රථවාහන තදබදය නිසා දිනකට අපතේ යන මිනිස් පැය ගණන අතිවිශාලය. එමෙන්ම දිනකට රුපියල් බිලියනයක් රජයට අහිමි වෙයි. මහාමාර්ග තදබදය නිසා රැඳී සිටින රථවාහනවලින් පිටවන කාබන්ඩයොක්සයිඩ් වායුව නිසා පරිසරයට වන හානිය අතිවිශාලය. පවතින මේ තත්ත්වයට විසඳුම් සෙවීම අත්යවශ්යය. මහා මාර්ග කොතෙක් ඉදි වුණත්, අධිවේගි මාර්ග කොතෙක් ඉදිවුවත් දිනෙන් දින මහා මාර්ගයට ඇතුළුවන වාහන ගණන අතිවිශාලය. ඒ නිසා වඩා වැදගත් වන්නේ මේ අවස්ථාවේ පවතින තත්ත්වය සමනය කරගැනීමට යම් විසඳුමක් සෙවීමය.
පොලීසියට අමතරව යුද හමුදා පොලිසියේ නිලධාරීන් මේ මාර්ග තදබදය වෙනුවෙන් යම් පිළියමක් ලෙස යෙදීම පිළිබඳව නොයෙක් දෙනා විවිධ මතවාද දරති.
කෙසේ වෙතත් මෙරට දෛනික අනතුරුවලින් දිනකට අටදෙනෙක් මරණයට පත් වෙතිි. මේ තත්ත්වය යම් පාලනයක් කිරීමේ අරමුණින් කාර්යය බහුල වේලාවන්හිදී උදේ හයත් දහයත් අතර හා සවස තුනත් හතත් යන වේලාවන්වලදී කොළඹ නගරයට ජනතාව ඇතුළුවන සහ පිටත්වන වේලාවන් හිදී ඇතිවෙන වාහන තදබදය අවම කරගැනීමට; ශ්රී ලංකා පොලීසියට සහය වීම උදෙසා ශ්රී ලංකාවේ යුද හමුදාවේ පොලිස් සේවා බල ඇනිය යෙදවීමට රජය තිරණය කර තිබේ.
මේ වනවිට විශාල ලෙස රිය අනතුරුවලින් පදිකයෝ මිය යති. මාර්ග තදබදය අවම කරගැනීම පොලිසියේ රාජකාරියක් පමණක් බව ඇතැමුන්ගේ මතය වී ඇත. එය හුදු මහත් ජනතාවගේම වගකීමකි.
මාර්ගයේ ධාවන කටයුතුවලදී රියැදුරන් මෙන්ම මගීන්ද සුපරික්ෂාකාරී විය යුතුයි. මාර්ග නීති සම්බන්ධයෙන් පොලිස් නිලධාරීන්ගේ නිල ලාංජනයෙන් සලකුණ වී ඇති ත්රිකෝණයේ පාද තුනෙහි ඇති ඉංග්රිසි E අකුරු තුනෙන් පැහැදිලි කරන්නේ (education) දැනුවත් කිරීමේ අධ්යාපනය (enforcement), නීතිය බලගැන්වීම සහ ඉජිනේරු (Engineering) යනුවෙනි. ඉජිනේරු යනුවෙන් අදහස් කරන්නේ තාක්ෂණික පහසුකම් සැලසීමයි. රජයේ ආයතන විශාල ප්රමාණයක් එකතු වී මේ ක්රියාදාම සක්රිය කිරීම සඳහා විශාල පරිශ්රමයක නිරත වන බව රථවාහන මාර්ග ආරක්ෂාව හා පරිසර ආරක්ෂණ දිශාව බාර නියෝජ්ය පොලිස්පති ඩි. එම්. මුදිත පුස්වැල්ල සඳහන් කරයි.
