පෞද්ගලික ගොඩනැගිලිවල පවත්වාගෙන යන අමාත්‍යාංශ හා රාජ්‍ය ආයතන රජයේ ගොඩනැගිලිවල පවත්වාගෙන යෑමට පියවර ගත යුතු බව ජනාධිපති ගෝඨාභය රාජපක්ෂ මහතා උපදෙස් දී තිබේ. මෙමගින් වසරකට රුපියල් කෝටි දහසක අධික මුදලක් ඉතිරිකර ගත හැකි වනු ඇතැයි විශ්වාස කෙරේ.
මේ අනුව නව රජයේ අමාත්‍යාංශ හා රාජ්‍ය අමාත්‍යාංශ මෙන් ම රාජ්‍ය ආයතන ද රජයට අයත් ගොඩනැගිලිවල ස්ථාපිත කිරීමට පියවර ගෙන ඇත. ඉකුත් යහපාලන රජය විසින් කෘෂිකර්ම අමාත්‍යාංශය සඳහා ලබාගෙන තිබූ පෞද්ගලික ගොඩනැගිල්ල වෙනුවට කෘෂිකර්ම අමාත්‍යාංශය සඳහාම ඉදිකර තිබූ ගොවිජන මන්දිරයට කෘෂිකර්ම අමාත්‍යාංශය ගෙන යෑමට පියවර ගනු ලැබුවේ ද ජනාධිපතිවරයාගේ මැදිහත්වීමෙනි.
මේ ආකාරයෙන් මේ වනවිටත් පෞද්ගලික ගොඩනැගිලිවල පවත්වාගෙන ගිය රාජ්‍ය අමාත්‍යාංශ හා ආයතන 30 ක් පමණ රජයේ ගොඩනැගිලිවලට රැගෙන ගොස් ඇති අතර මේ වසර අවසාන වීමට පෙර පෞද්ගලික ගොඩනැගිලිවල පවත්වා ගෙන යන සියලු රාජ්‍ය ආයතන රජයට අයත් ගොඩනැගිලිවලට රැගෙන යාමට පියවර ගෙන තිබේ.
