අද වන විට ගුරු රාජකාරිය බොහෝ සෙයින් වෙනස්ව ඇත්තේය. ගුරුවරුන්ගේ වගකීම් යුතුකම් කොටසද ඊට සමගාමීව වෙනස්ව ගොසිනි. එදා ගුරුවරු දරුවන් ඇපයට තබා ගනිමින් වැඩ වැරුවේ නැත. ඉල්ලීම් ඉල්ලා සටන් මඟට පිවිසියේ නැත. එහෙත් කාලයාගේ ඇවෑමෙන් බොහෝ දේ වෙනස්ව ඇත්තේය. දෙලක්ෂයකට අධික රජයේ පාසල් ගුරුවරු පසුගියදා වැඩ වැරුවේ ඔවුන්ට මෙතෙක් නොවිසදී ඇති ඉල්ලීම් හයක් ඉටු කර ගන්නට යැයි කියමිනි.
ජාතික හා පළාත් පාසල් ඇතුළුව ලංකාවේ සමස්ත ගුරුවරු සංඛ්‍යාව 248,000 ක් පමණ වෙයි. සාමාන්‍යයෙන් ලංකාවේ ගුරු සිසු අනුපාතය 19:1 කි. පසුගිය කාලයේ අධ්‍යාපන අමාත්‍යාංශ දත්ත වාර්තාවන්ට අනුව ලංකාවේ ඉතා පැහැදිලි ගුරු හිඟයක් පැවැතුණු අතර ඊට සමාන්තරව ගුරු අතිරික්තයද ඉහළ අගයක් ගෙන තිබුණි. එනම් පාසල්වල 60,000 ගුරු හිඟයක් පැවැතියද තවත් පාසල්හි 40,000කට ආසන්න ගුරු අතිරික්තයක්ද පැවැතුණි.
මේ බොහෝමයක් ගුරු අතිරික්ත පැවැතියේ ජනප්‍රිය ජාතික පාසල් හා ජනප්‍රිය නගරාසන්න පළාත් පාසල් තුළය. මේ හේතුව නිසාවෙන් පසුගිය රජය ගුරු තුලනය කිරීම වෙනුවෙන් වසර 10කට වඩා එක පාසලක සේවය කළ ගුරුවරුන් මාරු කිරීමට පියවර ගත්තේය. ඒ අනුව පසුගිය කාලයේ ගුරුමාරු 5000 - 6000ක් පමණ සිදු විය. කෙසේ වෙතත් මේ වන විට ගුරු ක්ෂේත්‍රයේ ගැටලු රාශියක් ඇති වීමට මේ කරුණු කාරණාද ඉවහල් වී ඇත.
“ගුරුවරුන්ගේ පොදු ගැටලු 6ක් අපි හඳුනා ගෙන තිබෙනවා. 1994ට පෙර ගුරුවරු ලබා ගත් වැටුපට වඩා අඩු වැටුපක් 1996 න් පසු ලැබෙන්නේ. බී. සී පෙරේරා වැටුප් කොමිසමෙන් ගුරුවරුන්ගේ මේ වැටුප් අවප්‍රමාණ වුණා. අපි බලධාරීන්ගෙන් ඉල්ලන්නේ 1994ට පෙර ගුරුවරු ලැබූ වැටුප් පරිමාන ලබා දෙන්න කියා. සාලිය මැතිව් හා ලයනල් ප්‍රනාන්දු වැටුප් කොමිසමෙන් අවුරුදු 5ක අධ්‍යනයක් කළත් වැටුප් විෂමතා ඉවත් වුණේ නැහැ. පසුගිය රජය මේ යෝජනා අනුමත කර වැටුප් විෂමතා ඉවත් කිරීමට අයවැයෙන් සියයට 40ක් වෙන් කළා. ඒ වගේම ඇමැති අනුකාරක සභාවක් පත් කළා.
වැටුප් විෂමතා ඉවත් කරන්න නම් මෙය සංයුක්ත සේවාවක් බවට පත් කළ යුතුයි, එතෙක් අතුරු වැටුපක් දිය යුතුය යන යෝජනාව ගෙනාවා. මෙය අමාත්‍ය මණ්ඩලයට ඉදිරිපත් කළා. නමුත් මෙය ප්‍රකාශයට පත් කළාට චක්‍රලේඛ නිකුත් කළේ නැහැ. පසුගිය රජය වෙනස් වීමෙන් පසුව උපාලි විජේවීරගේ සභාපතිත්වයෙන් යුත් වැටුප් කොමිසමක් පත් කළා. වත්මන් ජනාධිපතිතුමාගේ ප්‍රතිපත්ති ප්‍රකාශයේ තියෙනවා ගුරු විදුහල්පති සේවාව සංයුක්ත සේවාවක් බවට පත්කර වැටුප් විෂමතා ඉවත් කරන බව.“එසේ අප හා පැවැසූයේ සමස්ත ලංකා එක්සත් ගුරු සංගමයේ ප්‍රධාන ලේකම් යල්වල පඤ්ඤාසේකර හිමිය.
