ඉකුත් ජනාධිපතිවරණයේ දී ගම්පහ දිස්ත්රික්කයේ ප්රතිඵලය තීරණාත්මක සාධකයක් වූ බව ඔබ සඳහන් කර තිබුණා. ඒ කතාව තව ටිකක් පැහැදිලි කරන්න පුළුවන්ද?
අපි මැතිවරණවලදී ඒවාට ආවාට ගියාට මුහුණ දෙන්නෙ නෑ. ජයග්රහණය අපේක්ෂාවෙන් ඉතා හොඳට සංවිධානය වෙලා තමයි අපි මැතිවරණයට මුහුණ දෙන්නෙ. 2018 පැවැති පළාත් පාලන මැතිවරණයෙන් පස්සේ පළාත් සභා හා පළාත් පාලන ආයතනවල අපේ මන්ත්රිවරු හාරසියයකට අධික පිරිසක් උඩුගම්පොලට කැඳවලා මැතිවරණ ප්රතිඵල විශ්ලේෂණය කරලා ජනාධිපතිවරණයට අපි ඉලක්කයක් හදා ගත්තා. ඒ ඉලක්කය සපුරා ගන්න හැම කෙනාටම වගකීම් බෙදා දුන්නා. අපේ ඉලක්කය තිබුණේ වැඩි ඡන්ද ලක්ෂ තුන හමාරක් ගන්නයි.මීගමුව හැරෙන්න අනෙක් හැම ප්රදේශයකම ඒ ඉලක්කය සම්පූර්ණ කර ගන්න පුළුවන් වුණා. සමහර ආසනවල අපේක්ෂිත සංඛ්යාව ඉක්මවා තිබීම නිසා තමයි අපිට වැඩි ඡන්ද 3,62000 ක් ගන්න පුළුවන් වුණේ. ජනාධිපතිවරණයේ දී ගම්පහ දිස්ත්රික්කයේ අපි මේ වැඩි ඡන්ද සංඛ්යාව නොගත්තා නම් ගෝඨාභය රාජපක්ෂයන්ට ලැබෙන්නෙ 47% කට ටිකක් වැඩි ගාණක්. එහෙම වුණා නම් දෙවැනි මනාපය ගණන් කරන්න වෙනවා. ඒක වැළකිලා ගෝඨාභය රාජපක්ෂයන් 62%ක ඡන්ද ප්රතිශතයක් ලබා ගන්නෙ ගම්පහ දිස්ත්රික්කයේ ජනතාව එතුමා කෙරෙහි තැබු විශ්වාසය නිසයි.
එතකොට හරීන් ප්රනාන්දු හිටපු මන්ත්රීවරයා කියන විදියට කාදිනල්තුමන් ගේ ප්රකාශය ගෝඨාභය රාජපක්ෂයන්ගේ ඡන්ද ගොඩ වැඩි කරන්න හේතු වුණා කියන එක බොරුවක්ද?
ඒක බොරුවක් විතරක් නොවෙයි හරීන් කතෝලිකයකු විදියට කතෝලික ජනතාවට කරපු නින්දාවක් අවනම්බුවක් විදියටයි ඒ කතාව මම දකින්නෙ. කාදිනල් හිමිපාණන් පාස්කු ප්රහාරය සම්බන්ධයෙන් කරන ලද ප්රකාශයක් වැරදි විදියට අර්ථ කථනය කරල කාදිනල්තුමන්ට කළ අපහාසයට සමාව ගන්නවත් හරීන්ට වුවමනාවක් තිබුණෙ නෑ. එදා කාදිනල් හිමිපාණන් එළියට බැහැල ජනතාව සන්සුන් කළේ නැත්නම් ධීවර ජනතාව මාළු පිහි ටික අතට අරන් එළියට බහින්න ඉඩ තිිබුණා. එහෙම වෙන්න ගිය මහ විනාශයක් වැලකුණේ කාදිනල්තුමන් එවෙලේ බුද්ධිමත්ව කටයුතු කිරීම නිසයි. තමන් ගේ ආගමේ නායකයාට අපහාස කළ හරීන්ට කාදිනල්තුමන් ගෙන් සමාව ගන්නත් සජිත්ට මැදිහත් වෙන්න සිද්ධ වුණා. කාදිනල්තුමන් හමු වෙලා එළියට ඇවිල්ලත් කියනවා තමන් ඒ කරපු ප්රකාශය ඉල්ලා අස්කර ගන්නෙ නෑ කියල. සජිත් ගේ පිලේ බෞද්ධ නායකයෝ අපේ භික්ෂුන් වහන්සේට අපහාස කරනවා. කතෝලික නායකයන් ඒ ආගමේ නායකයන්ට අපහාස කරනවා. මේකෙන් අපිට ඇතිව තිබෙන සැකය තමයි මේ අය මේ රට අනාගාමික රාජ්යයක් කරන්න උත්සහ කරනවා කියන එක. ඒ වැනි අය හා ඒ අයට අත්වැල් අල්ලන නායකයන්ටත් මේ මැතිවරණයේදි ජනතාව අමතක නොවන පාඩමක් උගන්වාවී.
