රතුපාට පාටියත් මනාප පොරයක
රතු පාට පක්ෂයට අලුත් ම අවුලක් ඇතිවෙලා කියලයි කියන්නේ. සමාජ මාධ්‍යය (මුහුණුපොත) යොදා ගනිමින් රතු පාට පක්ෂයට දිගින් දිගටම දැඩි විවේචන එල්ල වෙනවාලු. දේශීය, විදේශීය මේ හැම පැත්තකින් ම රතුපාට පක්ෂයේ ලොක්කාට එල්ල වන විරෝධතාව වළක්වන්නේ කොහොමද කියලා ඔවුන් හොයනවා කියලයි ආරංචිය. තවත් පැත්තකින් ලොකු අර්බුදයක් හැදිලා කියන්නේ. ඒ වෙන මොනවත් නොවෙයි. පක්ෂයේම අය මනාප සෙල්ලම පටන් අරන් ඉන්න නිසාලු. රතු පාටියේ අය ප්‍රසිද්ධියේ කියන්නේ තමන්ගේ පාටියේ ලකුණට මනාපය දුන්නම ඇති කියලා. ඒ වුණාට දියවන්නාවට පනින්න බලන් ඉන්න රතු පාටියේ සමහර අයියලා තමන්ට මනාපය ලබාගන්න අමුතු අමුතු ගේම් ගහනවා කියලයි ආරංචිය.
යුව රජ වෙන්න සිහින දකින පුතාණෝ
කොළ පාටියයි දුරකතන පාටියයි දිගින් දිගටම ගැටෙන බව නොරහසකි. මේ පාටි දෙකේම මාතෘකා මවන්නා ලෙස පුතාණෝ ඉදිරිපත්ව සිටිති. පුතාණෝට දුරකතන පාටියට සම්බන්ධ ජ්‍යෙෂ්ඨයන් අවවාද දුන්න ද පුතාණෝ ඒවා පිළිපදින බව කියමින් ඔවුන්ට සමු දෙනවලු. එහෙත් වේදිකාවට නැගලා ජනතාව අමතන්න ගත්ත ගමන් පුතාණෝට කිව යුත්තේ කුමක්ද කියන කාරණය හරි හරියට අමතක වෙනවා කියලයි පුතාණෝ ළඟින් ම ඉන්න ඇත්තන්ගෙන් ආරංචි වෙන්නේ. කොහොම නමුදු කෙසේ හෝ තමන් පළමුවැනියාට මනාප අරගෙන කොළඹ දිස්ත්‍රික්කයෙන් දියවන්නාවට එනවා කියලයි පුතාණෝ කියනවා කියන්නේ. තමන් මේ රටේ යුව රජ වෙනවා කියලත් ඔහු කියනවලු. යුව රජවීමේ ආශාව වැඩිවීම නිසා පුතාණෝ මේ දිනවල හරි හරි වැඩ කරනවලු.
පුතාණෝ සහභාගි වන ජනරැලි සඳහා බෙදාහරින ආරාධනා පත්‍රවල තමන් මේ රටේ යුවරජු බව සඳහන් කරලා තියෙනවා කියලයි ආරංචිය.
පළමු තැන ගන්න හදන පුලතිසිපුර කටකාරයා
මැතිවරණ සටන එන්න එන්නම උණුසුම් වීමත් සමඟ රස කතා, අමුතු කතා, මෝඩ කතා නොයෙක් කතා රටවටින් ම ඇසෙන්නට පටන් අරන්. දියවන්නාවට කොහොම හරි පැනගන්න උත්සාහ කරන බොහෝ ප්‍රසිද්ධ අයියලා මරු මරු කතා කියනවා කියලයි ආරංචිය.
කලක් රජගෙදර සිටි පුලතිසිපුර ගොයියා මේ දිනවල කියනවලු තමන් අනිවාර්යයෙන් ම පළමු තැනට කැමැත්ත අරගෙන දියවන්නාවට එනවා කියලා. එහෙම බැරි වුණොත් ගෙදර නතර වන බවත් ඔහු කිව්ව කියලයි ආරංචිය. පොහොට්ටු පාටියෙන් ගම්පහ පැත්තෙන් හරි හරි කතා ඇසෙනවාලු. කාට කාටත් කෙලින් ම බැණ වදින, තරමින් පොඩ්ඩක් උස මහත හාදයා තනිවම ආණ්ඩුවක් හදනව කියල වේදිකාවක් වේදිකාවක් ගානේ කිය කියා යනවලු.
බදුල්ල පැත්තෙන් දියවන්නාවට පනින්න ලෑස්ති වෙලා ඉන්න සුරූපිනියත් පොඩි පොඩි හාදයන්ගෙන් හොඳටම ගේම ඉල්ලනවා කියලා කියන්නේ. ගම්, නගර පාලනය කරන ඇත්තන්ට හොඳ හොඳ විහිලු ඈ සපයනවා කියලයි ආරංචිය.
