සිලෝන් ටී ගැන කියු විට ලෝකයේ නොදන්නා රටක් නොමැති තරම් ය. කොටින්ම කිවහොත් සිලෝන් ටිවල රසයට විදේශිකයන් වහ වැටුණේ අතීතයේ සිටම ය. අපේ රටේ තේවල රසය, ප්රමිතිය මෙන්ම ගුණාත්මක බව නිසාම තේ සඳහා වර්තමානයේද ඇත්තේ ඉහළ ඉල්ලුමකි. තේ දලු කිලෝවක් සඳහාද වෙනත් කිසිදු කාලයක නොලැබු මිලක් තේ වතුහිමියන්ට ලැබි ඇත. එපමණක් නොව ලංකා තේ වෙන්දේසියේදී ඉහළ මිල ගණන්වලට අලෙවි වන්නේය. කොටින්ම කිවහොත් තේ කර්මාන්තයට හිමිවි ඇත්තේ හොඳ කළ දසාවකි. අපි මේ කියන්නට යන්නේ සිලොන් ටී නාමය ලෝකයා ඉදිරියේ බැබළවීම සඳහා කටයුතු කරන තේ කම්හල් හිමියකු ගැනය. ඔහු අනුර අතුකෝරල ය. අනුර අතුකෝරල පිටිගල අතුකෝරල සමුහ ව්යාපාරයට අයත් අතුකෝරල තේ කර්මාන්ත ශාලාවේ කළමනාකරණ අධ්යක්ෂවරයාය.
අගෝස්තු මස 26 වැනි දින කොළඹ පැවති තේ වෙන්දේසියේදී අතුකෝරල ගෘප් සුපර් වෙළෙඳ නාමය යටතේ OPA තේ කිලෝවක් සඳහා රුපියල් 920ක උපරිම මිලක් වාර්තා කිරීමට අතුකෝරල තේ කාර්මාන්ත ශාලාවට හැකිවිය.
ප්රමිතියෙන් හා ගුණාත්මක බවින් යුතු තේ නිෂ්පාදනය කිරීම සම්බන්ධයෙන් අතුකෝරල තේ කර්මාන්ත ශාලාව සඳහා සුවිශේෂි සම්මාන රැසක් හිමිවි ඇත. එපමණක් නොව ජාත්යන්තර තේ අලෙවියේ ජයග්රහණ රැසක්ද හිමිකරගෙන ඇත. අයි.එස්. ඕ. 22000,2005 එච්.ඒ.සී.සී.පි යන ජාත්යන්තර තත්ත්ව සහතිකයන්ට අනුකූලව පවත්වාගෙන යන මෙම තේ කර්මාන්ත ශාලාවේ තේ වර්ග ගණනාවක් නිෂ්පාදනය කරනු ලබයි.
කළමනාකරණ අධ්යක්ෂ
අනුර අතුකෝරල
|
මෙරට පහතරට තේ නිෂ්පාදනයෙන් සියයට 40ක් පමණ නිෂ්පාදනය කරනු ලබන්නේ OPA ශ්රේණියේ තේ ය. මේ නිසා මෙකී තේ කිලෝවක් සඳහා තේ වෙන්දේසියේදී උපරිම මිලක් ලැබීම පහතරට තේ නිෂ්පාදකයන් ලැබු ජයග්රහණයකි. එමෙන්ම මෙය රටේ විදේශ විනිමය වැඩිවීමටද හේතුවකි. පසුගිය කාලයේ OPA ශ්රේණියේ තේ කිලෝවක් සඳහා තේ වෙන්දේසියේදී ලබා ගැනීමට හැකි වූයේ රුපියල් 500ක 600ක මුදලකි. එහෙත් අනුර අතුකෝරල වැනි තේ කම්හල් හිමියන් නිසා මෙකී තේ වර්ගයට තේ වෙන්දේසියේදී උපරිම මිලක් ලැබී ඇත. එය අහඹු සිදුවීමක්ද නොවේ.
නියමිත ප්රමිතිය හා ගුණාත්මක බවින් යුතුව තේ නිෂ්පාදනය කිරීම ඊට හේතුවයි.
අනුර අතුකෝරල මහතා සිය නිෂ්පාදන කටයුතු කරගෙන යන්නේ තේ ටුවරිසම් නැමති සංකල්පය යටතේය. කොටින්ම කිවහොත් අතුකෝරල තේ කර්මාන්ත ශාලාව තේ සම්බන්ධ විවිධ පර්යේෂණය කරන පුද්ගලයන්ට විශ්වවිද්යාලයක් වැනිය. මෙකී තේ කම්හල් පරිශ්රය තේ පැළ තවානක්, තේ වත්තක්, තේ කර්මාන්තශාලාවක් හා තේ අලෙවි මධ්යස්ථානයකින් සමන්විත වේ.
