ජාතික විද්යා පදනම විසින් සංවිධානය කරනු ලබන සම්මාන උලෙළ - 2018 පසුගිය සතියේ කොළඹ බණ්ඩාරනායක සම්මන්ත්රණ ශාලා භූමියේ ලැවෙන්ඩර් ශාලාවේදී පැවැත්විණි. මෙහිදී ලෝක විද්යා ඇකඩමිය (TWAS) ජාතික විද්යා පදනමේ තරුණ විද්යාඥ සම්මානය හිමි වූයේ කොළඹ විශ්වවිද්යාලයේ වෛද්ය පීඨයේ සායනික පෝෂණවේදී විශේෂඥ ෛවද්ය සහ ජ්යෙෂ්ඨ කථිකාචාර්ය වෛද්ය රනිල් ජයවර්ධනට ය. මෙම සම්මානය ජීව විද්යාව, රසායන විද්යාව, ගණිතය සහ භෞතික විද්යාව යන ක්ෂේත්ර තුළ තම පර්යේෂණ කටයුතු විශිෂ්ට මට්ටමක පවත්වාගෙන යන තරුණ විද්යාඥයන් සඳහා පිරිනැමෙන්නකි.
වෛද්ය රනිල් ජයවර්ධනට ලෝක විද්යා ඇකඩමිය (TWAS) ජාතික විද්යා පදනමේ සම්මානය හිමි වූයේ ‘මගේ බත් පිඟාන’ යනුවෙන් ඉදිරිපත් කළ ආහාර වට්ටෝරුවටයි. එය ඔහු සකස් කළේ ශ්රී ලංකාවේ ආහාර රටාවන් පිළිබඳව අධ්යයනය කිරීමෙන් අනතුරුවයි.
“දැන් ලංකාවේ ජනගහනයෙන් බොහෝ දෙනෙක් පීඩා විඳින්නේ බෝ නොවන රෝගවලින්. අධි රුධිර පීඩනය, දියවැඩියාව, කොලෙස්ටරෝල් යන රෝගවලට ගොදුරු වන අය අද වේගයෙන් ඉහළ යනවා. ලංකාවේ වැඩිහිටි ජනගහනයෙන් 20%කට අධි රුධිර පීඩනය. 21%ක් පූර්ව දියවැඩියාව හා දියවැඩියාවට ගොදුරු වෙලා. මෙයට බලපාන ප්රධාන හේතුව අපේ අහිතකර ආහාර රටාව. ලංකාවේ ගොඩාක් දෙනා පිටි කෑමවලින් බඩ පුරවා ගන්න පුරුදු වී සිටිනවා.
එළවළු සහ මස් මාළු කන්නේ අඩුවෙන්. බත්, ආප්ප, ඉඳිආප්ප, පාන්, රොටී, පිට්ටු මේ හැම කෑමක් ම පිෂ්ටය සහිත ආහාර. කොස්, අල, බතල වුණත් පිෂ්ටය වැඩි ආහාර. අනික අපි රොටී, ආප්ප කනවා නම් ලුණුමිරිස් වගේ දෙයක් එක්ක කන්නේ.
ඉඳිආප්ප කනවා නම් පොල් සම්බෝල සමඟ හොඳි එක්ක කන්නේ. ඒ කෑම එක්ක අපි එළවළු, මස් හෝ මාළු කන්නේ නැහැ. අපි සම්පූර්ණයෙන් ම බඩ පුරවා ගන්නේ පිටි කෑමවලින්. අපේ රටේ හෘදය රෝග, දියවැඩියාව ඉහළ යන්නේ පිටි කෑම නිසා. ඒ නිසා පිටි කෑම අඩුවෙන් කාලා පෝෂණය ලබාගන්න ක්රමවේදයක් සකස් කිරීමේ අවශ්යතාව දැනුණා” යනුවෙන් පවසමින් සාකච්ඡාවට පිවිසියේ විශේෂඥ වෛද්ය රනිල් ජයවර්ධන ය.
ඔහු තවදුරටත් පෙන්වා දෙන්නේ දෛනික කැලරි අවශ්යතාවෙන් 72%ක් පමණ පිෂ්ටය සහිත ආහාර මගින් ලබා ගැනීම නිසාත් ප්රෝටීන් ආහාර මගින් ලබා ගන්නා කැලරි ප්රමාණය 10%ක් පමණ වන නිසාත් බෝ නොවන රෝගවලට ගොදුරු වීමට හේතු වී ඇති බවය. එමෙන් ම එක් පුද්ගලයකු එක් ආහාර වේලකින් කිලෝ කැලරි 600කට වඩා වැඩි ප්රමාණයකින් ශක්තිය ලබාගන්නා බව තහවුරු වී ඇත. ඒ අනුව සාමාන්යයෙන් දවසකට ලබාගන්නා කිලෝ කැලරි ප්රමාණය 1500 ඉක්මවයි. මෙය ශරීරයේ දෛනික ශක්ති අවශ්යතාව ඉක්මවා යෑමකි. වැඩි ශක්ති ප්රමාණයක් දහනය නොවී මිනිස් සිරුරේ තැන්පත්වී තිබීම නිසා බෝ නොවන රෝග වැලඳීමේ හැකියාව වැඩිවේ. පිටි සහිත ආහාර වෙනුවට එළවළු සහ පලතුරු ආහාරවලට එකතු කළ යුතු වන්නේ එම නිසා ය.
