හැම දෙනාටම ඔබ කෘතවේදී වන්න.
කිසිවකු ඔබට කෘතවේදී වේයැයි
බලාපොරොත්තු නොවන්න.
හැම දෙනාටම ඔබ ආදරය කරන්න. කිසිවකුගෙන් ඔබ ආදරය බලාපොරොත්තු නොවන්න. හැමදෙනා සමඟම ඔබ සිනාවෙන්න. කිසිවකුගෙන් ඔබ සිනාහවක් බලාපොරොත්තු නොවන්න.
හැමදෙනාටම ඔබ පිහිටවෙන්න. කිසිවකුගෙන් ඔබ පිහිටක් බලාපොරොත්තු නොවන්න.
ඔබ හැමදෙනාගේම සැප දුක විමසන්න. කිසිවකු, ඔබගේ සැප දුක විමසාවි යැයි බලාපොරොත්තු නොවන්න.
එවිට කිසිදු ආයාසයකින් තොරව සියලු දේ ඔබට ලැබෙනු ඇත.
“Who ever has will be given more and he will have an abundance. Who ever does not have, even what he has will be taken from him.
ඇති කෙනාට තව තවත් ලැබෙන අතර, ඉන් ඔහු වඩාත් සමෘද්ධිමත් වේ. නැති කෙනාට කිසිවක් නොලැබෙන අතර, ඔහුගේ තිබෙන දෙයත් විනාශ වේ. ඒක හරිම අසාධාරණය කියන එක ඔබටත් වැටහේවි. නමුත් මේ කියමනේ විසඳාගන්න ප්‍රහේලිකාවකුත් හෙළිදරව් කරගන්නට රහසකුත් තියනවා වගේ ම ඔබ ඒක දැනගත්තාම, ඔබට අලුත් ලෝකයක් විවර කරගන්නත් ලැබෙනවා.
නමුත් ඔබ දන්නවද? බොහෝ දෙනාට මඟ හැරුණ මේ අභිරහසට පිළිතුර “කෘතඥතාව” නම් වූ එකම එක වචනය තුළ ගැබ්වී තිබෙන බව...?
ඉහත කියමනට දැන් අපට මෙන්න මෙහෙම ආදේශ කරන්න පුළුවන්. “කෘතඥතාව ඇති කෙනාට තව තවත් ලැබෙන අතර ඉන් ඔහු වඩාත් සමෘද්ධිමත් වේ. කෘතඥතාවය නැති කෙනාට කිසිවක් නොලැබෙන අතර, ඔහුට තිබෙන දෙයත් විනාශ වේ.”
කෘතඥතාව පළ කරන්න ඔබ කාලය මිඩංගු කරන්නෙ නැති නම්, ඔබට කිසිදාක තව තවත් ලැබෙන එකක් නැහැ. ඒ විතරක් නෙමේ. ඔබට තියෙන දෙයත් අහිමි වේවි. ඔබ කෘතවේදී නම් ඔබට තව තවත් ලැබේවි. ඔබ සමෘද්ධිමත් වේවි.
ඔබ අදහන ආගම කුමක් වුවත් ඔබ බැතිමත් වුණත්, නැතත් අනෙකාට කෘතවේදී වීමේ වචන තුළ සැඟවී තිබෙන‍්නෙ විද්‍යාවේත් විශ්වයේත් මූලික නීතියයි. එය විශ්වීය පොදු සමස්ත නීතියයි. ඒ නීතිය තුළින් ක්‍රියාත්මක වන කෘතඥතාවය පිදීමේ අරුත ඔබගේ සමස්ත ජීවිතය පුරාම සිය අණසක පතුරවමින් ඔබට ජයග්‍රහණ සහ යහපත ගෙනෙන බව ස්ථිරයි.
දැන් ඔබ මෙන්න මේ විදියට හිතන අවස්ථාවනුත් තියෙනව නෙ. නැත්තෙ නැහැ. එහෙම නේද?
“මම මගේ රස්සාවට කැමති නෑ...” “මට ලැබෙන පඩිය මදි...” “මට සල්ලි නෑ...” “මට හරියට ම ගැළපෙන කෙනා සොයාගන්න බැරිවුණා...” “මට මගේ බිල් ටික ගෙවාගන්න බෑ...” “මට හිතෙන්නෙ මට මොකක් හරි අසනීපයක් වගේ...” “එයා කොයි වෙලාවකවත් මගේ හොඳක් දකින්නෙ නෑ...” “මට මගේ දරුවා හරි ප්‍රශ්නයක්...” “මගේ ජීවිතේ පඹ ගාලක්, ප්‍රශ්න පත්තරයක්...” “දැන් නං මගේ කසාදෙත් අනතුරේ...”
ඔය වගේ දේවල් ඔබ නිතර ම හිතුවොත් ඔබ දිගින් දිගටම ඔබ වෙතට ආකර්ෂණය කර ගන්නෙ ඒ වගේ අසුබවාදී දේවල්මයි.
එහෙම නැතුව තත්ත්වය කොච්චර නරක් වුණත් ඔබ කෘතවේදීව ලද දෙයින් සතුටු වෙලා මෙහෙම හිතුවොත් (මම මගේ රස්සාවට කැමැතියි. මගේ පවුලෙ අය මට පුළුවන් විදිහට උදව් කරනවා. මේක තමයි මගේ හොඳම වැකේෂන් එක.. අද හරිම ප්‍රබෝධවත් දවසක්.” “මේ සති අන්තය හරිම ප්‍රීතිමත්...” “මගේ දරුවන් එක්ක මං හරිම සතුටෙන් හිටියා...”
අර අපි මුලින් කීව “ආකර්ෂණයේ න්‍යායයෙන්” කියන්නෙ, ඔබට ඔබගේ ජීවිතයට තව තවත් වැඩිපුරම එවැනි සුබවාදී දේවල්ම ලැබෙන බවයි. ඔබගේ කෘතවේදී බව හරියට ම කාන්දමක් වගේ.
කෘතවේදිත්වය, 'ස්තුති' කිරීම වැඩිවෙන්න වැඩිවෙන්න ඔබට ලැබෙන වරප්‍රසාදත් කාන්දමකින් වගේ ආකර්ෂණය වෙලා ඔබ වටා එක් රැස් වෙනවා. ඒක තමයි විශ්ව නීතිය.
ඔබ උදෑසන නැගිටින විට, උදා හිරු එළියට, ඔබේ ජීවිතයට සහ ඔබට ලබා දී ඇති ශක්තියට, ස්තුති කරන්න. ඔබට සපයා ඇති ආහාර වලටත්, ජීවත් වීමට ලැබීමේ සතුටටත් ස්තුති කරන්න. ස්තුති කරන්නට තරම් කාරණාවක් ඔබට නොදැනේ නම්, එය ඔබ තුළ ඇති ගිනිය නොහැකි අඩුපාඩුවක්. ඔබ කෘතවේදී නොවනවා කියන්නෙ, ආපස්සට ඔබට ලැබෙන දේකුත් නැහැයි කියන එක. ලද දේවල්වලට ඔබ කෘතවේදි නො‍වීම නිසා, ඔබට ඔබගේ ජීවිතයට යහපත් ආදර සබඳතා,උතුරා යන සතුට සහ මුදල් ලැබීමේ නොහොත් ගලාඒමේ ප්‍රවණතා, මුදල් ආකර්ෂණය වීමේ පාරවල් වසාගෙන තිබෙනවා.
ඒ විතරක් නෙමෙයි. ඔබගේ රැකියාව දියුණුව ව්‍යාපාරය යන හැමදේටමත් අර කෘත‍ෙව්දී බව අමතක කර අත පසු කරදැමීම නිසා, එක තැන පල්වීමට ඔබට ඉඩකඩ සලසා දෙනවා.
කෘතඥතාවය තුළින් ඔබ මුලින් ම කළ යුතු වන්නේ “ඔබට ස්තුති” (Thank you) කියන මැජික් වචන දෙක භාවිතා කිරීමට පටන් ගැනීමයි. කෘතවේදී බව තුළ ජීවත් වීමටත්, එහි ඇති මැජික් බලය ඔබගේ ජීවිතය තුළ අත්විඳින්නටත්, අනිත් සියලු වචන අබිබවා, ඔබ විසින් හිතාමතාම සන්නිවේදනය කළ යුතු, විඳිය යුතු, අවධාරණය කළ යුතු වචනය වන්නේ “ස්තුතියි” යන්නයි. “ස්තුතියි” කියන වචනය ඔබගේ හැඳුනුම්පත නොහොත් අනන්‍යතාවය කරගත යුතු වෙනවා.
ඒ මැජික් වචනය, ඔබ දැන් සිටිනා ඔබගේ ජීවිතයත්, ඔබගේ අනාගත සිහින වල තිබෙන ජීවිතයත් යා කරන පාලමක් වෙනවා.
