ශ්රී ලංකාවේ ප්රථම තාක්ෂණවේදී සරසවි පීඨය හෙට (16 දා) දින ජනාධිපති ගෝඨාභය රාජපක්ෂ මහතා අතින් විවෘත කිරීමට නියමිත අතර ඊට සමගාමීව තාක්ෂණවේදී ප්රදර්ශනයක් (Innotech 2020) මාර්තු 11 සිට 14 දින දක්වා හෝමාගම පිටිපන දී පැවැත්වෙයි.
‘කියවන මුද්දර’මෙවර වෙන් වන්නේ නවෝත්පාදනය වෙනුවෙන් සිය හඬ අවධි කළ ජාතික වීරයන් ආවර්ජනය කරන්නටය.
පඬිවර කුමාරතුංග මුනිදාස
අලුත් දෑ නොතනන ජාතිය ලොව නොනඟී
හිඟා කෑම බැරිවුණ තැන ලගී ගයා මරගී
කුමාරතුංග මුනිදාසයන් විරිත් වැකියේ එසේ සඳහන් කරන්නේ ජාතියක් ලෙස අප යායුතු තැන ගැන හොඳින්ම අවබෝධ කරගෙන තිබූ අවධියකය. විප්ලවකාරී අධ්යාපන ක්රමයක් පිළිබඳ සිහින මැවූ කුමාරතුංගයෝ ඒ පිළිබඳ මෙසේ සඳහන් කළහ.
“අප විසින් කල් නොයවා කළ යුත්තේ රට වැසියන්ගේ සහජ ශක්තිය පිබිදවීමට උපක්රමයකි. ඇතැම්හු නොයෙක් කලා අතට ගිය සහජ ශක්තියෙන් යුතුවැ උපදිති. ඇතැම්හු ශාස්ත්ර මාර්ගයට වැටුණු සහජ ශක්තියෙන් යුක්ත වෙති. ඇතැමුන්ගේ සහජ ශක්තිය අලුත් නිපැදැවීම් අතට නැමුණේයැ. මේ එක් එක් අතට ගිය ශක්තිය හැඳිනැගෙනැ එයට රුකුල්දීම නම් ජාතිය බලවත් කිරීමෙනි. එහි අගය මෙතෙකැයි නියම කළ නොහැකි තරම් මහත් වූවද එයට අප රටෙහි දැක්වෙන සැලකිල්ල නම් ඉතා අල්පය.”
ශ්රීමත් අනගාරික ධර්මපාල
ආගම ධර්මය, අධ්යාපනය, සංස්කෘතිය ගැන පමණක් නොව ජාතියක් ලෙස හා නිදහස් රටක් ලෙස ඉදිරි ගමනක් යෑම සඳහා නවෝත්පාදනයේ වැදගත්කම මුලින්ම රටට ඉදිරිපත් කරන ලද්දේ ධර්මපාලතුමන්ය. ලංකාව නිදහස් රටක් බවට පත්කිරීම සඳහා කර්මාන්ත උන්නතිය ඇති කළ යුතු බව එතුමන් පුන පුනා ප්රකාශ කළේය. ජාතියක් ස්වාධීන වන්නට නම්, ආර්ථික සමෘද්ධිමත් භාවයද අත්යවශ්යය සාධකයක් බව මැනවින් පසක් කළ ධර්මපාලතුමා ශිල්පීය ඥානය ඉහළ නංවන්නටද දේශීය කර්මාන්ත සංවර්ධනයටද මං පෙත් විවර කළේය.පේෂ කර්මාන්තය හැදෑරු යූ. බී. දොලපිහිල්ල, පිඟන් කර්මාන්තය හා චිත්ර ශිල්පය හැදෑරු ඩී. සී. හාන්ති අප්පුහාමි, සුවඳ විලවුන් කර්මාන්තය හැදෑරු ජෝන් එෆ්. කුරේ, කඩදාසි කර්මාන්තය හැදෑරු එන්. ජේ. සෝමරත්න, ගිනිකූරු කර්මාන්තය හැදෑරු බාලසූරිය, ගොවිකම හැදෑරු මුණසිංහ එසේ කර්මාන්ත ඉගෙනගෙන පැමිණි කැපී පෙනෙන ශිෂ්යයෝ වෙති.