ඒ අනුව ක්ෂණික ප්රතිඵල ළඟාකර ගත හැකි විවිධ ආහාර සැලසුම් යෝජනා කිරීමට සායනික පෝෂණවේදී විශේෂඥ වෛද්යවරුන්ට සිදු විය.
නිදසුන් වශයෙන් ඉතා අඩු කැලරි ආහාර සැලසුම සහ ඌන ශක්ති ආහාර සැලසුම දැක්විය හැකි ය. ඉතා අඩු කැලරි ආහාර සැලසුම භාවිතයට ගැනෙන්නේ ශල්යකර්මවලට පෙර සිරුරේ බර අඩු කිරීම හෝ පාලනය කළ නොහැකි දියවැඩියාව හා මඳ සරුභාවය වැනි ප්රතිකාරවලට සූදානම් වීම වැනි විශේෂ අවස්ථාවලදී ය. එහිදී සාමාන්ය ආහාර වෙනුවට ආදේශක ආහාර එකතු කෙරේ.
ඌන ශක්ති ආහාර සැලසුම් ක්රමයේදී ශරීරයට ලබාගන්නා කැලරි ප්රමාණය සිරුර දහනය කරන ශක්ති ප්රමාණයට වඩා අඩු කළ යුතු නිසා දේශීය ආහාරවල අඩංගු කැලරි ප්රමාණය ගණනය කළ යුතු ය. එහෙත් ශ්රී ලාංකේය මිශ්ර ආහාර වට්ටෝරුවල සංයුතිය පිළිබඳ සම්පූර්ණ දත්ත ගබඩාවක් නැති නිසා එය අපහසු කාරණාවකි.
ඌන ශක්ති ආහාර සැලසුම් ක්රමය ලංකාවට යෝග්ය නොවන්නේ එබැවිනි.
බර අඩු කර ගැනීම සඳහා සංස්කෘතික වශයෙන් යෝග්ය ආහාර පාලන ක්රමෝපායක් හඳුන්වා දීමේ අවශ්යතාව මතු වූයේ එම නිසා ය. ආදර්ශක ආහාර පතක් ලෙස ‘මගේ බත් පිඟාන’ නමින් අලුත් ආහාර පාලන ක්රමෝපායක් විශේෂඥ වෛද්ය රනිල් ජයවර්ධන හඳුන්වා දුන්නේ එහි ප්රතිඵලයක් වශයෙනි.
‘මගේ බත් පිඟාන’ ට අනුව පිඟානෙන් ¼ක් පිෂ්ටය සහිත ආහාරවලින් ද ¼ක් මස්, මාළු, බිත්තර, සෝයා මීට් වැනි ප්රෝටීන් ආහාරවලින් ද ½ක් පිටි රහිත එකිනෙකට වෙනස් එළවළු වර්ග තුනකින් ද සමන්විත විය යුතු ය.
මෙයින් තම පිඟානට බෙදා ගන්නා ආහාර ප්රමාණය පාලනය කෙරේ. බර වැඩිවීම පාලනය කෙරේ. සෞඛ්ය සම්පන්න ආහාර වේලක් හිමිවේ. සුළු ආහාර ප්රමාණයකින් පහසුවෙන් ශක්තිමත් බව ලැබේ.
“මේ ක්රමය සායනික පරීක්ෂණයකින් තහවුරු කර තිබෙන්නේ. මම පරීක්ෂණයට තෝරා ගත්තේ කොළඹ ජාතික රෝහලේ හෘදය රෝග ඒකකයේ රෝගීන් 120 දෙනකුව. එයින් 60 දෙනකුට ‘මගේ බත් පිඟාන’ ක්රමයට මාස 3 ක් කෑම දුන්නා. ඉතිරි 60 දෙනාට හෘද රෝග සායනයෙන් උපදෙස් දෙන ආකාරයට තෙල් අඩු ලුණු අඩු ආහාර ඔවුන් ගන්නා පිළිවෙළටම ගන්න කිව්වා. මාස තුනකට පසුව ඔවුන්ගේ බර මැනලා බැලුවාම ‘මගේ බත් පිඟාන’ට අනුව ආහාර ගත් අයගේ බර සැලකිය යුතු මට්ටමට අඩු වී තිබුණා. සිරුරේ බර වගේ ම ඉණ වටා ප්රමාණය, ශරීරයේ අඩංගු සීනි ප්රමාණය අඩු වුණා. මේ රෝගීන්ගේ කොලෙස්ටරෝල් මට්ටම අපි මැන බැලුවේ නැත්තේ ඔවුන් හෘද රෝගීන් නිසා කොහොමටත් ඔවුන්ගේ කොලෙස්ටරෝල් පාලනය වීමට සායනයෙන් ඖෂධ ලබාදෙන නිසයි. මේ අනුව ‘මගේ බත් පිඟාන’ සිරුරේ බර අඩු කර ගැනීමටත් බෝ නොවන රෝග අඩු කර ගැනීමටත් බලපාන ආකාරය අපි පරීක්ෂණයකින් ඔප්පු කළා” යනුවෙන් සායනික පෝෂණවේදී විශේෂඥ වෛද්ය සහ ජ්යෙෂ්ඨ කථිකාචාර්ය වෛද්ය රනිල් ජයවර්ධන පැහැදිලි කළේ ය.