වර්තමානයේ මේ හා සම්බන්ධ වන සියලු රාජ්ය ආයතන එකමුතු මේ පරිශ්රමය සඳහා සමගාමී වෙමින් කටයුතු කරනු ලබයි. නොසැලකිලිමත් ලෙස රිය පදවන රියැදුරන් සඳහා තදින් ක්රියා කිරීමත් සුවිශේෂි කරුණකි. යම් වරදක් රියැදුරු විසින් සිදු කළහොත් ඒ බස් රථ හිමිකරුට ද නඩු පැවරීමට ඉදිරියේදි ක්රියා කරන අතර; විශාල අනතුරක් සිදු වුවහොත් ජාතික ගමනාගමන කොමිෂන් සභාව සමඟ එකතු වී අදාළ බස් රථයට හිමි මාර්ග ධාවන අවසර බලපත්රය අවලංගු කිරීමට ඉදිරියේදි පියවර ගනු ලබයි.
විශේෂයෙන් සියලුම පාර්ශ්වයන් මාර්ග තදබදය පිළිබඳ ව අවධානයෙන් සිටිය යුතුයි.
මගීන් විශේෂයෙන් ම කාල කළමනාකරණය කරගත යුතු අතර මාර්ග තදබදය ඇති අවස්ථාවලදී මාර්ගය පිළිබඳ අවධානයෙන් සිටිය යුතුයි. ගූගල් තාක්ෂණය හරහා දැනුවත් වීම වැනි ක්රමවේද භාවිත කළ හැකියි. විශේෂයෙන් මගීන්ට, පදිකයන්ට, රියැදුරන් යන සියලු පාර්ශ්වයන් සඳහා මෙහි වගකීම පැවරී ඇති බව නියෝජ්ය පොලිස්පතිවරයා තවදුරටත් සඳහන් කරයි.
අපේ අරමුණ මහජනයාට සේවයක් කිරීමයි
• පොලිස් මාධ්ය කොට්ඨාසයේ අධ්යක්ෂ ජාලිය සේනාරත්න
රථවාහාන තදබදයට අපිට අතිවිශාල පොලිස් නිලධාරීන් පිරිසක් අවශ්ය වෙනවා. එන්න එන්න රථවාහන ප්රමාණය වැඩිවෙනවා. ඒ වගේම වාහන ලියාපදිංචිය වැඩි වෙනවා. කොළඹ නගරයේ රථවාහන තදබදය ඉතාමත් වැඩිවෙනවා. පාසල්වලට එන ප්රමාණය, කොළඹ නගරයේ කාර්යාලවලට යන ප්රමාණය සියල්ල වැඩි වෙනවා. මේ නිසා දිනෙන් දින රථවාහන තදබදය වැඩි වෙනවා. යම් කිසි ආකාරයකට අපිට මේ සදහා නිලධාරීන් සහ තාක්ෂණය පාවිච්චි කරන්නට සිදු වෙනවා. එහිදී අපිට ඉන්න නිලධාරීන් ප්රමාණයේ ඌනතාවක් තියෙනවා. දැනට ඉන්න නිලධාරීන් ප්රමාණය ගත්තාම අපිට නිලධාරීන් 600ක පමණ ඌනතාවක් තියෙනවා.
කොළඹ නාගරික රථවාහන පාලනය සඳහා මේ වෙලාවේ අපිට ත්රිවිධ හමුදාවෙ සහය ලැබෙනවා කියන්නේ පහසුවක්. මොනම අවස්ථාවකදිවත් අපි බලාපොරොත්තු වෙන්නේ නැහැ; ත්රිවිධ හමුදාවෙන් රථවාහන නීතිය ක්රියාත්මක කරන්න.
මෙහි කොටස් දෙකක් තියනවා. එකක් තමයි රථවාහන නීතිය ක්රියාත්මක කිරිම; අනෙක් කාරණාව තමයි රථවාහන හැසිරවීම සහ පාලනය කිරිම. හැසිරවීමේ හා පාලනයේ පහසුවට තමයි අපි මේ හමුදා නිලධාරින් යොදා ගන්නේ. මේ වන විට තදබදය අඩුවක් වෙලා නැහැ. කළමනාකරණය කරගැනීමට හැකිවෙලා තියෙනවා.
