යාපනයේ පන්නෙයි මුහුදු වෙරළ තීරය දැන් ගාලු මුවදොරට නොදෙවෙනිය. කාලාන්තරයෙක් ජන ශුන්ය වූ එහි පෙම්බස් දොඩන්නෝ මෙන්ම මුහුදු සුළං විඳින්නට එන්නෝද අපමණය. පසුගිය බදාදා තම ස්වාමිපුරුෂයාගේ ඇරියුමින් වෛද්ය උපාධිය ලැබීමට ආසන්නව සිටි රෝෂණී කාංචනාද එහි යන්නේ යම් හෝ ආදර සුවයක් ලැබීමට විය හැකිය.
කාංචනා සිය සැමියා වූ එරංග දිලීප් කුමාර සමග පන්නෙයි වෙරළ දිගේ ඇවිද යමින් ඒ අසල වූ කොන්ක්රීට් බංකුවක වාඩි ගත්තේ දැඩි අව් රශ්මිය මැදමය.
කාංචනාගේ මුළු ජීවිතයටම සෙවණ ලබා දෙනු ඇතයි යන විශ්වාසය මත මීට වසර තුනහමාරකට පමණ ඉහතදී විවාහ දිවිය සදහා තෝරාගත් සිය ස්වාමියාට මේ අව් රශ්මිය දරා ගත නොහැකි නිසා ඔහුට සෙවණ හා සිසිල සැපයූවේ කාංචනාගේ ලස්සනට මල් වැටුණු පුංචි කුඩයයි. විවාහ වී සිටියද ඒ වන විට දෙදෙනා වෙන් වීමට අධිකරණයේ නඩුවක් පවරා තිබුණි. එසේ වුවත් කාංචනා තම සැමියා හමුවට මීට පෙරද මේ ලෙසින්ම පැමිණ ඇත.
වෙරළ තීරයේ සිටි අයද මේ දෙදෙනා දෙස උවමනාවකින් නොබැලුවේ පන්නෙයි මුහුදු වෙරළ තීරයේ පෙම්වතුන් නිතර පැමිණෙන නිසා ය.
හදිසියේම ඇසුණු කාංචනාගේ විලාප හඩ නිසා පන්නෙයි මුහුදු වෙරළේ වෙනදා රළ බිදීමෙන් නැගෙන රිද්මය ද එදා මොහොතකින් වෙනස් විය.
මහා අනතුරක සෙයියාවක් දුටු අවට වැසියෝ කාංචනාත් ඇගේ ස්වාමියාත් සිටි ඉසව්වට නෙත් යොමු කරන විට එක් අයෙකු දුටුවේ කාංචනා මුහුදට තල්ලු කරන දසුනයි.
මේ සිද්ධිය දුටු පුද්ගලයා මහා හයියෙන් විලාප තබමින් උත්සහ කළේ දියේ ගිලෙමින් සිටි කාංචනාව බේරා ගැනීමටත් වඩා ඇය මුහුදට තල්ලු කර දිව යන සැකකරු අල්ලා ගැනීමටය. සැකකරු පසු පස ලුහුබැද යමින් සිටි ඔහුට වටේ පිරිසගෙන් ලද සහය නිසා ඉතා ඉක්මනින් සැකකරු අල්ලා ගැනීමට හැකි විය.
දිව යන්නට ගිය සැකකරු අල්ලාගත් සැණින් ඔහුට පරුෂ වචනයෙන් බැණ වැදුණු තරුණයෝ ඔහුට පහර පිට පහර දෙන්නට විය. තවත් පිරිසක් මුහුදේ පාවෙමින් සිටි කාංචනා දෙසට හැරුණාහ.
පන්නෙයි මුහුදු තීරයේ ඉතාම පිරිසුදු නිල්වන් ජලය කෙමෙන් කෙමෙන් රත්පැහැ ගැන්වී විනාඩි කීපයකින් නිල්වන් ජලය රත්පැහැ වූයේ කාංචනාගේ සිරුරෙන් ගලාගිය රුධිර ධාරාව නිසාමය.
