මැද දුම්බර ප්‍රාදේශීය ලේකම් කොට්ඨාශයට අයත් උඩිස්පත්තුව පිහිටා තිබෙන්නේ මහනුවර නගරයේ සිට කිලෝ මීටර 40 ක පමණ දුරිනි. මහනුවර මහියංගණ ප්‍රධාන මාර්ගයේ තෙල්දෙණිය දක්වා ගොස් රංගල මාර්ගයේ කිලෝ මීටර පහක පමණ දුරක් ගියපසු හමුවන උඩිස්පත්තුව නගරයෙන් හැරී අඩි හතරක පළළින් යුත් කොන්ක්‍රීට් මාර්ගයේ වැටී ඇත්තේ ඇටඹගහවත්ත ග්‍රාමයටය. මෙහි කපරාරු නොකළ කාමර දෙකකින් යුත් නිවසක් ඇත.නිවසට අතුළු වෙත්ම දක්නට ලැබුණේ හිසේ ගෑවෙන නොගෑවෙන තරම් උසකින් රෙදි වැලක ස්වරූපයෙන් එල්ලා තිබූ රන්,රිදී හා ලෝ පදක්කම් ගොන්නකි. ඒවායෙහි හිමිකරුවන් සිව් දෙනා අතරින් වැඩිමලා වූ දහසය හැවිරිදි සඳුන් සෙව්මිණ ධර්මරත්න තම මව සමඟ අපව පිළිගත්තේ අහිංසක සිනහවකින් මුව සරසාගෙනය.
නිවසේ වහළයට පහළින් එල්ලෙමින් තිබූ පදක්කම් ගොන්නේ සෙසු හිමිකරුවන් අනෙක් කාමරයේ සිට එබිකම් කළේ ස්වේත වර්ණ කරාතේ ඇඳුමින් සැරසීගෙනය. ඒ අතරින් දහතුන් හැවිරිදි දිව්මි තස්මිලා සෙව්මිණි ධර්මරත්න තම අයියා සමඟ අධ්‍යාපනය ලබන්නේ අමුපිටිය ජාතික පාසලේය. දස හැවිරිදි චේතන විදුෂාන් ධර්මරත්න හා හය හැවිරිදි ඔෂධ විදුෂාන් ධර්මරත්න උඩිස්පත්තුව ප්‍රාථමික විදුහලේ පස්වන හා දෙවන වසර පන්තිවල අධ්‍යාපනය ලබති. වනයේ පිපී වනයේම පරව යන්නට තිබූ මල්වන් දරුවන්ගේ හැකියාවන් හඳුනා ගෙන ඔවුන්ට කරාතේ ක්‍රීඩාවෙන් මෙතරම් දුරක් එන්නට මඟ පෙන්වා ඇත්තේ කළුපටි හතරවන ශ්‍රේණිධාරී එස්. සූරියභවන්ය. කරාතේ ක්‍රීඩාවට යොමුව මාස නවයක් තරම් කෙටි කාලයක් තුළ දිවයිනේ ජනප්‍රිය පැසැල් රැසක සිසුන් පරාජය කරමින් මේ සිව් සහෝදරයෝ රන්, රිදී හා ලෝකඩ පදක්කම් 104 කින් මේ වන විටත් ඔවුන්ගේ ගෙල සරසාගෙන තිබේ. කොවිඩ්-19 බලපෑම එල්ල වී ක්‍රීඩා තරඟ අත් නොහිටුවන්නට අද ඔවුන්ගේ මේ පදකම්කම් ගොන්න 150 ද ඉක්මවා තිබෙන බව පවසන්නේ මෙම ළමුන්ගේ කරාතේ සහය උපදේශක රසික බණ්ඩාරය.