මෙවර මහ මැතිවරණයේදී ගම්පහ ඉලක්කය වැඩි ඡන්ද ලක්ෂ පහක් කියල ඔබ සඳහන් කර තිබෙනවා. ඒ ඉලක්කය සපුරා ගන්නා බව තහවුරු කරන්න ඔබට තිබෙන සාධක මොනවාද?
මම මුලදිත් සඳහන් කළා වාගේ අපි මැතිවරණයට මුහුණ දෙන්නෙ ගම්පහ දිස්ත්රික්කයේ පළාත් පාලන ආයතනවල නියෝජිතයන්, පළාත් සභාවල නියෝජිතයන්, ආසන සංවිධායකවරුන් මෙන්ම ගම්මට්ටමේ ඉන්න ගමේ නායකයන් යන අපි හැමෝම එක්ව එක කණ්ඩායමක් විදියටයි. අපි අපේක්ෂා කරන්නෙ පක්ෂයට ලැබෙන ඡන්ද ගොඩ වැඩිකර ගන්නයි. මෙවර අපේ ඉලක්කය සපුරා ගන්න ඉවහල් වෙන වැදගත්ම කාරණය තමයි එජාපය දෙකඩ වෙලා ඔවුන් වෙන වෙනම මැතිවරණයට ඉදිරිපත්ව සිටීම. මේ තත්ත්වය නිසා ගමේ එජාප පාක්ෂිකයන් කලකිරිලා. ඔවුන් ඡන්දය දීමෙන් වැළකී ඉන්න සුදානමක් තිබෙන බවටත් දැන ගන්න තිබෙනවා. 2015 පැවැති ජනාධිපතිවරණයේ සිට මේ දක්වා පැවැති මැතිවරණවල ගම්පහ දිස්ත්රික්කයේ ප්රතිඵල විශ්ලේෂණය කීරිමේදී අද ඇති වී තිබෙන දේශපාලන වෙනස්කම් සමඟ අපිට මේ මහ මැතිවරණයේදී වැඩි ඡන්ද ලක්ෂ පහකට වඩා ලබා ගන්න පුළුවන්. එහෙම වුණොත් අපිට දිනා ගත හැකි මන්ත්රී ආසන සංඛ්යාවත් 12 ක් 15ක් වෙන්න පුළුවන්.
ඔබේ පියා ආදරය කරපු ශ්රී ලංකා නිදහස් පක්ෂය සමඟ ඔබට තිබෙන අර්බුදය මොකක්ද?
මම කරන ප්රකාශ වැරදි විදියට අර්ථකථනය කරලා සමාජයට වැරදි මතයක් දෙන්න උත්සහ කරන එක ගැන මම කනගාටු වෙනවා. මට ශ්රීලනිපය සමඟ කිසිම අර්බුදයක් නෑ. ශ්රීලනිපය මමත් ගරු කරන මමත් ආදරය කරන පක්ෂයක්. මට ප්රශ්නය තියෙන්නේ ඒකේ වත්මන් සභාපති හිටපු ජනාධිපති මෛත්රීපාල සිරිසේන සමඟයි. මට මෛත්රීපාල සිරිසේන සමඟ ප්රශ්නයක් තිබෙනවා වගේම එයාට ගෑවුන කෙනෙක්ටවත් ඡන්දය දෙන්න එපා කියල මම අදත් කියනවා. 1952 දී බණ්ඩාරනායක මැතිතුමා එජාපයෙන් එළියට ඇවිල්ල ශ්රීලනිපය පිහිටුවා ගත්තේ සමාජවාදි බලවේගයක් විදියට.මෛත්රීපාල සිරිසේන තමන් ජනාධිපති කරන්න සහය වුණ එජාපය සමඟ ජාතික ආණ්ඩුවක් හදනවා කියල ශ්රීලනිපය එජාපයේ එල්ලුවා. මේ නිසා නියම ශ්රී ලංකාකාරයෝ මෛත්රීපාල සිරිසේන ගේ සභාපතිත්වය දරන ශ්රීලනිපයේ නෑ. නියම ශ්රී ලංකා නිදහස් පාක්ෂිකයෝ දැන් ඉන්නෙ මහින්ද රාජපක්ෂ නයකත්වය දරන ශ්රී ලංකා පොදුජන පෙරමුණ සමඟයි.