කාංචනා පිළිබදව විපරම් කළ පිරිස තවදුරටත් කාංචනා ජීවතුන් අතර නොමැති බවට නිගමනය කොට ඒ පුවත සැකකරුව අල්ලා ගෙන සිටි පිරිසට දැනුම් දුන්නා පමණි. යළිත් වරක් සැකකරුට පන්නෙයි වෙරළ තීරයේ සිටි පිරිසගෙන් ගුටිබැට පූජාවක් ලැබුණි. වැඩිදෙනෙක් ඔහුට පහර දෙන ලද්දේ යතුරු පැදිවල පැමිණි පිරිස හිසට දමාගෙන සිටි හෙල්මට්වලිනි.
සැකකරු අල්ලා ගත් ස්ථානයට පොලීසිය කඩිනමින් නොපැමිණෙන්නට ඇයගේ සැමියාද කාංචනා ගිය ලෝකයටම යවන්නට තරුණයන් කටයුතු කරණු ඇත.
කාංචනාගේ දේහය යාපනය ශීක්ෂණ රෝහල වෙත රැගෙන යද්දී කාංචනාගේ ස්වාමියා යාපනය පොලීසිය වෙත රැගෙන යනු ලැබීය.
යාපනයේ තරුණයෝ වැල නොකැඩී යාපනය ශීක්ෂණ රෝහලට ඇදී ආහ. ඒ කාංචනා හොදින් දන්නා හඳුනන නිසා නොවේ. මේ සිද්ධිය ඔවුන් කිසිසේත්ම අනුමත නොකරන නිසාත් කාංචනා වෙනුවෙන් උපන් දැඩි සංවේදීභාවයත් නිසාමය.
නොදන්නා කාංචනා වෙනුවෙන් යාපනයේ තරුණයෝ දුක් වූවා පමණක් නොව කාංචනාගේ නිසල දේහය ගමන් කරමින් තිබූ සෑම ස්ථානයකටම ඒ තරුණයෝද ගමන් කළහ. ඇතැම් තරුණයෝ කදුළු සැලූහ. ඒ මේ සිදුව ඇති පොළොව නුහුලන අපරාධය හා මහා විනාශය දැකීමෙන් සලිත වූ හදවත් නිසාමය.
විපතක් වූ විට බොහෝ මිනිසුන් කරන්නේ ඒ ස්ථානයෙන් ඉවත්ව යෑමයි. නමුත් යාපනයේ තරුණයෝ සැකකරුව අල්ලා පොලීසියට බාරදීමෙන් නතර නොවී ඒ සිද්ධියට අදාළව සාක්කි දීම සඳහා පොලීසියටද පැමිණ සිටියහ.
මේ ක්රියාව තමන්ට අදාළ නොවන කාරණයක් යැයි යාපනයේ තරුණයෝ කිසි විටකත් නොසිතූහ. සියලු මූලික පරීක්ෂණ අවසන් වන තුරු ඒ තරුණයන්ගෙන් පොලීසියට නොමද සහයෝගයක් ලැබිණි.
ඔවුහු තමන් දුටු දේ පොලිසියට කීහ.
කොහොම හරි අපිට ගෑනු කෙනෙක් කෑගහනවා ඇහුණේ. මම හිතුව මොකක් හරි අනතුරක් වෙන්න ඇති කියල. මොකද හැම තැනම කළුගල් තියන නිසා. ඒත් එක්කම කළුපාට ඇඳුමක් ඇදගෙන හිටිය කෙනා කාන්තාවත් එක්ක පොර බැදුවා. එක පාරටම කාන්තාව මුහුදට තල්ලු කරලා මෙයා දුවන්න ගත්තා.
සිද්ධිය වුණු තැන ගොඩාක් දුර නැතත් අපිට එක පාරටම එයාව අල්ල ගන්න දුවන්න බැරිවුණා. මේ නිසා අපි ඊට ඉස්සරහින් හිටිය අයට කෑගහලා කිව්වා මෙයාව අල්ල ගන්න කියලා. එහෙම පිරිසක් එකතු වෙලා තමයි මෙයාව අල්ල ගත්තේ.”
යාපනය පොලීසියේ අපරාධ විමර්ශන අංශයේ නිලධාරීන් සිද්ධිය වූ ස්ථානයට පැමිණෙන විට කාංචනා මියගොස් විනාඩි ගණනාවක් ගත වී ගොසිනි. ඇගේ සන්තකයෙන් ගිලිහුණු ජංගම දුරකතනය කළුගල් ගොඩේ එක්තැනක තිබුණි. ඊට මදක් දුරින් කාංචනාගේ මුදල් පසුම්බිය තිබුණි. එක් සෙරෙප්පුවක් දිස්වූයේ මුහුදේ ජලයත් කළුගල් පෙළත් වෙන් කරණ සීමාවේය.
