අධිකරණවලට බන්ධනාගාර රැඳවියන් ඉදිරිපත් කිරීමේදී පවතින ප්‍රායෝගික දුෂ්කරතා සඳහා විකල්පයක් වශයෙන්, මෙන්ම පසුගිය කොරෝනා සමයේ අධිකරණය තුළ බන්ධනාගාර රැඳවියන් සම්බන්ධ නඩු ඇසීමේ ක්‍රමවේදය පහසු වනු පිණිස, අලුතින් අත්හදා බැලුණු වීඩියෝ තාක්ෂණික ක්‍රමය මඟින් නඩු ඇසීම සිදුකෙරුණු අතර එය සාර්ථක ක්‍රමයක් ලෙස ඔප්පු වී ඇත. ශ්‍රී ලංකාව තුළ මෙම වීඩියෝ තාක්ෂණය අත්හදා බැලුවේ මුල්වරට වන අතර එය ක්‍රියාත්මක කිරීම සම්බන්ධයෙන් ක්ෂේත්‍රයේ කිහිප දෙනෙකුගෙන්ම විමසා බැලුවෙමි.
අධිකරණ අමාත්‍යාංශ‍යේ අතිරේක ලේකම් මාධ්‍ය, පාලන, රෝහන හපුගස්තැන්න මේ සම්බන්ධයෙන් සිළුමිණට මෙසේ කීය.
“අධිකරණ කටයුතු සඳහා බන්ධනාගාරයෙන් අධිකරණවලට රැඳවියන් ගෙනයන විට, පවතින හා පැනනැගුණු දුෂ්කරතාව නිසායි, මෙම නියමු ව්‍යාපෘතිය ගොඩනැගුවේ. මෙයට අපට සම්පූර්ණ සහාය දුන්නේ ශ්‍රී ලංකා ටෙලිකොම් ආයතනයයි.
එවකට අධිකරණ ඇමති නිමල් සිරිපාල ද සිල්වාගේ ඉල්ලීමකට අනුව, ශ්‍රී ලංකා ටෙලිකොම් ආයතනයේ නියමු ව්‍යාපෘතියක් ලෙසින් මෙම වැඩසටහන සැකසුවෙ. මෙහි එක් කැමරා පද්ධතියක්, කොළඹ මහේස්ත්‍රාත් අධිකරණයේ උසාවියේත්, තවත් කැමරා පද්ධතියක් කොළඹ වැලිකඩ බන්ධනාගාරයේත් ස්ථාපිත කළා.
මෙම ටෙලිකොම් නියමු ව්‍යාපෘතිය දින 7ක් ක්‍රියාත්මක කළා. උසාවිය තුළ විනිසුරුවරු කැමති වුණා. සාමාන්‍යයෙන් මාසයක් ගතවෙනවා නඩු 100 අහන්න. නමුත් පැය 2කින් අහලා ඉවරකරන්න හැකිවුණා.
මේ ක්‍රමයට ඉදිරියේදී නඩු අහන්න පහසු වෙන්න නම්, නඩු අංක අනුව විත්තිකරුවන් පිළිවෙළකට සකසා පිළිවෙළින් ඉදිරිපත් කළ යුතුයි.
මෙහිදී මාකඳුරේ මධුෂ් වැනි පාතාල සාමාජිකයන් ඉදිරිපත් කිරීමේදී සැලකිලිමත් විය යුතුයි. මෙය කිසියම් සංවිධානාත්මක ක්‍රමවේදයකට අනුව සකස් වූවක්.
විදේශ රටවල නම් මෙම ක්‍රමවේදය බොහොම හොඳින් ක්‍රියාත්මකයි. මේ ගැන හොඳින් අධ්‍යයනය කරලා තමයි මෙවැනි අවස්ථා ප්‍රයෝජනයට ගැනීමට මෙවැනි ක්‍රමවේද සකසා ඇත්තේ. කැබිනට් මණ්ඩලයෙන් අනුමැතිය ලබා දුන්නා.”
