ශ්රී ලංකාවේ කෘෂි අපනයන ආදායමෙන් ලැබෙන මුදල මෙන්ම සංචාරක කර්මාන්තයෙන් ලැබෙන අදායමටත් වඩා තුන්ගුණයක් විදෙස්ගත ශ්රමිකයින්ගෙන් අපේ රටට විදේශ විනිමය ලෙස ලැබේ. ඒ අයුරින් ගත් කල විදේශගත ශී්ර ලාංකිකයින්ගෙන් අපේ රටට ලැබෙන ආදායම විශාල ප්රමාණයකි. 2013 වර්ෂය ගතහොත් විදෙස්ගත ශී්ර ලාංකිකයන්ගෙන් ලැබුණු විදේශ විනිමය ඇමරිකන් ඩොලර් මිලියන 6407කි. නමුත් 2013 වසරේ සංචාරක කර්මාන්තයෙන් ලැබුණු ආදායම ඩො.මි. 1715කි. මේ ආකාරයෙන් ශ්රී ලංකාවේ ආර්ථිකයට විශාල සේවාවක් සිදුකරනු ලබන විදෙස්ගත ශ්රමිකයින් සම්බන්ධයෙන් අප රට දක්වන සැලකිල්ල ප්රමාණවත් ද යන්න සොයා බැලිය යුතු කරුණකි.
කෙසේ නමුත් අද වනවිට විදෙස්ගත ශ්රී ලාංකික ශ්රමිකයින් හට බොහෝ සෙයින් සිදුවන අනතුරු මෙන්ම නොසැලකීම් හේතුවෙන් ඔවුන් මෙන්ම ඔවුන්ගේ පවුල්වල සාමාජිකයින් ද දැඩි අසීරු තත්වයකට පත්වීමට සිදුව ඇතත් ඒ සම්බන්ධයෙන් බලධාරීන්ගේ අවධානය ද නියමිත පරිදි නොලැබීම තුළ ඔවුන්ට අත්වන ඉරණම ශෝචනීය කරුණක් වී තිබේ .
අම්බලන්තොට ඔලුවිල් ප්රදේශයේ පදිංචිව සිටින තිදරු පියෙකු වන ඩබ්ලිව්.කේ.පි ලසන්ත මහතා ද පත්ව ඇත්තේ එවන් ශෝචනීය ඉරණමකටය. ඔහුගේ බිරිඳ වූ ඩබ්ලිව්.ආර්.නිරෝෂා දීප්ති 2018 නොවැම්බර් මස 08 වන දින මිය යන්නේ වසර ගණනාවක් සෞදි ආරාබියේ ගෘහ සේවිකාවක ලෙස සේවය කරමින් සිටින අතරතුර වැරදි එන්නතක් ශරීර ගතවීමෙන් පසු ලංකාවටද පැමිණ දුක් විඳීමෙන් අනතුරුව ය.
'මගේ නෝනා සෞදි ආරාබියේ ගෘහ සේවයට ගිහින් වසර ගණනාවක් හිටියා. ඒ අතරතුර විටින් විට ඉන්න තැන හොඳ නැ කියලා හිටපු ගෙදරින් පැනලා වෙනත් තැනක සේවයට ගිහින් තියෙනවා . ඒ අතරතුර මෙයා අසනීපයක් වෙලා රෝහල් ගත කළාම එහිදී දුන් එන්නතක් වැරදිලා එයාට හරියට ප්රතිකාර නොකර 2016 ලංකාවට එව්වා. එදා සිටම මිය යනතෙක් ඉඩකඩම් පවා උකස් තියලා එයාව බේරගන්න හැදුවත් වැඩක් උනේ නෑ. අද දරුවන්ගේ වැඩ ටික කරගන්නත් විදියක් නැති තරමටම අපි අසරණ වෙලා'
ලසන්ත යනු මේ ඉරණමට ලක්වූ එක් පියෙකු පමණි. මේ ආකාරයෙන් විදේශ රැකියාවන්හි නියුක්ත වු මවුවරුන්, පියවරුන් දහස් ගණනකට මෙම ඉරණම අත් වි තිබෙන බව තොරතුරු දැනගැනීමේ පනත හරහා විදේශ සේවා නියුක්ති කාර්යංශය මගින් ලබා ගත් නිල තොරතුරුවලින් අනාවරණය වේ. ඒ අනුව 2015 වර්ෂයේ 313 , 2016 වර්ෂයේ 295, 2017 වර්ෂයේ 291 ,2018 වර්ෂයේ 239 ,2019 වර්ෂයේ 242ක් වූ විදෙස්ගත ශ්රමික ප්රමානයක් මියගොස් ඇති අතර ඒ අනුව පසුගිය වසර පහ තුළ පමණක් විදෙස්ගත ශ්රමිකයින් 1380 දෙනෙකු මියගොස් තිබේ.
බොහොමයක් විදෙස් ශ්රමිකයින් මියගොස් ඇත්තේ මැද පෙරදීය රටවලදීය. එහිදී 2015 වර්ෂයේ සිට 2019 වර්ෂය දක්වා වූ වසර 05 තුළ සෞදී අරාබියේදී 505ක්, කුවේට් හිදී 261 ක් , කටාර් වලදී 189ක් එක්සත් එමීර් රාජ්යයේදී 154 දෙනෙකු මියගොස් තිබෙන බව අනාවරණය වේ .
