එදා වරින් වර ඇතිවූ වසංගත තත්වයන් හමුවේ ලෝක ජනතාව දැඩි අවදානම් සහගත තත්වයන්ට මුහුණ දුන් අතර වර්තමානයේදී ඇතිවී තිබෙනුයේද ඊට සමාන පරිසරයකි. මේ වන විට ලෝක සෞඛ්‍ය සංවිධානය මඟින් නව කොරෝනා හෙවත් කොවිඩ් - 19 ලොව වෙළාගත් වසංගතයක් බවට අනතුරු අඟවා තිබේ. අතීතයේ උගත් පාඩම් නැවත නැවතත් ආවර්ජනය කර ගැනීම සඳහා මුද්දර මතකයන් ඔබට උපකාරී වනු ඇත.
මැලේරියා වසංගතය
1930 දශකයේ ලංකාවේ සෞඛ්‍යය අන්තයටම පිරිහෙමින් මැලේරියාව රටපුරා පැතිර ගියේය. 1935 වසරේ මුල් සති හය ඇතුළත ළමයින් 3500ක් මියගිය බව පුවත්පත් වල වාර්තා වූ අතර මැලේරියා මර්ධනය සඳහා හමුදාව ස්ව කැමැත්තෙන් ඉදිරිපත් වීම එදත් දක්නට ලැබුණු විශේෂිත ලක්ෂණයකි. ලංකා සම සමාජ පක්ෂය මූලික කරගත් "සූරිය මල් ව්‍යාපාරය" මැලේරියාවෙන් විපතට පත් ජනතාවට ආධාර උපකාර කිරීම සඳහා මහත් වෙහෙසක් ගත්තේය. වෛද්‍ය පහසුකම්, ආහාර සහනාධාර ලබාදීමට ඔවුහු මූලික වූහ. සම සමාජයේ ආචාර් ය එන්. එම්. පෙරේරා "පරිප්පු මහත්තයා" බවට පත් වූයේ මෙම සහනාධාර වැඩපිලිවෙළ ක්‍රියාත්මක කිරීමට නායකත්වය දුන් නිසාවෙනි. මැලේරියාව මෙතෙක් මෙරටින් වාර්තා වූ දරුණුතම වසංගතය වූ අතර ඉන් ජීවිත 125,000 කට අධික සංඛ්‍යාවක් රටට අහිමි විය. 1962 අප්‍රේල් 7 වැනිදා මැලේරියා මර්ධන ව්‍යාපාරය නිමිති කොට ගෙන ශත 25ක සමරු මුද්දරක් නිකුත් කොට ඇත.
ක්ෂය රෝගය
වර්ෂ 1600 දී පමණ ලොව ජනගහනයෙන් මිලියන 1.5 කට ආසන්න සංඛ්‍යාවක් මෙම රෝගයෙන් පීඩා විඳි අතර ඉන් 80% ක්ම සංවර්ධනය වෙමින් පවතින රටවල ජනතාව විය. ක්ෂය රෝගය නිවාරණය සඳහා රජය අවශ්‍ය සියලූම පහසුකම් සපයා දී ඇති අතර වැලිසර පිහිටුවන ලද ළය රෝහල ඒ අතුරින් ප්‍රමුඛය. ක්ෂය රෝග කාරකය සොයා ගනු ලැබූ වෛද්‍ය රොබට් කොක් සමරනු වස් ශත 50ක සමරු මුද්දරයක් 1982 සැප්තැම්බර් 21 දින ඉතිහාසයට එක් විය.
ලාදුරු රෝගය
අතීතයේදී නම ඇසූ පමණින් තැති ගැන්මට ලක් වන මෙම රෝගය, අද වන විට නිට්ටාවට සුව කළ හැකි රෝග අතරට එක්ව ඇත්තේය. ලාදුරු රෝගය වෙනුවෙන් ප්‍රතිකාර ලබාදීම සඳහා මෙරට රෝහලක් ඉඳිවන්නේ ලන්දේසි පාලන සමයේදීය. ඒ වර්ෂ 1708 දීය. හැඳල පිහිටි මෙම මධ්‍යස්ථානය මෙරට ප්‍රථම කොරෝනා නීරෝධායන මධ්‍යස්ථානය ලෙස නම් කෙරුණද එහි කටයුතු ව්‍යර්ථ විය. ලාදුරු රෝහල ඉඳිකර වසර 300ක් ගතවීම නිමිත්තෙන් 2009 අප්‍රේල් 23 දින රු. 5.00ක සමරු මුද්දරයක් නිකුත් කර තිබේ.
ඒඩ්ස් රෝගය
සෑම වසරකම දෙසැම්බර් 01 වනදා ලෝක ඒඩ්ස් දිනය ලෙස නම් කර ඇති අතර රෝගය පිළිබඳ දැනුවත් භාවය ඉහල නැංවීමට මෙම දිනය මූලික කරගෙන ලොව පුරා ක්‍රියාකාරකම් රැසක් සිදු වේ. ලෝක ඒඩ්ස් දිනය වෙනුවෙන් 1980 නොවැම්බර් 30 දින රු. 8.00 හා රු. 1.00 බැගින් වූ සමරු මුද්දර දෙකක් නිකුත් කර තිබේ.
කොළඹ ජාතික රෝහල
වර්ෂ 1864 දී අක්කර 32ක භූමියක ඇරඹි කොළඹ ජාතික රෝහල ලංකාවේ ප්‍රධානතම ශික්ෂණ රෝහලයි. එය ලංකාවේ අවසන් යොමු ස්ථානයද වේ. වර්ෂ 2015 දී කොළඹ ජාතික රෝහල ස්ථාපනය කර වසර 150ක් ගතවීම නිමිත්තෙන්, සමරු මුද්දරයකින් උපහාර දක්වා තිබේ. එහි වටිනාකම රු. 10.00කි. මීට අතිරේකව, කොළඹ වෛද්‍ය විද්‍යාලය, රතු කුරුස සමාජය, ලේ දන්දීමේ ව්‍යාපාරය, ලෝක හෙද දිනය, අක්ෂිදාන සංගමය, අනුරාධපුර ශික්ෂණ රෝහල, ලෝක ජලභීතිකා දිනය, ළමා ප්‍රතිශක්තීකරණය ආදී තේමාවන් රැසක් වෙනුවෙන් මුද්දර නිකුත් කර තිබේ. ලංකාවේ සෞඛ්‍ය ක්ෂේත්‍රයේ ඉතිහාසය කියවා ගැනීම සඳහා මෙම මුද්දර කදිම මූලාශ්‍රය.