දැනට සියයක් පමණ ත්රිවිධ හමුදාවෙන් යොදවලා තියනවා. ඉදිරියේදි එකසිය විස්සක් යොදවා ගන්නට අපි බලාපොරොත්තු වෙනවා. යුද හමුදා පොලීසියෙන් සියයක්, ගුවන් හමුදා පොලීසියෙන් දහයක්, නාවුක හමුදා පොලීසියෙන් දහයක් ලෙස යොදා ගැනීමට අපි බලාපොරොත්තු වෙනවා. කොළඹ ප්රදේශයේ මාර්ග තදබදයට පමණයි මෙලෙස යොදවා තියෙන්නේ.
අපි මේ යුද හමුදා පොලීසිය යෙදවීමෙන් යම් අත්දැකීමක් ගැනීමට උත්සාහ කරනවා; යමක් කරන්නට පුළුවන්ද කියලා. මේ සම්බන්ධයෙන් යහපත් ප්රතිඵලයක් ඇතිවුවහොත් නෛතික අවශ්යතාවන් සම්පූර්ණ කරලා නෛතික පරිසරයක් ගොඩ නගන්නට පුළුවන් වෙයි කියලා හිතනවා. එය රජයේ කාර්යයක්.
අපිට දැනට බලාපොරොත්තු වන්නෙ නිලධාරීන්ගේ ඌනතාව නිසා සහයෝගයට සහභාගී කරගැනිමටයි. මෙය නීතිවිරෝධි කියලා කියන්න බැහැ. එසේ කියන්නට නම් නීතියෙ විධි විධාන උල්ලංඝනය කර තියෙන්නට ඕන. එසේ වෙලා නැහැ.
දැනට අපි බලාපොරොත්තු වෙන්නේ නැහැ; හමුදා පොලිස් නිලධාරීන් හරහා නීතිය ක්රියාත්මක කරවන්නට.
ඇත්ත වශයෙන් මහජනතාවට මේ මාර්ග තදබදය නිසා දැඩි අපහසුතාවක් තියනවා. එසේ නම් රථවාහන පොලිස් නිලධාරියකුගේ වගකීම මහජනතාව කරදරයකින් තොරව ගමනාන්තය දක්වා යෑමට සහය දැක්වීමයි.
රියදුරන් පදිකයන් මගින් මේ අය මාර්ගයට අවතිර්ණ වුණාට පස්සේ සහය දීම රථවාහන පොලිස් නිලධාරින් ගේ කාර්යභාරය වෙන්නේ. එ් පහසුකම් සැපයීමට තමයි අපි මේ හමුදා පොලීසිය සහය යොදා ගන්නේ.
එහෙනම් යුද හමුදා පොලීසියට බලතලත් දෙන්න
• පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න
හමුදාවේ බැටැලියන් එකම දැම්මත් මේ මාර්ග තදබදය ඉවත් කරන්න බැහැ. පොදු ප්රවාහන සේවය දියුණු කරන්නේ නැතුව තනි තනි වාහාන වල මිනිස්සු දිනපතා කොළඹට එනවා. ඒ නිසා ගුණාත්මක සේවාවක් බවට මෙය පත්කරන්න ලැබෙන්නේ නැහැ. මුළු හමුදාවම දැම්මත් එය නතර කරන්න බැහැ.
මේ මාර්ග තදබදය බරපතළ ප්රශ්නයක්. දවසකට රුපියල් බිලියන එකක් අපේ රටට අහිමි වෙනවා. එය කොළඹ හා තදාසන්න ප්රදේශවල මාර්ග තදබදය නිසා. ඒ නිසා වන හානිය අතිවිශාලයි. වාහනයක් නතර කර තැබීමෙන් තමයි පරිසරයටත් විශාල හානි සිදුවන්නේ. වාහන නතර කර තැබීමෙන් පරිසරයට විශාල හානි සිදුවෙනවා. වාහන තදබදයේදිත් මෙය සිදුවනවා.