විදේශ සේවා නියුක්ති කාර්යාංශයේ 2017 වර්ෂයේ රැකියා සඳහා විදෙස්ගත වුවන් පිළිබඳව දැක්වෙන වාර්තාවන්ට අනුව පිරිමි කම්කරුවන්ගෙන් සියයට 65 කට වැඩි ප්රමාණයක් විදේශ රැකියා සඳහා ලියාපදිංචි වී ඇති බව වාර්තා වේ. කාන්තා සේවිකාවන්ගේ මුළු පිටවීම සියයට 34 ක් වූ අතර, ඉන් 26% ක් ගෘහ සේවිකාවන් ලෙස වාර්තා වි තිබේ.
‘එතෙර අපි‘ සංවිධානයේ කටාර්හි මධ්යම කමිටු සාමාජික සුනිල් ජයතිලක මහතා මේ සම්බන්ධයෙන් දැක්වූයේ මෙවන් අදහසකි.
' ඇත්තටම විදෙස් රටවලදී ගොඩක් කරදරයට පත්වන්නේ හොර විදේශ රැකියා ආයතන මගින් යන අය. ඒ ගැන රජය මිට වඩා සොයා බැලිය යුතුයි. යම් අනතුරක්, කරදරයක් උනාම මොනවා හරි දෙයක් කරනවට වඩා එහෙම දෙයක් නොවෙන ආකාරයකට රාජතාන්ත්රිකව යමක් කළ යුතුයි. තානාපති කාර්යාල මඟින් ඉටුවිය යුතු සේවාවන් නිසි අයුරින් ඉටු නොවීමද විදෙස් ගත ශ්රමිකයින් මෙවැනි කරදරයන්ට පත්වීම වැඩි වෙනවා '
මේ ආකාරයෙන් 2015 සිට 2019 දක්වා කාලය තුළදී විදේශ රටවල් තුළදී මියගිය විදෙස් ශ්රමිකයින් 1380 අතරින් මෘත දේහ ගෙන්වා ගැනීමට විදේශ සේවා නියුත්ති කාර්යාංශය මුදල් යොදවා තිබෙන්නේ 96 දෙනකුට පමණි. අනෙකුත් 1284 දෙනාගේ මෘත දේහ ගෙන්වා ගැනීමට අදාළ මියගිය අයගේ පවුලේ අයගේ වියදමින් හෝ ඔවුහු සේවය කළ ආයතනයේ වියදමින් සිදුකර තිබේ .එමෙන්ම මිට අමතරව 1178 දෙනෙකු හට රුපියල් 30000 බැගින් අවමංගල්යාධාර මුදලක් ලබාදී ඇතත් මෙම කාල සීමාව තුළ මියගිය විදෙස් ශ්රමිකයින් 121 දෙනෙකු හට ඒ ආකාරයෙන් වූ කිසිදු මුදලක් ගෙවා නොමැති බව තහවුරු වෙයි.
එමෙන්ම මේ වනවිට විදෙස් ගතවන ශ්රමිකයන් වෙනුවෙන් විදේශ සේවා නියුක්ති කාර්යාංශය මඟින් රක්ෂණ ක්රමයක් හදුන්වා දී ඇති අතර ඉන් මියගිය අයකු වෙනුවෙන් ලැබෙන්නේ රුපියල් ලක්ෂ හතරක් පහක් පමණ මුදලක් බවත් එය මියගිය අයගේ පවුල් සඳහා ජීවත්වීමට කිසිසේත් සරිලන මුදලක් නොවන බවත් කුවෙට්හි දී ස්වාමියා මියගිය දිල්කි මහත්මිය කියා සිටියි .
විදෙස් ගතව විවිධ අනතුරුවලට ලක්වී නැවත ගෙන්වා ගත් විදෙස් ශ්රමිකයින් සංඛ්යාව 2016 වර්ෂයේදී 08කි. 2017 වර්ෂයේ 10 ක් , 2018 වර්ෂයේදී 03ක් 2019 වර්ෂයේදී 05 ක් වේ. එමෙන්ම ඔවුන් ගෙන්වා ගැනීම සඳහා විදෙස් සේවා නියුක්ති කාර්යාංශය රුපියල් අනු හතර ලක්ෂක් පමණ මුදලක් වැයකොට තිබේ (රු 9437148). නමුත් මේ ආකාරයෙන් ගෙන්වා ගත් කිසිම අයෙකු හට වන්දි ගෙවීමක් සිදුකර නොමැත.
අහිංසක මිනිසුන් ගේ ජිවිත බිල්ලට තබමින් ඔවුන් විදෙස් ගත කරන මුවාවෙන් මුදල් මෙන්ම ශ්රමය මංකොල්ල කමින් මිනිස් ජාවාරම් වල නිරතවූ නීති විරෝධී විදේශ රැකියා ලබාදෙන ආයතන සම්බන්ධයෙන් 2015 වර්ෂයේ සිට 2019 දක්වා සිදුකරන ලද වැටලීම් මඟින් එවැනි ආයතන 1046ක් හසු කොටගෙන ඇති අතර, ඒ අතුරින් විදේශ රැකියා ලබාදෙන ආයතන 885 ක් සඳහා නීතිමය ක්රියාමාර්ග ගෙන තිබේ. නමුත් 2020 ජනවාරි 07 දින වන විට ලංකාවේ විදේශ රැකියා නියෝජිත ආයතනයක් වශයෙන් වලංගු බලපත්ර ලබාගෙන තිබෙන ආයතන ඇත්තේ 735 ක් බව විදේශ සේවා නියුක්ති කාර්යාංශය මඟින් ලබාගත් තොරතුරු වලින් අනාවරණ වේ.