තැපැල් ඡන්ද පත්‍රිකා නිකුත් කිරීම සහ තැපෑලට බාරදීම අද (30) දිනයේ ආරම්භ කරන බව මැතිවරණ කොමිෂන් සභාව පවසයි.
එහි ප්‍රකාශකයෙකු සඳහන් කළේ හෙට සහ අනිද්දා දිනවලදී ද තැපැල් ඡන්ද පත්‍රිකා නිකුත් කිරීම සහ තැපෑලට බාරදීම සිදුකරන බවය.
අගෝස්තු මස 05 වන දින පැවැත්විමට නියමිත පාර්ලිමේන්තු මැතිවරණය සඳහා තැපෑලෙන් ඡන්දයදීමට පුද්ගලයින් හත් ලක්ෂ 53,037 දෙනෙකු ඉල්ලීම් කර තිබූ අතර ඉන් හත් ලක්ෂ 5,085 දෙනෙකු සුදුසුකම් ලබා තිබේ.
මැතිවරණ කොමිෂන් සභාව සඳහන් කළේ තැපැල් ඡන්ද අයදුම්පත් 47,430ක් මේ වන විට ප්‍රතික්ෂේප කර ඇති බවය.
දිස්ත්‍රික් ලේකම් කාර්යාල, මැතිවරණ කාර්යාල, පොලීසිය, ආරක්ෂක අංශ සහ සෞඛ්‍ය අංශ හැර තැපැල් ඡන්ද සලකුණු කිරීම ලබන මස 14 සහ 15 යන දිනයන්හිදී සිදුකිරීමට නියමිතය.
දිස්ත්‍රික් ලේකම් කාර්යාල, මැතිවරණ කාර්යාලය, පොලීසිය ආරක්ෂක අංශ සහ සෞඛ්‍ය අංශවල තැපැල්ඡන්ද සලකුණු කිරීම ජුලි මස 16 සහ 17 යන දිනවල දී සිදුකිරීමට නියමිත අතර එම දිනවල තැපැල් ඡන්ද සලකුණු කිරීමට නොහැකි වන තැපැල් ඡන්ද හිමියන්ට ජුලි මස 20 සහ 21 දිනවල දී තැපැල් ඡන්ද සලකුණු කිරීම සඳහා අවස්ථාව සලසා තිබේ.
මේ අතර මැතිවරණ කොමිෂන් සභාව අද පෙරවරුවේ රැස්වීමට නියමිත බව වාර්තා වේ.
මැතිවරණ කොමිෂන් සභාවේ සභාපති මහින්ද දේශප්‍රියගේ ප්‍රධානත්වයෙන් අද රැස්වන මැතිවරණ කොමිෂන් සභාවේදී පාර්ලිමේන්තු මැතිවරණය පැවැත්වීම සම්බන්ධයෙන් ඉදිරි කටයුතු පිළිබඳව සාකච්ඡා කිරීමට නියමිතය.
විශේෂයෙන් ඡන්ද විමසීම පැවැත්වෙන කාලසීමාව දිර්ඝ කිරීම සම්බන්ධයෙන් අද දිනයේ අවසන් තීරණයක් ගැනීමට නියමිත බව මැතිවරණ කොමිෂන් සභාව සඳහන් කළේය.