පරිසරයට කාබන්ඩයොක්සයිඩ් පිට වෙනවා. මේමගින් පරිසරයට විශාල හානි සිදුවෙනවා. ඒ නිසා බරපතළ වායු දූෂණයක් වෙනවා. ඉන්දන දහනයක්ද සිදුවෙනවා. එක අතකින් අපිට සියයට තිස්පහක ඉන්ධන අපතේ යනවා. එය තමයි බරපතළම ප්රශ්නය.
පොදු ප්රවාහනවලින් ඉවත් වෙලා තදබදය නිසා ත්රිවිල් මෝටර් බයිසිකල් වැනි විකල්ප භාවිත කිරීමට පටන් ගත්තා. එයින් වෙන්නේ මාර්ග තදබදය නිසා රිය අනතුරු බහුල වීමයි. මෝටර් බයිසිකල් ත්රිවීල් මගින් දිනකට අටදෙනෙක් මිය යනවා.
පොදු ප්රවාහන සේවාව සංවර්ධනය කරන්නේ නැතුව මෙය කරලා වැඩක් නෑ. හන්දි ගානේ වාහන නතර කරලා තියනවා. යුද හමුදාව දාලා ඒ සියල්ල ඉවත් කරන්නට ඕන.
යුද හමුදාව හරි එය කරන්නට ඕන; පොලීසිය ඒ වැඩෙ කරන්නේ නැතිනම්. පදික වේදිකාවේ වාහන නතර කරලා මගියෙක්ට යන්න විදිහක් නැහැ. එසේ නම් ජනතාවට යන්න වෙලා තියෙන්නේ පාරේ. රිය අනතුරු කොතෙකුත් සිදුවෙනවා ඒ මගින්.
කොළඹ නගරයට එන මෝටර් රථ, ත්රිරෝද රථ පාලනය කිරිමට යම් වැඩපිළිවෙලක් වගේම කොළඹ නගරයට වැඩිපුර වාහන එන වේලාව, එක් වාහනයක කීදෙනෙක් එනවාද ආදිය ගැන මූලික අධ්යයනයක් කර සැලසුමක් කළ යුතුයි.
පොදු බස්සේවාව සහ දුම්රිය සේවාව සක්රිය කළ යුතුයි. කොළඹ නගරයට එන ජනතාවගේ කාර් කිසියම් ස්ථානයක ගාල්කොට බස්රථවලට මාරුවී කොළඹට ඒමට සුඛෝපබෝගි බස් රථ සේවාවක් ආරම්භ කළ යුතුයි. බස් ප්රමුඛතා මංතිරු නිර්මාණය කළයුතුයි.දැඩිවාහන තදබදය ඇති අවස්ථාවලදි කන්ටේනර් වැනි වාහන ඇතුළු කිරිම සීමා කළ යුතුයි. මේ ගැටලුවට යුද හමුදාවත් යොදවලා තියෙනවා. එය යම් විසදුමක් සෙවීමක් ලෙසයි කරන්නේ.
එසේ නම් අපි හිතන්නේ දඩමුදල් ලියන්න ඒ අයට බලය දෙන්නට ඕන. ත්රිවිධ හමුදාව යොදවන්න වෙලා තියෙන්නේ පොලීසිය රථවාහන නීතිය නිසි පරිදි ක්රියාත්මක නොවන නිසයි. මාර්ග තදබදය අවම කිරීමට හමුදා පොලිසි නිකං යොදවලා මදි. රථවාහන නීතිය ක්රියාත්මක කිරිමට අවසර ලබාදි යෙදවිය යුතුයි.