චන්ද්රිකා බණ්ඩාරනායක ජනාධිපති කාලයේ ශ්රීලනිපය ජවිපෙ සමඟ එකතු වුණා. එදා කටක් ඇරියෙ නැති ඔබ මෛත්රීපාල සිරිසේන ශ්රීලනිපය එජාපයේ එල්ලුවා කියල කෑ ගහන්නෙ ඔහු ගමේ ගොවියෙක්ගෙ පුතෙක් නිසා කියලයි සමහරු කියන්නෙ?
චන්ද්රිකා බණ්ඩාරනායක ජනාධිපති කාලයේ ජවිපෙ ශ්රීලනිපයට එකතු කරගෙන කටයුතු කළා මිසක් ශ්රීලනිපය ජවිපෙ එල්ලුවෙ නෑනේ. ඇය එදා එසේ කටයුතු කිරිම වැරදියි කියන්න බෑ. නමුත් මෛත්රීපාල සිරිසේන ශ්රීලනිපය එජාපයේ එල්ලුවා විතරක් නොවෙයි එවකට පාර්ලිමේන්තුවේ බහුතරය සහිත අපේ ආණ්ඩුවේ අගමැතිවරයාව සිටි දී.මු.ජයරත්ත බලහත්කාරයෙන් ඉවත් කරල පාර්ලිමේන්තුවේ සුළුතරය හිමිව තිබු රනිල් වික්රමසිංහ අගමැති ලෙස පත් කළා.
ඔබට මෛත්රීපාල සිරිසේන සමඟ තිබෙන්නේ දේශපාලන අර්බුදයකට එහා ගිය පෞද්ගලික වෛරයක්ද?
අනේ නෑ. මට සිරිසේන සමඟ කිසිම පෞද්ගලික අමනාපයක් හෝ තරහක් නෑ. මම එතුමත් සමඟ අමනාප වෙන්නෙ ඔහු ගේ දේශපාලන භාවිතය නිසා අපිට හා අපේ රටට සිදු වු හානිය නිසයි. මෛත්රීපාල සිරිසේන ශ්රීලනිපයේ මහ ලේකම් ධුරයට පත් කරල පක්ෂයේ පාලන වගකීම දුන්නේ ලොකු විශ්වාසයකින්. නමුත් ඔහු ඒ විශ්වාසය කඩ කරල ශ්රීලනිපය පාවා දීල එජාපය සමඟ එක්ව ජනාධිපතිවරණයේ 2015 දි පොදු අපේක්ෂකයා වුණා. ඊට පස්සෙ ශ්රීලනිපයේ සභාපතිකම ඔහුට බාර නොදුන්නොත් ගම්වල ශ්රීලනිපය පාක්ෂිකයින්ට හිරිහැර විඳින්න වෙයි කියල එයා ගේ ගෝලයෝ අතේ මහින්ද මහත්තයාට පණිවිඩ එව්වා. ශ්රීලනිපයේ සභාපතිකම තමන් ළඟ තියාගෙන ගමේ ශ්රීලනිපය පාක්ෂිකයින්ට හිරිහැර විඳින්න ඉඩ දෙන්න බැරි නිසා තමයි මහින්ද රාජපක්ෂ මහතා ශ්රීලනිපයේ සභාපතිකමත් සිරිසේනට දුන්නේ. මේ සිද්ධිය සිදු වුණේ එවකට මම බස්නාහිර පළාතේ ප්රධාන අමාත්යවරයා ලෙස මට හිමිව තිබූ නිල නිවාසයේදී. එදා මහින්ද රාජපක්ෂ මහතා අපිත් සමඟ කතානායක නිල නිවසට ගිහිල්ල ශ්රීලනිපයේ සභාපතිකම සිරිසේනට දීල මහින්ද මහතා සිරිසේන ගෙන් ඉල්ලුවෙ අපේ පාක්ෂිකයන්ට