“ගුරුවරුන්ගේ වැටුප් විෂමතා ඉවත් කිරීම මුල් කර ගෙන තමයි අපි පසුගියදා දිප ව්‍යාප්ත වැඩ වර්ජනයක් කළේ. මෙය සාර්ථක වුණා. සියයට 95ක් පමණ ගුරුවරු මෙයට සහාය දැක්වූවා. සමහර අය පැවැසුවා මෙයින් ළමයින්ට පාඩුවක් සිදු වූ බව. දකුණු ආසියාවේ අඩුවෙන්ම පඩි ලබන්නේ අපේ ගුරුවරු. පිංලන්තයේ වැඩිම පඩියක් ලබන්නේ ගුරුවරු. අද ගුරුවරුන්ගේ ගුරු මාරුවිම් සියල්ල නතර කරලා. පසුගිය කාලයේ එක පාසලේ වසර 10කට වඩා සිටි ගුරුවරු සියල්ල අපි මාරු මණ්ඩල යටතේ මාරු කිරීමට සැලැස්වූවා. නමුත් මේ වසරේ මාරුවීම් විදුහල්පතිවරුන් විසින් නතර කරලා. මේ නිසා ජාතික පාසල්වලට අලුත් ගුරුවරු එන්නේ නැහැ.
අපි අධ්‍යාපනයෙන් අපේක්ෂා කරන්නේ නිර්මාණාත්මක පෞරුෂයෙන් පිරි දරුවෙකු බිහි කිරීම. ඒත් ඒ කාර්යය කරන්න අද ගුරුවරුන්ට විවේකයක් නැහැ. ගුරුවරුන්ට අද නොයෙකුත් කොළ පුරවන්න වෙලා. සාමාන්‍ය පෙළ ඇයැදුම්පත් අන්තර්ජාලය හරහා පුරවන්න සිදුවෙලා. මේ සඳහා විශාල කාලයක් යනවා. ඒ නිසා පංතියේ උගන්වන්න තියෙන කාලය අඩුයි. එසේ පැවැසූයේ ලංකා ගුරු සංගමයේ ප්‍රධාන ලේකම් ජෝෂප් ස්ටාලින් ය.
“2016.1.1 සිට රාජ්‍ය සේවයට බඳවා ගත් ගුරුවරු ඇතුළු සියලු රාජ්‍ය සේවකයින්ට විශ්‍රාම වැටුප අහිමි කරලා. එය ලබා දෙන ලෙස අපි ඉල්ලුවා. පසුගිය රජය දායක විශ්‍රාම වැටුපක් දෙන බව කිව්වත් එය හඳුන්වා දුන්නේ නැහැ. අද විවිධ කටයුතුවලට දෙමවුපියන්ගෙන් මුදල් එකතු කරන්න පාසල්වලට සිදුවෙලා තියෙනවා. මෙය ගුරු විදුහල්පති දෙමවුපියන්ට විශාල ප්‍රශ්නයක්. ඒ වගේම සමහර විදුහල්පතිවරුන්ටත් මේ නිසා අයථා ක්‍රම වල යෙදෙන්න අවස්ථාව උදාවෙලා. ඒ නිසා අපි ඉල්ලන්නේ දළ ජාතික නිෂ්පාදිතයෙන් සියයට 6ක් අධ්‍යාපනය වෙනුවෙන් වෙන් කරන්න කියා. ගුරු මාරු නවතා දැම්මේ ඇයි? අධ්‍යාපන අමාත්‍යාංශයේ ගුරු මාරු ඒකකය වගේම අපේ අයත් මේ සඳහා සිය කාලය කැප කළා. නමුත් අද එය අපතේ ගිහින්. ගුරු මාරු වීම්වල ගැටලු තියෙනවා නම් එය නිරාකරණය කිරීම අධ්‍යාපන අමාත්‍යාංශයේ රාජකාරියක්. “ ඒ ලංකා ගුරු සේවා සංගමයේ ප්‍රධාන ලේකම් මහින්ද ජයසිංහය.
ගුරු සංගම් විසින් ගෙන ගිය මෙම විරෝධතා ව්‍යාපාරයට ඇතැම් ගුරු සංගම් එකතු වූයේ නැත. ඔවුහු ගුරුවරුන්ගේ ගැටලු හඳුනා ගත්තත් නව රජය විසින් එය විසඳනු ඇතැයි අපේක්ෂාවෙන් පසුවෙති.
“ගුරුවරුන්ටත් විදුහල්පතිවරුන්ටත් වැටුප් ප්‍රශ්න තියෙනවා. මේ වෘත්තිය අරගලයට අපි එක් නොවුණත් ඉතා අසාධාරණ ලෙස වැටුප් විෂමතා තියෙන බව අපි පිළිගන්නවා. නමුත් අපි මේ ප්‍රශ්න වත්මන් රජයත් සමඟ සාකච්ඡා කළා. ගුරුවරුන්ගේ මේ ප්‍රශ්න විසදීමට ප්‍රමුඛතාව දෙන බව බලධාරීන් අප සමඟ ප්‍රකාශ කළා. නව රජය මේ ප්‍රශ්නය පිළිබද සංවේදීයි. පසුගිය කාලයේ විවිධ චක්‍රලේඛ නිසා ගුරුවරුන්ගේ වැටුප් අසීමිත ලෙස පහත වැටුණා. අද ගුරුවරුන්ගේ වැටුප පොලිස් කොස්තාපල්වරයකුටත් වඩා අඩුයි.