පවුලේ වැඩිමලා වන සඳුන් පසුගිය වසරේ පැවැති ශ්‍රී ලංකා අන්තර් පාසැල් කරාතේ තරඟාවලියේදී රිදී පදක්කමක් දිනා ගැනීමෙන් පසු මෙම වසරේ මාර්තු මස මැලේසියාවේ පැවැත්වීමට නියමිත තිබූ ආසියානු තරඟාවලියට සහභාගි වීමට සිදුසුකම් ලබා සිටියත් කොරෝනා අර්බුදය හේතුවෙන් එම තරඟාවලිය අවලංගු කිරීම නිසා ඔහුගේ සිහින බොඳවී ගියේය.මේ වන විට සඳුන් කරාතේ ක්‍රීඩාවෙන් ලබාගත් ජයග්‍රහණ වෙනුවෙන් හිමිකර ගෙන තිබෙන රන්, රිදී හා ලෝකඩ පදක්කම් ගණන 29 කි. දෙවැන්නා වන දිව්මි පදක්කම් 10 ක් ද තෙවැන්නා වන චේතන පදක්කම් 34 ක්ද දිනා ගනිත්දී පවුලේ බඩපිස්සා වන ඔෂධ දිනා ඇති පදක්කම් ගණන 31 කි. ඒ අතරින් 25 ක්ම රන් පදක්කම් වීම තුළින් ඔහු සතු දක්ෂතාව කෙබඳුද යන්න තේරුම් ගැනීමට පුළුවන.
කරාතේ ක්‍රීඩාව ගැන අසාදැන හෝ නොතිබුණු මේ දරුවන් ඊට යොමුව තිබෙන්නේ අපූරු ආකාරයකටය. එය අප හා පැවසුවේ මිල කළ නොහැකි මිණිකැට වන් මේ දරුවන් මෙළොවට බිහිකළ දිනේෂා චාන්දනීය. තුන්වෙනි පුතා ඉගෙන ගන්න උඩිස්පතුත්ව ඉස්කෝලේ කරාතේ පන්ති පටන් ගන්නවා කියලා ගිය අවුරුද්දේ සර් කෙනෙක් ඇවිත් කියලා තිබුණා. ඒ සර් ළමයි ඔක්කොම පිට්ටනියට ගෙනත් පන්ච් කරන්න කියලා. අපේ පුතා ඒක හොඳට කළා කියලා එයාව කරාතේ වලට තෝර ගත්තා. එයත් එක්ක ළමයි 20 ක් විතර ඉස්කෝලේ පුහුණු වීම් කළා. කරාතේ පුහුණු කළ සූරියභවන් සර් ඉස්කෝලේ වෙලාවෙන් පස්සේ හවස පන්ති වලටත් පුතාව ගෙන්වා ගත්තා. මහත්තයා වැඩට යන නිසා මම අනිත් දරුවෝ තුන් දෙනත් එක්ක ගිහින් පුතාට කරාතේ පන්ති ඉවර වෙනකල් බලා ඉන්නවා. ඒ ඉන්න අතරේ ලොකු පුතයි දුවයි කරාතේ පන්තියට සම්බන්ධ වුණා. එයාලගේ ඉස්කෝලේ එතකොට මේ ක්‍රීඩාව තිබුණේ නැහැ. දවසක් පන්තියට ගිය වෙලාවක මගේ පුංචි පුතා පන්චින් බෑග් එකට පහරක් ගැහුවා.ඒක දැකපු ගමන් සර් කිව්වා හෙට ඉඳලා දරුවා පන්තියට එවන්නම ඕන කියලා. පුංචි පුතා ගිිය වසරේ මැයි මාසේ වගේ ඉඳලා පන්ති වලට ගියේ. එයා හැම තරඟයකදීම රන් පදක්කම් දිනුවා.
මම රත්නපුරේ කෙනෙක්. මහත්තයා වෘත්තියෙන් පෙදරේරු රස්සාව කරන්නේ. කොළඹදී අපි හමුවෙලා 2000 දී විවාහ වුණා. 2004, 2007, 2010 හා 2013 වසර වලදී තමයි මේ දරුවෝ ඉපදුණේ. මුලින් අපි හිටියේ මේ ළඟ මහත්තයාගේ මහ ගෙවල් තියෙන පුස්සැල්ලගොල්ලේ. අපි පුංචියට කාමර දෙකක් හදාගෙන හිටියේ. දරුවෝ තුන් දෙනෙක් හම්බ වෙලා ඉන්න කොට එතන නාය ගියා. ඊට පස්සේ අපි දරුවොත් එක්ක මකුල්දෙණියේ ආච්චිලාගේ ගෙදර ගියා. එතන ඉන්න අතරේ තමයි මේ ඉඩම මහත්තයාගේ මාමා කෙනෙකුගෙන් 280000.00 කට ගත්තේ. මේක මහවැලි ඉඩමක්. රක්ෂිතය නිසා ඔප්පු නැහැ. අනවසර පදංචිකරුවන් විදිහට තමයි අපිව සලකන්නේ. මේ දරුවන්ගේ දක්ෂතා දැකලා මධ්‍යම පළාතේ ආණ්ඩුකාර තුමා අපේ ගෙදරට ආවා. දරුවන්ගේ ක්‍රීඩා කටයුතු වලට උදව් කරන්න එතුමා පොරොන්දු වුණා.