තේ අලෙවි මධ්යස්ථානය විදේශීය සංචාරකයන්ගේ ආකර්ෂණය දිනාගත් ස්ථානයකි. කොරෝනා වසංගතයට පෙර එනම් මෙකී වර්ෂයේ මාර්තු 17 වැනි දින වනතෙක්ම විදේශීය සංචාරකයන් පිටිගල පිහිටි මෙකී තේ අලෙවි මධ්යස්ථානය වෙත පැමිණියහ. විශේෂයෙන්ම අතුකෝරල තේ කම්හලේ තේ නිෂ්පාදනවල ප්රමිතිය මෙන්ම අගය එකතුකළ තේ වෙන්දේසිය තේ නිෂ්පාදන නිසා උපරිම මිලක් ලැබි ඇත.
අතුකෝරල තේ කර්මාන්ත ශාලාවේ කළමනාකරණ අධ්යක්ෂක අනුර අතුකෝරල මහතා ඒ පිළිබඳ මෙසේ අදහස් දැක්වීය.
“තේ නිෂ්පාදනය සඳහා අපි යොදා ගන්නේ ගුණාත්මක බවින් උසස් අමු තේ දලු. අපේ වතුවලින් සියයට 20ක් විතර අමු තේ දලු සපයා ගන්නවා. ඉතිරි සියයට 80 පිටිගල අවට පෞද්ගලික වතුවලින් සපයා ගන්නවා. අපේ කම්හලට තේ දලු සපයන පුද්ගලයන් 1200ක් විතර ඉන්නවා. තේවලට දැන් හොඳ ඉල්ලුමක් ඇතිවෙලා තියෙනවා. පසුගිය කාලයේ නොයෙකුත් හේතු නිසා සිලොන් ටී නාමයට කැළලක් ඇතිවෙලා තිබුණා. නමුත් මගේ බලාපොරොත්තුව වුණේ තේ නිෂ්පාදනයේදී ප්රමිතිය වැඩි දියුණු කරගැනීමයි. එහිදී විශේෂයෙන් අගය එකතුකළ තේ නිෂ්පාදනය කිරීම සඳහා කුරුඳු
ඉඟුරු, දොඩම් ආදිය අපේ වතුවල වගා කරනවා. ඒ නිසා ඒවායේ ප්රමිතිය ගැන ගැටලුවක් නැහැ. කාබනික තේ, නිෂ්පාදනය කරනවා. තේවල ප්රමිතිය හා ගුණාත්මක භාවය තමයි තේ වෙන්දේසියේදී ගැනුම්කරුවන් සලකා බලන්නේ. ඒ නිසා තමයි මෙවර තේ වෙන්දේසියේදී OPA ශ්රේණියේ තේ වර්ගය සඳහා උපරිම මිලක් ලැබුණේ”
තේ මිල වැඩි වීම සඳහා කොරෝනා සමයේ හඳුන්වා දුන් ඔන්ලයින් තේ වෙන්දේසියද රුකුලක් වී තිබේ. මේ නිසා විදේශිකයන්ට පවා තේ මිලදී ගැනීමට හැකිවී ඇත.
පහත රට තේ කම්හල් හිමියන් විසින් ග්රේණි 18කට අයත් තේ නිෂ්පාදනය කරනු ලබන අතර අතුකෝරල තේ කර්මාන්ත ශාලාව මඟින් මාසයකට තේ කිලෝ 50000ක් 60000ක් නිෂ්පාදනය කරයි. අනුර අතුකෝරල තේ කර්මාන්තයට යොමු වී ඇත්තේ රබර් වගාව අත්හැරීමෙනි. ඒ ගැන ඔහු මෙසේ කීවේය.
