මැටි කැපූ වළෙන් මතුවූ ජීවිතය විඳිය හැකි අසපුව | සිළුමිණ

මැටි කැපූ වළෙන් මතුවූ ජීවිතය විඳිය හැකි අසපුව

පාවෙන හෝටල් සංකී­ර්ණය  පෙනෙන අයුරු
පාවෙන හෝටල් සංකී­ර්ණය පෙනෙන අයුරු

කුමා­ර­තුංග මුනි­දා­ස­යන් විරිත් වැකියේ අපට පවසා තිබුණේ අලුත් අලුත් දේ නොත­නන ජාති­ය­කට ලොව ඉහළ යෑමේ හැකි­යා­වක් නොමැති බවයි. නව නිපැ­යු­ම්ව­ලට තැනක් ලබා නොදෙන්නේ නම් එසේත් නැත්නම් නව නිපැ­යුම් කරා අප යොමු නොවන්නේ නම් අපට ඉදිරි ගම­නක් නොමැති බව එයින් ගම්‍ය වනවා පම­ණක් නොව ලෝකයේ නිෂ්පා­දන මෙන්ම නව නිර්මාණ දෙස බැලූ විටද එය පැහැ­දි­ලිය.

නව නිපැ­යුම් කෙරෙහි ලෝක­යාගේ ඇස යොමු වන්නේ රටක් ජන­තා­වක් ඉදි­රි­යට යාමට අවශ්‍ය නිසාය. රොබෝ තාක්ෂ­ණය මෙන්ම මිනි­සුන් රහිත ගුවන් යානා ද මේ වන විට ලෝකයේ භාවිත කෙරේ. එමෙන්ම මේ වන විට රියැ­දුරු රහිත මෝටර් රථ පවා කල එළි බැස තිබේ.

සභා­පති කැළුම් පෙරේරා

ඒ සියල්ල අලුත් අලුත් දේ තැනීමේ ප්‍රති­ඵ­ල­යන්ය. තාක්ෂ­ණ­යට මිනිසා අභි­භවා යාමට නොහැ­කිය. මන්ද තාක්ෂ­ණය හසු­රු­වන්නේ මිනිසා විසින් වන හෙයිනි.

අප මේ කිය­න්නට යන කතා­වද එවැ­නිම මිනි­ස­කුගේ අපූර්ව නිර්මා­ණ­යක් ගැනය. ඒ නිර්මා­ණය කර­න්නට ඔහුට හැකි­යාව ලැබී ඇත්තේ ද භාවි­ත­යෙන් ඉවත දමන භූමි­යක් උප­යෝගී කර­ගෙන වීම මෙහි විශේ­ෂ­ත්ව­යයි.

මැටි කර්මා­න්ත­යට වළ­වල් කපා ඇති මහා පරි­මාණ භූමි රැසක්ම කොච්චි­ක­ඩේට සමීප කටාන ප්‍රදේ­ශයේ දක්නට ඇත. එවන් එක් ප්‍රදේ­ශ­යක් අක්කර 200කට අධි­කය. එයින් අක්කර 13.5ක මැටි කැපූ වළක් උප­යෝගී කර­ගෙන එයින් සංචා­රක හෝට­ල­යක් තනා දෙන්නට මේ කතා නාය­කයා කට­යුතු කෙළේය. ඒ හෝට­ලය හද­න්නේද මැටි කපා ඉවත් කළ වළේ වතුර පුරවා දිය මතු පිට වීම මෙහි ඇති විශේ­ෂ­ත්ව­යයි. මේ දක්වා මැටි කපා ඉවත් කරන ලද එම භූමි­වල කිසිදු ප්‍රයෝ­ජ­න­යක් ගෙන නැත. මැටි කපා අව­සන් කිරී­මෙන් පසුව එම අගා­ධ­යන් පුරවා දැමිය යුතු වුවත් එවැ­න්නක් පසු­ගිය කාලය පුරාම සිදු කර නොමැත.