දුක්මුසුම දසුනක් වූයේ කාංචනා ආදරයෙන් සිය සැමියාට සෙවණ හා සිසිල දුන් කුඩය කළුගල් පෙළ මත ඉහළු නියායෙන්ම තිබීමය.
කවර හෝ හේතුවක් මත නීතියෙන් වෙන් වන්නට කටයුතු කොට තිබුණත් කාංචනා සිය සැමියා වන දිලිප් කුමාරට නපුරුකම් නොකළාය. පුංචි සන්ධියේ සිටම දලුලා වැඩුණු ආදරය තවමත් ඔහු ළග ඇතැයි ඇයට දැනෙන්නට මෙන්ම විශ්වාසයක්ද ගොඩ නැගී තිබුණාට කිසිදු සැකයක් නොමැත. එය එසේ නොවූවානම් කුමන කරුණක් විසදා ගැනීමට වූවද නීතියෙන් වෙන්වීමට කටයුතු සැලසී ඇති සිය සැමියා කියන තැනකට පැමිණීමට තරම් කාංචනා අදබාල හෝ මෝඩ කාන්තාවක් නොවිය යුතුය.
එමෙන්ම ඇය තුළ වෛරයක් තිබුණේ නම් ඇය කිසිවිටකත් තමන් හැර යන්නට සූදානම් වන සැමියාට සෙවණ දීමට කුඩය ඇල්ලීමක් නොකරණු ඇත. කාංචනාගේ උගත්කම අභිභවමින් අන්ධ වූ ආලය ඉස්මතු වීමක් සිදුවන්නට ඇතැයි සමහරෙකුට සිතෙන්නට පුළුවන. නමුත් කාංචනා මෙතෙන්ට තනි පංගලමේ පැමිණෙන්නට ඇත්තේ විසඳා ගත යුතුව තිබූ යමක් විසඳා ගැනීමේ මූලික බලාපොරොත්තුව ඇතිව විය හැකිය.
නමුත් කාංචනාගේ ස්වාමියා එතැනට පැමිණ ඇත්තේ කුමක් හෝ සිදුවුවහොත් කාංචනාගේ ඉරණම සදහටම විසදනවා යැයි යන බලාපොරොත්තුව ඇතිව බව පැහැදිලිය. ඊට හොදම සාක්කිය වන්නේ ඔහුගේ බෑගයේ දමා ගෙන ආ තියුණු මුවහතක් ඇති පිහියයි. මේ නිසා කාංචනා මේ ලෝකයෙන් තුරන් කිරීමට විශාල වුවමනාවක් කාංචනාගේ ස්වාමියාට තිබෙන්නට ඇති බවද ඉතාම පැහැදිලිය.
කාංචනාගේ ස්වාමියා වෘත්තියෙන් යුද හමුදාවේ සේවය කළත් ඔහු අනුයුක්තව කටයුතු කොට ඇත්තේ වෛද්ය බළකායේය. ඔහුගේ රාජකාරියේ කොටසක් වන්නේ අනුන් සුවපත් කිරීම වුවත් නපුරු වූ කුරුරු සිතක් තිබූ ඔහුට පුංචි සන්ධියේ සිට තමන් ආලය කල කාංචනාගේ ජීවිතය බේරන්නට කිසිම වුවමනාවක් නොතිබීම දිලිප් කුමාරගේ රැකියාවටද නිගාවකි.
එමෙන්ම මේ ලෝකයේ සිටින සුවාසූ දහසක් රෝගීන් සුවපත් කිරීමට මම මේ ගමන යන්නෙමියි තරයේම සිතාගෙන කාංචනා දෙමව්පියන්ගේ දෙපා නැමද යාපනයට පැමිණියේ මහත් බලාපොරොත්තු රාශියක්ම පොදි බැදගෙනය. කාංචනාගේ අධම ස්වාමි පුරුෂයා විසින් කාන්චනාගේ ඒ බලාපොරොත්තු සමුදායද කාංචනාගේ පවුලේ උදවියගේ ප්රාර්ථනාද පමණක් නොව මේ රටේ ජනතාවගේ බලාපොරොත්තුද විනාශ කොට දමා තිබේ.