වරලත් ඉංජිනේරු
ඩී.ජේ. විමලසුරේන්ද්ර
කාර්මික ශිල්පීය ඥානය මිටින් ගෙන උපන් විමලසුරේන්ද්රයෝ මෙරට ඉතිහාසයේ නවෝත්පාදන පරිච්ඡේදය වර්ණවත් කළ තවත් ජාතික විරුවෙකි. මෙරට ජල විදුලි බලයේ නිර්මාතෘ ලෙසින් සැලකෙන විමලසුරේන්ද්ර දේශීය කර්මාන්ත සංවර්ධනයේ නියමුවා ලෙසින් ද සැලකේ.
උඩරට දුම්රිය මාර්ගයේ දෙමෝදර රේල්ගැටේ, පිඟන් මැටි කර්මාන්තය, රබර් ආශ්රිත කාර්මික භාණ්ඩ නිෂ්පාදනය, විදුලි දුම්රිය සැලසුම් යනාදිය විමලසුරේන්ද්රයන්ගේ දක්ෂතාවලින් කිහිපයකි.
ආචාර්ය ඒ. එන්. එස්. කුලසිංහ
පෙරසවි කොන්ක්රීට් තාක්ෂණයේ පෙරළිකාර නියමුවා දේශබන්දු විද්යා ජෝති ආචාර්ය ඒ. එන්. එස්. කුලසිංහයෝ්ය. එතුමන් සිවිල් ඉංජිනේරු ක්ෂේත්රයේ නව නිපැයුම් සඳහා ඉහළම දායකත්වය ලබා දුන් ජාති මාමකයෙකි.
ඔහු ශ්රී ලංකා නව නිපැයුම්කරුවන්ගේ සංගමයේ ආරම්භක කොමසාරිස්වරයායි. ශ්රී ලංකාවේ ඉඳිකිරීම් ක්ෂේත්රයේ කුලසිංහයන්ගේ දස්කම් අතර ප්රධාන තැනක් ගන්නේ මහවැලි ව්යාපාරය වසර 5 කින් කඩිනම් කිරීමට අවශ්ය ඉංජිනේරුමය උපදෙස් ලබා දීමයි. එම මෙහෙවරට කෘතගුණ පුදනු වස් මහවැලි පංච මහා ජලාශ වලින් අවසන් ජලාශය වූ මොරගහකන්ද ජලාශය 'ආචාර්ය කුලසිංහ ජලාශය' ලෙසින් නම් කරන ලදි.
ආචාර්ය රේ. විජයවර්ධන
විද්යාජෝති දේශමාන්ය ආචාර්ය පිලිප් රේවත විජයවර්ධන බ්රිතාන්යයේ කේම්බ්රිජ් සරසවියෙන් ඉංජිනේරු උපාධිය ලැබුවද ගොවියෙකු හා කාර්මිකයෙකු වශයෙන් තමන්ව හඳුන්වා දීමට තරම් නිහතමානී වූ විශිෂ්ඨයෙකි. යාන්ත්රික ඉන්ජිනේරු විද්යාව, කෘෂිකාර්මික ඉංජිනේරු විද්යාව සහ ගුවන් යානා පැදවීම පිළිබඳවද එක ලෙස සමර්ථ වූ අයෙකි.
සොබා දහමට වඩාත් සමීප කෘෂිකර්මාන්තයක් වෙනුවෙන් නිරතුරුවම වෙහෙසුණු එතුමන් දේශීය දැනුම කාලීන අවශ්යතාවන්ට යෝග්ය අයුරින් යොදාගෙන පරිසර හිතකාමී ආහාර භෝග වගාවට යොමුවිය යුතු බැව් නිරතුරුවම ප්රකාශ කළේය. හරිත විප්ලවය ආරම්භක දශකයේදී (වර්ෂ 1950) රෝද දෙකේ අත්ට්රැක්ටරය නිර්මාණය කරන ලද්දේ රේ. විජයවර්ධනයන්ය. 'ලෑන්ඩ්මාස්ටර්' නමින් ලොව පුරා ඉතාමත් ජනප්රියව පැතිර ගියේ මෙම නිමවුමයි. ග්ලිරිසීඩියා (වැටමාර) ශාකයේ කොටස් වලින් ශාකමය ඉන්ධන ප්රභවයක් ලබා ගත හැකි බව මුලින්ම හඳුනා ගත්තේ ද ඔහුය.