ඒ කෙසේ වුවත් ඒ අක්කර සිය ගණ­නක භූමි භාග­යෙන් සුළු ඉඩක් වෙන් කර­ගෙන මේ අපුරු නිර්මා­ණය කර­න්නට අපේ කතා නාය­කයා කට­යුතු කර තිබේ. ඔහු නමින් කැලුුම් පෙරේ­රාය. මේ නිර්මා­ණය ඔහු­ගේය. මීගමුව කොච්චි­කඩේ සිට මඩ­ම්පැල්ල පාරේ කිලෝ­මී­ටර් 9කට ආසන්න දුරක් ගෙවා මේ අපූරු ස්ථාන­යට ළඟා විය හැකිය. එය නම් කර ඇත්තේ ‘බෝල­ගල ෆ්ලෝටින් රිසෝට්‘ නමිනි. මේ නිර්මා­ණය ගැන අපි සභා­පති කැළුම් පෙරේ­රා­ගෙන් විම­සු­වෙමු.

‘කවු­රුත් නොක­රන නිර්මා­ණ­යක් කර­න්නයි මට ඕන කෙරේ. මේ භූමිය සම්බ­න්ධව මම භූ විද්‍යා හා පතල් කැණීම් කාර්යාං­ශ­යෙන් විමසා බැලූ අව­ස්ථාවේ ඔවුන් පැව­සුවා මැටි කපා ඇති මේ අගා­ධ­යන්ට නව නිර්­මා­ණ­යක් කරන්න හැකි­නම් එය ඉදි­රි­පත් කර­න්නැයි කියා. ඒ අනුව මම මගේ නිර්මා­ණය ඉදි­රි­පත් කළා. එයට අනු­මැ­තිය ලැබුණා. ඒ විත­රක් නෙමෙයි. ලෝක බැංකු ආධාර ව්‍යාපෘ­ති­ය­ක­ටත් මම අයැ­දුම් කළා. ඒ සඳහා අයැ­දු­ම්පත් 7000ක් පමණ ඉදි­රි­පත් වුණත් 232ක් පම­ණයි තෝරා ගැනුණේ. එයි­නුත් මට ප්‍රථම ස්ථානය ලැබුණා. මේ පාවෙන හෝටල් සංකී­ර්ණය හදන්න පටන් ගත්තේ එයින් පසු­වයි. ඒත් ආරම්භ කළ දින පටන්ම විවි­ධා­කාර ගැටලු ආවා. ඇත්තෙන්ම ප්‍රදේ­ශ­වා­සීන්ගේ මුවා­වෙන් මේ වැඩ කරන්නේ පළාතේ ප්‍රබල දේශ­පා­ල­ක­යකු විසින්. ගමට තියෙන වතුර ප්‍රශ්න­යක් ගැන ඇතැම් අය කිව්ව­හම ලක්ෂ 25ක පෞද්ග­ලික විය­ද­මින් මම වතුර ටැංකි­යක් හදලා දුන්නා. පිහිටි ගල විදලා වතුර අර­ගෙන දුන්නා. නමුත් මේ කට­යුත්ත සඳහා විවිධ බාධා­වන් එනවා. පුරා විද්‍යා බිමක් කියලා කිව්වා. අඩි 20ක් පමණ හාරපු සින්න­ක්කර ගත්ත ඉඩ­මක පුරා වස්තු කොහෙද? එයින් වැඩක් වුණේ නැති තැන මේ ලෙසින් විවි­ධා­කාර බාධා ආවා. දැන් මේ ඉඩම් ඉඩමේ කොට­සක් ඉඩම් ප්‍රති­සං­ස්ක­රණ කොමි­ස­මට අයි­ති­යක් තියෙන බවක් කිය­නවා. ඒ කිසි­වක් කියන්නෙ ඒ ආය­තන නෙමෙයි. කොහොම වුණත් ජනා­ධි­ප­ති­ව­ර­යාත් අග­මැ­ති­ව­ර­යාත් මේ කාර්යය සම්බ­න්ධව ප්‍රශංසා කර තිබෙ­නවා. මම පුළු­වන් තරම් උත්සාහ කර­නවා මෙතැන මේ හෝටල් සංකී­ර්ණය ඉදි කර­