හිරිහැර කරන්න ඉඩ දෙන්න එපා කියලයි. නමුත් ඊට පස්සේ මෙයා මොනවද කළේ. පක්ෂයේ ලේකම්වරු ඉවත්කරල රාජපක්ෂවරුන් ගෙන් පලි ගන්න පටන් ගත්තා. ඒ පලිගැනීම් කොයිතරම් සූක්ෂම විදියට කරාද කියල පෙනෙන හොඳම නිදර්ශනය තමයි 2015 අගෝස්තු මාසයේදි පැවැති පාර්ලිමේන්තු මහ මැතිවරණය. එදා මහින්ද රාජපක්ෂ මහතාට කතා කරල මේ මැතිවරණය බාර ගෙන මෙහෙය වන්න කියල. ජයග්රහණය කළාම අගමැති ධුරය දෙනවා කීවා. මැතිවරණයේ ඡන්ද විමසන දිනය ආසන්නයේ සිරිසේන ජනාධිපතිවරයා මොනවද කිව්වෙ. මහින්ද දිනුවත් අගමැති ධුරය දෙන්නෙ නෑ කීවා. ඒ නිසා අපේ පක්ෂයට ලැබෙන්න තිබුණ ඡන්ද ලක්ෂ දහයක් විතර ලැබුණෙ නෑ. ඒ අනුව එජාපයට ආණ්ඩුව හදන්න පුළුවන් වුණා. එජාපයට එහෙම ආණ්ඩුව හදන්න ඉඩ දීල පාර්ලිමේන්තුවේ විපක්ෂයේ බහුතරය හිමි මහින්ද රාජපක්ෂ මහතා ගේ කණ්ඩායමට නිල විපක්ෂයේ වගකීමවත් නොදී ඒකත් දෙමළ ජාතික සන්ධානයට ලබා දුන්නා. ඒ ඔක්කොමත් කරලා දින 56 ආණ්ඩුවෙ අගමැතිකම මහින්ද රාජපක්ෂ මහතාට දුන්නෙ ඒක කරු ජයසූරිය හෝ සජිත් ප්රේමදාස බාර ගත්තෙ නැති නිසා කියලත් කීවා. දැන් එයා උකුස්සෙක් ගෙ කතාවක් කියනවා; මේ මැතිවරණයෙන් පස්සේ කට්ටිය ඩැහැ ගෙන යන හැටි තමයි ඒ කියන්නෙ. අනෙක 2019 ජනාධිපතිවරණයේ දී එයා ගේ පවුලේ අය වගේම ඔහුගේ හිතවතුන් වැඩ කළෙත් සජිත් දිනවන්න. ඒවා ඔප්පු කරන්න මගේ ළඟ හඬපට තියෙනවා.
හොඳයි ඔබ කියන දේ හරි හෝ වැරදි වුණත් මේවන විට ශ්රීලනිපය පොහොට්ටුව සමඟ සන්ධාන ගතවෙලා මහ මැතිවරණයට එකට තරඟ කරනවානෙ. ඔබ කියන්නෙ එහෙම සන්ධාන ගතවීමකුත් නෑ කියලද?
ශ්රීලනිපය අපිත් එක්ක සන්ධාන ගත වුණේ නෑ කියල මම කියන්නෙ නෑ. ජනාධිපතිවරණයේ දී ශ්රීලනිපය සමඟ එකතුව කටයුතු කිරීම හොඳයි. මොකද ඒ වෙලාවෙ එක ඡන්දයක් වුණත් අපිට වටිනවා. එදා ශ්රීලනිපයේ සමහර අය අපිට අවංකව සහය දුන්නා. ජනාධිපතිවරණයේ දී සන්ධාන ගතවෙලා එහෙම සහය දුන්නා කියල මෛත්රීපාල සිරිසේන කරපු කියපු දේවල් අමතක කරන්න බෑ.
