ස්ලොවැකියාවේ ඉපදී පසු කලක ඇමරිකා එක්සත් ජනාධිපතිවරයාගේ ආර්යාව බවට පත්වන්නට වරම් ලැබූ ඇය, මෙලනියා කනාවුස්. දැන් මේ සුරූපී කාන්තාව මුළු ලොවම හඳුනන්නේ මෙලනියා ට්‍රම්ප් හැටියට. ඇමරිකානු විද්යුත් සහ මුද්‍රිත මාධ්‍යවල උකුසු ඇස්වලට හසුවී සිටි ඇය මෝස්තර නිරූපිකාවක්. ඇතැම් අවස්ථාවලදී ඇගේ සිරුරේ සරාගී බව උලුප්පා පෙන්වීම නිසා ඇය ආන්දෝලනාත්මක තරුවක් බවටත් පත්වුණා.
නමුත්, ලොව බලගතුම පුද්ගලයාගේ ආර්යාව වූ පසුව මෙලනියා මාධ්‍යවල ඇස ගැටෙන්නේ වෙනස් ආකාරයකින්. ඒ, ඇගේ සැමියා ඩොනල්ඩ් ට්‍රම්ප්, ඇමරිකානු ජනාධිපතිවරයා ලෙස සහභාගිවන නිල ගමන් බිමන් වලදී. පසුගියදා ඩොනල්ඩ් ට්‍රම්ප් ඉන්දියාවේ නිල සංචාරයක යෙදී සිටිද්දී බොහොමයක් මාධ්‍ය මෙලනියාටත් විශේෂ තැනක් ලබා දී තිබුණා.
ට්‍රම්ප් සහ මෙලනියා ඉන්දීය ජනාධිපති රාම්නාත් කෝවින්ද්ගේ ඇරියුමෙන් ජනපති නිල මැදුර වන රාෂ්ට්‍රපතිභවන් වෙත පැමිණ සිටියා. එහිදී මෙලනියා ඇඳ සිටි ඇඳුම කාගේත් සිත් ඇදගන්න සමත්වුණා. ලොව කීර්තිමත් ඇඳුම් නිර්මාණ ශිල්පිනියක වන කැරොලිනා හෙරේරා විසින් සකසන ලද ගවුමක් සහ දිගු කලිසමකින් සැරසී සිටි මෙලනියා ගේ රුව වෙත කැමරා ඇස නිතැතින් ම යොමුවුණා.
“මේ තමයි මම ඉන්දියාවට පැමිණි මුල්ම අවස්ථාව. මට මේ සංචාරයේදි දැනුණ සතුට කොච්චරද කියල වචනයෙන් කියන්න බැහැ.” මෙලනියා ට්විටර් සටහනක් තබමින් එලෙස පැවසුවා.
ලෝක බලවතාගේ බිරිය වී මුළු ලෝකයේ ම ඇස් තමන් වෙත යොමු කරවාගන්නට වාසනා ගුණය ලද මෙලනියා 1970 අප්‍රේල් 26 දා උපත ලැබුවා. ඇගේ පියා (වික්ටර් කනාවුස්) රජයට අයත් වූ යතුරු පැදි සහ මෝටර් රථ නිෂ්පාදනාගාරයක සේවය කළ අයෙක්. මව (අමලිජා) ළමා ඇඳුම් නිර්මාණය කළ ආයතනයක මෝස්තර නිර්මාණකාරියක ලෙස සේවය කළා. මෙලනියාට වැඩිමල් සොහොයුරියක් සිටිනවා. ඇය චිත්‍ර ශිල්පිනියක්. තවත් වැඩිමල් සොහොයුරකු සිටියත් මේ වනතුරු මෙලනියාට ඔහු මුණගැසී නැහැ. ඔහු තම පියාගේ කලින් විවාහයේ දරුවෙක්. උසස් අධ්‍යාපනය ලැබූ කාලයේදී ඡායාරූපකරණය සහ ගෘහ නිර්මාණ ශිල්පය හැදෑරූ මෙලනියා විශ්වවිද්‍යාල වරම් ලැබුවත් ඇයට එහි ගත කිරීමට ලැබුණේ වසරක කාලයක් පමණයි.