මේ සම්බන්ධයෙන් ගරු අධිකරණ, මානව හිමිකම් හා නීති ප්‍රතිසංස්කරණ අමාත්‍යතුමාගේ පෞද්ගලික ලේකම්, නීතිඥ අනිල් ගයාන් කෞෂ්‍ය මෙසේ කීය.සාමාන්‍යයෙන් මේ ක්‍රමය ඇමෙරිකාවේ රටවල් බොහොමයක් භාවිත කරනවා. නමුත් අපි යාවත්කාලීන වෙලා නැහැ. ඒ නිසා නඩු ගොඩග‍ැහෙනවා. මෙම ක්‍රමයේ වාසි වැඩියි. පරණ ක්‍රමය නාස්තිය වැඩියි. කාලය ගතවීම වැඩියි. නඩු ගොඩගැසීම වැඩියි. එක් නඩුවක් සඳහා උසාවිය අවට එක්රැස්වන පිරිස වැඩියි.
මේ සියල්ලක්ම අවම කරගතහැකියි. නව ක්‍රමවේදය මඟින්. නියමු ව්‍යාපෘතියේදී අප සම්බන්ධ කර ගත්තේ එක් උසාවියක් පමණක් වුවත්, අනික් උසාවිත් මේ සඳහා යොදාගන්න පුළුවන්.
වීඩියෝ තාක්ෂණය මඟින් නඩු ඇසීමේ ක්‍රමවේදයේ වාසි හා යහප්‍රවණතා සම්බන්ධයෙන් නීතිඥ සංගමයේ ලේකම් රජිව් අමරසූරිය ද මෙසේ අදහස් දැක්වීය.
“අපේ නීති පද්ධතිය නවීකරණය කළ යුතුයි. අනිත් රටවල් ගැන බලනවිට අපේ තාක්ෂණය පහළ මට්ටමක පවතින්නේ. ඒ නිසා කොවිඩ් කාලේ අපේ වීඩියෝ තාක්ෂණය භාවිත කළා.
මෙහිදී අදාළ නඩුව විභාගයට ගැනීමට පෙර Vidio conference සඳහා නඩුවේ ලේඛන ගොනුකර තියෙනවා. අදාළ නඩුව කැඳවන විට එම නඩුවේ තොරතුරු තමයි ඉදිරිපත් කෙරෙන්නේ.
විදේශ රටවල නම් මේ පරිගණක පද්ධතියෙන් පසු ක්‍රියාත්මක කරන නඩු ඇසීමේ ක්‍රමවේදය අවු: 10 - 15 කාලපරාසයකට පිරියම් යෙදුණා.
නඩු කල්යාම සම්බන්ධයෙන් හැම රජයක්ම සාකච්ඡා කරලා තියනවා. මොනහරි විසඳුමක් ඉදිරිපත් කරලා තියෙනවා. දැනට මේ ක්‍රමය මඟින් කොළඹ උසාවිය පමණක් සම්බන්ධ වුවත්, අනිකුත් පිට පළාත්වල උසාවිත් මෙයට ඒකරාශි කර ගන්නවා.
මෙමඟින් ශ්‍රේෂ්ඨාධිකරණයේ, අභියාචනාධිකරණයේ කල්දැමූ නඩු යම්තාක් දුරට ඉක්මන් වෙනවා.
නඩු කල්යාම ගැන ඇමතිතුමා නිතරම සාකච්ඡා කරලා තියෙන්නේ. නඩු කල්යාමේදී ළඟ දින දෙන්න බෑ කීවාම ශ්‍රේෂ්ඨාධිකරණ විනිසුරුවන් ළඟ දින දෙනවා. ඇතැමුන්ගේ මරණය සිදුවුණ පසුවත් නඩු අහනවා.
ලංකාවෙ, සමහරු මැරිලත් නඩු අහන ක්‍රමය අනාදිමත් කාලයක සිට පවතින දෙයක්. නඩු අසා ඉක්මණින් නිම කිරීමේ වගකීම රජයට විතරක් ගන්න බැහැ. සියලුම පාර්ශ්වවලට වගකීමක් තියෙන්න ඕනෑ.
