ජනාධිපතිවරණ කාලසීමාවේ සිට වත්මන් ජනාධිපති ගෝඨාභය රාජපක්ෂ මහතා වටා තරුණ පරපුර විශාල ලෙස රොක්වෙමින් සිටී. ඔවුන් සමාජය තුළ ධනාත්මක පෙරළියක් ඇති කරන්නට උත්සුක වන බවක් කාටත් දකින්නට ලැබේ. මෙතෙක් කල් නිද්‍රාගතව තම නව අදහස් සිරකරගෙන සිටි මේ තරුණ පිරිස නැවතත් ජීවමය බවකින් සමාජ යාන්ත්‍රණයට තම සහාය ලබාදෙන්නට පෙළ ගැසෙන්නේ කුමන සුවිශේෂීත්වයක් නිසා දැ’යි සොයා බැලීම වඩාත් කාලෝචිත වන්නේ ය.
සාම්ප්‍රදායික දේශපාලන සංස්කෘතිය තුළ කල්මැරූ බොහෝ තරුණ පිරිස් ඒ පිළිබඳ ගොඩ නඟාගත් තම ආකල්ප ඉතාම කුසීත බවක් ඉසිලීය. පොරොන්දු මත බරපැන දරන ඡන්දය, වාසි පැත්තට හෝයියා කියන දේශපාලනඥයන් වැඩ අමතකව කටින් බතල කොළ සිටුවන ඡන්ද කෙළිය, අල්ලසට හෑල්ලු වන රාජ්‍ය සේවය නිතර නිතර අහන දකින විට රට කෙරෙහි, එහි අනාගතය කෙරෙහි ඇතිවන්නේ එතරම් යහපත් සිතුවිල්ලක් නම් නොවේ. තම පෞද්ගලික වුවමනා මත ක්‍රියා කරන නායකයන් නිසා රට මුළුමනින් ම අගාධයට යන බව දැක ඒවා විවේචනය කරන්නට තරුණ පිරිස් කටයුතු කළ ද, ඊට ඇහුම්කන් දෙන බවක් ඉහළ නිලධාරීන්ගෙන් හෝ පාලකයන්ගෙන් දැකගන්නට නොහැකි විය. රට කානු පල්ලට වැටෙන්නට ඉඩ හැර ගානක් නැතිව, ඔවුන් තම තමන්ගේ වැඩෙහි නිරත වූ‍යේ ඒ බොහෝමයක් දෙනාට රට ගොඩනඟන්නට අවශ්‍ය ශක්තිය ලබාදීමට හැකියාව තිබියදී ය.
හැකියාව ඇත්තවුන් එලෙසින් මන්දගාමී පිළිවෙතක් තම රට කෙරෙහි අනුගමනය කරන විට; එය නොඉවසන, ජවසම්පන්න තරුණයන් තුළ නැ‍ඟෙන ප්‍රකෝපකාරී ආවේගය තවදුරටත් අසාධාරණ නොවනු ඇත. එහෙත් ගෝඨාභය රාජපක්ෂ මහතා දේශපාලන කරළියට පැමිණි මත්තෙන් ම තරුණ මනසෙහි පැළපදියම්ව තිබූ දේශපාලන සංස්කෘතිය පිළිබඳ වූ අප්‍රසන්න ආකල්පය වෙනස් වී පරිවර්තනයක් වීමක් සිදු විය. පොරොන්දු මත නොව ප්‍රතිපත්ති මත ගොඩනැඟෙන දේශපාලනික ක්‍රියාවලියක් ඇතිවීමත්, පරිසරය විනාශ කරමින් ගජරාමෙට ගෙන යන ඡන්ද ව්‍යාපාර වෙනුවට පොලිතින් භාවිතය බැහැර කළ ප්‍රචාරක සංස්කෘතියක් ඇති වීමත් ඒ සඳහා වන සාධකයි. ක්‍රම ක්‍රමයෙන් වෙනස් කරන දේශපාලන සම්ප්‍රදායන් සාධනීය බවක් දරත් ම තරුණයෝ ද දේශපාලනය දෙස බැලූ සුපුරුදු කාචය ඉවත් කරන්නට නම්‍යශීලී වූහ. එමෙන් මහින්ද රාජපක්ෂ ජනාධිපතිතුමාගේ පාලන සමයේදී ඊළාම් ත්‍රස්තවාදය නිමා කරවීමට මෙහෙය වූ නායකත්වය දෙස බලද්දී ගෝඨාභය රාජපක්ෂ මහතා රට ගොඩනැංවීමෙහිලා වැඩක් කර පෙන්වූ අයෙකු යන විශ්වාසය අනාගතයේ වැඩ කරන්නට බලාපොරොත්තු දෙන්නන්ට වඩා, සත්‍යවාදී වෙයි. එම හේතුවෙන් තරුණයෝ ජරාජීර්ණ වූ දේශපාලන සංස්කෘතිය වෙනස් කරන්නට හැකියාව පවතින නායකත්වය ලෙස ගෝඨාභය රාජපක්ෂ මහතා පෙරමුණු කරගැනීමත්, තම ආකල්පවල නව පිබිදීම සනිටුහන් කිරීමත් උද්‍යෝගයෙන් යුතුව සිදු කරති.
