• ගෝඨාභය රාජපක්ෂ ජනාධිපතිවරයා පත්වී දෙමසක් ගතවෙලා තියෙනවා. ඒවගේම ඔ‍බේ දේශපාලන ගමනේ පළමු පාර්ලිමේන්තු ඇමැති ධූරයට පත්වී දෙමසක් ගතවී තියෙනවා. පසුගිය ආණ්ඩුව සමයේ වඩාත් ආන්දෝලනයට ලක් වුණ සංචාරක කේෂත්‍රය ඇතුළු වගකිව යුතු අමාත්‍යාංශ රැසක් භාර ඇමැතිවරයා ලෙස අදාළ කේෂත්‍රවල විශාල කාර්යය භාරයක් පැවරී තියෙනවා. මේ ආයතන ප්‍රවර්ධනය කිරීමට ගෙන ඇති ඉදිරි පියවර සම්බන්ධයෙන් කතා කළොත්?
මේ රටේ ප්‍රධාන අමාත්‍යංශ සහ ප්‍රධාන වගකිමක් ඇති අමාත්‍යාංශ සහ මේ රටේ ආර්ථිකයට ඍජුවම බලපාන අමාත්‍යාංශ මගේ විෂය පථයට අයත් වෙලා තියෙනවා. එවැනි ප්‍රධාන වගකීම් ඇති අමාත්‍යාංශ රැසක් මා කෙරෙහි විස්වාසයෙන් ලබා දීම සම්බන්ධයෙන් ජනාධිපති තුමාට, අගමැතිතුමාට සහ ගම්පහ දිස්ත්රික්කයේ ජනතාවට වි‍ශේෂයෙන් මා ස්තුතියිවන්ත වෙනවා. මගේ වගකීම තියෙන්නේ ගෝඨාභය රාජපක්ෂ ජනාධිපතිවරයාගේ මැතිවරණ ප්‍රතිපත්ති ප්‍රකාශයේ. මැතිවරණයේදී ජනතාවට මැතිවරණ ප්‍රකාශයේ පරිදි ලබා දුන් ජනතා පොරොන්දු ඉටුකිරීමයි මගේ අපේක්ෂාව.
• ජනතා අපේක්ෂා ඉටුකිරීමට නම් රටේ ආර්ථිකයට ඍජුවම බලපාන මේ ආයතන වලට සභාපතිවරුන් සහ අධ්‍යක්ෂ මණ්ඩලයක් පත් කිරීම් කර තිබෙනවාද?
මේ කෙ‍ටි කාලය තුළ ආයතනවල අධ්‍යක්ෂවරුන්, සභාපතිවරුන් පත් කරලා ඒ කටයුතු ඉදිරියට කරගෙන යෑමට කටයුතු කරනවා. සියයට අසුවක් අනුවක් මේ වනවිට පත්කරලා තියෙනවා. ජනාධිපතිවරයාගේ ප්‍රධාන ඉලක්කයක් තමයි සංචාරක ව්‍යාපාරය. එය ඉතා ඉක්මනින් රටේ විදේශ විනිමය උපයන්න පුළුවන්, වැඩි කරගන්න පුළුවන් විෂයක්. ඒ නිසා මට පැවරී ඇති අමාත්‍යාංශයෙන් සහ ආයතන වලින් ප්‍රධාන අංශ ලෙස ශ්‍රීලංකන් ගුවන් සමාගම, සංචාරක අමාත්‍යාංශය, සංචාරක අධිකාරිය ඇතුළු මේ සියල්ල ඔස්සේ සංචාරක කර්මාන්තය ප්‍රවර්ධනය කරන්න වැඩපිළිවෙලක් හදන්න සැලසුම් කරලා තියනවා.
• පසුගිය යහපාලන රජය සමයේ දි සිදුවු මුස්ලිම් අන්තවාදීන් විසින් එල්ල කරන ලද බෝම්බ ප්‍රහාරයත් සමඟ සංචාරක කර්මාන්තය බිදවැටුණා. එය යළි ගොඩ ගන්නට යම් පියවරක් ගෙන තියෙනවාද?