වයස අවුරුදු 5 සිටම මෝස්තර නිරූපණයට යොමු වූ මෙලනියා අවුරුදු 18 පිරෙද්දීම ඉතාලියේ මිලාන් නුවර නිරූපණ ඒජන්සියක කොන්ත්‍රාත්තුවකට එක් වී නිරූපණ ශිල්පය වෘත්තියක් බවට පත් කරගත්තා. 1995 වසරේ යුරෝපා රටව සංචාරය කරද්දී මෝස්තර නිරූපණ ආයතනයක හිමිකරුවකු වූ පාවුලෝ සම්පොලි හමුවීම ඇගේ ජීවිතය වෙනස් මගකට යොමු කරන්නට සමත් වුණා. ඔහු ඩොනල්ඩ් ට්‍රම්ප්ගේ මිතුරෙක්.
1996 ජනවාරියේදී නිකුත් වූ ‘මැක්ස්’ සඟරාවේ මෙලනියාගේ සරාගී අඩ නිරුවත රැගත් ඡායාරූප පළ වුණේ ඇයට එවැනිම ඡායාරූපවලට පෙනී සිටීමේ දොරටු විවර කර දෙමින්. 2000 ජනවාරි මස නිකුත් වූ ‘GQ’ සඟරාවේ පළ වූ මෙලනියාගේ ඡායාරූපය මුළු ලොවම සලිත කරන්නට සමත් වුණා. ඒ ඡායාරූපයේ ඇය පෙනී සිටියේ දියමන්ති ආභරණයක් පමණක් පැලඳ ගෙනයි. 2010 දී ස්වර්ණාභරණ සහ රුව වඩන ආලේපන නිෂ්පාදනයට යොමු වූ ඇය ධනවත් ව්‍යාපාරිකාවක් වුණා. 1996 දී තාවකාලික වීසා බලපත්‍රයක් ලබා ඇමරිකා එක්සත් ජනපදයට පැමිණි මෙලනියා, නොයෙකුත් බාධක ජය ගනිමින් 2006 දී එරට පුරවැසිකම ලබාගත්තා.
ඇයට ඩොනල්ඩ් ට්‍රම්ප් මුණ ගැසුණේ 1998 සැප්තැම්බර් මාසයේදී පැවති එක්තරා සාදයකදීයි. ඒ වන විට මාර්ලා මේපල්ස් සමඟ ඩොනල්ඩ් ට්‍රම්ප් විවාහ වී සිටියත් ඔහු කල්යල් බලමින් සිටියේ ඇගෙන් වෙන් වීමටයි. 1999 දී ඔවුන් දෙදෙනාගේ විවාහ ජීවිතය අවසන් වුණා. 2005 දී මෙලනියා, ට්‍රම්ප් සමඟ යුග දිවි ගමන් ඇරඹුවා.
ශිල්පා ශෙට්ටි යළිත් මවු පදවිය ලැබූ හැටි
අනූව දශකයේ දී සිනමා රසික කැල මෝහනයට පත් කරවමින් ශිල්ප දැක්වූ ඇය, ශිල්පා ශෙට්ටි. විවාහයෙන් පසුව බොලිවුඩ්තිරයෙන් මඳක් ඈත්ව සිටියත් තවමත් ඇය සැබෑ ලෝකය තුළ ජීවමාන චරිතයක්.