සමහරු නඩු පැමිණිලිකරුවන් විසින්ම කල්දමා ගන්නවා. නඩුවට විවිධ වාසි ලබා ගැනීමේ බලාපොරොත්තුවෙන්. නමුත් හැම දෙනාම එකතුවී නඩුව අවසන් කර ගැනීමේ අරමුණින් නඩුවට එකතුවිය යුතුයි.
අධිකරණ වෛද්‍ය වාර්තාව ඊළඟ දිනයට ලැබිය යුතුයි. රස පරීක්ෂණ වාර්තාව කඩිනමින් ලැබිය යුතුයි.
මේ ආදී වශයෙන් නඩු කඩිනම් කිරීම තනි පක්ෂයකට නොහැකි අතර හවුල් කීපයක් එකතු විය යුතුයි.
අභියාචනාධිකරණයේ හා ශ්‍රේෂ්ඨාධිකරණයේ නඩු කල්යාම සම්බන්ධයෙන් අමාත්‍යවරයා දිගින් දිගටම අධිකරණ විනිසුරු කොමිසම දැනුවත් කළා. නඩු කල්යාම ගැන දිගු දින ලබාදීමට නොහැකි බව කී විට කෙටි දින ලබාදී නඩු ඉක්මන් කිරීමට උපදෙස් ලබාදී ඇත.
ඇතැම් නඩුවල පාර්ශ්වයන් පවා නොමැතිව නඩු අසන අවස්ථා ඇති අතර ඇතැම් පාර්ශ්වයන් මියගොස් සිටියදී පවා නඩු අසනු ලැබේ.
ශ්‍රී ලංකා නීති ආධාර කොමිසන් සභාවේ ජනාධිපති නීතිඥ රොහාන් සහබන්දු මහතා මෙසේ කීය. “කොවිඩ් යුගයේ සිරකරුවන් එහෙට මෙහෙට කරන්න බැහැනේ. ඒ නිසා වීඩියෝ තාක්ෂණය මඟින් නඩු ඇසීමේ ක්‍රමවේදයක් සිදුකළා.
එය අප කාටත් හරිම පහසුවක් වුණා. පිටරටවල නම් එසේ තාක්ෂණය භාවිතා කරනවා. අපට වඩා දියුණුයි.
ඉන්දියාවේ කොවිඩ් කාලේ නීතිඥවරු අනුගමනය කළෙත් ඔවැනි ක්‍රමයක්. මේ ක්‍රමය නිසා මිනිස්සු එකට එක ගැටෙන්නෙ යොමු වෙන්නෙත් නෑ. සිරකරුවන් උසාවියට ගෙනියන්න අවශ්‍ය වන්නේ නැහැ.
නඩුකාරතුමා ලිස්ට් එකේ පිළිවෙළට නඩු අහන්නේ. උසාවියේ ඉඳලා විනිසුරුට පුළුවන් ඇප දෙන්න. තවදුරටත් රිමාන්ඩ් කරන්න පුළුවන්. දුරස්ථභාවය රැගෙන නඩු අහන්නත් පුළුවන්.
කොළඹ ප්‍රධාන මහේස්ත්‍රාත් තුමිය මේක දිගටම කරගෙන ගියා. ඒ දිනවල උසාවියට මිනිසුන් ඒම අඩු වුණා. සාර්ථක ක්‍රමයක් ලෙස ස්කයිප් තාක්ෂණය මඟින් නඩු ඇසීමේ ක්‍රමවේදය ගත හැකියි.
මේ අනුව බලවිට දිනෙන් දින ගොඩගැහෙන දහසක් නඩු දිගින් දිගටම කල් නොයවා මෙවැනි අති නවීන ක්‍රම මඟින් කඩිනමින් නඩු ඇසීම සිදු කළහොත් දිගින් දිගටම පවතින මේ තදබදය අවම කරගත හැකිය.
