පසුගිය දිනවල පැවති එළවළු මිලගණන් පිළිබඳව බොහෝ දෙනෙකු‍ම කතා කළේ මැසිවිලි ස්වරූපයෙනි. වෙනත් රටවල් හා සසඳන විට අපේ රටේ එළවළු පලතුරු ඇතුළු ආහාර පාන අවශ්‍ය පමණටත් වඩා ඇති බව පැවසුවොත් බොහෝ දෙනෙක් එය පිළිනොගනී.
මේ දේවල් නිසි කළමනාකරණයක් යටතේ බෙදාහැරීමක් හා පරිභෝජනයක් සිදු නොකරන නිසා විශාල ප්‍රමාණයක් අපතේ යන බව නම් කිවහැක. බත් නාස්තිය අතින් නගරබදට වඩා ඉදිරියෙන් සිටින්නේ ගම්බද ප්‍රදේශයන්ය. ගම්බද ප්‍රදේශවල උදේට උයන බත් මුට්ටිය එසේම ඉතිරිව තියෙද්දී නැවතත් දවල්ට තව බත් මුට්ටියක් ද මේ දෙකම ඉතිරි වෙද්දි රාත්‍රියට ද බත් මුට්ටියක් ළිප තැබීම සාමාන්‍ය සිරිතය. දිනකට මෙසේ බත් නාස්ති වෙද්දි සතියකට, මාසයකට, අවුරුද්දකට වශයෙන් කොතරම් බත් ප්‍රමාණයක් නාස්ති වෙයිද?
ජපානය වගේ රට‍ක ජීවත් වන ජනතාව බත් ඇටයක්වත් නාස්ති නොකරන්නට කටයුතු කරති. හෝටලයකදී ඔවුන් බත් ඇණවුම් කරන්නේ එක් අයෙකුට සෑහෙන පරිද්දෙනි. අපේ රටේ අය තැනකට ගොස් ආහාර ඇණවුම් කරන හැටි ගැන කවර කතාද? ඒ වගේම ජපන් ජාතිකයන් කෑමට පෙර බත් පිඟානට වැඳ නමස්කර කරන්නේ එම බත්පත සඳහා දායක වූ සියලු දෙනාට ස්තූති කරමිනි.එළවළු පරිභෝජනය කරන්නට අපේ වැඩි පිරිසකට අවබෝධයක් නැත. කාලයකට එළවළු මිල ඉහළ යන්නේ හැම එළවළු වර්ගයක්ම නොවේ.
විශේෂයෙන්ම වස විසෙන් තොර දේශීය එළවළු වර්ග වල මිල එතරම් උස්පහත් වීමක් නොවේ. මෙහිදී අප කළ යුතු වන්නේ මිල වැඩි රට එළවළු වැඩිපුර නොගෙන මිල අඩු දේශීය එළවළු වර්ග මිලට ගැනීමයි. මේ සඳහා උදාහරණ ලෙස කොළ එළවළු, පලා වර්ග, කොස් පොළොස්, කෙසෙල්මුව, අඹරැල්ලා, අඹ, වට්ටක්කා, දඹල, අවර, කොස් ඇට වැනි තවත් එළවළු හා පලාවර්ග රාශියක් ඇත. අපේ රටේ පලා වර්ග ගණනින් 160 කට වැඩි ප්‍රමාණයක් ඇත. මේවා ශරීරයට මෙන්ම පසුම්බියට ද ගුණදායකය.
අප රටේ පලතුරු වලින් හරි අඩකටත් වඩා නාස්ති වීමක් සිදු වේ. පලතුරු විශාල ප්‍රමාණයක් රටපුරා මග දිගට ඇති පලතුරු කඩ වලින් අපතේ යනවා නොවේද? මීළඟට තවත් විශාල ප්‍රමාණයක් අප නොසිතන ආකාරයෙන් අපට අහිමි වේ.
ඉතින් මේ විදියේ නාස්තිවලින් පසු අපේ දරුවන්ට කෑමට පලතුරු ඉතිරි වන්නේ ඉතා සුළු ප්‍රමාණයකි. අනෙක පලතුරු කෑමෙන් ලැබෙන ශාරීරික ප්‍රතිලාභ පිළිබඳ අපේ රටේ බහුතරයක් දැනුවත් ද? නැත මේවා ගැන වැඩිහිටියන් මෙන්ම දරුපරපුරද දන්නේ නැත. බොහෝ දෙනෙකු සිතන්නේ පලතුරු හැදෙන්නේ උඩ ඉන්න දෙවියන්ගේ පරිභෝජනය සඳහා කියාය. ඒ නිසාම අපේ පලතුරු ගසක හැදෙන පළමු පලතුරු තොගය මෙන්ම ඉන්පසු හැමදාම හැදෙන හොඳම හා ලොකුම පලතුරු ප්‍රමාණය පිළිගන්වන්නේ දෙවියන් උදෙසාමය. අපේ රටට මහඟු සම්පතක් ලෙස ස්වාභාවිකවම ලැබෙන පලතුරු නිකරුණේ නාස්ති වන්නේ මේ අයුරිනි.
රත්නායක කුලතිලක
