ගුවන් හමුදා නිලධාරීන් අධිකාරියට පත්කිරීමේ හා පියාසර කැඩෙට් නිලධාරී පාඨමාලා හැදෑරූ ගුවන් නියමුවන්ට පියාසර ලාංඡන පැලැඳවීම අග්රාමාත්ය මහින්ද රාජපක්ෂ මහතාගේ ප්රධානත්වයෙන් ත්රිකුණාමලය චීන වරායේදී සිදු කෙරිණි.
සුරකිමු ලකඹර පාඨය තේමා කර ගනිමින් ශ්රී ලංකා ගුවන සුරකිමින්, ශ්රී ලංකා ගුවන් හමුදා සේවයට එක්වීමට අංක 59 හා අංක 60 යන කෙඩෙට් නිලධාරී පාඨමාලාවන් හැදෑරූ සහ අංක 11 හා අංක 12 යන කෙඩෙට් නිලධාරිනී පාඨමාලාවන් හැදෑරූ කෙඩෙට් නිලධාරීන් සහ නිලධාරිණියන් අධිකාරියට පත්කිරීම මෙහිදී සිදුවූ අතර මෙම විසිරයාමේ පෙළපාළියේ අණදෙන්නා ලෙස ගෲප් කපිතාන් නිලන්ත පියසේන කටයුතු කළේය.
පියාසර කෙඩෙට් නිලධාරී පාඨමාලාව හැදෑරූ ගුවන් නියමුවන් 10ට පියාසර ලාංඡන පැලැඳවීමද මෙහිදී සිදුවූ අතර අංක 59 කැඩෙට් නිලධාරී පාඨමාලාවේ දක්ෂතම කැඩෙට් නිලධාරී ලෙස පයිලට් ඔෆිසර් එන්. ජී. බී. අයි පතිරාජ සහ අංක 60 කෙඩෙට් නිලධාරී පාඨමාලාවේ දක්ෂතම කෙඩෙට් නිලධාරී ලෙස පයිලට් ඔෆිසර් ආර්. එම්. ජී. කේ. ඩී. රත්නායක යන නිලධාරීන්ට විශේෂ සම්මාන ප්රදානය කළේය.
ශ්රී ලංකා ගුවන් හමුදාව PT -6 වර්ගයේ ගුවන් යානා යොදාගනිමින් ගුවන් කරනම් සංදර්ශනයක්ද, ගුවන් හමුදා තූර්ය වාදක කණ්ඩායම සමඟ එක්ව විචිත්රවත් සරඹ සංදර්ශනයක්ද මෙහිදී ඉදිරිපත් කළේය.
මෙම අවස්ථාවට නැගෙනහිර පළාත් ආණ්ඩුකාර අනුරාධා යහම්පත්, ශ්රී ලංකා ගුවන් හමුදාපති එයාර් මාර්ෂල් සුමංගල ඩයස්, ගුවන් හමුදා අධ්යක්ෂ මණ්ඩලයේ නිලධාරීන්, ගුවන් හමුදා චීන වරාය විද්යාපීඨයේ පීඨාධිපති එයාර් කොමඩෝර් උදේනි රාජපක්ෂ මහතා ඇතුළු අනෙකුත් නිලධාරීන් හා සෙසු නිලයන් ද ආධුනික කෙඩෙට් නිලධාරීන්, නිලධාරිනියන්, අධිකාරියට පත් නිලධාරීන්ගේ දෙමාපියන් ඇතුළු විශාල පිරිසක් එක්වූහ.