ශ්රීලනිපය මෙවර මහ මැතිවරණයට පොහොට්ටුවෙන් වගේම අත ලකුණෙන් සමහර දිස්ත්රික්කවලට තරග කරනවා. ඔවුන්
සැලකිය යුතු ආසන ප්රමාණයක් දිනා ගත්තොත් ඔබේ සිරිසේන වෛරය ඉස්මතු කර ගෙන ආණ්ඩුවට බලපෑමක් කරන්න පුළුවන් නේද?
ඔව් පුළුවන්. ඒ අය එහෙම නොකරයි කියල විශ්වාස කරන්න තියෙන සාධක මොනවද? ඒ නිසා තමයි මම කියන්නෙ පොහොට්ටුවෙන් හරි අත ලකුණෙන් හරි ඡන්දය ඉල්ලන මෛත්රිපාල සිරිසේනට ගෑවුන අයකුටවත් ඡන්දය දෙන්න එපා කියලා. අනෙක මේ වන විටත් සිරිසේන කියල තියෙනවා උකුස්සෙක් විදියට මන්ත්රීවරු ඩැහැගෙන යන්නෙ කොහොමද කියල. මම දැනුත් ඉල්ලන්නෙ අපේ රටේ ජනතාව බුද්ධිමත්ව ජනාධිපති ගෝඨාභය රාජපක්ෂ හා අගමැති මහින්ද රාජපක්ෂ කෙරෙහි විශ්වාසය තියෙන ඔවුන් අතහැර නොයන පොහොට්ටුවේ අපේක්ෂකයන්ට ඡන්දය දීලා ඔවුන් පාර්ලිමේන්තුවට එවන්න කියලා. ඔබ ඔය මතුකරපු ප්රශ්නයේ තිබෙන අවධානම ගැන තමයි මම රටේ ජනතාවට කියන්නෙ. එහෙම නැතුව මට සිරිසේන මහත්තයා සමඟ පෞද්ගලික කෝන්තරයක් නෑ.
ඔබ ඔය කියන අවදානම පක්ෂ නායකත්වයට තේරෙන්නෙ නැද්ද; එහෙම නැත්නම් ඔබ පක්ෂ නායකත්වය අබිබවා වීරයෙක් වෙන්න මේ දේවල් කියනවාද?
මම කතා කරන්නේ මගේ හෘදය සාක්ෂියට අනුවයි. අනෙක මම කියන දේවල් මගේ පෞද්ගලික මතවාද නොවෙයි. මේ මහ පොළොවේ ජනතාව කියන්නෙත් ඔය මම කියන දේමයි. අපේ පක්ෂ නායකත්වයත් මේ තත්ත්වය නොදන්නවා නොවෙයි. නමුත් පක්ෂයක් විදියට ඒ අයට යම් යම් සිමාවන් ඇතුළෙ කටයුතු කරන්න වෙන නිසා සමහර තීන්දු ගන්න සිද්ධ වෙනවා. මම කියන දේ ගැනත් පක්ෂ නායකත්වය අවධානයෙන් ඉදලා යම් අවධානමක් ඇති වුණොත් අවශ්ය විදියට කටයුතු කරන්න සුදානමින් ඉන්නවා.
ගෝඨාභය රාජපක්ෂයන්ගේ ජයග්රහණයේ තීරණාත්මක සාධකය ගම්පහ ඡන්ද ප්රතිඵලය කියල ඔබ කියනවා. එතකොට වියත්මඟ වැනි සංවිධාන කිසිම දෙයක් කරල නැද්ද?
