විවෘත කිරීමට ඉන්දීය බලධාරීහු කටයුතු කළහ.