රට ගොඩ නඟන්නට නම් රට ගැන ඇල්මක් මෙන් ම රටේ දියුණුවක් දැකීමේ උනන්දුවත් ක්‍රියාකාරී ජනතාව තුළ තිබීම අත්‍යවශ්‍යය. රට අනතුරට පත් වන විට ඊට එරෙහි වන්නේත්, රට රැකගැනීමේ වුවමනාව මුදුන්පත් වන්නේත් රට කෙරෙහි ආදරයක්, ඇල්මක් ජනතාවට පැවතියහොත් පමණි. එහෙත් රට කරවන ඇත්තෝ මෙම දේශමාමකත්වය නිර්වින්දනය කරමින් කාලයක් තිස්සේ තම අභිප්‍රායන් ඉටු කරගන්නට මාන බැලූහ. එහි අනිසි ප්‍රතිඵලයක් ලෙස රට තුළ බෝම්බ ව්‍යසන නැවත ඇති වන්නටත්, විදේශ බලවේගයන්ගේ අත පෙවීම බලවත් වන්නටත් මුල පිරීය. රටට හිතෛෂීන් නොවීම නිසා රට විනාශ මුඛය කරා යන අයුරු තරුණයන්ට බලා හිඳින්නට සිදු විය. ඔවුන්ට රට වෙනුවෙන් නැඟී සිටීමට අවශ්‍ය ශක්තිය ලබාදෙන්නට හෝ ඒ සඳහා පෙලඹවීමක් ඇති කරන්නට හෝ නායකයෙකුගේ අවශ්‍යතාව පැවතුණි. එම හිඩැස පුරවාලමින් ගෝඨාභය රාජපක්ෂ මහතා රට, දැය, සමය සුරකින්නට ප්‍රතිඥා දීමත්, සංඝරත්නය ඇතුළු සියලුම ආගමික නායකයන්ගේ ආශිර්වාදය ඒ සඳහා එතුමාට නොඅඩුව හිමිවීමත් නිසා රට නැවතත් සුරක්ෂිත වීමේ පෙරනිමිති පහළ විය. මවුබිමේ අගය දැනෙන්නට දැනෙන්නට, මවුබිම අපේය යන හැඟීම කුළුගැන්වෙන්නට කුළුගැන්වෙන්නට, අපටත් රටක් තිබේය යන විශ්වාසය තරවන්නට තරවන්නට රටක් වශයෙන් නැඟී සිටින්නට තරුණයන්ට තවත් නම් පෙලඹවීමක් අවශ්‍ය නොවෙනු නියතය. අප රට ගොඩනැඟිය යුතු ය. ඊට උරදිය යුතුය යන සිතුවිලි මැඬලිය නොහැකි වනු ඇත. තරුණයින් අනාගත අභිවෘද්ධිය කරා පදවාගෙන යා යුතු නොවේ. හුදෙක් කළ යුතුව තිබුණේ පැදගෙන යාමට ඇන්ජිම ක්‍රියාත්මක කරවීමේ අවශ්‍යතාව පමණකි.
තරුණයන් ලෝකය දකින්නේ හණමිටි අදහස්වලින් නොව නව අදහස්වලින් පිරුණු නැවුම් මනසකිනි. ලෝකයාගෙන් ප්‍රතික්ෂේප වන ඇතැම් දෙයින් පවා ඔවුන් නව නිර්මාණ බිහි කරන්නේ එනිසා විය යුතු ය. එහෙත් බොහෝ පිරිස් ඒ දෙස බලන්නේ වපර ඇසකිනි. වැඩිහිටියන්ගේ හා තරුණයන්ගේ මත අතර ගැටුම එදා සිට ම බොහෝ අවස්ථාවල දකින්නට ලැබුණ ද, එය යහපත් අතකට පෙරළන්නට උත්සාහ ගන්නා කවුරුන් හෝ නොවීය. බොහෝ විට සිදු වන්නේ තරුණයන්ගේ අදහස් වැඩිහිටියන් අතින් ප්‍රතික්ෂේප වී නිෂ්ප්‍රභා වීමයි. තරුණ අදහස් අභිප්‍රේරණය කරන්නටත්, ඔවුන්ගේ අදහස් පැසුණු මනසක මඟ පෙන්වීම යටතේ ක්‍රියාත්මක කරන්නටත් හැකියාව ඇත. ආණ්ඩුවේ කැබිනට් සභිකයන් අතරට තරුණ මහජන නියෝජිතයන් ඇතුළත් කිරීම ඒ සඳහා ගත්තා වූ යහපත් පියවරකි. මාර්ග දෙපස ඇති තාප්ප, බිත්ති සහ පොදු ස්ථානවල දැන්වීම් ඇලවීම වැළැක්වීම සඳහා ගත් කදිම විසඳුමක් ලෙස තරුණයන් සිතුවමින් ඒවා අලංකාර කිරීම ජනාධිපති ගෝඨාභය රාජපක්ෂ මහතා ඇතුළු පිරිසගේ ඇගැයීමට ලක්වීමත් ප්‍රශංසනීය වේ. තරුණ මනසින් සිතා ඔවුන් රටට, සමාජයට වැඩදායි වන ලෙස නිර්මාණය කරන නව නිමැවුම්වලට අතහිත දීම ද අවශ්‍ය වන්නකි. ඒ සඳහා අවශ්‍ය ආයෝජකයන් සැපයීම, අරමුදල් පිහිටුවීම, සහන ලබාදීම ආදිය මඟින් තරුණයන්ට ලැබෙන්නේ ශක්තියකි. ඔවුහු එම බලාපොරොත්තු පෙරදැරිව තරුණයන් අගයන නායකත්වය වටා එකතු වන්නෝ ය.