පසුගිය කාලයේ ඉතාමත් අසාධාරණ ලෙස ගුරුවරුන්ගේ වැටුප් පහතට වැටුණු නිසා පසුගිය සතියේ කැබිනට් මණ්ඩලයට මේ පිළිබඳ කැබිනට් පත්‍රිකාවක් දමන්න යෝජනා වුණා. අධ්‍යාපන ඇමැති පවා මේ පිළිබඳ දැනුම්වත් වුණා වගේම එය කළ යුතු දෙයක් බව ඔවුන් තීරණය කළා.
මේ කැබිනට් පත්‍රිකාව හරහා ගුරු සේවා ව්‍යවස්ථාව පිහිට වූ පසු ගුරු වැටුප් අඩු කිරීමට හේතු වූ විවිධ චක්‍රලේඛ අහෝසි කළ යුතු බව අවධාරණය කළා. ඉදිරි මැතිවරණයෙන් පසු බිහිවන නව රජයේ පළමු අයවැය වාර්තාවේ මේ සඳහා ප්‍රතිපාදන යොදවීමට රජය සූදානම්. මේ නිසා අපිට ලොකු විශ්වාසයක් තියෙනවා මෙතෙක් තිබෙන වැටුප් විෂමතා ඉවත් කර අපේ වැටුප් සාධාරණ තලයක තබන බවට.“ එසේ පැවැසූයේ ශ්‍රි ලංකා පොදු ජන අධ්‍යාපන සේවා සංගමයේ සභාපති වසන්තා හදපාන්ගොඩය. ඇය පවසන්නේ පසුගියදා උද්ඝෝෂණය කරනන්නට යෙදුණු විවිධ ගුරු සංගම් පවසන්නේ මෙවැනි කැබිනට් පත්‍රිකාවක් දැමීම අවශ්‍ය නොමැති බවයි. නමුත් එසේ පැවැසීම මුළාවක් පමණක් බව ඇය පවසන්නීය.
ගුරුවරුන්ගේ මෙම ප්‍රශ්නය විසදීමට රජය මැදිහත් වි ඇත. ගුරු වැටුප් පහත හෙළිමට පසුගිය රජයන් ගෙනා සියලු චක්‍රලේඛ අහෝසි කර ගුරුවරුන්ට සාධාරණ වටුප් තලයක් හිමි කර දීමට රජය සුදානම් වෙයි.
“ගුරුවරයාගේ වැටුප පහත හෙළීමට පසුගිය ආණ්ඩු ගෙනා චක්‍රලේඛ සියල්ල අහෝසි කර අභිමානයෙන් ජීවත් වීමට සුදුසු සාධාරණ වැටුප් තලයක් ලබා දීමට කැබිනට් මණ්ඩල යෝජනාවක් ඉදිරිපත් කළා. ...“ අධ්‍යාපන ඇමැති ඩලස් අලහප්පෙරුම පවසන්නේය.
ගුරුවරුන්ගේ වැඩ වැරුම මැද දරුවන් අනාරක්ෂිත බව කොයි කවුරුත් දන්නා සත්‍යයකි. කෙළ සෙල්ලමින් ගත කරන පාසල් කාලය තුළ ගුරුවරුන් නොමැතිවීමේ අනාරක්ෂිත බව දරුවන්ට වැටහෙන්නේ නැත. ඉතා කනගාටුදායක ලෙස මෙහි ප්‍රතිවිපාක අසන්නට ලැබීමෙන් කියා පාන්නේ මේ පිටුපස ඇති නොපෙනෙන ප්‍රතිවිපාකය.
බද්දේගම ක්‍රිස්තුදේව විදුහලේ 10 වැනි ශ්‍රේණියේ ඉගෙනුම ලැබූ දරුවෙකු ඉතා අවාසනාවන්ත ලෙස ගිං ගඟේ ගිලි මිය යන්නේ මේ ගුරු වර්ජනය සිදුවන මොහොතේය. පහළොස් හැවිරිදි මේ දරුවා උදෑසන පාසල් යන්නේ සුපුරුදු පරිදි අකුරු කරන්නට වුවත් පාසලේ දැනෙන පාළුව මේ දරුවා ඇතුළු සිය යහළුවන්ට ගෙන දුන්නේ විනෝදාස්වාදයකි. සිය පියාද තවත් පාසලක විදුහල්පතිවරයෙකු වු අතර ඔහුද නිවාඩු වාර්තා කර මෙම වර්ජනයට සහාය දැක්වුවද සිය වගකීම් නොපිරිහෙලා ඉටු කළ ඔහු නිවාඩු පිට පාසලට යන්නේ තවත් දරු පිරිසකගේ ආරක්ෂාව වෙනුවෙනි.