එහෙම නෑ කියල මම කියල නෑනේ. වියත්මඟ හා අපි සමඟ කටයුතු කළ අනෙක් සංවිධානවල සහයෝගයත් ගම්පහ ඡන්ද ගොඩ වැඩි කර ගන්න උදව් වුණා. හැම දිස්ත්රික්කයකම වියත්මඟ සංවිධාන හදලා ඒ ඒ ප්රදේශවල සිටින වෘත්තිකයන්ගේ, උගතුන්ගේ, බුද්ධිමතුන්ගේ සහයෝගය අපිට ලබා ගත්තා. මෙවරත් ඔවුන් මේ මහ මැතිවරණයේදීත් කැපවීමෙන් කටයුතු කරනවා. මොකද අපි හැමෝම දැන් කටයුතු කරන්නෙ ගෝඨාභය රාජපක්ෂ ජනාධිපතිවරයා ගේ සෞභාග්යය දැක්ම ප්රතිපත්ති ක්රියාවට නංවන්න ශක්තිමත් ආණ්ඩුවක් හදන්නයි. එදා 2015 මහින්ද රාජපක්ෂ ජනාධිපතිවරණයෙන් පරාජය වුණාට පස්සේ මහින්ද සුළඟ ආරම්භ කරලා බැසිල් රාජපක්ෂ රට වටේ ගමින් ගමට ගිහිල්ල ගමේ ඉඳලා ජාතික මට්ටම දක්වා අපේ සියලු සංවිධාන ශක්තිමත් කිරීම නිසා තමයි ආණ්ඩු බලය එජාපයට තිබියදී පළාත්පාලන ඡන්දය වගේම 2019 ජනාධිපතිවරණයත් අපිට විශිෂ්ට ලෙස ජය ගන්න පුළුවන් වුණේ. ඒ ගෞරවය බැසිල් රාජපක්ෂ මහතාට හිමි වෙන්න ඕනේ.
ගෝඨාභය මහතා ජනාධිපතිවරණයේ දී සිය මැතිවරණ ව්යාපාරය තුළ කිසිවකු විවෙිචනය නොකර කිසිවකුට ඇඟිල්ල දිගු නොකර ඔහුගේ ප්රතිපත්ති ගැන ජනතාව දැනුවත් කළා. එතුමගේ අනුගාමිකයකු වන ඔබට එසේ කටයුතු කරන්න බැරි ඇයි?
මමත් කවුරුත් විවෙිචනය කරන්නෙ නෑ. කාටවත් මඬ ගහන්නෙත් නෑ. මම ජනතාවට කියන්නෙ මේ අය ගේ අතීත ක්රියකාරකම් අනුව අපිට අවධානමක් තිබෙනවා කියල විතරයි. කවුරුවත් කරපු දෙයක් විකෘති කරල කිව්වොත් ඒක විවේචනයක් වෙන්න පුළුවන්. මම කියන්නෙ ඇත්ත. ඒ ඇත්ත තුළ අපිට මේ මැතිවරණයේදීත් අවධානමක් තියෙනවා. අපි ඡන්දය දිනනවා වගේම ඒ අවස්ථාවාදීන්ගෙන් තිබෙන අවධානමත් ජයග්රහණය කරන්න ඕන. පසුගිය රජය කාලේ මෛත්රීපාල සිරිසේනලා, රනිල්ලා, සජිත්ලා කරපු කියපු දේ අමතක කරලා මේ මැතිවරණය කරන්න බෑ.
ශ්රී ලංකා පොදුජන පෙරමුණේ මැතිවරණ අපේක්ෂකයන් අතර ඔබත් එක් අයෙක් පමණයි. අනෙක් අපේක්ෂකයන්ට නැති විවේචනයක් ඔබ මේ වෙලාවෙ මතු කරන්නේ එජාපයේ න්යාය පත්රයකට අනුව කියලයි චෝදනා එල්ල වෙන්නෙ?