‘මගේ බත් පිඟාන’ ක්රමය උපයෝගි කර ගත හැක්කේ බත්, නූඩ්ල්ස්, පැස්ටා හා මැකරෝනි වැනි ආහාරවලට පමණි. මෙය ඉඳිආප්ප, ආප්ප, රොටී, පිට්ටු වැනි ආහාර සඳහා යොදාගත නොහැක්කේ එම ආහාර සමඟ එළවළු ආහාරයට ගැනීමේ පුරුද්දක් අපට නැති නිසා ය.
එමෙන් ම එළවළු පිස ගැනීමේදී පොල්වලට වැඩි වතුර ප්රමාණයක් එකතු කර පොල් කිරි දියර ගතියෙන් සකස් කර ගැනීම වැදගත් ය. කොළ මැල්ලුම් පිළියෙල කර ගැනීමේදී ද තලා ගත් පොල් හෝ වරක් මිරිකා ගත් පොල් මැල්ලුමට එක්කර ගත යුතු ය. මාළු පිස ගැනීමේදී මිරිසට පිස ගැනීමෙන් හෝ ඇඹුල් තියල් ලෙස සකස් කර ගැනීමෙන් සෞඛ්ය සම්පන්න ලෙස ‘මගේ බත් පිඟාන’ ප්රයෝජනයට ගත හැකි ය.
‘මගේ බත් පිඟාන’ ආහාර පිළියෙල කරගන්නා ආකාරය පිළිබඳව විශේෂඥ වෛද්ය රනිල් ජයවර්ධන විසින් පොතක් පළ කර තිබේ.
‘මගේ බත් පිඟාන’ ට අනුව පිඟානෙන් ½ ක් ම පුරවා ගත යුත්තේ එළවළුවලිනි. එළවළුවල ඇති විශේෂ ගුණ සහ ලෙඩ රෝගවලින් වැළකී සිටීෙම් හැකියාව ගැන අප මඳක් අවධානය යොමු කළ යුතු වන්නේ එබැවිනි. එළවළු සහ පලතුරුවල ප්රතිඔක්සිකාරක ගුණය අඩංගු ය. මෙම ප්රතිඔක්සිකාරක ගුණය නිසා ශරීරයේ සෑම අවයවයකම මුක්ත ඛණ්ඩ ඉවත් වී, ඒවා නිරෝගී ලෙස ක්රියා කිරීමට පටන් ගනී. එම අවයව තමන්ට නියමිත කාර්යයන් නිසි පරිදි ඉටු කරයි.
මේ අනුව අග්න්යාශය නිරෝගීව ක්රියා කරමින් දියවැඩියාව පාලනය කිරීමට අවශ්ය ඉන්සියුලින් නිපදවයි. අක්මාව ප්රෝටීන සංශ්ලේෂණය, විෂහරණය, හෝමෝන සමතුලිත කිරීම වැනි එයට නියමිත වූ කාර්යයන් ඉටු කරයි.
ආහාර මාර්ග පද්ධතිය, මොළය, ප්රතිශක්තිකරණ පද්ධතිය, හෘදය වස්තුව ඇතුළු සියලුම ඉන්ද්රියයන් තම තමන්ගේ කාර්යයන් ක්රියාශීලීව සිදු කරයි. ඊට අමතරව ශරීරයේ විෂ වර්ග ඉවත් කිරීමේ හැකියාවක් ප්රතිඔක්සිකාරක ගුණය සතු ය.
ආහාර මාර්ගයේ දී සහ අක්මාව තුළදී විෂ වර්ග නිෂේධනය කෙරේ. ඊට හේතු වන්නේ අක්මාව, වකුගඩු සහ වසා පද්ධති වැනි අවයව ඉතා හොඳින් නිරෝගීව ක්රියා කිරීමයි.
මෙම ප්රතිඔක්සිකාරක ගුණයට අමතරව රෝග නිවාරණය කරන ස්වාභාවික රසායනික සංඝටක සිය ගණනක් එළවළුවල අඩංගු වී ඇත. උදාහරණයක් ලෙස මුරුංගාවල විටමින් ඒ, සී, පොටෑසියම්, මැග්නීසියම්, යකඩ, ඇමයිනෝ අම්ල වැනි පෝෂණ සංඝටක රාශියක් අඩංගු බැවින් මුරුංගා පිළිකා නාශක, පෝෂණ ගුණයෙන් අනූන එළවළුවක් වශයෙන් දැක්විය හැකි ය. එළවළු අපේ ආහාරයට වැඩිපුර එකතු කරගැනීම ඉතා වැදගත් වන්නේ එමනිසා ය.