හමුදාව යෙදෙව්වා කියලා කිසිසේත් විසදුමක් ලැබෙන්නේ නැහැ; මුළු හමුදාවම යෙදෙව්වත් මේකට විසඳුමක් නොවෙයි. පොලීසිය කරන්නේ නැතිනම් දඩ ගහන්නත් හමුදාවට අයිතිය දෙන්න අවශ්යයි කියලා මම කියන්නේ අරමුණක් ඉලක්කයක් ඇතිව. දැම්මා නම් බලතලත් දිය යුතුයි. එසේ නොකළොත් හමුදාව හෑල්ලුවට පත් වීමයි මෙයින් වෙන්නේ.
යුද රණවිරුවන් පාරට දාලා
• ජවිපෙ ගම්පහ දිස්ත්රික් පාර්ලිමේන්තු මන්ත්රී විජිත හේරත්
පොලීසිය මේ රාජකාරිය නිසියාකාරව කරන්නේ නැහැ කියලා නම් මේ දේ කරන්නේ; හැමදාම හමුදාව පාරේ තියන්න බැහැනේ. එය හොඳ දෙයක් නොවෙයි. තාවකාලිකව දැම්මත් හැමදාම කරන්න බැහැ. මොකක්ද කරන්නේ කියලා අපි කතා කරන්නට අවශ්යයි. පොලීසිය මේ වැඩේ නිසියාකාරව කරන්නෙ නැතිනම් හමුදාව දාලා මේ වැඩේ කරන්න බැහැ. මේක ස්ථිර පිළිතුරක් නොවෙයි. එසේ නම් කළ යුතුවන්නේ එතැන තියෙන දුර්වලතා හඳුනා ගැනීමයි. පොලීසියට මේ සඳහා නිසියාකාර පුහුණුවක් ලබාදෙන්නයි අවශ්ය වෙන්නේ.
පොලීසිය හෑල්ලුවට ලක් කරලා විතරක් නොවෙයි; හමුදාවත් පාරට බස්සලා. දෙකම හොඳ දේවල් නොවෙයි. යුද්ධය කරපු රණවිරුවන් පාරට දාලා. පොලීසියේ සේවයත් සැහැල්ලුවට ලක් කරලා. දුර්වල තැන හදුණා ගෙන එයට පිළියම් යොදන්නයි ඕන. පොලීසියේ සේවයත් හෑලුවත් ලක්කරලා. හමුදාවට දිගටම මේ දේ කරන්න බැහැ. මේ නිසා දුබලතාව හඳුනාගෙන ඒ අඩුව සම්පුර්ණ කරන්නට කටයුතු කරන්නට ඕන. සේවය හරියට නොකෙරෙනවා නම් ඒ වෙනුවට හමුදාව පාරට දාන එක නොවෙයි පිළිතුර. අපේ රටේ හැමතැනටම මේ දේ කරන්නට බැහැ.
හමුදා පොලීසිය යෙදවීමේ අවදානමක් තිෙබනවා
• එජාප කළුතර දිස්ත්රික් පාර්ලිමේන්තු මන්ත්රී නීතිඥ අජිත් පී. පෙරේරා
සිවිල් කටයුතුවලට යුද හමුදාව යොදවලා මිලිටරිකරණය කිරීමේ පියවරක් ලෙසයි අපි මෙය දකින්නේ. පොලිස් සහ යුද හමුදා අඥා පනතට අනුව රථවාහන රාජකාරි සඳහා යුද හමුදා පොලිසිය යෙදවීමට හැකියාක් නැහැ. එය නීති විරෝධි බවත් එසේ යෙදවීමට නම් ඊට අදාළ පනත් සංශෝධනය කළ යුතුයි.
එසේ නොමැතිව පොලිස් ආඥා පනත යටතේ ඇති රෙගුලාසි අනුව යුද හමුදාව පොලීසියට සිවිල් ජනතාව සම්බන්ධ රාජකාරි කිරීමට හැකියාවක් නැහැ. මාර්ග තදබදය ආපදා තත්ත්වයක්; එසේ හදිසි ආපදා තත්ත්වයක් ලෙස සලකා මෙය කරන්නේ කියලා. මම හමුදාපතිවරයාට නීතිය ඉෙගන ගන්න කියලා කියන්න යන්නේ නැහැ. නමුත් යුද හමුදා, නාවුක හමුදා, ගුවන් හමුදා, පොලීසිය යොදවලා කරන්නේ නීති විරෝධී කටයුත්තක් කියලා මම හිතන්නේ. මේක 25 වැනිදා සිට ක්රියාත්මක කරනවා.