යාපනය ශීක්ෂණ රෝහලේදී අධිකරණ වෛද්ය නිලධාරී එන්.ප්රේම්ශංකර් මහතා විසින් සිදුකල පශ්චාත් මරණ පරීක්ෂණයෙන් නිගමනය වී තිබුණේ ඉතා සියුම් ආයුධයකින් සිරුරේ ස්ථාන නවයකට දැඩි ලෙස කැපුම් තුවාල සිදු වී එම තුවාල වලින් වහනය වූ අධික රුධිරය හේතුවෙන් හා දැඩි කම්පනය නිසා කාංචනාගේ මරණය සිදු වූ බවටය.
මේ අනුව පන්නෙයි මුහුදු තීරයේ සිටි තරුණයෝ ගන්නා ලද ක්ෂණික තීරණය ඉතාම නිවැරදි බවද මෙහිදී පසක් වෙයි. ඔවුන් මුහුදේ පාවුණු කාංචනාගේ මළසිරුර ගොඩ ගැනීමට උත්සහ කළේ නම් අනිවාර්යෙන්ම සැකකරු ඒ ස්ථානයෙන් සාක්කි නොමැතිවම පලා යනු නියතය.
තරුණයින්ගේ උත්සාහය නිසා සැකකරු කරේ එල්ලා ගෙන ආ බෑගයද කාංචනාට ඇනීමට භාවිත කළ පිහියද සොයා ගැනීමට පොලීසියට හැකි විය.
කාංචනා හා සැමියා යන දෙදෙනාම බේරුවල පදිංචිකරුවන් වන අතර මීට වසර තුනකට පමණ ඉහතදී මේ දෙදෙනා විවාහ වී ඇත. විවාහ වී ඔවුන් එකම නිවසක වාසය කර ඇත.
පසුව ඇය යාපනය විශ්ව විද්යාලයේ වෛද්ය පීඨයේ ශිෂ්යාවක් ලෙස පැමිණ තිබේ.
පොලීසියට ලැබී ඇති තොරතුරු වලට අනුව දෙදෙනා අතර නිතරම ආරවුල් ඇති වී තිබෙන අතර සැකකරු එක් වරක කියා තිබෙන්නේ මේ විවාහයට බිරිදගේ මව අකැමතිවීම නිසා එවැනි තත්ත්වයක් ඇති වූ බවයි.
මේ ආරවුල් නිසා ඔවුන් නීතියෙන් වෙන් වී දික්කසාද වීම සදහා නඩුවක් පවරා තිබෙන බවටද තොරතුරු ලැබී ඇත. අධිකරණයේ නඩුවක් පැවරීමෙන් පසුව වුවද මේ දෙදෙනා වරින් වර හමුව ඇත.
විවාහයට කාංචනාගේ මවගේ ඇති අකැමැත්ත නිසා දෙදෙනා වෙන් වීම සඳහා නඩු පවරා තිබෙන බවද වාර්තා වේ. එහෙත් සැකකරු තවත් වරක කියා ඇත්තේ තම බිරිද වෙනත් අයෙකු සමග සම්බන්ධයක් ඇති කරගෙන සිටින නිසා තමන්ව දැන් නුරුස්සන බවයි.
මේ සිද්ධිය වූ දිනයේදිත් බහින්බස් වීමක් ඇති වූයේ ඒ කතාව පදනම් කරගෙන බවත් ඔහු පවසා තිබේ. ඒ අනුව දුර දිග ගිය ආරවුලෙන් පසුව ඇයට පිහියෙන් ඇන තිබේ. 29 හැවිරිදි වියේ පසුවූ කාංචනාට අවසන් ගමන් යන්නට වූයේ උපාධිය ලබා ගන්නට ආසන්නව සිටියදීමය. හැඟීම් පාලනය කර ගන්නට නොහැකි වීම මෙන්ම ඉවසීම නැතිකම නිසා සිදුවූ තවත් එක් අවාසනාවන්ත මරණයක් ලෙස පමණක් මෙය හඳුන්වා දීමට පුළුවන.