දේශීය හා විදේශීය සංචාරකයින්ගේ ආරක්ෂාව සහතික කිරීමට ශ්‍රී ලංකා රජය විසින් සංචාරක සංවර්ධන අධිකාරිය හරහා ගෙන ඇති ක්‍රියාමාර්ග හමුවේ සංචාරකයින්ට ආරක්ෂිතව ගමන් කළ හැකි රටක් ලෙස ශ්‍රී ලංකාව නම් කිරීමට ලෝක සංචාරක හා සංචාරක කවුන්සිලය (WTTC) නිර්දේශ කර තිබේ. පසුගිය අගෝස්තු 8 වැනිදා කළ ඒ නිර්දේශය හමුවේ මේ වන විට ශ්‍රී ලංකාව කෙරෙහි සංචාරකයින්ගේ අවධානය වැඩි වී තිබෙන අතර දකුණේ සම්ප්‍රදායික ගැමි ධීවර
සංස්කෘතියේ ජීවමාන අංගයක් වූ රිටි පන්නය කෙරෙහි සංචාරක අවධානය යොමුව තිබේ. මේ පන්න ධීවර ක්‍රමය නරඹන්නට, එහි ක්‍රියාශීලී වන්නට, ඒ ඇසුරෙහි සමරු සටහන් ගොනු කරගන්නට බොහෝ විදේශිකයෝ රුචි වෙති. කොග්ගල වෙරළ තීරය ආශ්‍රිත නොගැඹුරු මුහුදේ රිටිපන්නයෙහි යෙදෙන ධීවරයන් දකිනු රිසිව පැමිණෙන මේ විදේශිකයින් නොමැකෙන මතක සමගින් ලෝකයට රැගෙන යන්නේ ලාංකේය ජීවිත
විචිත්‍රත්වයේ මනරම් සලකුණුය.
(සටහන - ලලිත් චාමින්ද)