ඇත්ත වශයෙන් ම නැවත සංචාරක ව්‍යාපාරය දියුණු කරන්න ඒකාබද්ධ සැලැස්මක් හදන්න කටයුතු කරමින් යනවා. නමුත් සහරාන්ගේ අන්තවාදි බෝම්බ ප්‍රහාරයත් සමඟ ම සංචාරක ව්‍යාපාරය කඩා වැටුණා. සංචාරක කේෂ්ත්‍රයේ මිනිසුන් විශාල සංඛ්‍යාවකට ඍජු සහ වක්‍ර අකාරයෙන් රැකියා අහිමි වුණා. ජීවත් වීමේ මාර්ගය අහිමි වෙලා ගිහිල්ලා තියෙනවා. හෝටල් ගොඩනැගීම සඳහා බැංකු ණය අරන් තිබුණු අයට ණය ගෙවා ගැනීමට නොහැකි වුණා. සංචාරක ව්‍යාපාරය සඳහා, සංචාරයේ යෙදෙන්නන් සඳහා යොදාගත් බස් රථ හිමියන්ට ඒවායේ ලීසින් ගෙවා ගැනීමට නොහැකි වෙලා. ඒ වගේම සංචාරකයන් සඳහා මඟ පෙන්වන්නන්ට ගැටලු මතුවුණා. ලොකු අවුලක් රටේ ආර්ථිකයට බලපාන ආකාරයට සිදු වුණා. ඒ ඉලක්කය සපුරන්න අවශ්‍ය කරන යටිතල පහසුකම් නඟා සිටුවන්න අපි කටයුතු කරනවා. ඒවගේම මේ ක්ෂේත්‍රය තුළ ඇති අපේ ස්වභාවික සම්පත් සහ වැඩසටහන් ක්‍රියාත්මක කරන්නත් මේ සඳහා පහසුකම් ලබාදීමට කටයුතු කරනවා. එය ලොකු අභියෝගයක්. අපි ඒ අභියෝගයට මුහුණ දෙන්න ඉදිරි කාලයේ කටයුතු කරනවා.
• රන්ජන් රාමනායක මන්ත්‍රීවරයාගේ හඬපට සිදුවීමත් සමඟ මේ රටේ සදාචාරය පිරිහීම සහ නීති ක්ෂේත්‍රවල ස්වාධීනත්වයට සිදු වී ඇති හානිය ඉතා බරපතළයි. මේ හඬපට සිදුවීමත් සමඟ ජනතාව තුළ නීතිය, ස්වාධීනත්වය පිළිබඳ ව විශ්වාසය බිඳ වැටී තියෙනවා. එය නැවත ගොඩනඟා ගැනීමට රජයක් ලෙස ඉදිරියේදී ගනු ලබන ක්‍රියාමාර්ග මොනවාද.?
යහපාලන රජය කාලයේ රටේ ජනතාව නොමග යවලා, දහනව වැනි ව්‍යාවස්ථා සංශෝධනය ගෙනැල්ලා, ස්වාධීන කොමිෂන් පත්කරලා රාජපක්ෂ පවුලෙන් පළිගන්න නීති හදා ගත්තා. ස්වාධීන කොමිසන් කියලා ඔවුන්ගේ හෙන්චයියොන්ට එහෙයියෝ ටික පත් කරගත්ත එක තමයි කළේ. මේ කොමිසම් වලින් කරපු ඇති දෙයක් නැහැ. දඩයම් දේශපාලනයක් කිරීම තමයි මේ අය කළේ. අපේ රජය නීතිය ඒ ආකාරයට හසුරුවා නීති ආයතනවලට මේ අාකාරයට බලපෑම් කරන තත්ත්වයට පත් නොවන බව මේ රටේ ජනතාවට අපි කෙරෙහි විශ්වාසයක් තියෙනවා. රන්ජන් රාමනායකලා වගේ විනයක් නැති අය පත්කරගෙන මේ අය දේශපාලන දඩයමක් කළා මිසක් වෙන දෙයක් කළේ නැහැ. පසුගිය රජය කාලයේ විනයක් ඇති කළේ නැහැ. මෙය හරියට පිස්සු බල්ලෙක්ව මිනිස්සු හපා කන්න ලෙහලා දැම්මා වගේ වැඩක් මේ කරලා තියෙන්නේ. මේ වියතුන් හැටියට අපි සලකන අධිකරණ ක්ෂේත්‍රය කඩා වැටිලා තියෙනවා. පොලිසිය පිළිබඳව විශ්වාසයක් නැහැ. විධායකය, ව්‍යවස්ථාදායකය, අධිකරණය ගැන විශ්වාසයක් ජනතාව තුළ තිබුණේ නැහැ. එසේ වුණාම රට අයාලේ යනවා. ඒ නිසා ජනතාව බලන් හිටියා. මේ තත්ත්වය වෙනස් කරන්න. ජනතාව ජනාධිපති ගෝඨාභය සම්බන්ධයෙන් විස්වාසයක් තැබුවා. අගමැති මහින්ද රාජපක්ෂ මහතා සම්බන්ධයෙන් විශ්වාසයක් තබලා මේ පැවැති ක්‍රමය වෙනසක් ඇතිකිරීමට බලාගෙන හිටියා. ඒ වෙනස ජනතාව වත්මන් ජනාධිපතිවරයාගෙන් දැක්කා. මිනිස්සුන්ට විශ්වාසයක් නැති වුණාම; අධිකරණයේ ස්වාධීන බව නැති වුණාම; නීති හදන ආයතන සම්බන්ධයෙන් විශ්වාසයක් නැති වෙලා ගියාම රට අයාලේ යනවා. අද වනවිට ගෝඨාභය රාජපක්ෂ ජනාධිපතිවරයා සම්බන්ධයෙන් නව රජයක් යට‍තේ වෙනසක් ඇතිවෙයි කියලා විශ්වාසයක් ඇති වෙලා තියෙනවා. ඒ අනුව අධිකරණ ක්ෂේත්‍රයේ වෙනස්කම් ඇති කරමින් දේශපාලන අධිකාරිය අධිකරණයට බලපෑම් නොකරන තත්ත්වයක් ඇති කරන්නට ඕන. පොලීසියේ ස්වාධීනත්වය තහවුරු කරන්නට ඕන. පොලීසියේ වෙනස්කම් සිදු කරන්නට ඕන. ඉහළ සිට පහළ දක්වා පොලිස් නිලධාරීන්ගේ ගෞරවය රැකෙන ආකාරයට ක්‍රියා කරන්නට ඕන. ඒ අය සමඟ සාකච්ඡා කරලා කටයුතු කරන්නට ඕන. දේශපාලඥයන් වන අපි විසින් නීතියට අත නොතබන ආකාරයයට කටයුතු කරමින් රටේ ජනතාවගේ ගෞරව රැකෙන ආකාරයට කටයුතු කරන්නට ඕන. ඒනිසා එයට අවශ්‍ය අඩිතාලම පසුගිය ජනාධිපති මැතිවරණයත් සමඟ තබා තිබෙනවා.
• මේ ආණ්ඩුවත් පරණ ආණ්ඩුවෙම කොපියක් බවත් අලුත් පිටපතක් කියලා කිව්වත් පරණ ආණ්ඩුව කරපු දේවල් එලෙසින්ම සිදුකරන බවත්; විපක්ෂයේ මන්ත්‍රීවරුන් ප්‍රකාශ කරනවා. ඒ අනුව බලයට පත්වීමට පෙර කියූ පරිදි හම්බන්තොට වරාය ඉඩම් විකුණන්නේ නැහැ කිව්වත් ඒ සම්බන්ධයෙන් කිසිදු පියවරක් අරගෙන නැති බව සඳහන් කරනවා?
ඔය චෝදනා කරන ඇතැම් විපක්ෂයේ අයගේ දේශපාලන ස්ථාවරය ඉතා පැහැදිලියි. සියයට තුනක් වගේ සුළු ඡන්ද ප්‍රමාණයක් අරගෙන ඒ අය එජාපයට කඩේ ගිය බව ඉතා පැහැදිලියි. අද යුඑන්පිය, ජවිපෙ කියන්නේ දෙකක් නොවෙයි එකක් බව ඉතා පැහැදිලියි. ජනතාවට සුබවාදි ආණ්ඩුවක් ඇති කරලා රටේ යළි ප්‍රජාතන්ත්‍රවාදය ගොඩනඟන්නට උත්සාහ කරද්දි එය කඩාකප්පල් කරන්න ඒ අයගේ භාෂා ස්වරූපය පාවිච්චි කරලා ලස්සන වචන කියලා ජනතාව මුලාකරන්න උත්සහ කරනවා. නමුත් එය සාර්ථක වෙන්නේ නැහැ. ජනතාව දන්නවා ඇත්ත තත්ත්වය. ඒ අය යුඑන්පියට කඩේ ගිය බව ඉතා හොඳින් දන්නවා; හඬපටවලින් පවා පැහැදිලි වන අවස්ථා තියෙනවා. හොර රහසේ යහන්ගත වෙච්ච හැටි අපිට බලාගන්න පුළුවන්. සිතපු නැති දේවල් දන්වන විට අපිට හෙළිදරව්වෙමින් පවතිනවා. යහපාලන රජයේ නිරුවත එළියට එන්න පටන් අරන්. ඒ අයට හිතේ දුකක් ඇති සියයට තුනක ඡන්දයක් ලැබීම ගැන. ඒ සියයට තුනත් නැත‍ිවෙලා යනවා මහමැතිවරණය වන විට. ඒ අයට හිත්වේදනාව තියෙන්නේ. මේ වනවිට යුඑන්පියටත් බනිනවා; අපිටත් බනිනවා; ඒ අයගේ සියයට තුනත් නැතිවෙයි කියලා.
• මේ රජය හඬපට හරහා ආන්දෝලනයක් ඇති කරමින් ජනතා පොරොන්දු ඉටු නොකරන තත්ත්වයකට පත්වී ඇති බවත් හඬ පටවලින් එදා වේල හම්බකරගන්න තත්ත්වයට පත්වෙලා කියලා චෝදනාවක් තියෙනවා ?