“ස්තුතියි” කියන ඉන්ද්‍රජාලික බලයකින් යුතු වචනය වැඩි වැඩියෙන් පාවිච්චි කරන තරමට, ඔබට ම දැනේවි ඔබ වඩ වඩාත් කෘතවේදී වෙන බව. ඒ කෘතවේදී බව ගැන ඔබ වඩාත් සිතන විට, හැඟෙන විට සමෘද්ධිය වඩ වඩාත් ඔබ ..කරා ළංවන බව අත්විඳින්න. මෙම කෘතවේදී බව ප්‍රගුණ කිරීම ඔබගේ දින චර්යාවට එක් කර ගැනීම කොතරම් සරල පහසු ක්‍රමයක් ද කියලා ඔබ සොයාගත්තාට පස්සෙ සහ එහි ගුප්තව තිබෙන පුදුම සහගත සාර්ථක ප්‍රතිඵල ඔබ අත්විඳින්න පටන් ගත්තාට පස්සෙ, ඔබ දැනට මේ පුරුදු වෙලා ඉන්න මලානික වියලි ජීවිතයට අනිවාර්යයෙන් ම සුබදායක පොද වැස්සක් වැටේවි.
ඔබ දිනපතාම මෙම කෘතවේදය පුරුදු පුහුණු කළොත්, ඔබගේ ජීවිතය අනපේක්ෂිත ලෙස, පුදුමාකාර ලෙස, විශ්වාස කළ නොහැකි ලෙස ඒ තරමටම හුඟාක් වෙනස් වේවි. ඒ නිසා අත් විඳින්න.
ඔබ කෘතවේදය ටිකක් පුහුණු කළොත් ඔබේ ජීවිතය ටිකක් වෙනස් වේවි. ඔබ දිනපතාම එය හුඟක් පුහුණු කළොත්, ඔබගේ ජීවිතය අනපේක්ෂිත ලෙස, පුදුමාකාර ලෙස, විශ්වාස කළ නොහැකි ලෙස ඒ තරමටම හුඟක් වෙනස් වේවි.
ඇමෙරිකාවේ 35 වැනි ජනාධිපති ජෝන් එෆ්. කෙනඩි (1917 - 1963) මෙන්න මෙහෙම ප්‍රකාශයක් කරලා තිබෙනවා. මේ කෘතඥතාව තුළ එවැනි අග්‍රගණ්‍ය පුද්ගලයින්ගේ ඉහළම දියුණුව ලියවී තිබුණු බව ඔබ දන්නවාද?
“අපි අප‍ගේ කෘතඥතා ප්‍රකාශ කරන විට අමතක නොකළ යුතුම දෙයක් ඇත. එනම් ඉතාමත් ම උසස් අගය කිරීම වන්නේ නිකම්ම නිකන් වචන උච්චාරණය කිරීම නොව, ඒ වචන කෙරෙහි පූර්ණ විශ්වාසය තැබීමයි.”
අවසාන අදියර සඳහා ආරම්භය
1. උදෑසන නැගිට්ට වහාම ඔබ කෘතඥතාව දැක්විය යුතු ඔබගේ ජීවිතයේ සිදු වූ සුබදායි දේවල් දහයක් (10) ලැයිස්තුගත කරන්න.
2. ඒ හැම එකටම ඉදිරියෙන්, ඔබ ඒ වෙනුවෙන් ස්තුතිවන්ත වෙන්නෙ ඇයි කියලත් ලියන්න.
3. ලැයිස්තුවේ මුලට ගිහින් සිතින් හෝ ශබ්ද නගා ඒ ලැයිස්තුව කියවන්න. හැම කරුණක්ම අවසානයේදී අප සතුව ඇති මැජික් වචනය ‘ස්තුතියි’ කියා තුන් වරක් හදවතේ ගැඹුරුම තැනින්, හෘදයංගමව ස්තුති කරන්න.
ඔබට ලැබෙන ප්‍රතිඵල අත්විඳින්න. හැකි නම් ඒවා අපේ ‘රසඳුන’ ටත් කියා එවන්න. ඔබට ස්තුතියි.
Rhonda Byrne විසින් රචිත The Magic කෘතිය ඇසුරෙන් ෆෙංෂුයි කලෙක්ෂන් විසින් සම්පාදිත "මායාබලය ඉන්ද්‍රජාලය" කෘතිය ඇසුරෙනි.