වැලේ ගෙඩි වැලට බරක් නැතැයි කියමනක් තිබේ. මොනතරම් අගහිඟකම් තිබුණද දිනේෂා තම සැමියාවූ ප්‍රියන්ත හා එක්ව දරුවන් සිව් දෙනා උස් මහත් කළේ තමන් විඳින දුක් ඔවුන්ට විඳින්නට නොතබන්නේ යැයි සිතාගෙනය. බිරිඳගේ කතාවට ඌන පුර්ණයක් එක් කරමින් ප්‍රියන්ත සංජීව ධර්මරත්න මෙසේ පැවසුවේය. පසුගිය කොරෝනා කාලේ මට වැඩ තිබුණේම නැහැ. වැඩක් හම්බ වුණොත් රෑ දවල් නොබලා මම වැඩකරන්නේ මේ දරුවන්ට හොඳ හෙට දවසක් උදාකරලා දෙන්නයි. මම බැංකුවකින් ලක්ෂ තුනක ණයක් අරගෙන තමයි මේ ඉඩම ගත්තේ. පුළුවන් විදිහට කාමර දෙකක් හදා ගත්තා. ඒ ණය ගෙවාගන්න බැරිවුණ නිසා දැන් බැංකුවෙන් නඩු දාලා තියෙන්නේ. කරාතේ ක්‍රීඩාවට ඕන කරන එක් ඇඳුම් කට්ටලයක් රුපියල් 10000.00 ක් විතර වෙනවා. ළමයි හතර දෙනා තරඟ වලට එක්කගෙන යන්න ලොකු වියදමක් යනවා. දරුවන්ට කරාතේ උගන්වන සූරියභවන් ගුරුතුමා ගොඩක් උදව් කරනවා. මේ අවස්ථාවේ අපිට කවුරුහරි අත දෙනවා නම් ඒක ලොකු සහනයක්.
පවුලේ වැඩිමලා වන සඳුන් හා තෙවැන්නා වන චේතන මේ වන විටත් තැඹිලි පටිධාරීන්ය. හය හැවිරිදි ඔෂධ කහ පටිධාරයෙකි. චේතනා තාමත් සුදු පටිය දරන්නේ කහ පටිය ලබා ගැනීම අවශ්‍ය පුහුණුවීම් කොවිඩ්-19 නිසා අතපසු වීම හේතුවෙනි.
මේ දරුවෝ හතර දෙනාගේ සහජ දක්ෂතා අපේ ගුරුතුමා හඳුනා ගත්තා.එතුමා මොවුන්ව පුහුණු කරත්දී මේ දරුවෝ විශාල කැපවීමකින් පුහුණු වුණා.එහි ප්‍රතිපල අද දකින්න පුළුවන්.මේ දක්ෂතා තවත් වර්ධනය කරගෙන ඉදිරියට යන්න නම් මේ අයට නිසි පෝෂණය වගේම පුහුණු වීම් වලට අවශ්‍ය උපකරණ හා සුදුසු ස්ථානයක් තිබිය යුතුයි. එක තරඟයකට දරුවෙක් ඉදිරිපත් කරන්න රුපියල් 2000.00 ක් විතර අය කරනවා. හතර දෙනෙක් ඉදිරිපත් කරන්න 8000.00 යනවා. ගොඩක් වෙලාවට මේ මුදල දරන්නේ සූරියභවන් මාස්ටර්. කරාතේ කියන්නේ ගොඩක් නගර බද පාසැල් වලට සීමා වී තිබූ ක්‍රීඩාවක්. අද මේක ගම් මට්ටමට ගෙනත් දක්ෂ ක්‍රීඩකයන් බිහි කරන්න අපට හැකිවෙලා තියෙනවා. ගමේ ළමයින්ට ඉදිරියට එන්න අවස්ථා තිබෙන්න ඕන. එහෙම වුණොත් අපිට ජත්‍යන්තරය දිනන ක්‍රීඩකයින් බිහිකළ හැකියි. කළුපටි ධාරී පුහුණු උපදේශක රසික බණ්ඩාර පවසයි.