අපි ගෙන යන වැඩපිළිවෙල ඉතා පැහැදිලිව ජනතාව තේරුම් අරන් තියනවා. ජනතාව හිතුවටත් වඩා හොඳින් මේ රට ඉදිරියට යනවා. ඔය වගේ හඩ පටියක් රජපක්ෂ පවුලෙන් හෝ අපේ කාගෙන් හරි එළියට ආවා නම් ඒ අය තමයි උඩ දදා කෑගහන්නේ. නමුත් රන්ජන්ගේ හඬපට ගැන වචනයක්වත් කියන්නෙ නැහැ. අද ජවිපෙ නිහඬ වෙලා ඉන්නේ රන්ජන් රාමනායක ආරක්ෂා කරන්න. අපි රන්ජන් විකුණන්න තරම් බංකොලොත් වෙලා නැහැ. ඒ අය වගේ. රන්ජන් ළඟ හිටිය අයගෙන්මයි හඬපට එළියට එන්නේ. අපිට ඒ දේවල් විකුණන්න අවශ්‍ය නැහැ. අපි වැඩ කරපු ආණ්ඩුවක්; වැඩ කරලා පෙන්නපු ආණ්ඩුවක්. රන්ජන් රාමනායක එක්ක ඒ අයගේ කතා බහත් ඇති. එයාට තියෙන ජනතාවගේ අවධානය නැතිකරන්න ඒ අය කටයුතු කරනවා ඇති. අපිට ඒ සඳහා දොස් කියලා වැඩක් නැහැ. හඬපට එළියට දාන අයට කියන්න ඕන ඔය කතා අපි ආණ්ඩුවක් විදිහට එළියට දාන්නේ නැහැ. රටේ අධිකරණය සහ පොලීසිය සම්බන්ධ ව හඬපට අනුව නීතියේ ආධිපත්‍ය ආරක්ෂා කිරීම වෙනුවෙන්; අධිකරණයේ ස්වාධීනත්වය රැකීම වෙනුවෙන්; ඉහළ නීති ක්ෂේත්‍රයේ අයත් සමඟ කතා බහ සම්බන්ධයෙන් කටයුතු කරන්නට ඕන. වල්පල් කතා කරන දේවල් අපිට අවශ්‍ය නැහැ. හිරුණිකා නෝනලාගේ සදාචාරය, හැදියාව අපිට වැඩක් නැහැ. ඒ අයගේ කුණුහරුප එක් කාණ්ඩයක් බලනවා ඇති; ඒවා අපිට වැදගත් නැහැ. පත්තිනි අම්මලා වගේ කතා කරපු අය කෙරෙහි රටේ ජනතාවට හොඳ අවබෝධයක් ඇවිත් තියනවා; දැන් රටම දන්නවා හැදියාව. ඒ නිසා මේ වගේ අයව පාර්ලිමේන්තුවට එවන එක ගැන කල්පනා කරන්න ඕන. රටේ ජනතාව හැමෝටම දොස් කියන, විවේචනය කරන අය අද කවුද කියලා අපි දන්නවා. එදා කියපු දේවල් බොරු කියලා කවුරුත් කිව්වේ නැහැ; එදා අපිට අභූත චෝදනා කරද්දි අපි සද්ද නැතිව හිටියා. මිනිසුන් අවබෝධයකින් ඉන්නවා පාර්ලිමේන්තු නියෝජනය කරන මෙවැනි අය නිසා. අනෙක් මන්ත්‍රීවරියන්ටත් චෝදනා කරනවා. අපි මේ දේවල් වලට පියවර ගත්තාම කියන්නේ දේශපාලන පලිගැනීම් කියලා. ගෝඨාභය මහතා පොලීසියට කියලා තිබුණා පසුබිමක් තුළ අත්අඩංගුවට ගන්න කියලා. නිකන් හිරේට ගන්න එපා කියලා; රන්ජන් අත්අඩංගුවට ගත්තාම කියනවා. දොස් කියපු මිනිසුන් අද කියනවා; මේ අයව පිස්සන් කොටු යවන්න ඕන කියලා.
• අද වන විට මේ සිදුවිම් හරහා දේශපාලන අදිකාරය සම්බන්ධයෙන්ද විස්වාසය පලුදුවිමක් සිදුවෙලා තියනවා නේද?
මම හිතන්නේ නැහැ එහෙම වෙයි කියල හොද දේශපාලඥයන් ගැන කිරාමැනලා කටයුතු කරන්න දන්නවා හොදින් කිරාමැනලා තෝරගන්න ජනතාව දන්නවා. එය හොද දේශපාලනයක් කරන අයට හොද ප්‍රතිචාරයක් ලැබෙනවා එ‍වගේම මේ අය ඉවත් කරන්න ජනතාව කටයුතු කරයි.
