සංවිධානාත්මක අපරාධකරුවන් මෙරටින් පලායාමට දරන උත්සාහයන් ව්‍යර්ථ කිරීමට මෙන්ම නීති විරෝධීව රටට ඇතුළු වන්නන් වළක්වාලීම පිණිසත්, තහනම් භාණ්ඩ රට තුළට ගෙන ඒම වළක්වාලීම පිණිසත් පුළුල් ආරක්ෂක ජාලයක් ක්‍රියාත්මක කිරීමට ආරක්ෂක අමාත්‍යාංශය කටයුතු යොදා ඇත. ඒ සඳහා ත්‍රිවිධ හමුදාව, විශේෂ කාර්ය බළකාය, පොලිසිය හා උතුරේ ධීවර ප්‍රජා ආරක්ෂක කමිටු සහායද ගෙන තිබේ.
මේ සම්බන්ධයෙන් අප කළ විමසීමකදී හමුදා මාධ්‍ය ප්‍රකාශක බ්‍රිගේඩියර් චන්දන වික්‍රමසිංහ සිළුමිණට පැවසුවේ භූමියේ ආරක්ෂාව සම්බන්ධයෙන් අවශ්‍ය සියලු ක්‍රියාමාර්ග ගෙන ඇති බවත් ජාතික ආරක්ෂාව සැලැසීම වෙනුවෙන් උපරිම ලෙසින් කටයුතු යොදා ඇති බවයි. ඒ වෙනුවෙන් ත්‍රිවිධ හමුදාවම ඒකාබද්ධව කටයුතු කරන බවද ඔහු කීය.
නාවික හමුදා මාධ්‍ය ප්‍රකාශක කපිතාන් ඉන්දික ද සිල්වා පැවසුවේ උතුරේ ධීවර ප්‍රජා ආරක්ෂක කමිටු සහාය ලබා ගෙන වැඩි වශයෙන් අනවසර සංක්‍රමණ සිදුවන මන්නාරම දකුණු මුහුදේ මුර සංචාරක වැඩි කර ඇති බවයි. එමෙන්ම ගුවන් ආවේක්ෂණ කටයුතුවලින් ගුවන් හමුදාව විසින් දායකත්වය සපයනු ලබන බවත් පොලිසිය හා සෙසු ආරක්ෂක අංශ හා එක්ව රටේ උපරිම ආරක්ෂාව වෙනුවෙන් ඒකාබද්ධව කටයුතු කරන බවයි. අපරාධකරුවන් රටින් පිටවීම වැළැක්වීම පිණිස උපරිම බලය යොදා ඇති බවද ඔහු පැවසීය.
පොලිසිය විසින් රට තුළ සිවිල් නීතිය ක්‍රියාත්මක කරද්දී රටෙන් මුහුදු මඟින් පැනයාමට උත්සාහ දරන පුද්ගලයන් කෙරෙහි වැඩි අවධානයක් යොමු කර ඇතැයිද පැවසූ නාවික හමුදා මාධ්‍ය ප්‍රකාශකවරයා දිවා රෑ දෙකෙහිම මුර සේවා තර කර ඇති බව කීය.