ඔය දේවල් කියන කවුරුවත් මහින්ද රාජපක්ෂ පැරදුණාම හිටියේ නෑ. ධූරධාරීන් ඔක්කොම ගිහිල්ල යහපාලන ආණ්ඩුවට එකතු වුණානෙ. එදා ධූරධාරියෙක් විදියට මහින්ද රාජපක්ෂ ළඟින් හිටියේ මම විතරයි. කතා කරන්න ඕන වෙලාවේ අනෙක් අය කට වහගෙන වරදාන වරප්රසාද බුක්ති විදින්න පොරකද්දී මම මහින්ද රාජපක්ෂ වෙනුවෙන් කතා කරල ජනතාව දැනුවත් කරන්න බය වුණේ නෑ. අදත් මම මගේ මතය තර්කානුකූලව ජනතාවට කියනවා. මම කියන දේ වැරදියි කියල කවුරු හරි සාධක සහිතව ඔප්පු කළොත් මම ඒක පිළිගෙන ජනතාව එක්ක ඒක නිවැරදි කර ගන්න සුදානම්. 19වන සංශෝධනයට අත උස්සපු අයට ඒකට විරුද්ධව කතා කරන්න බෑ. මෛත්රීපාල සිරිසේන ගෙන් වරදාන වරප්රසාද ලබාගත් අයට ඔහු වැරදියි කියන්න බැ.ඔය දෙකම මම කළේ නැති නිසා වැරදි දේ වැරදියි කියන්න මට පුළුවන්. මම එජාප න්යාය පත්රයකට කටයුතු කරනවා නම් මට බොරු චෝදනා ගොනු කරල නඩු දානවද? මහින්ද රාජපක්ෂ පැරදිලා එදා මගේ මහ ඇමති නිල නිවසට ආපු වෙලාවෙ ඉදලා ඔය හැමෝම කියපු දේ කරපු දේ වෙච්ච දේ මම හොඳට දන්නවා. ඒ නිසයි මම බය සැක නැතුව මේවා කියන්නෙ. ගෝඨාභය රාජපක්ෂයන් ජනාධිපති කරන්න ඔය හැමෝම සහය දුන්නා. ඒවාට මම කෘතඥ වෙනවා. එහෙමයි කියල ඒ අය කරපු කියපු හැම දේම අමතක කරල වැඩ කළොත් ඒ අය හිතාවී අපි මෝඩයෝ කියලා. අනෙක එජාපය සමඟ මම ඩීල් දානවා කිව්ව අය තමයි එජාපය එක්ක එකතු වෙලා එදා මහින්ද රාජපක්ෂට විරුද්ධව කටයුතු කළේ. ඕනෑ නම් විස්තර ඇතුව ඒවත් මට කියන්න පුළුවන්.
ගම්පහ රණතුංග පවුලේ දේශපාලන මතවා දත් එකිනෙකට වෙනස්. ඔබ රාජපක්ෂවරුන්ට මේ තරම් කඩේ යන්නේ පොරොන්දු දේශපා ලනය නිසා කියලයි සමහරු කියන්නේ?
ඔබලා හොඳට හොයල බලන්න මම බස්නාහිර මහ ඇමති කාලේ රාජපක්ෂවරු එක්ක මගේ සම්බන්ධයක් තිබුණේ නෑ. රට යුද්ධයෙන් බේරා ගත්තු නායකයෙක් විදියට මගේ හිතේ මහින්ද රාජපක්ෂ ගැන ගෞරවයක් තිබෙනවා. ඒ වගේම රට වැඩ බිමක් කරල රටෙි සංවර්ධන වේගවත් කළ ඔහු ගැන දේශපාලනඥයෙක් විදියට මගේ පැහැදීමක් තිබෙනවා. ඒ දවස්වල ත්රස්තවාදීන් උඩින් ඇවිල්ල ගම්පහට කටුනායකට බෝම්බ දාන කොට අපි බයේ හැංගුණ කාලයක් අපිට තිබුණා. ඒවා පරාජය කරලා රයේ පාරවල් වරායවල් ගුවන් තොටුපළවල් හදන කොට අපි ලොකු තෘප්තියක් අත්වින්දා. එහෙම මනුෂ්යයෙක් කුමන්ත්රණයකින් පරාජය කරලා ගෙදර යවද්දී සාධාරණයට ගරු කරන දේශපාලනඥයකු විදියට මට ඔහු තනි කරන්න බැරුව ගියා ඒකයි මම මහ ඇමති පට්ටම් අමතක කරල ඔහු වෙනුවෙන් පෙනී සිටියේ.එහෙම නැතුව මමත් එදා වරදාන වරප්රසාද අපේක්ෂාවෙන් මෛත්රීපාල සිරිසේනලා එක්ක එකතු වුණානම් අද තත්ත්වය මීට වඩා වෙනස් වෙන්න ඉඩ තිබුණා.අනෙක් කාරණය තමයි සිරිසේනලා ශ්රීලනිපයේ බලය අතට ගෙන ශ්රීලනිපය එජාපය් එල්ලද්දී මෙි රටෙි අසරණ වුණ ශ්රීලනිප පාක්ෂිකයන්ට ඉන්න තැනක් හැදුවේ බැසිල් මහත්තයා. එහෙම කරලා මේ රටේ සාධාරණය වෙනුවෙන් කටයුතු කරපු රාජපක්ෂවරුන්ට මගේ තියෙන්නෙ ගෞරවයක්.