කරාතේ ක්‍රීඩාවෙන් සුවිශේෂි දක්ෂතා දක්වන මේ සිව් සහෝදරයන්ගේ නිවස ඉදිරිපිට පන්චින් බෑග් එකක් වෙනුවට තබා ඇත්තේ වැලි පිරවූ පොහොර උරයකි. දරුවන් සිව් දෙනා තමන්ගේ හිසටද ඉහළින් යන සේ පාදයක් ඔසවා එයට පහර දෙන්නේ හරි අපූරුවටය. කැපවීම, නොබසුබට උත්සහය, ධෛර්යය ආදි බොහෝ දේ ඒ සිත් තුළ ගැබ්ව තිබේ. නොයෙකුත් දුෂ්කරතා මධ්‍යයේ කරාතේ ක්‍රීඩාවේ යෙදෙන මේ දරුවන්ට සුළු හෝ දිරියක් ලබා දුනහොත් ඔවුන් එම ක්‍රීඩාවේ බොහෝ දුර යන බවට සලකුණු ඔවුන් සිව් දෙනාගේම දෑසේ තුළ ලියවී තිබේ.
මෙම දරුවන් සිව්දෙනාගේ දක්ෂතා ඇගයීම පිණිස පසුගියදා මධ්‍යම පළාත් ආණ්ඩුකාර නීතීඥ ලලිත් යූ ගමගේ දුෂ්කර මඟක් ගෙවා ඔවුන්ගේ නිවසට ගියේ මධ්‍යම පළාත් ප්‍රධාන ලේකම් ගාමිණි රාජරත්න ඇතුළු පළාත් අධ්‍යාපන හා ක්‍රීඩා බලධාරීන් සමඟය. මොවුන්ගේ ඉදිරි යහපත වෙනුවෙන් ගන්නා ක්‍රියාමාර්ග පිළිබඳව ආණ්ඩුකාරවරයා මෙසේ අදහස් දැක්වීය. මේ වගේ දක්ෂතා ඇති දරුවන් රැසක් මධ්‍යම පළාතේ ඉන්නවා. ඔවුන් ක්‍රීඩාවේ යෙදෙන්නේ නොයෙකුත් දුෂ්කරතා මැදයි. මේ දරුවන්ගෙ හෙට දවස වෙනුවෙන් දිරියක් වීමට අපි කටයුතු කරනවා. මේ අය දැනට පදිංචිව සිටින නිවස මහවැලි රක්ෂිතයට අයත් කොටසක්. දැනට බාගෙට ගොඩනඟා ඇති ඉඩම ඉදි කිරීම සඳහා පහසුකම් සපයන්න අපට හැකියාවක් නැහැ. මොකද මේක අනවසර ඉදි කිරීමක්. මැද දුම්බර ප්‍රාදේශීය ලේකම්වරයාට මම කිව්වා මේ පවුලට නිවසක් ඉදිකර දීමට සඳහා සුදුසු ඉඩමක් යෝජනා කරන්න කියලා. ඒ කටයුතු දැන් සිදු වෙනවා. ශ්‍රී දළදා මාලිගාවේ දියවඩන නිළමේ ප්‍රදීප් නිලංගල දෑලගේ අවධානය මේ පවුල වෙත යොමුව තිබෙනවා. එතුමා ඔවුන්ට නිවසක් ගොඩනගා දීමට ආධාර උපකාර කරන්න සූදානම්. අපේ රටට ක්‍රීඩාවෙන් ජත්‍යන්තර ජයග්‍රහණ ලබා දෙන්න හැකියාව, දක්ෂතාව තිබෙන මේ වගේ දරුවන් ආරක්ෂාකර ගැනීම අපේ වගකීමක්. ඒ වගකීම වෙනුවෙන් අපි කැපවෙනවා.