පොහොට්ටුවේ ගැටුම රජගෙදර දක්වා යයි
මැතිවරණ වේදිකාවේ ගැටුම් මෙන් ම මැතිවරණ වේදිකාවේ අභියෝග වැඩි වශයෙන් ම ඇසෙන්නට ඇත්තේ ගම්පහ පැත්තෙනි.
කොළ පාටියේ, පොහොට්ටු පාටියේ, නිල් පාටියේ මෙන් ම පුතාණෝගේ පාටියේ අය අතර මත ගැටුම් උග්‍ර වී ඇති බවයි පැවසෙන්නේ.
පොහොට්ටු පාටියේ ජ්‍යෙෂ්ඨයෙක්ව දිගින් දිගටම විවේචනය කරන අලුත් හාදයෙක් නිසා යුව රජුටත් තරහ ගිහිල්ලා කියලයි ආරංචිය.
තරබාරු පෙනුමක් ඇති පොහොට්ටු පාටියේ ගම්පහ ජ්‍යෙෂ්ඨයා දියවන්නාව නියෝජනය කරපු අයෙක්ලු. දියවන්නාවට පැනගන්න ප්‍රථම වතාවට උත්සාහ කරන නවකයකු මෙලෙස ගැටුමක් ආරම්භ කරපු බව තමයි ගම්පහ පැත්තෙන් ආරංචි වෙන්නේ.
මේ දෙන්නගේ ගැටුම රජගෙදර දක්වා ගිහිල්ලා කියලයි කියන්නේ.
වේදිකාවට නැතිවම බැරි කවුරුත් කැමැති සිහින කුමාරි
ඉකුත් ජනාධිපතිවරණ වේදිකාවේ කා අතරත් ප්‍රසිද්ධ භාර්යාවක් ඉන්නවානේ. බොහෝ දෙනෙක් ඇගේ කතාබහට හරිම ආසයිලු.
තමන්ගේ ස්වාමියා නිසැකවම රජවෙන බවත් ඉන්පසුව තමන් මේ රටේ රැජින වන බවත් ඇය එම වේදිකාවල දිගින් දිගටම ප්‍රකාශ කර සිටිය කියලත් මතකයි නේ. තමන් වේදිකාව තරණය නොකරන්නේ නම් තම කුමාරයාට හෝ කුමාරයාගේ පාටියට කිසිදු ගමනක් යා නොහැකි බව ඇය කිව්ව කියලයි ආරංචිය. ඉකුත් සතියේ දින දෙක තුනක් මහ මැතිවරණ වේදිකාවට ආයි ගොඩවෙලා තිබෙනවාලු. කොහොම වුණත් ඇයට වැඩියෙ කතා කරන්න එපා කියලා පුතාණෝගේ පාටියේ අය කෑගැහුවා කියලත් කියනවා.
කුමන බාධක ආවත් තමන් කුමාරයා වෙනුවෙන් වේදිකාවේ රඟන බවත් ජනතාව ඉදිරියට ඉදිරියෙන් ම ගමන් කරන බවත් ඇය කීවාලු.
ක්‍රිකට් වීරයන් රකින්න නුවරින් ම පිරිසක් එක්වෙති
රටක් දිනපු ක්‍රිකට් ක්රීඩකයන්ට අවුලක් හදන්න එපා කියලා මේ දිනවල මුහුණු පොත පුරා සටහන් ගොඩකින් පිරිලා. දියවන්නාව කලක් තිස්සේ ම නියෝජනය කරපු නුවර පැත්තේ හාදයෙක් ක්‍රිකට් ක්රීඩකයන්ට පාටි දැම්මා කියලා බොහෝ දෙනා කිපිල ඉන්නව කියලයි කියන්නේ. කොහොම වුණත් මේ කතාව දැන් ජාත්‍යන්තරයට ගිහිල්ලාලු. දියවන්නාවට පැනගන්න ඉන්න වෙලාවේ නුවර හාදයා කරපු මේ කතාවට පොහොට්ටු පාටියේ වැඩ්ඩෝ කිහිප දෙනෙකුටම තරහ ගිහිල්ලා කියලයි ආරංචිය. දියවන්නාව නියෝජනය කරපු නුවර පැත්තේ කිහිප දෙනකුයි කොළඹින් දියවන්නාවට පැන්න කිහිප දෙනකුයි එකතුවෙලා මේ කතන්දරේ ඉවර කරන්න ලොකු උත්සාහයක් ගත්තත් එයින් කිසිදු ප්‍රතිඵලයක් නොලැබුණු බව තමයි ආරංචිය.