ඒ සම්බන්ධයෙන් අපිට කරන්න තියෙන්නේ එකම විවේචනයක් තමයි. මේ රටේ නීතිය ගැන නොතකා යුද හමුදා පොලීසිය යෙදවීම පොලිස් නිලධාරීන්ගේ සේවයට සහ පොලිස් නිලධාරින්ගේ ගරුත්වයට කරන හානියක්. මෙයින් හමුදා පොලීසියේ, සාමාන්ය පොලීසියේ රාජකාරි සේවා පථ වෙනස් වන අතර හිතුවක්කාරි ආකාරයට අත්තනෝමතිකව මෙවැනි දේ කිරිම කිසිසේත් නිත්යනුකූල නැහැ. රටේ නීතියේ ආධිපත්යයට හානි සිදුවෙනවා. හමුදා නිලධාරින්ට මාර්ග නීති සම්බන්ධයෙන් දැනුවත් විමක් නැති නිසා එය බරපතළ තත්ත්වයක්. සිවිල් කටයුතු සඳහා හමුදාව යෙදවීමේ අවදානමක් තියෙනවා.
මේ ක්රියාව මහජන සේවයක් මෙන්ම සාර්ථක වැඩපිළිවෙළක්
• හමුදා මාධ්ය ප්රකාශක බ්රිගේඩියර් චන්දන වික්රමසිංහ
විශේෂයෙන් කොළඹ නගරයට කාර්ය බහුල වේලාවන්හිදී උදේ හයත් දහයත් අතර හා තුනත් හතත් යන වේලාවන්වලදී කොළඹ නගරයට ඇතුළුවන සහ පිටත්වන වාහන නිසා ඇතිවන මාර්ග තදබදය අවම කරගැනීමට ශ්රී ලංකා පොලීසියට සහය වීමටයි ශ්රී ලංකා යුද හමුදාවේ පොලිස් සේවා බළ ඇණිය යොදාගන්නේ. විශේෂයෙන් ම කොළඹ නගරයේ මාර්ග තදබදය වැඩියෙන්ම ඇති ස්ථානවලට ශ්රී ලංකා පොලිස් සේවා බළ ඇණි බට පිරිස් යොදාගනු ලබනවා.
ශ්රී ලංකා පොලීසියට එ් අනුව කාර්යක්ෂමව ගමනාන්තය දක්වා යා හැකිවෙනවා. මෙය අතිගරු ජනාධිපතිතුමාගේ සංකල්පයක්. එහිදී යුද හමුදාපතිතුමා, නාවුක හමුදාපතිතුමා, ත්රිවිධ හමුදාපතිවරුන්ගෙන් හා විශේෂයෙන් ආරක්ෂක මාණ්ඩලික ප්රධානි ශවේන්ද්ර සිල්වා මහතාගේ උපදෙස් පරිදි ශ්රී ලංකා යුද හමුදාව 25වැනිදා සිට මේ රාජකාරි සදහා යොදා ගනු ලබනවා.
එමෙන්ම ශ්රී ලංකා ගුවන් හමුදාවත්, නාවුක හමුදාවත්, ඒ අයගේ මූලස්ථානයන්ට පිවිසෙන මාර්ග සඳහා පිවිසෙන මාර්ග සඳහා මාර්ග තදබදය අවම කරගැනීමට තාවකාලිකව මේ වැඩපිළිවෙළ යොදලා තියනවා. දැනට කොළඹ නගරයේ සාර්ථකව මේ වැඩපිළිවෙළ කෙරීගෙන යනවා.