ගිය සතියේ ඇය දෙස කාගෙත් අවධානය යොමු වුණා. ඒ, ඇය දෙවැනි වතාවටත් මවු පදවිය ලද නිසයි. ශිල්පා, ධනවත් ව්‍යාපාරික රාජ් කුන්ද්‍රා සමඟ විවාහ වුණේ 2009 නොවැම්බරයේදී. ඊට අවුරුදු 3කට පසුව ඔවුන් දෙදෙනා පුතෙකුගේ මවුපියන් බවට පත්වුණා. පුතාගෙ නම වියාන්. ඔහු මෙලොවට බිහිවුණේ ශිල්පාගේ කුසෙන්මයි. පුංචි වියාන්ට වයස අවුරුදු 2 සම්පූර්ණ වූ තැන් පටන් රාජ සහ ශිල්පාගේ පැතුම වුණේ තවත් දියණියක හෝ පුතකු ලබන්නයි. වසර 5ක් තිස්සේ ඔවුන් දෙදෙනා එක හිතින් පැතූ ඒ පැතුම ඉටු නොවන සේයාවක් පෙනෙන්න තිබුණා. වියාන් මෙලොවට බිහි වන විට ශිල්පාගේ වයස අවුරුදු 36යි. මේ වන විට ඇය 44 වැනි වියෙහි පසුවෙනවා. ඒ වුණත් තවත් දරුවෙකුගේ හෝ දැරියකගේ සුරතල් බලන්න ශිල්පාටත් රාජ්ටත් දැඩි කැමැත්තක් තිබුණා. හැබැයි, වෙනත් දරුවෙකු හදාවඩා ගන්න නම් දෙදෙනාගේ ම කැමැත්තක් තිබුණෙනැහැ. තමන් දෙදෙනාගේ ම ලෙයින් මසින් සුසැදුණු බිලිඳෙකු ලබා ගැනීමටයි දෙදෙනාටම වුවමනා වුණේ.
ඊට හොඳම විසඳුමක් තිබුණා. ඒ තමයි, රාජ් සහ ශිල්පාට දාව වෙනත් කාන්තාවකගේ කුසෙහි ඔවුන්ගේ ම දරුවෙකු නවීන වෛද්‍ය ක්‍රම අනුව පිළිසිඳවාගෙන මෙලොවට බිහි කිරීම. ඔබට මතක ඇති බොලිවුඩයේ සුපිරි නළු ශාරුක් සහ ඔහුගේ බිරිය ගෞරී තුන්වැනි වතාවටත් මවුපියන් වූ හැටි. ශාරුක් - ගෞරී යුවළට එලෙස තුන්වැනි දරුවා (අබිරම්) ලැබුණේ වෙනත් කාන්තාවකගේ කුසෙන්. ඉතින්, ඒ අයුරින්ම ශිල්පාටත් බිලිඳු දියණියක ලැබුණා. ඇය උපන්නේ පෙබරවාරි 15 දා. මේ බිලිඳියගේ නම තමයි, සමිශා ශෙට්ටි කුන්ද්‍රා. ‘ඕම් ශ්‍රී ගනේෂා නමාඃ සමිශා උපන් පසුව රූපවාහිනී චැනලයක් සමඟ කෙටි පිළිසඳරකට එක්වෙමින් ශිල්පා මෙලෙස තම සතුට පළකළා.
“සමීශා මගේ දෝතට ලැබෙන්නෙ මට මගේ පිරිස ගොඩක් උදව් කළා. ඒ අයට මම ස්තුතිවන්ත වෙනවා.”
මේ පිළිසඳරේදී බිලිඳු දියණියට සමීෂා කියා නම තබන්න කල්පනා කළේ ඇයි දැයි ප්‍රශ්නයක් නැගුණා.
“මේ නම මට මතක් වුණේ අද ඊයේ නෙමෙයි. මට අවුරුදු 21ක් වෙද්දි මම ප්‍රාර්ථනා කළා, කවදා හරි මට දුවෙක් ලැබේවා කියලා. ඒ දවස්වල තමයි මම ‘සමීශා’ කියන නම හිතේ රඳවාගත්තේ.” ශිල්පා ඒ පැනයට මුවපුරා සිනාසෙමින් උත්තර දුන්නා.
බිලිඳු සමීශා, රාජ් - ශිල්පා නිවහනට රැගෙන පැමිණි දින ඉතාම ප්‍රීතිමත් මොහොතක් වුණා. එදින මුළු නි‍ෙවසම විවිධ අයුරින් සරසා තිබුණා. රාජ් - ශිල්පා කැදැල්ලට එක් වූ අලුත් සිඟිත්තිය දැක බලාගන්නා ශිල්පාගේ නැගණිය ශාමිතා ඇතුළු නැදෑ හිතවතුන් රැසක් පැමිණ සිටියා.