දේශපාලනයේ ඇතැමුන් තම බූදලයක් යැයි සිතා මහජනයාගේ මුදල් අවභාවිත කරන අයුරු නොයෙක් වාරයන්වලදී අපට දකින්නට, අසන්නට ලැබී ඇත. සංවර්ධනය වෙමින් පවතින රටක් ලෙස රටේ පාලකයන් අනවශ්‍ය වියදම් හෝ අවම වශයෙන් නවතා දැමීමම ක්‍රියාමාර්ග ගැනීමෙන් සංවර්ධන ඉනිමේ තවත් එක් දශමයක් හෝ ශ්‍රී ලංකාව ඉහළට ඔසවා තබන්නට අවස්ථාව එළඹෙනු ඇත. සැබැවින් ම ඒ සඳහා කළ යුත්තේ සිතන පතන ආකාරය වෙනස් කිරීමට අවශ්‍ය ශක්‍යතාව ස්ථාපනය කිරීම පමණකි. රාජ්‍ය අංශයේ නාස්තිය අවම කිරීම, පරිසරය පිරිසුදු ව සහ අලංකාරවත්ව තබාගැනීම, ඍජු තීරණ ගන්නට නොබියව කටයුතු කිරීම, සාධාරණත්වය, විනිවිද භාවය සුරැකීම යනාදී තරුණ මනස අගයන දැක්ම ගෝඨාභය රාජපක්ෂ ජනාධිපතිතුමාගේ නායකත්වය අනුගමනය කරන්නට පෙලඹෙයි.
බදු බරින් මිනිසුන් පීඩාවට පත් කරනවා වෙනුවට බදු නොවන ආදායම් වන ලාභ, ලාභාංශ, පොලී ආදායම්, ගාස්තු සහ අය කිරීම් ආදිය ඉහළ දැමීමෙන් රජයේ ආදායම් ඉහළ නැංවීමත් ඉතාම වැදගත් තීරණයක් වෙයි. එමඟින් රටේ තරුණයන් ඇතුළු ක්‍රියාකාරී ජනතාව රට කෙරෙහි පැහැදීමත්, රට වෙනුවෙන් සිදු කරන තම දායකත්වය තවත් වැඩි කිරීමටත් හේතු වෙයි. බොහෝ විට තකන්නේ ජාති හිතෛෂී ආත්මාර්ථය පසෙකලා පරාර්ථකාමීත්වයයි. තමන්ට පමණකැ’යි සිතා සැම දෙයක් ම ගොඩ ගසාගෙන තම අභිමත සපුරා ගැනීමට නොව සැමට අත්විඳිය හැකි සාමූහික ප්‍රතිලාභ දිනා ගැනීමටයි. එබැවින් තරුණයන් අගයන එම දැක්ම පාලන පක්ෂයෙන් ද පිළිබිඹු වනවාය යන්නෙන් හැඟන්නේ හුදෙක් රටේ පාලනය තාරුණ්‍ය අත්පත් කර ගන්නා බවත් ය.
වත්මන් ජනාධිපති ගෝඨාභය රාජපක්ෂ මහතා වටා තරුණ පරපුර ගැවසෙමින් එතුමාට ලබාදෙන්නේ ඉතා ම සුවිශේෂී වරමකි. තරුණයන්ගේ එම සක්‍රීය දායකත්වය අදට මෙන් ම හෙටටත් රැකගැනීම මුළුමනින් ම පාලකයන් සතු කර්තව්‍යයකි. මන්ද යත් තවදුරටත් තරුණ තරුණියන් යනු ඇස් කන් වසාගෙන සිටින්නන් හෝ අවසිහියෙන් කටයුතු කරන්නන් හෝ නොවන නිසාය. ඔවුන් සැබැවින් ම දැනුවත් සේ ම රැවටීම්වලට හසු වන මුග්ධයන් නොවෙනු ඇත. එබැවින් මෙරට නායකත්වය බලයට හෝ වරප්‍රසාදවලට නොනැමී සබුද්ධිකව තම පාලන තන්ත්‍රය ක්‍රියාත්මක කළ ලෙසින් ම පවත්වාගෙන යෑමත් වඩාත් වැදගත් වෙයි.