ජලා­ශයේ ඉදි කර ඇති විසිත්ත කාමර

න්නට නොහැකි වුණොත් ඒක මේ ප්‍රදේ­ශ­වා­සී­න්­ගේම අවා­ස­නා­වක් පම­ණයි. මොකද වතුරේ ඉදි කරන මේ හෝටල් සංකි­ර්ණය මෙත­නින් ඉවත් කර ආණ­ම­ඩුවේ විශේෂ ස්ථාන­යක ස්ථාපිත කරන්න පුළු­වන්‘‘

අඩි 15ක් පමණ මේ වවන විට ජල­යෙන් පිරී ඇති අතර එය ඉදි­රි­යේදී අඩි 20ක් පමණ දක්වා ජල­යෙන් පිරෙනු ඇති බව කැළුම් පෙරේරා මහතා පව­සයි.

බෝල­ගල ඉදි­වන මේ හෝටල් සංකී­ර්ණය ඇත්තෙන්ම පරි­සර හිත­කාමී බවින් යුක්තය. එසේ නොවන්නේ නම් ලෝක බැංකු­වෙන් ආධා­ර­යක් හිමි වන්නේද නැත. ලෝක බැංකු­වෙන් මේ කාර්යය සඳහා රුපි­යල් කෝටි 7.5ක යළි නොගෙ­විය යුතු ආධාර මුද­ලක් ලබා දී ඇත. එසේ රුපි­යල් කෝටි 7.5ක් ලබා දී ඇත්තේ මේ නිර්මා­ණයේ ඇති පරි­සර හිත­කාමී බව මෙන්ම එහි ඇති හරි­තා­ගාර සංක­ල්පය නිසාය.

අපි ඉදි­වෙ­මින් පව­තින හෝටල් සංකී­ර්ණ­යට ගියෙමු. එය අලං­කාර විසිත්ත කාමර 50කින් සම­න්විත සංකී­ර්ණ­යකි. එයින් කාමර 10ක් ජලා­ශයේ වෙන් වශ­යෙන් ස්ථාපිත කෙරෙන අතර ඒවා ජලා­ශයේ එක් කෙළ­ව­රක සිට අනෙක් කෙළ­ව­රට ජී.පී.එස්. තාක්ෂ­ණය ඔස්සේ යා හැකිය. අනෙක් කාමර 40 සහිත සංකී­ර්ණය හරි­තා­ගා­ර­යක් තුළ ස්ථාපි­තය. එම සංකී­ර්ණය පුරාම කාබ­නික පොහොර යොදා රෝප­ණය කෙරන මෙරට එළ­වුළු හා පල­තු­රුය. එමෙන්ම ජලා­ශයේ මේ වන විටත් මසුන් ලක්ෂ 4ක් බෝකි­රීම සඳහා කට­යුතු කර ඇති අතර ඉස්සන් ලක්ෂ 3ක්ද යොදා ඇත. එමෙන්ම හෝටල් සංකී­ර්ණ­යට විදු­ලිය ලබා ගන්නේ සූර්ය බල­යෙනි. සූර්ය බල­යෙන් කිලෝ­වොට් 600ක විදු­ලිය උත්පා­ද­නය කිරී­මට කට­යුතු කෙරෙන අතර එයින් හෝටල් සංකී­ර්ණ­යට අවශ්‍ය වන්නේ කිලෝ­වොට් 200ක් පම­ණක් වන අතර ඉතිරි විදු­ලිය, විදු­ලිය බල මණ්ඩ­ල­යට සැප­යී­මට කට­යුතු කෙරේ.