ශ්රී ලංකා පොලීසියට සහයෝගය දැක්වීම සඳහායි මේ නිලධාරින් යොදවා තියෙන්නේ. දැනට මේ වැඩ පිළිවෙළ සාර්ථකව ක්රියාත්මක වෙනවා. ගමනාන්තය දක්වා යන මගීන්ට සහය දීමයි මෙයින් කෙරෙන්නේ. මාර්ගයන්හි තියෙන තදබදය අවම කරගැනීමටයි ත්රිවිධ හමුදාව සහය දක්වන්නේ. මාර්ග අවහිරතාව මඟහරවා ගැනීමට මහජනතාවට කරන සේවයක් ලෙසයි මෙය කරනු ලබන්නේ. ශ්රී ලංකා යුද හමුදාවේ පොලිස් සේවා බළ ඇණිය, නාවුක හමුදාවේ පොලිස් සේවා බළ ඇණිය, ගුවන් හමුදා පොලිස් සේවා බළ ඇණියත් මේ සඳහා ක්රියාත්මක වෙමින් පවතිනවා.
රථවාහන තදබදයට හේතුව පොලීසියේ දුර්වලතාවම නොවෙයි
• පෙරටුගාමී පක්ෂයේ අධ්යාපන ලේකම් පුබුදු ජාගොඩ
ජනතාවගේ පැත්තෙත් දුක්ගැනවිල්ලක් තියෙනවා. විශේෂයෙන් රථවාහන රියදුරන්ගේ පැත්තෙන් මේ දුක්ගැනවිල්ල තියෙනවා.
ලංකාවේ වාහන වැරදි සම්බන්ධයෙන් දඩමුදල් නියම කිරීමේ ක්රමවේදය තියෙන්නේ මිනිසුන් වැරදි කරන එක නැවැත්වීමට නොවෙයි. වැරදි කරන්න ඉඩදීලා ඒකට දඩ ගහලා රජයට ආදායමක් උපයා ගැනීමටයි. මෙහිදි අපිට ප්රශ්න දෙකක් තියෙනවා. පවතින නීතියට පටහැනි පොලිස් ආඥා පනතට අනුව පොලීසියට තමයි බලතල තියෙන්නේ.
විශේෂයෙන් හමුදාව සහ පොලිසිය අතර බලතල බෙදීමේදි හමුදාවට සිවිල් වැසියන් හැසිරවීම නොවෙයි නිතීයෙන් වෙන් කරලා තියෙන්නේ. එය වැරදියි.
හදිසි නීති වැනි අවස්ථාවලදි අත්අඩංගුවට ගැනීම් හමුදාවට කරන්නට පුළුවන්. හමුදාව එය කරද්දි එයට හමුදා පොලිසිය යම් මැදිහත් වෙනවා. එහෙත් අනෙත් අවස්ථාවලදි හමුදා පොලීසිය එයට මැදිහත් වීමක් වෙන්නේ නැහැ.
රථවාහන තදබදයට හේතුව පොලීසියේ දුර්වලතාවම නොවෙයි. අවශ්ය පමණ මාර්ග පද්ධතිය පුළුල් වෙලා නැහැ. මාර්ගවලට විශාල වියදමක් කළාට සාමාන්ය ජනතාව පාවිච්චි කරන මාර්ග වලට නොවෙයි එහෙම වියදම් වුණේ. අවසාන වසර දහයක කාලය සලකා බැලුවොත් මාර්ග සඳහා වැඩිම වියදම් කළේ අධිවේගි මාර්ග සඳහායි.
එ්වා සාමාන්ය ජනතාව පාවිච්චි කරන පාරවල් නොවෙයි. නගරවල පාරවල් තාම පුළුල් වෙලා නැහැ. යාපනය පැත්තට යන පාරත් එහෙමයි. නගරයට විශාල ප්රමාණයක් දිනකට එනවා; ලක්ෂ හතරක් කොළඹ නගරයට එනවා රැකියා සඳහා. එයට මිලිටරි පොලීසි දැමීමෙන් ඒ ප්රශ්න විසඳන්න බැහැ.