හුදකලා කළ පෙම්වතියකගේ විරහව... | සිළුමිණ

හුදකලා කළ පෙම්වතියකගේ විරහව...

 

කවියකුට, ගී පද රචකයකුට නිර්මාණාත්මක සිතුවිලි පහළ වන්නේ කොයි මොහොතේ දැයි කිව නොහැක. කවියක් ගීතයක් ලියන්නට තැනක් වේලාවක් නැත. එසේ තැනක් වේලාවක් නැතිව බිහිවන පද රචනා එක රැයින් ගී නිර්මාණ බවට පත්වන්නේද නැත. පත්නොවන්නේද නැත. නවපරපුරේ ගී පද රචකයකු වන අපේ සහෝදර මාධ්‍ය සගයකු වන ෆවුස් මොහොමඩ් විසින් ලියන ලද ගීතය ද එවැනි රචනාවකි.

“මීට අවුරුද්දකට විතර කලින් දවසක් දා මම රාත්‍රි සේවය නිමා වී නිවෙසට යමින් සිටියා. මම පදිංචිව සිටින්නේ මීගමුව ප්‍රදේශයේ. ඒ වෙනකොට වෙලාව රෑ දොළහ පහුවෙලා ඇති. බස් එකේ හිටපු එක්කෙනා දෙන්නා බැස යනවා. අසුනක වාඩි වෙලා හිටිය මගේ ගේ ඇස් යාන්තමින් පියවෙමින් තිබුණේ. ඒ වෙලාවේ තමයි මගේ හිතට පද පේළි දෙකක් ආවේ.

 

“පාට හතෙන් මල් තෝරාලා
කැලණි යන්න එනවා කීවා...“

 

කියලා මගෙ හිතට ඒ පද දෙක ආවේ මෙන්න මේ වගේ සිතුවිල්ලක් හිතේ තිබුණු නිසා. කොල්ලෝ කෙල්ලෝ යාළු වෙලා ඉන්න කාලේ තොරතෝංචියක් නැතිව කියවනවා. ළඟින් ඉන්නකනුත් කියවන එකමයි කරන්නේ.

නමුත් ඒ හැමදේම වෙනස් වෙන්න මහ ලොකු කාලයක් යන්නේ නෑ. එහෙම වෙනස් වුණාම පෙම්වතියගේ හිතට දැනෙන දුක තමයි මගෙ හිතට පාට හතෙන් මල් තෝරලා කැලණි යන්න එනවා කීවා. කියන පදයෙන් කියැවුණේ. මේ පද දෙක ලියලා කාලයක් ගියාට පස්සේ තමයි ඉතිරි පද ටික සම්පුර්ණ වුණේ.

ගමෙන් කොළඹට ආවාම අපේ තරුණ ළමයි කොයි තරම් නම් ආදරය ප්‍රේමය ගාවදි රැවටෙනවාද? සමහරු ගමෙන් ආවාම කොයි තරම් පොරොන්දු දෙනවාද ඒ පොරොන්දු ඉටුවෙන්නේ කියෙන් කීයෙද? අවසානයේ සිදු වෙන්නේ ප්‍රේමය ළඟ මුළාවෙන තරුණියෝ හිතෙන් විඳවන එක. ජීවිතේ අවුල් කර ගන්න එක.

මෙන්න මේ හැමදේ ගැනම හිතලා තමයි මගේ අතින් මේ පද ටික ලියැවුණේ. මේ මා ලියු දෙවැනි ගීතය. අශෝක කෝවිලගේ කියන්නේ මගේ පුතාගේ සංගීත ගුරුවරයා. ඔහු මගෙන් දවසක ඇහුවා සින්දු ලියපුවා නැද්ද කියලා. ඒ වෙලාවේ මම ඔහුට මේ පද ටික පෙන්නුවා. අශෝක මේ පද පෙළ දැකලා මෙය ගීතයකට හොඳයි අපි ගීතයක් කරමු කිව්වා. ඔහු දවස් දෙක තුනකට පස්සේ අපූරු තනුවක් නිර්මාණය කර තිබුණා.

ඔහුම තමයි යෝජනා කළේ ගීතය ගැයීම සඳහා අලුත් හඬක් යොදා ගමු කියලා. ඒ අනුව තමයි මේ ගීතය නව පරපුරේ ගායිකා අයෝමී පෙරේරාට දුන්නේ.“ ගීතයේ පසුබිම් කතාව පිළිබඳ පැවැසුවේ ගී පද රචක ෆවුස් මොහොමඩ්ය.

අයෝමිගේ හඬ අපූරුය. ඇය මේ යොවුන් පරපුර නියෝජනය කරමින් ගී ගයයි.

 

“මුහුදු රැල්ල දඟකරද්දි
කොළඹ අහස ලස්සනද
විසේකාර මල් දකිද්දි
මා ගැන අමතක වුවාද .. “

 

අයෝමි එලෙසින් ගයන විට මට හැගෙන්නේ හුදකලා ප්‍රේමවන්තියගේ විරහවයි. ගමෙන් නගරයට පැමිණි පෙම්වතා විසින් අමතක කර දැමු පෙම්වතියගේ ළතැවිල්ලයි.

 

“මා ළඟින්ම දැවටි දැවටි වරු ගණන් ඔයා
මුළු ජීවිතේම හැබෑ නොවන හීනයක් කළා...“

 

ගීතයේ දෙතැනකම මේ පද පෙළ යෙදීම නිසා පෙම්වතියගේ සිතෙහි ඇති දුක වේදනාව වඩාත් තදින් එත්තු ගන්වයි.

නිමේශයකදී සිතේ ඇති වූ සිතුවිල්ලක් විනාඩි දෙක තුනකදි රසික සිතේ සියුම් වේදනාත්මක වින්දනයක් ඇති කරවන්නට සමත් වීමේ රහස ඇත්තේ පදරචකයා සංගීතඥයා මෙන්ම ඒ සංගීතයට අනුව පද පෙළ ගයන ගායිකාව සතුවය. මේ ගීතය සාර්ථක බව රැඳි ඇත්තේ මේ තුන්කට්ටුව එකට එකතු වූ විටය.

[email protected]

Comments