මෙහි ව්‍යාපෘති ඉංජි­නේරු අරුණ පෙරේරා පව­සන්නේ ජලා­ශයේ යට කිරි­මැටි ඇති හෙයින් ජලය අඩු නොවී පව­තින බවයි. විශේ­ෂ­යෙන්ම මාස 8ක් පුරා එහි ජලය අඩු නොවී පව­තින බවද ඔහු පව­සයි. ජලය අඩු වුවද පුරවා ගබඩා කර ගැනී­මට අනෙක් පස මැටි කැපූ විශාල භූමි­යක් උප­යෝගී කර ගන්නා බවයි. එමෙන්ම වැසි වතු­රෙන්ද මේ ජලා­ශය පිර­වී­මට බලා­පො­රොත්තු වන බවද ඔහු පෙන්වා දෙයි.

හෝටල සංකී­ර්ණය ඉදි කිරීම නැර­ඹී­මට පැමිණි පිරි­සක්

ජලා­ශයේ ඉදි කර ඇති හෝටල් කාමර ඉදි කර ඇත්තේ මාලු­ව­කුගේ ආකෘ­ති­යෙනි. කාම­ර­යක ඉදිරි පෙනුම මාලු­ව­කුගේ ඉදි­රි­පස හා මාලු­වාගේ ඇහැක් ලෙසින් ඉදි කර ඇති අතර පසු­පස වරල් ආකා­ර­යෙන් ඉදි කර ඇත.

මෙරට ඉදි කරනු ලබන ප්‍රථම පාවෙන හෝටල් සංකී­ර්ණය වන බෝල­ගල ෆ්ලෝටින් රිසෝට් හෝට­ලයේ දේශීය ආයෝ­ජ­ක­යින් 12 දෙනකු සිටින අතර ප්‍රවීණ ක්‍රිකට් ක්‍රීඩක තිල­ක­රත්න ඩිල්ෂාන්ද එක් ආයෝ­ජ­ක­යෙකි.

පාවෙන පිහි­නුම් තටා­ක­යක්ද මේ වන විටත් ඉදි කර ඇත. එමෙන්ම වතුර යට ඉදි­වන සම්භා­හන මධ්‍ය­ස්ථා­න­යක්ද මේ හෝටල් සංකී­ර්ණ­යට එක් වනු ඇත. එම සම්භා­හන මධ්‍ය­ස්ථා­නය වීදු­රු­ව­ලින් වට­කර ඇති නිසා ජලා­ශයේ සිටින මත්ස්‍ය­යින් ජලාශ පැළෑටි වීදු­රු­වෙන් ඇතුළේ සිට නැරැ­ඹිය හැකිය. සියලු කාම­රද වායු සම­න­යෙන් යුක්තය.

දැනට ශ්‍රී ලංකාවේ මෙවන් කිසිදු හෝට­ල­යක් නොමැති අතර ආස­න්න­යේම ඇති රට­වල් වනුයේ මාල දිව­යින හා ඉන්දු­නී­සි­යා­වයි.

එසේ හෙයින් මේ හෝටල් කාම­ර­යක් එක් දින­කට ඇම­රි­කන් ඩොලර් 400ක් (රුපි­යල් 73000.00ක් පමණ) වනු ඇත. මේ වසරේ ජූලි මාසයේ මේ හෝටල් සංකී­ර්ණය විවෘත වනු ඇත. දේශීය සංචා­ර­ක­යන්ට සංචා­රක කාල සීමා­වන් නොවන කාල­ය­න්හිදී අඩ­කට පමණ ලබා දීම­ටද සභා­ප­ති­ව­රයා බලා­පො­රොත්තු වේ.

සේයාරූ - සමන් ශ්‍රී වෙදගේ

 

Comments