“ ඒ කාලයේ අපි රබර් වගාව තමයි කළේ. රබර් මිල අඩුවීමත් සමඟ මේ ප්රදේශයේ ගොඩක් අය රබර් ගලවලා තේ වගාව සඳහා යොමු වුණා. මීට වසර 30කට කලින් තමයි නවීන පන්නයේ තේ කර්මාන්තශාලාවක් අපි පිටිගල ආරම්භ කළේ. ඒක තමයි අපේ ව්යාපාරවල හැරවුම් ලක්ෂය වුණේ. මගේ තාත්තා ඩී. ඩබ්ලිව් අතුකෝරල. තාත්තා සහ මම එකතුවෙලා තේ කර්මාන්තශාලව ආරම්භ කළා. මීට වසර 09කට පෙර තාත්තා අභාවප්රාප්ත වුණා. මට අවශ්ය වුණේ අපේ කම්හලේ තේ නිෂ්පාදන ජාත්යන්තරයට ගෙනියන්නයි. අපේ තේවල රසය ලෝකයා ඉදිරියට ගෙනියන්නයි. ඒ වෙනුවෙන් මම කැප වුණා. පසුව අපේ තේ නිෂ්පාදන සෘජුව අප සමාගම විසින්ම අපනයනය කිරීමට කටයුතු කළා. දැනට අප කම්හලේ තේ නිෂ්පාදන චෙක් ජනරජය, මැලේසියාව, චීනය, ජපානය යන රටවල්වලට අපනයනය කරනවා. අගය එකතු කළ තේ වර්ග සඳහා හොඳ මිලක් මෙන්ම ඉල්ලුමක්ද තියෙනවා. ඒ විතරක් නෙවෙයි අපේ තේ අලෙවි මධ්යස්ථානයට පැමිණෙන විදේශිකයන් සිය රටවලට ගොස් ඔන්ලයින් මඟින් අපේ තේ නිෂ්පාදන මිලදී ගැනිමට කටයුතු කරනවා ”
අතුකෝරල තේ කර්මාන්ත ශාලාව ඔවුන්ගේ තේ නිෂ්පාදන වෙනුවෙන් ලබා තිබෙන විවිධ තත්ත්ව සම්මාන සහ සහතිකවලට එම තේ ප්රමිතියෙන් හා උසස් ගුණාත්මක බවෙන් යුතු වීමයි.
ශ්රී ලංකා තේ මණ්ඩලය මඟින් ලබා දෙන C.Q.C. තනි තරුව තත්ත්ව සහතිකය, මතුගම කලාපයේ හොඳම තේ කර්මාන්ත ශාලාව, දකුණු පළාතේ විශාල ව්යාපාර අංශයේ රන් සම්මානය, ජාතික මට්ටමේ නිෂ්පාදන සඳහා ලෝකඩ හා කුසලතා සම්මාන, ජාතික පලදායිතා විශේෂ කුසලතා සම්මානය, කම්කරු දෙපාර්තමේන්තුවේ සමාජ කථිකාවත විශිෂ්ටතා රන් සම්මානය යන සම්මාන හා තත්ත්ව සහතික අතුකෝරල තේ කර්මාන්ත ශාලාව වෙත පසුගිය කාලයේදී හිමි විය. එපමණක් නොව මෙකී තේ කර්මාන්ත ශාලාව ගාල්ල දිස්ත්රික්කයේ ආදර්ශමත් තේ කම්හල ලෙස තේ මණ්ඩලය විසින් තෝරාගෙන තිබේ. “ජනාධිපති ගෝඨාභය රාජපක්ෂයන් පාර්ලිමේන්තුවේ 9 වැනි සැසිවාරය විවෘත කරමින් පැවැත්වූ කතාවේදීද සිලොන් ටී නාමය රැකගෙන නිෂ්පාදන කටයුතු කළ යුතු බව පැවසුවා.
අපි මුල සිටම ප්රමිතියෙන් ගුණාත්මක භාවයෙන් යුතුව තේ නිෂ්පාදනය කළා. ඒ නිසා අපේ රටේ තේවලට ඉහළ මිලක් ලැබී තිබෙනවා.
දැන් ඇමෙරිකාවෙන් කතා කරලා අපේ තේ මිලදී ගන්නා තත්ත්වයක් ඇතිවෙලා තියෙනවා. වත්මන් රජයේ ජනාධිපතිතුමා, අගමැතිතුමා, වැවිලි කර්මාන්ත ඇමති දොස්තර රමේෂ් පතිරණ යන මහත්වරු තේ කර්මාන්තය සඳහා රජයේ විශේෂ අනුග්රහය ලබාදී තිබෙනවා.තේ කර්මාන්තයේ දියුණුවට රජය විශාල කාර්යභාරයක් කරනවා. ඔන්ලයින් තේ වෙන්දේසිය ඉතා සාර්ථක වීමට එයත් හේතුවක්” අනුර අතුකොරල වැඩිදුරටත් එසේද පැවසීය